Wa maʼ Dios beetik k-muʼyajeʼ, ¿máax túuniʼ? ¿Baʼaxten yaʼab máakoʼob táan u máanskoʼob wiʼijil yéetel óotsilil? ¿Baʼaxten táaj yaan baʼateltáambaloʼob, kʼojaʼaniloʼob yéetel nukuch loobiloʼob? Le Bibliaoʼ ku tsolik óoxpʼéel baʼax beetik u yantal muʼyajil:

1. U tsʼuʼutil máak, u kaxtik chéen u yutsil yéetel u pʼektik u maasil. «Yéetel in kʼaj óol le páajtalil yaan tiʼ wíinik utiaʼal u beet loob tiʼ u yéet xibil» (Eclesiastés 8:9). Bejlaʼeʼ yaʼab máakeʼ ku muʼyaj tumen ku peʼechʼel yéetel ku loobiltaʼal tumen u yéet máakil.

2. U jáan úuchul wa baʼax. Uláakʼoʼobeʼ ku muʼyajoʼob tumen ku jáan úuchul wa baʼax (Eclesiastés 9:11). Máakeʼ ku muʼyaj tumen yaan kʼiineʼ ku jáan úuchul wa baʼax tuʼux yaan, wa yoʼolal wa baʼax maʼ maʼalob ku beetik u maasiliʼ.

3. Kʼaasilbaʼal gobernartik le yóokʼol kaabaʼ. Le Bibliaoʼ juntaatsʼ u yaʼalik máax jach tu jaajil beetik u muʼyaj máak: «U túulisil yóokʼol kaabeʼ tiʼ yaan yáanal u páajtalil le j-Kʼasaʼanoʼ» (1 Juan 5:19). Satanaseʼ letiʼe «j-Kʼasaʼanoʼ». Tu káajbaleʼ juntúul utsul ángel, chéen baʼaleʼ ka máan kʼiineʼ kʼaschaji tumen «maʼ pʼáat ichil le jaajoʼ» (Juan 8:44). Uláakʼ angeloʼob xaneʼ tu tsʼáajubaʼob tu tséel Satanás utiaʼal u béeykuntkoʼob u kʼaakʼas tsʼíibolaloʼob, letiʼobeʼ kʼaj óoltaʼaboʼob bey demonioʼobeʼ (Génesis 6:1-5). Desde le ka tu tsʼáajuba Satanás yéetel u demonioʼob tu contra Dioseʼ káaj u kʼaskúuntikoʼob máak. Bejlaʼeʼ maas chíikaʼan u yilaʼal bix u meyaj. Le Bibliaoʼ ku yaʼalikeʼ le Kʼaasilbaʼaloʼ jach pʼujaʼan yéetel «táan u tusik tuláakal yóokʼol kaab», le oʼolal ku yaʼalik xan «óotsil tiʼ le Luʼumoʼ bey xan tiʼ le kʼáaʼnáaboʼ» (Apocalipsis [Revelación] 12:9, 12). Satanaseʼ minaʼan u xuul u kʼasaʼanil yéetel ku kiʼimaktal u yóol ken u yil bix k-muʼyaj. Jeʼex k-ilkoʼ letiʼ beetik k-muʼyaj, maʼ Diosiʼ.

TUKULT LELAʼ: Chéen juntúul máax kʼasaʼan yéetel minaʼan u yaabilaj jeʼel u beetik k-muʼyajeʼ. Baʼaleʼ le Bibliaoʼ ku kaʼansikeʼ «Dioseʼ yaabilaj» (1 Juan 4:8). Lelaʼ ku yeʼesikeʼ junpuliʼ maʼatech u beetik k-muʼyaj mix tech u beetik baʼax kʼaas (Job 34:10).

Maʼ xaaneʼ techeʼ ka kʼáatik: ¿Baʼax kʼiin kéen xuʼulsaʼak tiʼ Satanás? Jeʼex tsʼoʼok k-kanikoʼ Dioseʼ u pʼekmaj le kʼasaʼaniloʼ yéetel ku yaatal u yóol kéen u yil bix k-muʼyaj. Tsʼoʼoleʼ le Bibliaoʼ ku yaʼalik ka k-tsikbalt tiʼ Dios tuláakal baʼax chiʼichnakkúuntikoʼon (1 Pedro 5:7). Dioseʼ jach yaan u páajtalil yéetel jach u yaabiltmoʼon le oʼolal yaan u xuʼulsik le muʼyajiloʼ, lelaʼ letiʼe baʼax ken k-kan teʼ xook ku segueroʼ. *