Koʼox ilik baʼax úuch tiʼ Sally, * juntúul koʼolel kajaʼan Estados Unidos yéetel pʼáat óoliʼ mix baʼal yaantiʼ le ka tsʼoʼok u máan junpʼéel chak ikʼaloʼ, letiʼeʼ ku yaʼalik: «Jach náakʼten le baʼax úuchtenoʼ. Máan yaʼab kʼiinoʼob bey minaʼan in muukʼeʼ».

Koʼox ilik baʼax xan úuch tiʼ Janice, juntúul koʼolel kajaʼan Australia yéetel jach muʼyajnaj ka kíim kaʼatúul u paalal, letiʼeʼ ku yaʼalik: «Tin wuʼuyaj bey nukaʼaj xíikil in puksiʼikʼaleʼ, tin wuʼuyaj bey tsʼoʼokik tenoʼ. Hasta kʼuchen in waʼal tiʼ Dios ‹maas maʼalob ka kíimken›».

Beoraaʼ koʼox ilik bix tu yuʼubiluba Daniel le ka tuʼus tumen u yatanoʼ. Letiʼeʼ ku yaʼalik: «Le ka tu yaʼalaj in watan tsʼoʼok u tusken yéetel yaanal máakeʼ, tin wuʼuyaj bey póotsʼlomtaʼab in puksiʼikʼaleʼ. Xáanchaj bey in wuʼuyikinbaoʼ. Cada kéen kʼaʼajakten le baʼax úuchoʼ ku yaatal in puksiʼikʼal».

Le revistaaʼ yaan u yáantkech a wil bix jeʼel a aktáantik jujunpʼéel baʼaloʼob jeʼel u beetkoʼob a muʼyajeʼ, jeʼex:

• U yantal junpʼéel nojoch loob

• U kíimil máax a yaabiltmaj

• A tuʼusul tumen a núup

• U tsaʼayaltech junpʼéel yaayaj kʼojaʼanil

• A wuʼuyik maʼ taak u seguer a kuxtaliʼ

Táanileʼ yaan k-ilik baʼax jeʼel u beetik máak kéen úuchuk junpʼéel nojoch loobileʼ.