¿Baʼaxten antes tiʼ u kíimileʼ Jesúseʼ tu chʼaʼchiʼitaj le baʼax ku yaʼalik Salmo 22:1?

Mateo 27:46, ku yaʼalikeʼ antes tiʼ u kíimil Jesúseʼ, letiʼeʼ tu yaʼalaj: «In Dios, in Dios, ¿baʼaxten tsʼoʼok a pʼatken?». Le ka tu yaʼalaj le tʼaanoʼobaʼ Jesúseʼ tu béeykuntaj le profecía ku chíikpajal tiʼ Salmo 22:1 (Mar. 15:34). Le tʼaanoʼobaʼ maʼ tu yaʼalaj Jesús tumen tsʼoʼok u pʼáatal minaʼan u fejiʼ. Letiʼeʼ ku naʼatik kaʼach baʼaxten kʼaʼabéet u kíimil yéetel taak kaʼach u beetik baʼax u kʼáat u Taata (Mat. 16:21; 20:28). U yojel xaneʼ yaan u kʼaʼabéettal u pʼaʼatal tumen u Taata jach teʼ súutuk nukaʼaj kíimiloʼ (Job 1:10). Jéeobaeʼ tu chaʼaj u yeʼesik Jesús jeʼel u chúukpajal u yóol u meyajt Dios kex jeʼel baʼaxak ka beetaʼaktiʼ tak ken kíimkeʼ (Mar. 14:35, 36).

¿Baʼaxten túun tu yaʼalaj Jesús le tʼaanoʼobaʼ? U jaajileʼ maʼ k-ojel baʼax oʼolaliʼ, chéen baʼaleʼ koʼoneʼex ilik jujunpʼéel baʼax oʼolal wal tu yaʼaleʼ. *

Jesúseʼ maʼ xaaneʼ táan u yeʼesikeʼ Jéeobaeʼ maʼ ken u yoksuba utiaʼal maʼ u kíimsaʼal. Jesúseʼ unaj kaʼach u kʼubik u kuxtal bey junpʼéel boʼol sin ke u yáantaʼal tumen u Taataeʼ. Letiʼeʼ juntúul máak kaʼachi yéetel unaj u kíimil «utiaʼal u yutsil tuláakal máak» (Heb. 2:9).

Maʼ xaaneʼ Jesúseʼ tu chʼaʼchiʼitaj junxóotʼ tiʼ le Salmo 22 utiaʼal u kʼaʼajsaʼal tuláakal le salmo jeʼeloʼ. Teʼ kʼiinoʼob jeʼeloʼ le judíoʼoboʼ u suukileʼ  ku kankoʼob de memoriail le salmosoʼ. Le oʼolaleʼ wa ku kʼaʼajsaʼaltiʼob junxóotʼ tiʼ le salmooʼ letiʼobeʼ jeʼel u kʼaʼajsikoʼob tuláakal le baʼax ku yaʼalikoʼ. Wa letiʼe baʼax u tukultmaj kaʼach Jesúsoʼ, u jaajileʼ táan kaʼach u yáantik u discípuloʼob u kʼaʼajsoʼob le profecíaʼob ku tʼaanoʼob tiʼ u kíimiloʼ (Sal. 22:7, 8, 15, 16, 18, 24). Tsʼoʼoleʼ tu tsʼoʼokbal le salmooʼ ku yaʼalikeʼ Jéeobaeʼ yaan u beetik u reyil yéetel yaan u gobernartik tuláakal le kaajoʼoboʼ (Sal. 22:27-31).

Maʼ xaaneʼ Jesúseʼ táan u yeʼesik mix baʼal kʼaas u beetmaj. Kʼaʼajaktoʼoneʼ utiaʼal u kíimsaʼaleʼ aʼalaʼabeʼ táan bin u tʼaan tu contra Dios (Mat. 26:65, 66). Tsʼoʼoleʼ kex ku yaʼalik le Ley maʼ unaj u beetaʼal beyoʼ, letiʼeʼ de noche ka juzgartaʼabi (Mat. 26:59; Mar. 14:56-59). Le oʼolaleʼ úuchik u chʼaʼchiʼitik le Salmo 22, maʼ xaaneʼ táan u yeʼesikeʼ maʼ jaaj wa táan u kíimsaʼal tumen yaan baʼax kʼaas u beetmiʼ.

Maʼ xaaneʼ Jesúseʼ táan u kʼaʼajsikeʼ kex táan kaʼach u muʼyaj Davideʼ maʼ u kʼáat u yaʼal wa tsʼoʼok u xuʼulul u kʼaʼamal tumen Jéeobaiʼ. Davideʼ láayliʼ yaan kaʼach u fejeʼ, tumen le ka tsʼoʼok u yaʼalik le tʼaanoʼobaʼ letiʼeʼ tu yaʼalaj xaneʼ u yojel Dioseʼ yaan u salvartik le máaxoʼob meyajtikoʼ yéetel yaan u seguer u bendecirkoʼob (Sal. 22:23, 24, 27). Le oʼolal xaneʼ Jesús, u paal Davideʼ, kex táan kaʼach u muʼyajeʼ maʼ u kʼáat u yaʼal wa tsʼoʼok u xuʼulul u kʼaʼamal tumen Diosiʼ (Mat. 21:9).

Maʼ xaaneʼ Jesúseʼ táan kaʼach u yeʼesik yaachajaʼan u yóol u xuʼulul u kanáantaʼal tumen u Taata. Tumen Adán yéetel Eva maʼ tu yuʼuboʼob tʼaaneʼ kʼaʼabéetchaj u muʼyaj yéetel u kíimil Jesús, kex minaʼan kaʼach ichil le baʼaxoʼob u tukultmaj Jéeobaoʼ. Jesúseʼ mix baʼal kʼaas kaʼach u beetmaj, chéen baʼaleʼ kʼaʼabéetchaj u muʼyaj yéetel u kíimil utiaʼal u yeʼesik chéen táan u tuus Satanás yéetel utiaʼal u tsʼáaik u kuxtal bey junpʼéel boʼol utiaʼal u béeytal u kaʼa antal le kuxtal tu perdertaj Adánoʼ (Mar. 8:31; 1 Ped. 2:21-24). Baʼaleʼ tuláakal le jeʼelaʼ chéen jeʼel u béeytal kaʼach wa ku xuʼulul u kanáantaʼal tumen Jéeoba kex chéen junsúutuk utiaʼal u yeʼesik chúukaʼan u yóoleʼ.

Maʼ xaaneʼ Jesúseʼ táan kaʼach u yáantik u discípuloʼob u naʼatoʼob baʼaxten chʼuykíintaʼab tiʼ junpʼéel cheʼ. * Jesúseʼ u yojel le u kíimil tiʼ junpʼéel cheʼoʼ yaan u beetik u tʼóochpajal yaʼab máakoʼob (1 Cor. 1:23). Chéen baʼaleʼ u discípuloʼobeʼ unaj u naʼatkoʼob kaʼach baʼax oʼolal táan u kíimil beyoʼ (Gál. 3:13, 14). Le discípuloʼob túunoʼ maʼ ken u yiloʼob jeʼex juntúul kʼasaʼan máak táan u kíimil tiʼ junpʼéel cheʼeʼ, baʼaxeʼ bey letiʼe máax salvarkoʼoboʼ.

Jeʼel baʼaxak oʼolal tu chʼaʼchiʼitaj Jesús le Salmo 22, letiʼeʼ u yojel kʼaʼabéet u kíimil tiʼ junpʼéel cheʼ utiaʼal u béeykuntik baʼax u kʼáat Jéeoba. Le oʼolal le jach taʼaytak u kíimiloʼ tu yaʼalaj: «¡Tsʼoʼok u béeychajal tuláakal!» (Juan 19:30; Luc. 22:37). Jach beyoʼ Jéeobaeʼ xuʼul u kanáantik Jesús utiaʼal u béeytal tuláakal le baʼax taal u beet way Luʼumeʼ, yéetel utiaʼal u béeytal tuláakal le baʼax tsʼíibtaʼan tu yoʼolal Jesús «tu Ley Moisés, tu tsʼíib le Profetaʼoboʼ bey xan teʼ Salmosoʼ» (Luc. 24:44).