LE ANSIEDADOʼ junpʼéel baʼal jeʼel u beetik u jach lúubul u yóol máakeʼ (Pro. 12:25). ¿Yaan wa kʼiin tsʼoʼok a wuʼuyikaba beyoʼ? ¿Yaan wa kʼiin tsʼoʼok a tuklik maʼ tu páajtal a beetik mix baʼal maas? U jaajileʼ maʼ chéen tiʼ teech ku yúuchul beyoʼ. Yaʼab tiʼ toʼoneʼ táan u kanáantik wa máax, tsʼoʼok u kíimil juntúul máax u yaabiltmaj, tsʼoʼok u yúuchul junpʼéel nojoch loobil teʼ tuʼux kajaʼanoʼ wa tu yoʼolal uláakʼ wa baʼaxeʼ ku yuʼubik kaʼanaʼan yéetel mix taak u tuukul tiʼ mix baʼaliʼ. ¿Baʼax túun jeʼel u yáantkoʼon k-controlart le ansiedadoʼ? a

U ejemplo rey Davideʼ jeʼel u yáantkoʼon k-controlart le ansiedadoʼ. Letiʼeʼ yaʼab baʼaloʼob tu aktáantaj, juntéenjeakileʼ hasta óolak kíimsaʼak (1 Sam. 17:34, 35; 18:10, 11). ¿Bix tu controlartil David le ansiedadoʼ? ¿Bix jeʼel u páajtal k-seguertik u ejemploeʼ?

Le táan kaʼach u púutsʼul David tiʼ rey Saúl tumen taak u kíimsaʼaleʼ yaʼab baʼaloʼob tu aktáantaj. Juntéenjeakeʼ letiʼ yéetel le máakoʼob láakʼintikoʼ le ka suunajoʼob tu yotochoʼobeʼ tu yiloʼobeʼ tsʼoʼok u yoklaʼal tuláakal baʼax yaantiʼob, tóokaʼan u yotochoʼob yéetel bisaʼan u yatanoʼob yéetel u paalaloʼob. ¿Baʼax túun tu beetaj David? Le Bibliaoʼ ku yaʼalik: «David yéetel le máakoʼob láakʼintikoʼ, joʼopʼ túun u yawat okʼoloʼob, okʼolnajoʼob tak ka pʼáat minaʼan u muukʼil utiaʼal u seguer u yokʼoloʼob». Tsʼoʼoleʼ le máakoʼob yanoʼob tu yéeteloʼ joʼopʼ u yaʼalikoʼob yaan «u muruxtuntikoʼob» (1 Sam. 30:1-6). Jeʼex k-ilkoʼ óoxpʼéel baʼal táan kaʼach u yúuchul tiʼ David. Yáaxeʼ bisaʼab u familia, u kaʼapʼéeleʼ taak u kíimsaʼal tumen le máakoʼob yanoʼob tu yéeteloʼ yéetel u yóoxpʼéeleʼ táan u chʼaʼpachtaʼal tumen rey Saúl. ¡Jach chiʼichnakchaj wal Davideʼ!

¿Baʼax túun tu beetaj? Letiʼeʼ tu séebaʼanileʼ «tu chʼaʼaj u muukʼ tiʼ Jéeoba u Dios». ¿Bix úuchik u beetik le jeʼeloʼ? Davideʼ suuk kaʼach u orar tiʼ Jéeoba utiaʼal u kʼáatik ka áantaʼak, yéetel suuk xan kaʼach u tuukul tiʼ baʼaxoʼob tsʼoʼok u beetik Jéeoba tu yoʼolal (1 Sam. 17:37; Sal. 18:2, 6). Davideʼ tu tsʼáaj cuenta xaneʼ kʼaʼabéet u yojéeltik baʼax u kʼáat Jéeoba, le oʼolaleʼ tu kʼáatajtiʼ baʼax unaj u beetik. Le ka núukaʼabtiʼeʼ tu séebaʼanil tu beetaj le baʼax aʼalaʼabtiʼoʼ. Le oʼolaleʼ bendecirtaʼab David yéetel le máaxoʼob láakʼintikoʼ ka béeychaj u salvartik u familiaʼob yéetel u kaʼa chʼaʼikoʼob le baʼaxoʼob oklaʼabtiʼoboʼ (1 Sam. 30:7-9, 18, 19). ¿Ta wilaj wa le óoxpʼéel baʼal tu beetaj Davidoʼ? Yáaxeʼ orarnaj tiʼ Jéeoba utiaʼal u kʼáatik áantaj, u kaʼapʼéeleʼ tuukulnaj tiʼ baʼax tsʼoʼok u yáax beetaʼal tu yoʼolal yéetel u yóoxpʼéeleʼ tu séebaʼanil tu beetaj le baʼax aʼalaʼabtiʼ tumen Jéeobaoʼ. ¿Bix jeʼel u páajtal k-seguertik u ejemplo Davideʼ? Koʼoneʼex ilik óoxpʼéel bix jeʼel u páajtal k-beetkeʼ.

1. Unaj k-orar. Jeʼel baʼaxak kʼiin ka u tsʼáatoʼon ansiedadeʼ jeʼel u páajtal k-orar tiʼ Jéeoba utiaʼal u yáantkoʼon k-il baʼax jeʼel u páajtal k-beetkeʼ. Wa ku xáantal táan k-orar tiʼ letiʼ yéetel k-aʼaliktiʼ baʼax chiʼichnakkúuntikoʼoneʼ jeʼel u yantaltoʼon jeetsʼelileʼ. Chéen baʼaleʼ wa maʼ tu páajtal k-beetik beyoʼ jeʼel xan u páajtal k-jáan orar ichil k-tuukuleʼ. Cada juntéen ken k-kʼáat áantaj tiʼ Jéeobaeʼ k-eʼesik k-confiar tiʼ letiʼ jeʼex tu beetil Davideʼ. Letiʼeʼ tu yaʼalaj: «Jéeobaeʼ bey junpʼéel nuxiʼ tuunich tuʼux kin taʼakikinbaeʼ, junpʼéel lugar tuʼux kin kanáantaʼal, letiʼ salvarken. In Dioseʼ bey junpʼéel nuxiʼ tuunich tuʼux kin balikinbaeʼ» (Sal.  18:2). ¿Jach wa tu jaajil jeʼel u yáantik máak le oraciónoʼ? Juntúul precursora ku kʼaabaʼtik Kahliaeʼ ku yaʼalik: «Le kéen tsʼoʼokok in orareʼ kin wuʼuyik yaanten jeetsʼelil. Le oraciónoʼ ku yáantken utiaʼal in tuukul jeʼex Jéeobaeʼ bey xan utiaʼal in maas confiar tiʼ letiʼ». Jeʼex k-ilkoʼ le oraciónoʼ junpʼéel jatsʼuts regalo ku taal tiʼ Jéeoba jeʼel u yáantkoʼon k-controlart le ansiedadoʼ.

2. Unaj k-tuukul. ¿Kʼajaʼan wa tech le súutukiloʼob ta wuʼuyaj chéen yéetel u yáantaj Jéeoba béeychaj a aktáantik wa baʼaxoʼ? Le kéen tuukulnakoʼon tiʼ bix tu yáantil Jéeoba le máaxoʼob meyajt úuchjeakil bey xan tiʼ baʼax tsʼoʼok u beetik t-oʼolaloʼ k-maas confiar tiʼ letiʼ yéetel k-uʼuyikba maas tranquiloil (Sal. 18:17-19). Juntúul anciano ku kʼaabaʼtik Joshuaeʼ ku yaʼalik: «Teneʼ in beetmaj junpʼéel lista tiʼ le oraciónoʼob tsʼoʼok u núukikten Jéeobaoʼ. Beyoʼ ku páajtal u kʼaʼajalten tiʼ baʼax súutukil tin kʼáatajtiʼ junpʼéel baʼal yéetel bix úuchik u núukikten». Jeʼex k-ilkoʼ le kéen tuukulnakoʼon tiʼ le bukaʼaj baʼaloʼob tsʼoʼok u beetik Jéeoba t-oʼolaloʼ jach ku yáantkoʼon utiaʼal u béeytal k-controlartik le ansiedadoʼ.

3. Unaj k-beetik. Antes k-chʼaʼtuklik junpʼéel baʼaleʼ maʼalob ka k-xakʼalxokt le Bibliaoʼ tumen jeʼel u yáantkoʼon k-il baʼax unaj k-beetkeʼ (Sal. 19:7, 11). Yaʼab máakoʼobeʼ tsʼoʼok u yilkoʼobeʼ wa ku xakʼalxoktikoʼob junpʼéel tekstoeʼ ku maas naʼatkoʼob bix jeʼel u páajtal u tsʼáaikoʼob ichil u kuxtaloʼobeʼ. Juntúul anciano ku kʼaabaʼtik Jarrodeʼ ku yaʼalik: «Le in xakʼalxookoʼ ku yáantken in maas naʼat le tekstoʼoboʼ, in naʼat baʼax uts tu tʼaan Jéeoba, u kʼuchul tin puksiʼikʼal le baʼax ku yaʼalikoʼ yéetel in beetik le baʼax uts tu tʼaanoʼ». Jeʼex k-ilkoʼ wa k-chaʼik u nuʼuktikoʼon Jéeoba yéetel le Bibliaoʼ, yéetel k-ilik k-beetik le baʼax ku yaʼalikoʼ maas jeʼel u béeytal k-controlartik le ansiedadoʼ.

Davideʼ u yojel kaʼacheʼ utiaʼal u páajtal u controlartik le ansiedadoʼ kʼaʼabéet u yáantaʼal tumen Jéeoba. Tumen jach kiʼimak u yóol ikil u yáantaʼaleʼ tu yaʼalaj: «Yéetel u poder Dioseʼ jeʼel u páajtal in naʼakal tiʼ junpʼéel kaʼanal pakʼeʼ». Tsʼoʼoleʼ tu yaʼalaj xan: «U jaajil Dioseʼ letiʼ tsʼáaik in muukʼ» (Sal. 18:29, 32). Maʼ xaaneʼ yaan kʼiineʼ jeʼel k-tuklikeʼ le problemas yaantoʼonoʼ beyoʼob kaʼanal pakʼoʼob maʼ tu páajtal k-naʼakal tu yóokʼoloʼobeʼ, chéen baʼaleʼ yéetel u yáantaj Jéeobaeʼ jeʼel u béeytaleʼ. Wa k-orar utiaʼal k-kʼáatiktiʼ ka u yáantoʼon, k-tuukul tiʼ baʼax tsʼoʼok u beetik t-oʼolal yéetel k-beetik baʼax uts tu tʼaaneʼ letiʼeʼ yaan u tsʼáaiktoʼon u muukʼil yéetel u naʼatil utiaʼal k-controlartik le ansiedadoʼ.