1. ¿Baʼaxten Jéeobaeʼ tu tsʼáaj kuxtal tiʼ u maasil?

KEX Jéeoba chéen tu juunal yaan kaʼacheʼ maʼ jelaʼan u yuʼubikubaiʼ. Maʼ tu yuʼubik wa kʼaʼabéet u yantal máax láakʼintik utiaʼal u kiʼimaktal u yóoliʼ. Chéen baʼaleʼ yoʼolal u yaabilajeʼ tu tsʼáaj kuxtal tiʼ u maasil (Sal. 36:9; 1 Juan 4:19).

2. Le ka tu beetaj Jéeoba u maasil baʼaloʼobeʼ, ¿bix tu yuʼubiluba Jesús yéetel le ángeloʼoboʼ?

² Yáaxeʼ Jéeobaeʼ tu beetaj Jesús. Tsʼoʼoleʼ Jesúseʼ tu yáantaj u Taata utiaʼal ka u beet «tuláakal le uláakʼ baʼaloʼob[oʼ]», ichiloʼobeʼ tiaʼan tak le ángeloʼoboʼ (Col. 1:16). Jesúseʼ jach kiʼimakchaj u yóol úuchik u múul meyaj yéetel u Taata (Pro. 8:30). Le ángeloʼob xanoʼ jach kiʼimakchaj u yóoloʼob le ka tu yiloʼob u beetaʼal le kaʼan yéetel le Luʼum tumen Jéeoba yéetel Jesúsoʼ. Le Bibliaoʼ ku yaʼalikeʼ le ángeloʼoboʼ «joʼopʼ u kʼaʼam alabarkoʼob Dios». Letiʼobeʼ maʼ xuʼul u alabarkoʼob Dios yoʼolal le baʼaxoʼob tu beetoʼ, maases le ka tu yiloʼob u beetik wíinikoʼ (Job 38:7; Pro. 8:31). Tuláakal le baʼaxoʼob tu beetaj Jéeobaoʼ ku yeʼesik bukaʼaj u yaabilaj yéetel u naʼat (Sal. 104:24; Rom. 1:20).

3. Jeʼex u yaʼalik 1 Corintios 15:21, 22, ¿baʼax ku béeytal úuchik u kʼubik u kuxtal Jesús?

³ Jéeobaeʼ u kʼáat kaʼach ka kuxlak le máakoʼob teʼ jatsʼuts Luʼum tu beetajtiʼoboʼ. Chéen baʼaleʼ Adán yéetel Evaeʼ tu tsʼáajubaʼob tu contra Jéeoba ka kʼebanchajoʼob, le oʼolal tu máansoʼob  le kʼeban yéetel le kíimil tiʼ tuláakal máakoʼ (Rom. 5:12). Le ka úuch lelaʼ Jéeobaeʼ tu séebaʼanil tu yaʼalaj baʼax ken u beet utiaʼal u salvartik wíinik (Gén. 3:15). Tu yaʼalaj yaan u kʼubik u kuxtal u Hijo utiaʼal u salvartik u paalal Adán tiʼ le kʼeban yéetel le kíimiloʼ. Lelaʼ tu tsʼáaj oportunidad tiʼ wíinik utiaʼal u yéeyik wa u kʼáat u adorart Dios, beyoʼ ka yanak kuxtal minaʼan u xuul tiʼ (Juan 3:16; Rom. 6:23; xok 1 Corintios 15:21, 22).

4. ¿Baʼax ken k-kan teʼ xookaʼ?

⁴ Dioseʼ u prometermaj u kaʼa kuxkíintik le máaxoʼob tsʼoʼok u kíimloʼoboʼ. Chéen baʼaleʼ, ¿bix ken u beetil? ¿Yaan wa u béeytal a kʼaj óoltik a láakʼtsiloʼob yéetel a amigoʼob le kéen kaʼa kuxkíintaʼakoʼoboʼ? ¿Baʼaxten jach yaan u yantal kiʼimak óolal teʼ kʼiinoʼob jeʼeloʼ? Le baʼax kéen u beet Diosaʼ, ¿bix u yeʼesik u yaabilaj, u naʼat yéetel u paciencia? Koʼoneʼex ilik u núukil le kʼáatchiʼobaʼ.

5. Maʼ xaaneʼ, ¿baʼaxten maʼ junpuul kun kaʼa kuxkíintbil le kimenoʼoboʼ?

⁵ Jéeobaeʼ yaan u yaʼalik tiʼ Jesús ka u kaʼa kuxkíint u millonesil máakoʼob. Chéen baʼaleʼ maʼ xaaneʼ maʼ junpuul kun láaj kuxkíintbiloʼobiʼ. ¿Baʼaxten k-aʼalik leloʼ? Tumen wa ka láaj líiʼsaʼakoʼobeʼ jach yaan u yaʼabtal máakoʼob yéetel maʼ kun páajtal u atendertaʼaloʼob tubeel. Tsʼoʼoleʼ kʼaʼajaktoʼoneʼ Jéeobaeʼ uts tu tʼaan ka beetaʼak tuláakal baʼal tu tsoolol. Letiʼeʼ u yojel kʼaʼabéet u beetaʼal beyoʼ utiaʼal maʼ u yantal problemas (1 Cor. 14:33). Jéeobaeʼ tu yeʼesaj jach yaan u naʼat yéetel paciencia le ka tu beetaj le Luʼumaʼ, tumen jujunpʼíitil úuchik u beetik. Le kéen gobernarnak Jesús teʼ Mil Añosoʼ yaan xan u yeʼesik naʼat yéetel paciencia. Le jatsʼuts modosaʼ yaan u yeʼesik le kéen u nuʼukt le máaxoʼob maʼ kíimoʼob teʼ Armagedónoʼ utiaʼal ka u preparartoʼob tuláakal le baʼax  kun kʼaʼabéettal tiʼ le máaxoʼob kun kaʼa kuxkíintbiloʼoboʼ.

6. Jeʼex u yaʼalik Hechos 24:15, ¿máakalmáak le grupo máakoʼob maas nojoch kun kaʼa kuxkíintbiloʼ?

⁶ Le máaxoʼob maʼ kíimoʼob teʼ Armagedónoʼ yaan uláakʼ jatsʼuts meyaj ken u beetoʼob: yaan u kaʼanskoʼob le máaxoʼob kun kaʼa kuxkíintbiloʼoboʼ. Le máaxoʼob kun líiʼsbiloʼoboʼ yaan u kaʼansaʼaltiʼob yoʼolal le Reinooʼ yéetel bix u kʼáat Dios ka adorartaʼak. ¿Baʼaxten kʼaʼabéet u beetaʼal le meyajaʼ? Tumen u maas yaʼabil le máaxoʼob kun kaʼa kuxkíintbiloʼoboʼ tiaʼanoʼob ichil le grupo máakoʼob ku yaʼalik le Biblia «kʼasaʼanoʼob[oʼ]» (xok Hechos 24:15). Le máakoʼobaʼ jach yaʼab baʼaxoʼob kun kʼaʼabéettal u kʼexik ichil u kuxtaloʼob utiaʼal u kʼamkoʼob u yutsil le u kuxtal Jesús tu kʼuboʼ. Jach táaj yaʼab meyaj kun beetbil utiaʼal u kaʼansaʼal le u millonesil máakoʼobaʼ. ¿Yaan wa u tsʼaʼabal xook tiʼob de a jujuntúulil jeʼex u beetaʼal teʼ kʼiinoʼobaʼ? ¿Yaan wa u yaʼalaʼaltiʼob tiʼ baʼax múuchʼulil kun binoʼob utiaʼal ka u kanoʼob bix unaj u kaʼanskoʼob le uláakʼ máaxoʼob kun kaʼa kuxkíintbiloʼoboʼ? U jaajileʼ tak tu yorail ken k-il bix kun beetbil. Chéen baʼax k-ojleʼ le kéen tsʼoʼokok le Mil Añosoʼ «le luʼumaʼ yaan u chuʼupul yéetel le naʼat ku taal tiʼ Jéeobaoʼ» (Isa. 11:9). ¡Jach túun yaʼab meyaj kun antal teʼ Mil Añosoʼ!

7. ¿Baʼaxten yaan u yeʼeskoʼob paciencia le máaxoʼob kun kaʼansik le kun kaʼa kuxkíintbiloʼoboʼ?

⁷ Teʼ Mil Añosoʼ le máaxoʼob yanoʼob ichil u kaajal Jéeobaoʼ yaan xan u kʼaʼabéettal u beetkoʼob kʼeexoʼob ichil u kuxtaloʼob. Le oʼolaleʼ le kéen u yáantoʼob u kʼex u kuxtal le máaxoʼob kun kaʼa kuxkíintbiloʼoboʼ yaan u beetkoʼob yéetel paciencia tumen tak letiʼob anchaj u beetkoʼob kʼeexoʼob (1 Ped. 3:8). Le máaxoʼob kun kaʼa kuxkíintbiloʼoboʼ yaan u taaktal xan u adorarkoʼob Jéeoba kéen u yiloʼob le máaxoʼob kaʼanskoʼoboʼ humildeʼob yéetel táan xan u tsʼáaik u yóoloʼob u kʼex u kuxtaloʼob (Fili. 2:12).

8. ¿Baʼax eʼesik yaan u béeytal k-kʼaj óoltik le máaxoʼob kun kaʼa kuxkíintbiloʼoboʼ?

⁸ Yaʼab baʼax eʼesik yaan u béeytal k-kʼaj óoltik k-láakʼtsiloʼob yéetel k-amigoʼob le kéen kaʼa kuxkíintaʼakoʼoboʼ. Koʼox ilik baʼax eʼesik de ke beyoʼ. Le máaxoʼob ku yaʼalik le Biblia kaʼa kuxkíintaʼaboʼoboʼ, le ka líiʼsaʼaboʼobeʼ tsʼaʼabtiʼob le mismo wíinkliloʼ, tsʼoʼoleʼ le bix u tʼaanoʼob yéetel le bix u tuukuloʼoboʼ maʼ kʼexpajiʼ. Jesúseʼ tu yaʼalaj xaneʼ le máax kimenoʼ bey táan u weenleʼ yéetel le u kaʼa kuxkíintaʼaloʼ bey ka ajsaʼakeʼ (Mat. 9:18, 24; Juan 11:11-13). Kéen ajak juntúul máakeʼ béeyliʼ jeʼex le ka bin weenloʼ, maʼ kʼexpaj u wíinkliliʼ mix u voziʼ yéetel ku béeytal u kʼaʼajsik le baʼaxoʼob uchaʼantiʼoʼ. Bey úuchik tiʼ Lázarooʼ. Le ka líiʼsaʼab tumen Jesúsoʼ tsʼoʼok tak u káajal u kʼastal u wíinklil tumen tsʼoʼok cuatro días kíimik. Kex beyoʼ béeychaj u kʼaj óoltaʼal tumen u kiikoʼob yéetel letiʼ xaneʼ maʼ tuʼubtiʼ máaxoʼobiʼ (Juan 11:38-44; 12:1, 2).

9. ¿Baʼaxten le máaxoʼob kun líiʼsbiloʼoboʼ láayliʼ yaan kʼeban tu wíinkliloʼobeʼ?

⁹ Jéeobaeʼ u prometermeʼ yáanal u gobierno Cristoeʼ mix máak ken u yaʼal wa ‹kʼojaʼan› (Isa. 33:24; Rom. 6:7). Lelaʼ ku yeʼesikeʼ le kéen kaʼa kuxkíintaʼak máakeʼ chúukaʼan u wíinklil yéetel toj u yóol. Chéen baʼaleʼ leloʼ maʼ u kʼáat u yaʼal wa tsʼoʼok u pʼáatal minaʼan kʼeban tu wíinkliloʼobiʼ. Wa ka líiʼsaʼakoʼob yéetel junpʼéel wíinklil minaʼan kʼeban tiʼeʼ maʼ tun kʼaj óoltbiloʼob. Kʼaʼajaktoʼoneʼ teʼ Mil Añosoʼ maʼ xaaneʼ jujunpʼíitil kun luʼsbil le kʼeban yaan tu wíinklil máakoʼ. Kéen tsʼoʼokok túun le Mil Añosoʼ Jesúseʼ yaan u sutik le Reino tiʼ u Taataoʼ. Kéen úuchuk lelaʼ le gobiernoaʼ tsʼokaʼaniliʼ u láaj béeykuntik le baʼax u tukultmaj Diosoʼ, ichileʼ tiaʼan  le u luʼsaʼal le kʼeban tu wíinklil máakoʼ (1 Cor. 15:25-28; Apo. 20:1-3).

10. ¿Baʼax ken k-beet kéen kaʼa kuxkíintaʼak le máaxoʼob k-yaabiltmoʼoboʼ?

¹⁰ Máans ta tuukul baʼax ken a beet le kéen a wil tsʼoʼok u kaʼa kuxkíintaʼal a láakʼtsiloʼob yéetel a amigoʼob. Maʼ xaaneʼ tumen jach kiʼimak a wóoleʼ yaan u túupʼul a wokʼol. Yaan máaxoʼobeʼ hasta yaan u kʼaayoʼob utiaʼal u alabarkoʼob Jéeoba. Teʼ kʼiinoʼob jeʼeloʼ tuláakal máak ken u maas yaabilt Jéeoba yéetel Jesús úuchik u kaʼa kuxkíintikoʼob le kimenoʼoboʼ.

11. Jeʼex tu yaʼalil Jesús tiʼ Juan 5:28, 29, ¿baʼax kun úuchul tiʼ le kun líiʼsbiloʼob wa ku kʼexik u kuxtaloʼoboʼ?

¹¹ Le máaxoʼob kun kaʼa kuxkíintbiloʼoboʼ yaan u kiʼimaktal u yóoloʼob le kéen u kʼex u modosoʼob yéetel le kéen kuxlakoʼob jeʼex uts tu tʼaan Diosoʼ. Le máaxoʼob ken u kʼex u kuxtaloʼoboʼ yaan u yantaloʼob ichil le grupo máakoʼob ku yaʼalik le Biblia «yaan u líikʼloʼob utiaʼal ka kuxlakoʼob» minaʼan u xuuloʼ. Chéen baʼaleʼ le máaxoʼob ken u tsʼáaubaʼob tu contra Diosoʼ maʼ kun chaʼabil u pʼáatloʼob teʼ Paraísooʼ (Isa. 65:20; xok Juan 5:28, 29).

12. ¿Bix ken u bendecirtil Jéeoba le máaxoʼob kun kuxtaloʼob way Luʼumoʼ?

¹² Le kéen gobernartaʼak le Luʼum tumen Jesúsoʼ tuláakal le máaxoʼob meyajtik Diosoʼ yaan u tsʼáaikoʼob cuenta jach jaaj baʼax ku yaʼalik Proverbios 10:22. Le tekstoaʼ ku yaʼalik: «Le baʼaloʼob ku taal tiʼ Jéeobaoʼ ku ayikʼalkúuntik máak, lelaʼ maʼatech u taal paʼteʼ yéetel muʼyajil». Yéetel u yáantaj le espíritu santooʼ jach yaan k-ayikʼaltal. Lelaʼ u kʼáat u yaʼaleʼ yaan k-eʼesik le jatsʼuts modos yaan tiʼ Cristooʼ yéetel jujunpʼíitil kun lukʼul le kʼeban yaan t-wíinkliloʼ (Juan 13:15-17; Efe. 4:23, 24). Cada kʼiin kun máaneʼ yaan k-eʼesik jatsʼuts modosoʼob yéetel k-wíinklileʼ maas maʼalob kun meyaj. ¡Bukaʼaj wal kun kiʼimaktal u yóol máakeʼ! (Job 33:25). Beoraaʼ koʼox ilik bix u yáantkoʼon wa k-tuukul tiʼ u kaʼa kuxkíintaʼal le kimenoʼoboʼ.

13. Jeʼex u yaʼalik Salmo 139:1-4, ¿baʼaxten le u kaʼa kuxkíintaʼal máakoʼ ku yeʼesik Jéeobaeʼ jach u kʼaj óoloʼon tubeel?

¹³ Jeʼex tsʼoʼok k-ilkoʼ le máaxoʼob kun líiʼsbiloʼoboʼ yaan u kaʼa kuxtaloʼob yéetel le modos yaantiʼob kaʼachoʼ, tsʼoʼoleʼ yaan u kʼaʼajaltiʼob le baʼaxoʼob uchaʼantiʼoboʼ. Leloʼ ku kaʼansiktoʼon junpʼéel baʼal jatsʼuts yoʼolal Jéeoba. Ku kaʼansiktoʼoneʼ Jéeobaeʼ jach u yaabiltmaj cada juntúul tiʼ toʼon le oʼolal jach ku tsʼáaik cuenta baʼax k-tuklik, baʼax k-aʼalik, baʼax k-beetik yéetel bix k-uʼuyikba. Wa ka kʼaʼabéetchajak u kaʼa kuxkíintikoʼoneʼ yaan u líiʼskoʼon jach jeʼexoʼon kaʼacheʼ. Le rey Davidoʼ tu yaʼaleʼ Jéeobaeʼ jach u kʼaj óoloʼon tubeel (xok Salmo 139:1-4). ¿Bix a wuʼuyikaba ikil a wojéeltik jach u kʼaj óolech Jéeoba?

14. ¿Bix k-uʼuyikba ikil k-ojéeltik de ke Jéeobaeʼ u kʼaj óoloʼon tubeel?

¹⁴ K-ojéeltik u kʼaj óoloʼon tubeel Jéeobaeʼ maʼ unaj u beetik k-tuklik wa chéen táan u yilik le baʼaloʼob maʼ maʼalobtak k-beetkoʼ. Kʼaʼajaktoʼoneʼ letiʼeʼ jach u yaabiltmoʼon yéetel jach koʼoj k-tojol tu táan. Letiʼeʼ u yojel baʼaxoʼob sen uchaʼantoʼon ichil k-kuxtal le oʼolal ku naʼatkoʼon. ¿Máasaʼ ku beetik u kiʼimaktal k-óol k-ojéeltik leloʼ? Mix bikʼin unaj k-uʼuyik wa t-juunal yanoʼoniʼ tumen Jéeobaeʼ tiaʼan t-iknal utiaʼal u yáantkoʼoneʼ (2 Cró. 16:9).

15. ¿Baʼaxten le u kaʼa kuxkíintaʼal máakoʼ ku yeʼesik jach yaan u naʼat Jéeoba?

¹⁵ Wa sajak máak tiʼ le kíimiloʼ jeʼel u beetik baʼaloʼob maʼ maʼalobtakeʼ. Le oʼolal Satanás  yéetel le máaxoʼob apoyarkoʼ jeʼel u sajakkúuntkoʼob máak utiaʼal u traicionartik u amigoʼob wa utiaʼal u xuʼulul u meyajtik Dioseʼ. Chéen baʼaleʼ toʼoneʼ maʼ t-sajaktal tumen k-ojel kex ka u kíimsoʼonoʼobeʼ Jéeobaeʼ jeʼel u kaʼa kuxkíintikoʼoneʼ (Apo. 2:10). K-ojleʼ kex jeʼel baʼaxak ka u beetoʼobeʼ Jéeobaeʼ maʼ kun xuʼulul u yaabiltikoʼon (Rom. 8:35-39). Jéeobaeʼ jach yaan u naʼat ikil u prometertik yaan u kaʼa kuxkíintikoʼon. U yojel de ke beyoʼ mix baʼal ken u beet k-sajaktal, mix ka u yaʼal Satanás yaan u kíimskoʼon.

16. 1) ¿Tiʼ baʼax maʼalob ka tuukulnakoʼon? 2) Le bix ken k-núukil le kʼáatchiʼoboʼ, ¿baʼax ken u yeʼese?

¹⁶ Wa ka u yaʼal u enemigoʼob Dios u kíimskoʼonoʼobeʼ, ¿yaan wa k-creertik jeʼel k-kaʼa kuxkíintaʼal tumen Jéeobaeʼ? Utiaʼal k-ojéeltikeʼ maʼalob ka tuukulnakoʼon tiʼ lelaʼ: «Le ‹baʼaloʼob mejentak› kin beetik sáamsamaloʼ, ¿ku yeʼeskoʼob wa kin confiar tiʼ Jéeoba?» (Luc. 16:10). «¿Kin weʼesik wa yéetel le bix in kuxtal kin tsʼáaik táanil le Reinooʼ? ¿Kin creertik wa yaan u tsʼáaikten Jéeoba le baʼaxoʼob kun kʼaʼabéettaltenoʼ?» (Mat. 6:31-33). Le bix ken k-núukil le kʼáatchiʼobaʼ yaan u yeʼesik wa jach tu jaajil k-confiar tiʼ Jéeoba. Wa k-confiar tiʼ letiʼeʼ yaan u béeytal k-máansik jeʼel baʼaxak prueba ka yanaktoʼoneʼ (Pro. 3:5, 6).

17. 1) ¿Baʼaxten le u kaʼa kuxkíintaʼal máakoʼ ku yeʼesik yaan u paciencia Jéeoba? 2) ¿Bix jeʼel k-tsʼáaik gracias tiʼ Jéeoba yoʼolal u pacienciaeʼ?

¹⁷ Jéeobaeʼ u yéeymaj u kʼiinil yéetel u yorail utiaʼal u xuʼulsik le kʼasaʼan yóokʼol kaabaʼ (Mat. 24:36). Kex jach taak u kaʼa kuxkíintik le kimenoʼoboʼ letiʼeʼ jach yaan u paciencia (Job 14:14, 15). Táan u páaʼtik u kʼuchul le kʼiin u chʼaʼtukultmoʼ (Juan 5:28). Yaaske jach yaan u paciencia Jéeoba. Tumen tu yoʼolal leloʼ yaʼab máakoʼob tsʼoʼok u natsʼkubaʼob tu yiknal, ichiloʼobeʼ tiaʼanoʼoniʼ (2 Ped. 3:9). Jéeobaeʼ u kʼáat ka u salvartuba le bukaʼaj máakoʼob ku páajtaleʼ. ¿Bix jeʼel k-tsʼáaik gracias tiʼ yoʼolal u pacienciaeʼ? Letiʼe kéen k-kaxt le máaxoʼob «ku yeʼeskoʼob u kʼáat u kʼamoʼob le kuxtal minaʼan u xuuloʼ» yéetel le kéen k-áantoʼob u yaabiltoʼob Jéeobaoʼ (Hech. 13:48). Beyoʼ tak letiʼob ken u jóoʼsoʼob u yutsil u paciencia Jéeoba.

18. ¿Baʼaxten unaj k-eʼesik paciencia tiʼ u maasil?

¹⁸ Jéeobaeʼ yaan xan u páaʼtik ka tsʼoʼokok le Mil Años utiaʼal ka lukʼuk le kʼeban tu wíinklil máakoʼ. Hasta u kʼuchul le kʼiin jeʼeloʼ yaan u seguer u perdonartik k-kʼebanoʼob. Utiaʼal k-beetik jeʼex letiʼeʼ maases unaj k-ilik le jatsʼuts  modos yaan tiʼ u maasiloʼ yéetel unaj k-eʼesik paciencia tiʼob. Bey tu beetil juntúul kiikoʼ. U yíichameʼ kʼojaʼanchaj tiʼ u nervioseʼ ka xuʼul u bin muchʼtáambal. Le kiikoʼ ku yaʼalik: «Le baʼax úuchaʼ jach tu beetaj in muʼyaj. Maʼ béeychaj k-beetik tuláakal le baʼaxoʼob k-tukultmaj k-beetik kaʼachoʼ». Kex yaj le baʼax ku yúuchultiʼoboʼ le kiikoʼ maʼ xuʼul u yeʼesik yaabilaj yéetel paciencia tiʼ u yíichamiʼ. Confiarnaj tiʼ Jéeoba yéetel maʼ xuʼul u yáantik u yíichamiʼ. Jeʼex Jéeobaeʼ maʼ sen chʼíik tiʼ le baʼax ku yúuchloʼ, baʼaxeʼ tiʼ le baʼaloʼob maʼalobtak ku beetik u yíichamoʼ. Le kiikaʼ ku yaʼalik: «Jach jatsʼuts u modos in wíicham, letiʼeʼ táan u beetik tuláakal le ku páajtal utiaʼal u yutstal kex jujunpʼíitiloʼ». Jach kʼaʼabéet k-eʼesik paciencia tiʼ k-láakʼtsiloʼob yéetel tiʼ le sukuʼunoʼob yaan baʼax ku yúuchultiʼoboʼ.

19. ¿Baʼax unaj k-beetik desde bejlaʼeʼ?

¹⁹ Le ka beetaʼab le Luʼumoʼ Jesús yéetel le ángeloʼoboʼ jach kiʼimakchaj u yóoloʼob. Jach yaan xan u kiʼimaktal u yóoloʼob le kéen u yiloʼob chuup le Luʼum yéetel máakoʼob minaʼan u kʼebanoʼob yéetel ku adorarkoʼob Jéeobaoʼ. Le máaxoʼob kun gobernaroʼob yéetel Cristooʼ yaan xan u kiʼimaktal u yóoloʼob ken u yiloʼob bukaʼaj utsil ku taasik tiʼ wíinik le bix u gobernaroʼoboʼ (Apo. 4:4, 9-11; 5:9, 10). Bukaʼaj jatsʼutsil xan kéen pʼáatak mix máak kun kʼojaʼantal, mix máak kun kíimil yéetel mix máak kun muʼyaj. Teʼ kʼiinoʼob jeʼeloʼ chéen yaan u yokʼol máak tumen jach kiʼimak u yóol (Apo. 21:4). Mientras maʼ kʼuchuk le kʼiin jeʼeloʼ unaj k-eʼesik yaabilaj, paciencia yéetel naʼat jeʼex u beetik Jéeobaoʼ. Wa k-beetkeʼ le kéen yanaktoʼon junpʼéel pruebaeʼ yaan k-aktáantik yéetel kiʼimak óolal (Sant. 1:2-4). Jach táaj kiʼimak k-óol tumen k-ojel yaan u kaʼa kuxkíintik Jéeoba le kimenoʼoboʼ (Hech. 24:15).