1. ¿Baʼaxten tu kʼáat óoltaj Jesús tiʼ Jéeoba ka u kanáant u discípuloʼob?

 JESÚSEʼ le áakʼab antes tiʼ u kíimsaʼaloʼ tu kʼáat óoltaj tiʼ u Taata ka u kanáant u discípuloʼob (Juan 17:15, 20). U jaajileʼ Jéeobaeʼ mantatsʼ ku kanáantik le máaxoʼob meyajtikoʼ. Chéen baʼaleʼ Jesúseʼ u yojleʼ le Kʼaasilbaʼaloʼ yaan u maas atacartik le discípuloʼoboʼ. Le oʼolal tu kʼáat óoltaj tiʼ Jéeoba ka áantaʼakoʼob utiaʼal ka chúukpajak u yóoloʼob.

2. Jeʼex u yaʼalik Salmo 33:18-20, ¿baʼaxten maʼ unaj k-sajaktal tiʼ le problemasoʼ?

² U kʼasaʼan yóokʼol kaab Satanáseʼ jach ku taasik yaʼab problemas ichil u kuxtal le máaxoʼob meyajtik Diosoʼ. Lelaʼ jeʼel u beetik u lúubul k-óoleʼ yéetel jeʼel tak u tsʼáaik a pruebail k-fejeʼ. Chéen baʼaleʼ le xookaʼ yaan u yeʼesiktoʼoneʼ maʼ unaj k-chʼaʼik saajkiliʼ. Jéeobaeʼ ku yilik tuláakal baʼax ku yúuchultoʼon yéetel jach u kʼáat u yáantoʼon. Teʼ xookaʼ yaan k-xakʼaltik u kuxtal kaʼatúul máakoʼob ku yeʼesiktoʼoneʼ «Jéeobaeʼ mantatsʼ táan u paktik le máaxoʼob meyajtikoʼ» (xok Salmo 33:18-20).

3. ¿Baʼaxoʼob jeʼel u beetik k-uʼuyikba t-juunaleʼ?

³ Kex yaʼab máakoʼob yaan ichil u kaajal Jéeobaeʼ yaan kʼiineʼ jeʼel k-uʼuyikba t-juunaleʼ. Jeʼex le táankelem paalaloʼoboʼ yaan kʼiineʼ jeʼel u yuʼubikuba tu juunaloʼob le kéen kʼaʼabéetchajak u tsolkoʼob tiʼ u yéet xookoʼob baʼax ku creerkoʼobeʼ wa le kéen u kʼex u múuchʼuliloʼobeʼ. Maʼ xaaneʼ yaan tiʼ toʼoneʼ chan lubaʼan u yóol, yaan depresión tiʼ wa ku yuʼubik bey mix máak yaan utiaʼal áantkeʼ. Maʼ xaaneʼ yaan horaeʼ maʼ t-jáan tsikbaltik tiʼ wa máax baʼax ku yúuchultoʼon tumen saajkoʼon wa maʼ tu naʼatik bix k-uʼuyikba. Yaan horaeʼ jeʼel tak k-kʼuchul tukult mix máak yaabiltmiloʼoneʼ. U jaajileʼ jeʼel baʼaxak ka u beet k-uʼuyikba t-juunaleʼ ku beetik  k-preocupar. Chéen baʼaleʼ Jéeobaeʼ maʼ u kʼáat ka k-uʼuyba beyoʼ. ¿Baʼaxten k-aʼalik leloʼ?

4. ¿Baʼaxten tu yaʼalaj Elías jach chéen letiʼ pʼaatal?

⁴ Koʼoneʼex ilik u ejemplo profeta Elías. Letiʼeʼ juntúul máak jach chúukaʼan u yóol kaʼach u meyajt Jéeoba. Chéen baʼaleʼ le ka aʼalaʼab tumen reina Jezabel yaan u kíimsaʼaleʼ letiʼeʼ maas tiʼ 40 días táan kaʼach u máan u taʼakikuba (1 Rey. 19:1-9). Le tiaʼan tu juunal ichil junpʼéel sajkaboʼ tu yaʼalaj tiʼ Jéeoba: «Jach chéen teen pʼaatlen» (1 Rey. 19:10). Ku tuklik kaʼacheʼ minaʼan uláakʼ u profeta Jéeoba pʼaatal teʼ luʼum jeʼeloʼ. Chéen baʼaleʼ maʼ beyoʼ tumen Abdíaseʼ tu taʼakaj 100 u túulal u profetaʼob Jéeoba utiaʼal maʼ u kíimsaʼaloʼob tumen Jezabel (1 Rey. 18:7, 13). ¿Baʼaxten túun Elíaseʼ ku yuʼubikuba tu juunal? Maʼ xaaneʼ tumen ku tuklik kaʼacheʼ kíimsaʼab le profetaʼob taʼakaʼaboʼob tumen Abdíasoʼ. Wa maʼ xaaneʼ tu yuʼububa tu juunal tumen mix máak káaj u meyajtik Jéeoba kex tsʼoʼok u yilkoʼob teʼ Montaña Carmelo letiʼ u jaajil Diosoʼ. Wa maʼ xaaneʼ tu tuklaj mix máak u yojel baʼax táan u máansik yéetel mix máak ku preocuparkuba tu yoʼolal. Toʼoneʼ maʼ k-jach ojel baʼaxten tu yuʼububa Elías beyoʼ tumen le Bibliaoʼ maʼ tu yaʼalik, chéen baʼax k-ojleʼ Jéeobaeʼ tu naʼataj bix u yuʼubikuba yéetel jach u yojel bix jeʼel u yáantikeʼ.

5. ¿Baʼax tu beetaj Jéeoba utiaʼal u yeʼesik tiʼ Elías tiaʼan tu yiknaleʼ?

⁵ Jéeobaeʼ yaʼab baʼax tu beetaj utiaʼal u yáantik Elías. Por ejemploeʼ, utiaʼal ka u tsikbalt baʼax ku yúuchultiʼeʼ kaʼatéen tu kʼáatajtiʼ: «Elías, ¿baʼax ka beetik wayeʼ?» (1 Rey. 19:9, 13). Jéeoba túuneʼ jach tu chʼenxikintaj tuláakal baʼax tu yaʼalaj. Ka tsʼoʼokeʼ tu yeʼesajtiʼ tiaʼan tu yiknaleʼ, yéetel tu yeʼesajtiʼ jach yaan u páajtalil. Tu yaʼalaj xan tiʼeʼ tu kaajil Israeleʼ yaan yaʼabkach máakoʼob láayliʼ táan u meyajtikoʼob Jéeobaeʼ (1 Rey. 19:11, 12, 18). Le ka tsʼoʼok u tsikbal Elías yéetel Jéeobaeʼ seguro jach tu yuʼububa maʼalobil. Tsʼoʼoleʼ Jéeobaeʼ tu kʼubéentaj tiʼ Elías le nukuch meyajoʼobaʼ: ka u yéey Azael utiaʼal ka u beet u reyil Siria, ka u yéey Jehú utiaʼal ka u beet u reyil Israel yéetel ka u yéey Eliseo utiaʼal ka u beet u profetail (1 Rey. 19:15, 16). Úuchik u tsʼaʼabaltiʼ le meyajoʼob tumen Jéeobaoʼ áantaʼab utiaʼal  ka tuukulnak tiʼ baʼaloʼob maʼalobtak, tsʼoʼoleʼ tsʼaʼab Eliseo utiaʼal áantik. Toʼoneʼ ¿baʼax jeʼel u páajtal k-beetik wa k-uʼuyikba t-juunal yéetel kʼaʼabéettoʼon u yáantaj Jéeobaeʼ?

6. ¿Baʼax jeʼel u páajtal k-aʼalik tiʼ Jéeoba le kéen k-uʼuyba t-juunaleʼ? (Salmo 62:8).

⁶ Jéeobaeʼ u kʼáat ka orarnakoʼon tiʼ letiʼ utiaʼal k-aʼaliktiʼ bix k-uʼuyikba. Letiʼeʼ ku naʼatkoʼon yéetel u kʼáat ka orarnakoʼon tiʼ jeʼel baʼaxak súutukileʼ tumen yaan u chʼenxikintikoʼon (1 Tes. 5:17). Dioseʼ jach uts tu tʼaan u yuʼubik u oración le máaxoʼob meyajtikoʼ (Pro. 15:8). ¿Baʼax jeʼel u páajtal k-aʼaliktiʼ le kéen k-uʼuyba t-juunaleʼ? Jeʼex tu beetil Elíaseʼ jeʼel u páajtal k-tsikbaltiktiʼ jach bix k-uʼuyikbaeʼ (xok Salmo 62:8). Le kéen tsʼoʼokok k-tsikbaltik tiʼ Jéeoba baʼax preocuparkoʼoneʼ jeʼel u páajtal k-kʼáatiktiʼ ka u yáantoʼon k-il baʼax jeʼel u páajtal k-beetkeʼ. Por ejemploeʼ wa táankelmecheʼ, ¿baʼax jeʼel u páajtal a beetik wa ka wuʼuyikaba ta juunal yéetel saajkech tʼaan tu yoʼolal Jéeoba teʼ escuelaoʼ? Jeʼel u páajtal a kʼáatiktiʼ ka u yáantech utiaʼal maʼ a sajaktal yéetel ka u tsʼáatech naʼat utiaʼal a tsolik yéetel respeto le baʼax ka creerkoʼ (Luc. 21:14, 15). ¿Kux túun wa chan lubaʼan a wóol yéetel yaantech depresión? Jeʼel u páajtal a kʼáatik tiʼ Jéeoba ka u yáantech tsikbal yéetel juntúul sukuʼun yiijchajaʼan u tuukul yéetel ka béeyak u naʼatik bix a wuʼuyikabaeʼ. U jaajileʼ jach ku yáantkoʼon kéen k-tsikbalt tiʼ Jéeoba bix k-uʼuyikba, kéen k-il bix u núukik k-oraciónoʼob yéetel kéen k-kʼam u yáantaj u maasil.

7. ¿Baʼax jeʼel u páajtal a kanik tiʼ u ejemplo Mauricioeʼ?

⁷ Jéeobaeʼ ku kʼubéentik tiʼ toʼon nukuch meyajoʼob. Letiʼeʼ ku yilik yéetel ku apreciartik tuláakal baʼax k-beetik teʼ múuchʼuliloʼ bey xan teʼ kʼaʼaytajoʼ (Sal. 110:3). K-tsʼáaik k-óol k-meyajt Jéeobaeʼ ku yáantkoʼon utiaʼal maʼ k-jach uʼuyikba t-juunal. ¿Baʼaxten k-aʼalik leloʼ? Koʼoneʼex ilik baʼax úuch tiʼ juntúul xiʼipal ku kʼaabaʼtik Mauricio. * Le maʼ úuch okjaʼanakoʼ, juntúul tiʼ u amigoʼobeʼ joʼopʼ u náachtal tiʼ Jéeoba. Mauricioeʼ ku yaʼalik: «Le ka tin wilaj bix u náachtal in amigo tiʼ Jéeobaeʼ joʼopʼ in tuklik wa jeʼel u béeytal in beetik le baʼax tin waʼalaj tiʼ Dios le ka tin kʼubaj in kuxtal tiʼoʼ bey xan utiaʼal maʼ in jóokʼol ichil u kaajal. Kin wuʼuyikinba kaʼach tin juunal, yéetel kin tuklik kaʼacheʼ mix máak naʼatik bix in wuʼuyikinba». ¿Baʼax áant Mauricio? Letiʼeʼ ku yaʼalik: «In maas tsʼáaik in wóol teʼ kʼaʼaytajoʼ tu yáanten utiaʼal maʼ in tuukul chéen tin woʼolal, yéetel maʼ in tuukul tiʼ baʼaloʼob jeʼel u beetik u lúubul in wóoleʼ. In kʼaʼaytaj yéetel uláakʼ sukuʼunoʼobeʼ jach ku beetik kaʼach u kiʼimaktal in wóol yéetel ku beetik u xuʼulul in wuʼuyikinba tin juunal». Kex maʼ tu páajtal k-jóokʼol kʼaʼaytaj yéetel le sukuʼunoʼoboʼ jach jeʼel u líikʼil k-óol wa k-múul kʼaʼaytaj tu yéeteloʼob tiʼ teléfono wa tiʼ cartaeʼ. Mauricioeʼ ku yaʼalik uláakʼ baʼax áante:  «Tin maas tsʼáa in wóol meyaj teʼ múuchʼuliloʼ. Tin wilaj xan in preparartik maʼalob le jaatsoʼob ku tsʼaʼabalten utiaʼal in máansik tubeeloʼ. Leloʼ tu yáanten in wuʼuy jach u yaabiltmen Jéeoba bey xan le sukuʼunoʼoboʼ».

8. ¿Bix jeʼel k-uʼuyikba wa k-ilik maʼ tu xuʼulul u taal problemas t-óokʼoleʼ?

⁸ Tuláakloʼon k-ojel yaan k-máansik problemas teʼ tu tsʼook kʼiinoʼobaʼ (2 Tim. 3:1). Chéen baʼaleʼ yaan kʼiineʼ ku beetik u jaʼakʼal k-óol tumen chéen ku téek kʼuchul. Maʼ xaaneʼ jeʼel k-máansik óotsilileʼ, jeʼel u yilaʼal yaantoʼon junpʼéel yaayaj kʼojaʼanileʼ wa jeʼel u kíimil juntúul máax k-yaabiltmeʼ. Teʼ súutuk beyoʼ maʼ xaaneʼ jeʼel k-sen chiʼichnaktaleʼ, maases wa k-ilik maʼ tu xuʼulul le problemasoʼ bey xan wa k-uʼuyik tsʼoʼok u níikloʼob t-óokʼol. Chéen baʼaleʼ kʼaʼajaktoʼoneʼ Jéeobaeʼ táan u yilik baʼax ku yúuchultoʼon yéetel jeʼel u yáantkoʼon k-aktáant le problemasoʼ.

9. Aʼal jujunpʼéel tiʼ le nukuch problemas taal tu yóokʼol Joboʼ.

⁹ Koʼoneʼex ilik baʼax úuch tiʼ Job. Letiʼeʼ chéen ka téek taal nukuch problemas tu yóokʼol. Chéen tiʼ junpʼéel kʼiineʼ tu yojéeltaj kíim u yalakʼ baʼalcheʼob, le máaxoʼob meyajtikoʼ yéetel u maas yajileʼ kíim u paalaloʼob (Job 1:13-19). Tsʼoʼoleʼ le láayliʼ táan u muʼyajtik le baʼax úuchtiʼoʼ tsaʼay junpʼéel yaayaj kʼojaʼanil tiʼ, pʼáat yayachʼkil u wíinklil (Job 2:7). Tumen jach yaj baʼax ku muʼyajtikeʼ hasta tu yaʼalaj: «Jach in pʼeek kuxliken, maʼ in kʼáat ka seguernak in kuxtaliʼ» (Job 7:16).

10. ¿Bix úuchik u yáantaʼal Job tumen Jéeoba utiaʼal u chúukpajal u yóol? (Ilawil le dibujo yaan tu yáax páginail le revistaaʼ).

¹⁰ Jéeobaeʼ táan kaʼach u jach ilik tuláakal baʼax ku yúuchul tiʼ Job. Tsʼoʼoleʼ tumen jach u yaabiltmeʼ tu tsʼáaj tuláakal baʼax kʼaʼabéettiʼ utiaʼal u chúukpajal u yóol. Jéeobaeʼ tu tʼanaj Jobeʼ ka tu yeʼesajtiʼ bukaʼaj naʼat yaantiʼ yéetel bix u kanáantik le baʼaxoʼob u beetmoʼ, letiʼeʼ tu chʼaʼchiʼitaj jejeláas baʼalcheʼob (Job 38:1, 2; 39:9, 13, 19, 27; 40:15; 41:1, 2). Jéeobaeʼ tu túuxtaj xan Eliú utiaʼal u líiʼsik u yóol Job. Eliúeʼ tu kʼaʼajsaj tiʼ Jobeʼ Dioseʼ mantatsʼ ku bendecirtik le máaxoʼob ku chúukpajal u yóoloʼoboʼ. Jéeobaeʼ tu yaʼalaj tiʼ Eliú ka u tsʼáa jujunpʼéel consejoʼob tiʼ Job. Eliú túuneʼ yéetel yaabilaj tu yáantaj Job, tu kʼaʼajsajtiʼeʼ maʼ tu páajtal u compararkuba yéetel Jéeoba, le Máax Beetmil tuláakal baʼaloʼ (Job 37:14). Ka tsʼoʼokeʼ Jéeobaeʼ hasta tu kʼubéentaj tiʼ Job ka orarnak yoʼolal le óoxtúul máakoʼob sen aʼal baʼal tiʼoʼ (Job 42:8-10). Teʼ kʼiinoʼobaʼ, ¿bix u yáantkoʼon Jéeoba le kéen k-máans nukuch problemas?

11. ¿Bix u líiʼsik k-óol le Biblia le kéen k-aktáant nukuch problemasoʼ?

¹¹ Bejlaʼeʼ Jéeobaeʼ maʼatech u tʼankoʼon jeʼex úuchik u tʼanik Joboʼ, baʼaxeʼ ku meyajtiʼ le Biblia utiaʼal u tʼankoʼonoʼ (Rom. 15:4). Letiʼeʼ ku tsʼáaiktoʼon junpʼéel jatsʼuts esperanza. Koʼoneʼex ilik jujunpʼéel baʼaxoʼob ku yaʼalik le Biblia jach jeʼel u líiʼskoʼob k-óol le kéen k-máans problemasoʼ. Le Bibliaoʼ ku yaʼaliktoʼoneʼ mix junpʼéel tiʼ le nukuch problemas ‹jeʼel u náachkuntkoʼon tiʼ u yaabilaj Diosoʼ› (Rom. 8:38, 39). Ku yaʼalik xan toʼoneʼ «Jéeobaeʼ tiaʼan naatsʼ tiʼ tuláakal le máaxoʼob chʼaʼchiʼitik u kʼaabaʼoʼ», lelaʼ u kʼáat u yaʼaleʼ ku chʼenxikintik u oraciónoʼob (Sal. 145:18). Jéeobaeʼ ku yaʼalikeʼ wa k-kʼubik k-óol tiʼ letiʼeʼ jeʼel u chúukpajal k-óol le kéen k-aktáant jeʼel baʼalak pruebaileʼ yéetel jeʼel u kiʼimaktal k-óoleʼ (1 Cor. 10:13; Sant. 1:2, 12). Tsʼoʼoleʼ le Bibliaoʼ ku yaʼaliktoʼoneʼ le baʼaxoʼob k-aktáantikoʼ yaan u kʼuchul u kʼiinil u xuʼululoʼob, yéetel Jéeobaeʼ yaan u tsʼáaiktoʼon kuxtal minaʼan u xuul (2 Cor. 4:16-18). Dioseʼ ku yaʼaliktoʼoneʼ yaan u xuʼulsik tiʼ le máaxoʼob beetik u yantaltoʼon problemasoʼ, leloʼ u kʼáat u yaʼaleʼ yaan u xuʼulsik tiʼ le Kʼaasilbaʼaloʼ bey  xan tiʼ le máaxoʼob ku tsʼáaikubaʼob tu tséeloʼ (Sal. 37:10). ¿Yaan wa tekstoʼob tsʼoʼok a kanik de memoria jeʼel u yáantkechoʼob a aktáant le pruebaʼob ku taal u kʼiinoʼ?

12. ¿Baʼax unaj k-beetik utiaʼal k-jóoʼsik u yutsil le áantaj ku tsʼáaiktoʼon Jéeoba teʼ Bibliaoʼ?

¹² Utiaʼal k-jóoʼsik u yutsil le áantaj ku tsʼáaiktoʼon Jéeoba teʼ Bibliaoʼ, letiʼeʼ ku páaʼtik ka suukak k-xokik yéetel ka tuukulnakoʼon tiʼ baʼax ku yaʼalik. Wa k-tsʼáaik ichil k-kuxtal le baʼax k-kanikoʼ yaan u muʼukʼaʼantal k-fe tiʼ Jéeoba yéetel yaan k-maas bisikba tu yéetel. Leloʼ yaan u yáantkoʼon utiaʼal ka chúukpajak k-óol. Tsʼoʼoleʼ wa k-kʼubik k-óol tiʼ le Bibliaoʼ Jéeobaeʼ yaan u tsʼáaiktoʼon u espíritu santo. Bey túunoʼ yaan u yantaltoʼon «le páajtalil ku píitmáan tiʼ u muukʼ wíinik» utiaʼal u chúukpajal k-óol k-aktáant jeʼel baʼalakeʼ (2 Cor. 4:7-10).

13. ¿Bix u yáantkoʼon utiaʼal ka chúukpajak k-óol le janal espiritual ku tsʼáaik le esclavo chúukaʼan u yóol yéetel yaan u naʼatoʼ?

¹³ Yéetel u yáantaj Jéeobaeʼ ‹le esclavo chúukaʼan u yóol yéetel yaan u naʼatoʼ› ku tsʼáaiktoʼon publicaciónoʼob, videoʼob yéetel kʼaayoʼob. Le baʼaloʼobaʼ ku yáantkoʼon utiaʼal ka muʼukʼaʼanchajak k-fe yéetel utiaʼal maʼ u náayal k-óol (Mat. 24:45). Unaj k-ilik k-jóoʼsik u yutsil le janal espiritual ku tsʼaʼabaltoʼon jach tu yorailoʼ. Maʼ sen úucheʼ juntúul kiik kajaʼan Estados Unidoseʼ tu yaʼalaj jach kiʼimak u yóol yoʼolal le janal espiritualaʼ. Letiʼeʼ tu yaʼalaj: «Tu yáamil le 40 años joʼopʼok in meyajtik Jéeobaoʼ yaʼab u téenel tsʼoʼok u kʼaʼabéettal in weʼesik chúukaʼan in wóol in meyajt Dios». Le kiikaʼ yaʼab baʼaloʼob tsʼoʼok u muʼyajtik. U abueloeʼ kíim le ka jéenantaʼab tumen juntúul kalaʼan máak táan u manejar. U taataʼobeʼ kíimoʼob yoʼolal junpʼéel yaayaj kʼojaʼanil. Yéetel le kiikaʼ tsʼoʼok kaʼatéen u tsaʼayal cáncer tiʼ. ¿Baʼax áant utiaʼal ka chúukpajak u yóol? Letiʼeʼ ku yaʼalik: «Jéeobaeʼ jach ku kanáantken. Le janal espiritual ku tsʼáaik le esclavo chúukaʼan u yóol yéetel yaan u naʼatoʼ jach tsʼoʼok u yáantken utiaʼal ka chúukpajak in wóol. Yoʼolal leloʼ ku páajtal in waʼalik le baʼax tu yaʼalaj Jobaʼ: «¡Mientras kuxaʼaneneʼ yaan u chúukpajal in wóol in beet baʼax maʼalob!» (Job 27:5).

14. ¿Bix u meyaj le sukuʼunoʼob tiʼ Jéeoba utiaʼal u yáantkoʼonoʼob tu kʼiinil táan k-muʼyajoʼ? (1 Tesalonicenses 4:9).

¹⁴ Jéeobaeʼ tsʼoʼok u kaʼansik le máaxoʼob meyajtik utiaʼal ka u paklan yaabiltubaʼob yéetel utiaʼal ka u paklan líiʼs u yóoloʼob teʼ kʼiinoʼob táan u muʼyajoʼoboʼ (2 Cor. 1:3, 4; xok 1 Tesalonicenses 4:9). Le sukuʼunoʼob yéetel le kiikoʼoboʼ beyoʼob Eliúeʼ tumen ku yáantkoʼonoʼob  utiaʼal ka chúukpajak k-óol teʼ kʼiinoʼob táan k-muʼyajoʼ (Hech. 14:22). Leloʼ bey tu yilil juntúul kiik ku kʼaabaʼtik Diane. Le ka jach kʼojaʼanchaj u yíichameʼ, líiʼsaʼab u yóol yéetel áantaʼab tumen le múuchʼulil utiaʼal ka chúukpajak u yóoloʼ. Letiʼeʼ ku yaʼalik: «Maʼ chéen chʼaʼabil úuchik k-máansik le kʼiinoʼob jeʼeloʼ. Chéen baʼaleʼ t-uʼuyaj jach u yaabiltmoʼon Jéeoba yéetel maʼ tu pʼatkoʼon t-juunal. Le sukuʼunoʼob yéetel le kiikoʼoboʼ tu tsʼáajoʼobtoʼon tuláakal le baʼax kʼaʼabéettoʼon utiaʼal ka chúukpajak k-óoloʼ: tu xíimbaltoʼonoʼob, tu tʼanoʼonoʼob, tu méekʼoʼonoʼob... Yéetel tumen maʼ in wojel manejareʼ, le kéen béeyak teneʼ ku bin u chʼaʼenoʼob utiaʼal muchʼtáambal yéetel utiaʼal in jóokʼol kʼaʼaytaj». ¿Máasaʼ ku taasiktoʼon kiʼimak óolal k-antal ichil u kaajal Jéeoba tuʼux ku yeʼesaʼal yaabilaj?

15. ¿Baʼaxten k-ojel jeʼel u chúukpajal k-óol kex jeʼel baʼalak ka k-aktáanteʼ?

¹⁵ Tuláakloʼon yaan u yantal baʼax beetik k-muʼyaj, chéen baʼaleʼ jeʼex tsʼoʼok k-ilkoʼ junpuliʼ maʼ t-juunal yanoʼoniʼ. Jéeobaeʼ juntúul taatatsil jach u yaabiltmaj u paalal, mantatsʼ ku yilik u yáantkoʼon. Letiʼeʼ maʼ tu pʼatkoʼon t-juunal yéetel ku chʼenxikintikoʼon le kéen k-kʼáat áantaj tiʼ (Isa. 43:2). K-ojel jeʼel u páajtal u chúukpajal k-óol kex jeʼel baʼalak ka k-aktáanteʼ tumen Jéeobaeʼ u tsʼaamajtoʼon tuláakal le baʼax kʼaʼabéettoʼonoʼ: u tsʼaamajtoʼon le Bibliaoʼ, u páajtalil k-orar, yaʼab janal espiritual bey xan sukuʼunoʼob yéetel kiikoʼob ku yeʼeskoʼobtoʼon yaabilaj.

16. ¿Baʼax unaj k-beetik utiaʼal maʼ u xuʼulul u kanáantkoʼon Jéeoba?

¹⁶ Jach k-agradecertik tiʼ le k-Taata yaan teʼ kaʼan ikil u yáantkoʼonoʼ. «Kiʼimak u yóol k-puksiʼikʼal tu yoʼolal letiʼ» (Sal. 33:21). ¿Bix jeʼel k-eʼesik k-agradecertik tiʼ Jéeoba ikil u kanáantkoʼoneʼ? Letiʼe ka k-il k-jóoʼsik u yutsil tuláakal le baʼax ku tsʼáaiktoʼon utiaʼal u yáantkoʼonoʼ. Utiaʼal maʼ u pʼatkoʼon Jéeoba yéetel utiaʼal maʼ u xuʼulul u kanáantkoʼoneʼ unaj k-tsʼáaik k-óol k-beet tuláakal baʼax ku yaʼaliktoʼon (1 Ped. 3:12).