1. ¿Baʼax tsʼoʼok u beetik u milesil xiʼipalaloʼob yéetel x-chʼúupalaloʼob?

 ¿TIAʼANECH wa ichil le u milesil xiʼipalaloʼob yéetel x-chʼúupalaloʼob ku yokjaʼob cada añooʼ? Wa beyoʼ, seguramente jach kiʼimak u yóol le sukuʼunoʼoboʼ bey xan Jéeoba (Pro. 27:11). Jeʼex letiʼobeʼ maʼ xaaneʼ techeʼ tsʼoʼok u chan máan kʼiin joʼopʼok a xakʼalxoktik le Bibliaoʼ, le oʼolal ta tsʼáaj cuenta jach tu jaajil u Tʼaan Dios. Tsʼoʼok a kʼaj óoltik yéetel tsʼoʼok a yaabiltik Jéeoba, le máax beet u tsʼíibtaʼal le Bibliaoʼ. Chíikaʼan jach tu jaajil a yaabiltmaj tumen tsʼoʼok a kʼubik a kuxtal tiʼ letiʼ yéetel tsʼoʼok a wokjaʼ. ¡Jach k-felicitarkech!

2. ¿Baʼax ken k-il teʼ xookaʼ?

 ² Maʼ xaaneʼ táanil tiʼ a wokjaʼeʼ yaan baʼaxoʼob tsʼáa a pruebail a fe. Maʼ u tuʼubultecheʼ Satanáseʼ yaan u seguer u atacarkech utiaʼal u xuʼulul a yaabiltik Jéeoba yéetel utiaʼal a náachtal tiʼ letiʼ (Efe. 4:14). Maʼ a chaʼik u jóokʼol yéetel le baʼax u kʼáatoʼ. ¿Baʼax jeʼel u yáantkech utiaʼal maʼ u xuʼulul a meyajtik Jéeoba jeʼex ta prometertil le ka ta kʼubaj a kuxtal tiʼoʼ? Unaj u seguer a wilik ‹ka yiijchajak a tuukul› (Heb. 6:1). Teʼ xookaʼ yaan k-ilik baʼax jeʼel u yáantkecheʼ.

3. Le máaxoʼob meyajtik Diosoʼ, ¿baʼax unaj u seguer u beetkoʼob kex tsʼoʼok u yokjaʼob?

³ Le máaxoʼob tsʼoʼok u yokjaʼoboʼ unaj u chʼaʼikoʼob en cuenta le baʼax tu yaʼalaj apóstol Pablo tiʼ le sukuʼunoʼob yanoʼob kaʼach Éfesooʼ. Tu yaʼalajtiʼobeʼ kʼaʼabéet u kʼuchul u beetubaʼob «jeʼex juntúul nojoch wíinikeʼ» (Efe. 4:13). Pabloeʼ bey táan kaʼach u yaʼaliktiʼobeʼ: «Unaj u seguer a progresareʼex ichil u kaajal Dios». Letiʼeʼ tu ketaj le u progresar máak yéetel le bix u bin u nojochtal juntúul chan paaloʼ. Le kéen síijik juntúul chaambaleʼ jach ku taasik kiʼimak óolal tiʼ le taatatsiloʼoboʼ, chéen baʼaleʼ  deporsi unaj u bin u nojochtal, yéetel kéen máanak kʼiineʼ unaj u xuʼulul u beetik le baʼaloʼob ku beetik le mejen paalaloʼ (1 Cor. 13:11). Bey u yúuchul yéetel le máaxoʼob meyajtik Diosoʼ, kex tsʼoʼok u yokjaʼobeʼ unaj u seguer u progresaroʼob. Koʼoneʼex ilik jujunpʼéel tiʼ le baʼaxoʼob jeʼel u yáantik máakoʼ.

4. ¿Máakalmáak le jatsʼuts modos kun áantkech progresaroʼ, yéetel baʼaxten? (Filipenses 1:9).

⁴ Ilawil a maas yaabiltik Jéeoba. Chíikaʼan jach a yaabiltmaj Jéeoba, chéen baʼaleʼ le yaabilaj ka wuʼuyik tu yoʼolaloʼ unaj u maas nojochtal. ¿Baʼax unaj a beetik? Apóstol Pabloeʼ tʼaanaj tiʼ junpʼéel baʼax unaj u beetik máak. Leloʼ jeʼel u páajtal k-ilik tiʼ Filipenses 1:9 (xoke). Pabloeʼ tu kʼáataj tiʼ Jéeoba ka maas nojochchajak u yaabilaj le sukuʼunoʼob yanoʼob Filiposoʼ. Leloʼ u kʼáat u yaʼaleʼ le yaabilaj k-uʼuyik yoʼolal Diosoʼ jeʼel u páajtal u maas nojochtaleʼ. Chéen baʼaleʼ utiaʼal leloʼ kʼaʼabéet ‹k-kʼaj óoltik yéetel k-naʼatik tubeel baʼax u kʼáat Dios›. Jeʼex kun bin k-maas kʼaj óoltik Jéeobaeʼ bey kun bin k-maas yaabiltik, bey kun bin u maas jatsʼutstal k-ilik u modos bey xan bix u beetik tuláakal baʼal. Yaan u maas taaktal k-kiʼimakkúuntik u yóol yéetel maʼ ken k-beet mix baʼal jeʼel u beetik u tristetaleʼ. Tsʼoʼoleʼ yaan k-beetik tuláakal le ku páajtal utiaʼal k-ojéeltik baʼax u kʼáat ka k-beete, le kéen tsʼoʼokkeʼ k-ilik k-beetik.

5, 6. ¿Baʼax uláakʼ jeʼel u yáantkoʼon k-maas yaabilt Jéeobaeʼ?

⁵ Uláakʼ baʼax jeʼel u yáantkoʼon k-maas yaabilt Jéeobaeʼ letiʼe k-kʼaj óoltik tubeel u Hijooʼ tumen letiʼeʼ jach ku yeʼesik bix u modos u Taata (Heb. 1:3). Junpʼéel tiʼ le baʼaxoʼob jach jeʼel u yáantkoʼon k-kʼaj óolt Jesúsoʼ letiʼe ka k-xakʼalxokt le kanpʼéel Evangelioʼoboʼ. ¿Suukaʼan wa a xakʼalxoktik le Biblia sáamsamaloʼ? Wa maʼatecheʼ jeʼel u páajtal u káajal a beetik desde bejlaʼeʼ. Le kéen a xok baʼax tu yaʼalaj yéetel tu beetaj Jesúseʼ maʼalob ka a jach il bix le modos tu yeʼesoʼ. Letiʼeʼ uts tu tʼaan kaʼach u náatsʼal máak tu yiknal, hasta ku méekʼik le mejen paalaloʼoboʼ (Mar. 10:13-16). Yoʼolal bix u modoseʼ u discípuloʼobeʼ maʼ saajkoʼob kaʼach u tsikbaltoʼobtiʼ baʼax ku tuklikoʼobiʼ (Mat. 16:22). Jesúseʼ tu yeʼesaj le jatsʼuts modos yaan tiʼ u Taataoʼ. Toʼoneʼ jeʼel u páajtal k-orar tiʼ Jéeoba utiaʼal k-aʼaliktiʼ tuláakal baʼax yaan ichil k-puksiʼikʼaleʼ. K-ojel letiʼeʼ maʼ kun tuukul kʼaas tiʼ toʼon tumen jach u yaabiltmoʼon yéetel jach u kʼáat u yáantoʼon (1 Ped. 5:7).

⁶ Jesúseʼ tu chʼaʼaj óotsilil tiʼ le máakoʼoboʼ. Mateoeʼ tu yaʼalaj: «Le ka túun tu yilaj Jesús yaʼabkach máakoʼobeʼ, tu chʼaʼaj óotsilil tiʼob tumen beyoʼob tamanoʼob loobiltaʼanoʼob yéetel kʼiʼitpajaʼanoʼob tumen minaʼan mix máak kanáantkoʼob» (Mat. 9:36). Kux túun Jéeoba, ¿ku chʼaʼik wa óotsilil tiʼ le máakoʼoboʼ? Jesúseʼ tu yaʼalaj yoʼolal u Taata: «Maʼ u kʼáat ka saʼatak mix juntúul tiʼ le máaxoʼob beyoʼob mejen paalaloʼobaʼ» (Mat. 18:14). ¿Máasaʼ jach ku kiʼimaktal k-óol k-ojéeltik jach u yaabiltmoʼon Jéeoba? Jeʼex kun bin k-maas kʼaj óoltik Jesúseʼ bey xan kun bin k-maas yaabiltik Jéeobaoʼ.

7. ¿Baʼaxten maʼalob ka a bisaba yéetel le sukuʼunoʼob yiijchajaʼan u tuukuloʼoboʼ?

⁷ Yaan uláakʼ baʼax jeʼel u yáantkech utiaʼal ka a maas yaabilt Jéeoba yéetel ka progresarnakecheʼ. Letiʼe ka a bisaba yéetel le sukuʼunoʼob bey xan yéetel le kiikoʼob yiijchajaʼan u tuukuloʼoboʼ. Letiʼobeʼ mantatsʼ kiʼimak u yóoloʼob yéetel maʼatech u arrepentiroʼob úuchik u chʼaʼtuklikoʼob u meyajtikoʼob Jéeoba. Aʼaltiʼob ka u tsikbaltoʼobtech jujunpʼéel tiʼ le baʼaxoʼob tsʼoʼok u yúuchultiʼoboʼ. Le kéen kʼaʼabéetchajak a chʼaʼtuklik junpʼéel baʼal jach kʼaʼanaʼan ichil a kuxtaleʼ kʼáat consejo tiʼob. Le Bibliaoʼ ku yaʼalik: «Tuʼux yaan yaʼab máakoʼob ku nuʼuktajoʼob tubeeleʼ tuláakal ku jóokʼol maʼalobil» (Pro. 11:14).

8. ¿Baʼax jeʼel u páajtal a beetik wa ku káajal u kaʼapʼéeltal a tuukuleʼ?

 ⁸ Maʼ a chaʼik u kaʼapʼéeltal a tuukul. Jeʼex t-ilil teʼ  párrafo 2, le Kʼaasilbaʼaloʼ yaan u beetik tuláakal le ku páajtal utiaʼal maʼ a progresar. Letiʼeʼ u kʼáat ka kaʼapʼéelchajak a tuukul yéetel ka xuʼuluk a confiar tiʼ le baʼax ku yaʼalik le Bibliaoʼ. Teʼ kʼiinoʼobaʼ deporsi yaan u kʼuchul u kʼiinil a wuʼuyik u yúuchul tʼaan tiʼ le evoluciónoʼ, lelaʼ junpʼéel kaʼansaj ku bin tu contra le baʼax ku yaʼalik Jéeobaoʼ. Maʼ xaaneʼ kaʼacheʼ maʼatech a jach tuukul tiʼ le evoluciónoʼ. Chéen baʼaleʼ beora táan a táankelemtalaʼ le kun kaʼansbiltech teʼ escuelaoʼ. Maʼ xaaneʼ yaan a wuʼuyik bey jach jaaj le baʼax ku kaʼanskoʼobtech a maestroʼoboʼ. Chéen baʼaleʼ kʼaʼajaktecheʼ maʼ xaaneʼ letiʼobeʼ mix juntéen u xakʼaltoʼob le baʼaxoʼob eʼesik yaan Máax Beetmil tuláakal baʼaloʼ. Proverbios 18:17, ku yaʼalik: «Tiʼ junpʼéel juicioeʼ le máax ku yáax tʼaanoʼ bey jach jaaj baʼax ku yaʼalikeʼ, pero kéen kʼuchuk le máax tak u pooloʼ ku yilaʼal wa jach jaaj le baʼax tu yaʼaloʼ». ¿Baʼax ku kaʼansiktech le tekstoaʼ? Ku kaʼansikeʼ maʼ unaj a jáan creertik tuláakal baʼax ku kaʼansaʼaltech teʼ escuelaoʼ, baʼaxeʼ táanileʼ kʼaʼabéet a xakʼalxoktik le Bibliaoʼ. Xakʼalxokt xan le publicaciónoʼob ku jóoʼsik u testigoʼob Jéeobaoʼ. Tsikbalnen yéetel le sukuʼunoʼob ku creerkoʼob kaʼach le evoluciónoʼ yéetel kʼáattiʼob baʼax áantoʼob utiaʼal ka u creertoʼob yaan juntúul Dios beetmil tuláakal baʼal yéetel jach u yaabiltmaj máak. * Lelaʼ yaan u yáantkech utiaʼal a tuukul tiʼ le baʼaxoʼob eʼesik yaan Máax Beetmil tuláakal baʼaloʼ.

9. ¿Baʼax jeʼel u páajtal k-kanik tiʼ u experiencia Melissaeʼ?

⁹ Juntúul kiik ku kʼaabaʼtik Melissaeʼ le baʼax áant le ka kaʼapʼéelchaj u tuukuloʼ letiʼe u xakʼalxoktik le publicaciónoʼob ku tʼaanoʼob tiʼ le baʼaloʼob beetaʼanoʼoboʼ. * Letiʼeʼ ku yaʼalik: «Le maestroʼoboʼ yéetel u jaajil u yóoloʼob ku kaʼanskoʼob le evoluciónoʼ le oʼolal jeʼel u káajal u creertik máakeʼ. Tu káajbaleʼ saajken kaʼach xakʼalxook, tumen bik in wil jach jaaj le evoluciónoʼ. Chéen baʼaleʼ kʼaʼajteneʼ Jéeobaeʼ u kʼáat ka k-il wa jach jaaj le baʼax k-creerkoʼ le oʼolal tin chʼaʼtuklaj in xakʼalxook». Melissaeʼ tu xokaj le folleto Bix káajik le kuxtaloʼ. Cinco preguntaʼob unaj u xakʼaltaʼal bey xan uláakʼ publicaciónoʼob. *  Letiʼeʼ ku seguer u yaʼalik: «Jach letiʼe baʼax kʼaʼabéetten kaʼachoʼ. Bejlaʼa úuch kaʼach in xokoʼobeʼ».

10, 11. ¿Baʼax jeʼel u yáantkech utiaʼal maʼ a lúubul tiʼ baʼax kʼaaseʼ? (1 Tesalonicenses 4:3, 4).

¹⁰ Kanáantaba tiʼ baʼax kʼaas. Le táan u bin u táankelemtal máakoʼ jach ku tsʼíiboltik u yantaltiʼ relaciones sexuales, ku tsʼoʼokoleʼ u maasileʼ maʼ xaaneʼ jeʼel u sen aʼalikoʼobtech ka núupkʼebanchajkecheʼ. Satanáseʼ u kʼáat ka suʼusutaʼakech tumen a tsʼíibolaloʼob. ¿Baʼax jeʼel u yáantkech utiaʼal maʼ a núupkʼebantaleʼ? (Xok 1 Tesalonicenses 4:3, 4). Le kéen orarnakech tiʼ Jéeobaeʼ aʼaltiʼ bix a wuʼuyikaba yéetel kʼáattiʼ ka u tsʼáatech u muukʼil utiaʼal maʼ a lúubul tiʼ baʼax kʼaas (Mat. 6:13). Kʼaʼajaktecheʼ letiʼeʼ dispuesto u yáantech yéetel maʼ tu jáan juzgarkech (Sal. 103:13, 14). Le Bibliaoʼ jach jeʼel xan u yáantkecheʼ. Melissa, le máax t-chʼaʼchiʼitaj teʼ párrafo 9, yanchaj u luchar yéetel le kʼaakʼas tuukuloʼob ku yantaltiʼoʼ. Letiʼeʼ ku yaʼalik: «Le baʼax áantenoʼ letiʼe in xokik le Biblia sáamsamaloʼ. Ku kʼaʼajsikteneʼ in kuxtaleʼ u tiaʼal Jéeoba, tsʼoʼoleʼ maʼ in kʼáat ka náachchajak tiʼ teniʼ» (Sal. 119:9).

¹¹ Kʼaʼajaktecheʼ maʼ chéen ta juunal yanechiʼ. Aʼal tiʼ a papá wa tiʼ a maama baʼax ku yúuchultech. U jaajileʼ yaan baʼaloʼobeʼ maʼ chéen chʼaʼabil a waʼaliktiʼobiʼ, chéen baʼaleʼ jach maʼalob ka a waʼaltiʼob. Melissaeʼ ku yaʼalik: «Tin kʼáataj tiʼ Jéeoba ka u yáanten utiaʼal maʼ in lúubul tiʼ baʼax kʼaas. Ku tsʼoʼokoleʼ tin waʼalaj tiʼ in papá baʼax ku yúuchulten. Leloʼ jach tu yáanten. Tsʼoʼoleʼ in wojleʼ Jéeobaeʼ kiʼimak u yóol tin wéetel».

12. ¿Baʼax jeʼel u yáantkech a chʼaʼ maʼalob decisiónoʼobeʼ?

¹² Chaʼa u nuʼuktikech baʼax ku yaʼalik le Bibliaoʼ. Le kéen maas yanak a jaʼabileʼ maas yaan u béeytal a chʼaʼtuklik jujunpʼéel baʼaloʼob, chéen baʼaleʼ beoraaʼ u jaajileʼ yaʼab baʼaloʼob maʼ a wojliʼ. ¿Baʼax jeʼel u yáantkech utiaʼal maʼ a beetik junpʼéel baʼal kʼaas tu táan Jéeobaeʼ? (Pro. 22:3). Juntúul kiik ku kʼaabaʼtik Karieʼ ku yaʼalik baʼax áant u chʼaʼ maʼalob decisiónoʼob. Tu tsʼáaj cuentaeʼ le máaxoʼob yiijchajaʼan u tuukuloʼoboʼ maʼ kʼaʼabéettiʼob junpʼéel lista tiʼ le baʼaloʼob maʼ unaj u beetaʼaloʼ. Karieʼ ku yaʼalik: «Tin wileʼ le baʼax unaj in beetkoʼ letiʼe in naʼatik bix u yilik Jéeoba tuláakal baʼaloʼ, maʼ ka yanakten junpʼéel lista tiʼ le baʼaloʼob maʼ unaj in beetkoʼ». Le kéen a xok le Bibliaoʼ tukulte: «Le baʼax tsʼoʼok in xokikaʼ, ¿bix u yáantken in wil bix u tuukul Jéeoba? ¿Bix u yáantken utiaʼal ka in beet baʼax maʼalob? Wa ka in tsʼáa ichil in kuxtaleʼ, ¿baʼax utsil jeʼel u taasikteneʼ?» (Sal. 19:7; Isa. 48:17, 18). Wa ka xokik le Biblia yéetel ka tuukul tiʼ baʼax ku yaʼalikoʼ maas yaan a chʼaʼik decisiónoʼob ku kiʼimakkúuntik u yóol Jéeoba. Jeʼex kun bin a xokik le Bibliaoʼ yaan a maas naʼatik bix u tuukul Jéeoba yéetel yaan a tsʼáaik cuenta maʼ kʼaʼabéettech junpʼéel lista tiʼ le baʼaxoʼob maʼ unaj a beetkoʼ. Bey u yilaʼal táan u yiijtal u tuukul máakoʼ.

13. ¿Bix jeʼel u yáantkech le maʼalob amigoʼoboʼ? (Proverbios 13:20).

¹³ A amigoʼobeʼ unaj u yaabiltmoʼob Jéeoba. Jeʼex t-ilil teʼ párrafo 7, a amigoʼobeʼ jach jeʼel u yáantkechoʼob progresareʼ (xok Proverbios 13:20). Uʼuy baʼax úuch tiʼ juntúul kiik ku kʼaabaʼtik Sara. Letiʼeʼ táan kaʼach u pʼáatal maʼ kiʼimak u yóol u meyajtik Jéeobaiʼ, chéen baʼaleʼ yaan junpʼéel baʼax áant teʼ súutukil jeʼeloʼ. Saraeʼ ku yaʼalik: «Yanchajten jach maʼalob amigoʼob teʼ súutuk ka kʼaʼabéetchajtenoʼ. Cada semanaeʼ teen yéetel juntúul in amigaeʼ k-muchʼikba utiaʼal k-xakʼalxoktik U Pʼíich Tulumil Kanan, ku tsʼoʼokoleʼ uláakʼ juntúul in amigaeʼ tu animarten utiaʼal in comentar teʼ  muchʼtáambaloʼoboʼ. In amigoʼobeʼ tu yáantenoʼob in wil kʼaʼabéet in orar mantatsʼ bey xan in xakʼalxook. Le oʼolaleʼ jujunpʼíitileʼ joʼopʼ in maas biskinba yéetel Jéeoba yéetel kaʼa kiʼimakchaj in wóol».

14. ¿Baʼax áant Julien u kaxt maʼalob amigoʼob?

¹⁴ ¿Baʼax jeʼel u yáantkech a kaxt maʼalob amigoʼobeʼ? Juntúul anciano ku kʼaabaʼtik Julieneʼ ku yaʼalik: «Tin táankelmileʼ tin kaxtaj maʼalob amigoʼob úuchik in jóokʼol kʼaʼaytaj. Letiʼobeʼ jach ku tsʼáaik u yóoloʼob kʼaʼaytaj. Tu yáantenoʼob in wileʼ jach jeʼel u disfrutartik máak u beetik le meyaj jeʼeloʼ. Le oʼolal tin chʼaʼtuklaj in beetik in precursoril. Tin tsʼáaj cuenta xaneʼ tumen chéen táan in biskinba yéetel in wéet jaʼabiloʼobeʼ táan kaʼach in perdertik u oportunidadil in biskinba yéetel máakoʼob jach jeʼel u yáantkenoʼobeʼ. Tsʼoʼoleʼ le ka binen Beteleʼ yanchajten jach maʼalob amigoʼob xan. Letiʼobeʼ tu yáantenoʼob in wil yéetel baʼax unaj in náaysik in wóol, le oʼolal béeychaj in maas biskinba yéetel Jéeoba».

15. ¿Baʼax tu yaʼalaj Pablo tiʼ Timoteo? (2 Timoteo 2:20-22).

¹⁵ ¿Kux túun wa ka tsʼáaik cuenta teʼ múuchʼuliloʼ yaan juntúul máax maʼ táan u yáantkech a beet baʼax maʼalobiʼ? Úuchjeakileʼ le apóstol Pablooʼ u yojleʼ ichil le sukuʼunoʼob teʼ yáax siglooʼ yaan máakoʼob maʼatech u jach beetkoʼob kaʼach baʼax ku yaʼalik Jéeoba. Le oʼolaleʼ tu yaʼalaj tiʼ Timoteo ka u náachkuntuba tiʼ le máakoʼob beyoʼ (xok 2 Timoteo 2:20-22). Kʼaʼajaktecheʼ le u biskuba máak yéetel Jéeobaoʼ junpʼéel baʼal jach jatsʼuts yéetel yanchaj a beetik yaʼab baʼaloʼob utiaʼal u béeytal u káajal a biskaba tu yéetel, le oʼolal maʼ unaj a chaʼik tiʼ mix máak ka u beet u xuʼulul a biskaba tu yéeteliʼ (Sal. 26:4).

16. ¿Baʼax metasil maʼalob ka a tsʼáa ichil a kuxtal?

¹⁶ Tsʼáa maʼalob metas ichil a kuxtal. ¿Bey máakalmáakoʼobeʼ? Chʼaʼtukult a beetik baʼaloʼob jeʼel u muʼukʼaʼankúuntikoʼob a fejeʼ yéetel jeʼel u yáantkechoʼob a meyajt maas maʼalob Jéeobaeʼ (Efe. 3:16). Maʼalob ka maas suukak a xokik le Bibliaoʼ bey xan a xakʼalxook (Sal. 1:2, 3). Maʼalob xan ka maas suukak a orar tiʼ Jéeoba yéetel tuláakal a puksiʼikʼal. Maʼalob xan ka a maas kanáant yéetel baʼax ka náaysik a wóol bey xan a kanik bix unaj u meyajtech le  tiempo yaantechoʼ (Efe. 5:15, 16). Jéeobaeʼ jach ku kiʼimaktal u yóol le kéen u yil bix a tsʼáaik a wóol progresar.

17. ¿Baʼax utsil jeʼel u taasiktech wa ka wilik a wáantik u maasileʼ?

¹⁷ U jaajileʼ le kéen a wil a wáantik u maasileʼ ku chíikpajal táan a progresar. Jesúseʼ tu yaʼalaj: «Maas ku taasik kiʼimak óolal u tsʼaʼabal wa baʼax ke u kʼaʼamal wa baʼax» (Hech. 20:35). Jeʼex k-ilkoʼ jach jeʼel u bintech utsil wa ku meyajtech a tiempo yéetel a muukʼ utiaʼal a wáantik u maasileʼ. ¿Baʼax jeʼel u páajtal a beetik yoʼolal u maasileʼ? Maʼalob ka a chʼaʼtukult a wáantik le sukuʼunoʼob yaan u jaʼabiloʼoboʼ wa le kʼojaʼanoʼoboʼ. Maʼ xaaneʼ jeʼel u páajtal a bin a man baʼax kʼaʼabéettiʼobeʼ wa a wáantkoʼob yéetel le túumben baʼaloʼob jeʼex le celular wa le tabletoʼ. Wa tsʼoʼok a wokjaʼeʼ maʼalob xan ka a chʼaʼtukult a beetik a siervo ministerialil tumen beyoʼ yaan u páajtal a maas meyajtik le sukuʼunoʼoboʼ (Fili. 2:4). Utiaʼal xan a weʼesik yaabilaj tiʼ le máaxoʼob maʼatech u meyajtikoʼob Diosoʼ jeʼel u páajtal a tsikbaltiktiʼob le baʼaloʼob maʼalobtak ken u beet le Reinooʼ (Mat. 9:36, 37). Tsʼoʼoleʼ wa ku páajtaleʼ maʼalob xan ka a chʼaʼtukult a beetik a precursoril, a bin meyaj Betel wa a táakpajal tiʼ construcción.

18. ¿Bix u yáantkech progresar le a maas tsʼáaik a wóol a meyajt Diosoʼ?

¹⁸ Le kéen a wil a maas meyajtik Jéeobaeʼ ku yáantkech progresar. Le kéen a beetaba precursorileʼ ku páajtal xan a bin teʼ Escuela utiaʼal Máaxoʼob Kʼaʼaytik le Reinooʼ, a bin Betel wa a bin construcción. Juntúul x-lóoʼbayan precursora ku kʼaabaʼtik Kaitlyneʼ ku yaʼalik: «Le in kʼaʼaytaj yéetel le sukuʼunoʼob yéetel le kiikoʼob yaan experiencia tiʼoboʼ jach tu yáanten progresar ka tsʼoʼok in wokjaʼ. Letiʼobeʼ tu yáantenoʼob utiaʼal in maas xakʼalxoktik le Bibliaoʼ bey xan utiaʼal in kaʼansaj maas maʼalob».

19. ¿Baʼax utsil ken u taastech wa ku seguer a progresar?

¹⁹ Wa ku seguer a progresareʼ jach yaan u bendecirkech Jéeoba yéetel maʼ ken a xuʼuxup a muukʼ tiʼ baʼaloʼob minaʼan u biilaloʼob (1 Juan 2:17). Maʼ kan sen muʼyaj jeʼex le máaxoʼob ku chʼaʼtuklik u beetkoʼob baʼaloʼob maʼ maʼalobtakoʼ. Baʼaxeʼ jach yaan u kiʼimaktal a wóol yéetel yaan u bintech utsil ichil a kuxtal (Pro. 16:3). Le maʼalob ejemplo ken a tsʼáaoʼ yaan u yáantik le táankelmoʼob yéetel le máaxoʼob yaan u jaʼabiloʼoboʼ (1 Tim. 4:12). Tsʼoʼoleʼ u maas maʼalobileʼ yaan u kiʼimaktal a wóol tumen maʼalob yanikech tu táan Jéeoba yéetel ka biskaba tu yéetel (Pro. 23:15, 16).