Maʼ xaaneʼ maʼ tiʼ káaj u creertaʼaliʼ, koʼox ilik baʼaxten bey k-aʼalikoʼ. Le Kʼaasilbaʼaloʼ maʼ tu yaʼalaj tiʼ Eva wa chéen u wíinklil kun kíimil yéetel yaan baʼax kun pʼáatal kuxaʼanil tiʼiʼ (yaʼab máax aʼalikeʼ yaan u pixan máak yéetel maʼ tu kíimil). Tiʼ Satanaseʼ meyajnaj le kaan utiaʼal u yaʼalik tiʼ Eva jach junpuliʼ maʼ tun kíimiloʼ. Lelaʼ u kʼáat u yaʼaleʼ yaan u seguer u kuxtal way Luʼumeʼ yéetel yaan u yantal junpʼéel kuxtal maas maʼalob tiʼ tumen maʼ tun kʼaʼabéettal u yuʼubik u tʼaan Dios (Gén. 2:17; 3:3-5).

Jeʼex túun k-ilkoʼ le maʼ jaajil kaʼansajaʼ maʼ káaj tu jardinil Edeniʼ. ¿Baʼax kʼiin túun ka káaj u kaʼansaʼal? U jaajileʼ maʼ jach ojéelaʼaniʼ. K-ojleʼ le ka taal le Búulkabaloʼ xuʼulsaʼab tuláakal le maʼ jaajil kaʼansajoʼoboʼ. ¿Baʼaxten? Tumen ka tsʼoʼok le Búulkabaloʼ chéen pʼáat kuxaʼanil Noé yéetel u familia, letiʼobeʼ chéen Jéeoba ku adorartikoʼob.

Bey túunoʼ u kaʼansaʼal yaan baʼax ku pʼáatal kuxaʼanil tiʼ máak kéen kíimkeʼ káaj le ka tsʼoʼok le Búulkabaloʼ. Le ka xaʼakʼbesaʼab u tʼaan le máakoʼob le táan u beetaʼal u torreil Babel yéetel ka kʼiʼitpajoʼob «tuláakal yóokʼol kaab[eʼ]», káaj u kaʼanskoʼob baʼax ku creertikoʼob teʼ tuʼux binoʼob kajtaloʼ. Ichil le baʼaxoʼob tu kaʼansoʼoboʼ táakaʼan le u yaʼalaʼal yaan baʼax ku pʼáatal kuxaʼanil tiʼ máak kéen kíimkoʼ (Gén. 11:8, 9). Jeʼex túun k-ilkoʼ maʼ tu páajtal u yaʼalaʼal jach baʼax kʼiin ka káaj u creertaʼal le maʼ jaajil kaʼansajaʼ. Baʼax jach k-ojleʼ Satanás, «u taatail le tuusoʼ», letiʼ beet u káajal u kaʼansaʼal. Tsʼoʼoleʼ jach kiʼimakchaj u yóol ka tu yilaj káaj u creertaʼal tiʼ tuláakal yóokʼol kaab (Juan 8:44).