Wa ta xokaj u revistailoʼob U Pʼíich Tulumil Kanan 2020, ¿jeʼel wa u páajtal a núukik le kʼáatchiʼobaʼ?

¿Bix unaj k-tratartik le yéeyaʼanoʼoboʼ?

K-respetarkoʼob pero maʼ tu píitmáan k-alabarkoʼob yéetel maʼatech k-tratarkoʼob bey máakoʼob jach especialoʼobeʼ (Jud. 16). Maʼatech xan k-kʼáatiktiʼob bix úuchik u yéeyaʼaloʼobiʼ (w20.01, página 29).

¿Baʼaxten k-ojel jach tu jaajil ku chʼaʼikoʼon en cuenta Jéeoba?

Le Bibliaoʼ ku yaʼalikeʼ antes k-síijileʼ Jéeobaeʼ u yojliliʼ kuxaʼanoʼoneʼ, ku chʼenxikintik xan le oraciónoʼob k-beetiktiʼoʼ. U yojel bix k-uʼuyikba yéetel baʼax k-tuklik. Le bix k-kuxtaloʼ jeʼel u beetik u kiʼimaktal u yóol wa u yaatal u yóoleʼ (1 Cró. 28:9; Pro. 27:11). Tsʼoʼoleʼ letiʼeʼ tsʼoʼok u natsʼkoʼon tu yiknal (w20.02, página 12).

¿Tiʼ baʼax súutukil unaj k-tʼaan?

Ku kiʼimaktal k-óol kéen k-tsikbalt tiʼ u maasil yoʼolal Jéeoba. Unaj xan k-tʼaan kéen k-il yaan máax nukaʼaj u beet junpʼéel baʼal kʼaas. Le ancianoʼob xanoʼ kéen u yiloʼob kʼaʼabéeteʼ ku tsolnuʼutikoʼob wa máax. Maʼatech k-kʼáatik mix k-tsikbaltik bix u bin le kʼaʼaytaj tuʼux k-ojel prohibirtaʼan u meyajtaʼal Jéeobaoʼ. Maʼatech k-tsikbaltik baʼax maʼ unaj u yojéeltaʼaliʼ (w20.03, página 20, 21).

¿Baʼax eʼesik maʼ igual u profecíail le sáakʼoʼob ku yaʼalik Joel capítulo 2 tiʼ le ku yaʼalik Apocalipsis capítulo 9?

Joel 2:20-29, ku yaʼalikeʼ Dioseʼ yaan u beetik u náachtal le sáakʼoʼoboʼ yéetel ku yaʼalikeʼ yaan u sutik le baʼaxoʼob peʼerchaj úuchik u máan le sáakʼoʼoboʼ. Dioseʼ tu yaʼalaj xan yaan u tsʼáaik u poder wa u espíritu santo. Le profecíaaʼ béeychaj le ka bin le babilonioʼob u baʼateltoʼob Israeloʼ yéetel béeychaj xan desde tu añoil 33. Le baʼax ku yaʼalik Apocalipsis 9:1-11, ku yeʼesikeʼ le yéeyaʼanoʼob kuxaʼanoʼob teʼ kʼiinoʼobaʼ maʼ sajak u yaʼaloʼob tiʼ le máaxoʼob kʼasaʼanoʼob yaan u xuʼulsaʼaloʼob tumen Diosoʼ. Le máaxoʼob uʼuyik le baʼax ku kʼaʼaytikoʼoboʼ ku sen muʼyajoʼob (w20.04, página 3-6).

¿Máax u reyil xaman teʼ kʼiinoʼobaʼ?

Rusia yéetel le máaxoʼob áantkoʼ. Letiʼobeʼ tsʼoʼok u yeʼeskoʼob jach u pʼekmoʼob u kaajal Jéeoba, tsʼoʼok tak u prohibirkoʼob le meyaj ku beetik u kaajal Jéeobaoʼ. U reyil xaman yéetel u reyil noojoleʼ mantatsʼ táan u atacarkubaʼob (w20.05, página 13).

¿Chéen wa le modos ku yaʼalik Gálatas 5:22, 23 ku beetik u yantal tiʼ máak le espíritu santooʼ?

Maʼatech. Le espíritu santooʼ ku yáantkoʼon utiaʼal ka yanaktoʼon uláakʼ jatsʼuts modos jeʼex le justiciaoʼ (Efe. 5:8, 9) (w20.06, página 17).

¿Baʼaxten unaj k-kanáantik le baʼaxoʼob k-tsʼáaik teʼ redes sociales jeʼex fotoʼob, videoʼob yéetel le baʼaxoʼob k-tsʼíibtikoʼ?

Tumen le baʼaxoʼob k-tsʼáaikoʼ jeʼel u yeʼesik chéen táan k-presumireʼ yéetel jeʼel u yeʼesik wa jach tu jaajil humildeʼoneʼ (w20.07, página 6, 7).

¿Baʼax jeʼel k-kanik tiʼ le máaxoʼob u yojloʼob chuk kayoʼ?

Letiʼobeʼ ku binoʼob chuuk teʼ tuʼux yaan le kayoʼoboʼ bey xan teʼ hora maas jeʼel u chuukoʼoboʼ, u yojel u usart u nuʼukuloʼob yéetel maʼ saajkoʼob meyaj kex yaan hora maʼ chéen chʼaʼabiliʼ. Toʼon xaneʼ le kéen jóokʼkoʼon kʼaʼaytajeʼ unaj k-beetik jeʼex letiʼoboʼ (w20.09, página 5).

¿Bix jeʼel k-áantik le j-xoknáal u maas yaabilt Diosoʼ?

Unaj k-áantik ka suukak u xokik le Bibliaoʼ, unaj k-áantik ka tuukulnak tiʼ baʼax ku xokik yéetel unaj k-kaʼansik orar (w20.11, página 4).

¿Tiʼ máaxoʼob táan kaʼach u tʼaan Pablo le ka tu yaʼalaj tu yoʼolal Cristoeʼ «tiʼ tuláakal máak kun tsʼaabil kuxtal»? (1 Cor. 15:22).

Le apóstol Pablooʼ maʼ táan u yaʼalik wa tuláakal máak kun kaʼa kuxkíintbiliʼ. Le ka tu yaʼalaj «tuláakal» máakeʼ táan u tʼaan tiʼ le yéeyaʼanoʼoboʼ, le máaxoʼob tʼaʼanoʼob utiaʼal u yantaloʼob «junmúuchʼ yéetel Cristo[oʼ]» (1 Cor. 1:2; 15:18) (w20.12, página 5, 6).

¿Baʼax ken u beet le yéeyaʼanoʼob le kéen xiʼikoʼob teʼ kaʼan «le táan u paʼaxal le u tsʼook trompetaoʼ»? (1 Cor. 15:51-53).

Yaan u yáantkoʼob Jesús utiaʼal ka u nuʼukt le máakoʼob yéetel junpʼéel «xóolteʼ de fierrooʼ» (Apo. 2:26, 27) (w20.12, página 12, 13).