1. ¿Bix le jeetsʼelil ku taal tiʼ Diosoʼ, yéetel bix u yáantkoʼon? (Filipenses 4:6, 7).

 U JEETSʼELIL Dioseʼ maʼ tiʼ tuláakal máak yaniʼ. Le jeetsʼelilaʼ ku beetik u yuʼubikuba máak maʼalobil tumen ku biskuba maʼalob yéetel Jéeoba. Ku beetik xan u yuʼubik máak kanáantaʼan yéetel maʼ saajkiʼ (xok Filipenses 4:6, 7). Tsʼoʼoleʼ ku beetik k-bisikba jach maʼalob yéetel le máaxoʼob yaabiltmil Diosoʼ bey xan yéetel Jéeoba, «le máax tsʼáaik jeetsʼeliloʼ» (1 Tes. 5:23). Kéen k-kʼaj óolt Jéeoba, kéen confiarnakoʼon tiʼ yéetel le kéen k-beet baʼax ku yaʼalikeʼ ku yantaltoʼon le jeetsʼelil ku tsʼáaikoʼ. Le jeetsʼelilaʼ ku yáantkoʼon utiaʼal maʼ k-chiʼichnaktal kéen k-aktáant problemas.

2. ¿Bix k-ojéeltik jeʼel u yantaltoʼon jeetsʼelileʼ?

² ¿Jach wa tu jaajil jeʼel u yantaltoʼon le jeetsʼelil ku tsʼáaik Dios kex ka yanak nukuch problemaseʼ? ¿Jeʼel wa u pʼáatal máak tranquiloil kex yaan kʼaakʼas kʼojaʼaniloʼob, nukuch loobiloʼob, u sen baʼateʼel le máakoʼoboʼ bey xan wa tu chʼaʼpachtaʼaleʼ? Le baʼaloʼobaʼ jeʼel u beetik u sajaktal máakeʼ. Pero Jesúseʼ tu yaʼalaj tiʼ u discípuloʼob: «Maʼ a chaʼikeʼex u péek u yóol a puksiʼikʼaleʼex mix u chʼaʼik saajkil» (Juan 14:27). Yaʼab sukuʼunoʼob táan u beetkoʼob le baʼax tu yaʼalaj Jesúsoʼ. Yéetel u yáantaj Jéeobaeʼ yaantiʼob jeetsʼelil kex táan u aktáantkoʼob nukuch problemas.

3. ¿Bix u kʼexik u kuxtal máak junpʼéel epidemia wa junpʼéel pandemia?

³ Junpʼéel epidemia wa junpʼéel pandemiaeʼ jeʼel u kʼexik u kuxtal máakeʼ. Tuukulnakoʼon tiʼ bix tsʼoʼok u afectartik u kuxtal yaʼab máak le COVID-19. Tiʼ junpʼéel encuesta beetaʼabeʼ maas tiʼ u táanchumukil le máakoʼoboʼ tu yaʼaloʼobeʼ le pandemiaoʼ tu  beetaj maʼ u weenloʼob tubeel. Tsʼoʼoleʼ tiʼ yaʼab máakeʼ tsaʼay ansiedad, depresión, káaj u káaltaloʼob, u drogarkubaʼob, u maltratarkubaʼob ichil u familiaʼob yéetel yanoʼobeʼ taakchaj u kíimskubaʼob. Wa yaan junpʼéel kʼaakʼas kʼojaʼanil teʼ tuʼux kajaʼanechoʼ, ¿baʼax jeʼel a beetik utiaʼal maʼ a sen chiʼichnaktal yéetel utiaʼal ka yanaktech le jeetsʼelil ku tsʼáaik Diosoʼ?

4. ¿Baʼaxten ku tsʼáaiktoʼon jeetsʼelil k-ojéeltik le baʼax tu yaʼalaj Jesúsoʼ?

⁴ Jesúseʼ tu yaʼaleʼ teʼ tu tsʼook kʼiinoʼobaʼ «yaan u yantal kʼaakʼas kʼojaʼaniloʼob» jejeláas tuʼuxoʼob (Luc. 21:11). K-ojéeltik leloʼ ku tsʼáaiktoʼon jeetsʼelil tumen k-ojliliʼ yaan u yúuchleʼ. K-tsʼáaik cuenta táan u béeytal tuláakal le baʼax tu yaʼalaj Jesúsoʼ, le oʼolal k-beetik le baʼax tu yaʼalaʼ: «Ilawil maʼ a sajaktaleʼex» (Mat. 24:6).

5. 1) Jeʼex u yaʼalik Filipenses 4:8, 9, ¿baʼax unaj k-kʼáatik tiʼ Jéeoba kéen yanak junpʼéel kʼaakʼas kʼojaʼanil? 2) ¿Bix u yáantkoʼon k-uʼuyik u grabaciónil le Bibliaoʼ?

⁵ Le kéen yanak junpʼéel kʼaakʼas kʼojaʼanileʼ normal u sajaktal máak yéetel u chiʼichnaktal. Lelaʼ letiʼe baʼax úuch tiʼ juntúul kiik ku kʼaabaʼtik Desioʼ. b U tío, u primo yéetel le doctor atenderkoʼ kíimoʼob yoʼolal COVID-19, le oʼolal Desieʼ sajak u contagiartaʼal yéetel ka u contagiart u maama tumen tsʼoʼok u chan yantal u edad. Tsʼoʼoleʼ sajak xan u luʼsaʼal meyajtiʼ tumen wa maʼeʼ tuʼux ken u chʼaʼ taakʼin utiaʼal u manik baʼal u jaantoʼob yéetel utiaʼal u boʼotik u rentaʼob. Chéen táan u sen tuukul tiʼ le baʼax ku yúuchultiʼoʼ, le oʼolal mix tu páajtal kaʼach u wenel. Pero kaʼa anchaj jeetsʼelil tiʼ. ¿Baʼax áante? Tu sen kʼáataj tiʼ Jéeoba ka áantaʼak utiaʼal maʼ u sen chiʼichnaktal yéetel utiaʼal ka tuukulnak tiʼ uláakʼ baʼaloʼob, maʼ chéen tiʼ u problemasiʼ (xok Filipenses 4:8, 9). Tsʼoʼoleʼ le kéen u yuʼub u grabaciónil u xookil le Bibliaoʼ ku yuʼubik bey táan u tʼaʼanal tumen Jéeobaeʼ. Letiʼeʼ ku yaʼalik: «Kéen in wuʼuy u xookil le Bibliaoʼ ku xuʼulul in chiʼichnaktal yéetel ku kʼaʼajalten táan in kanáantaʼal tumen Jéeoba» (Sal. 94:19).

6. ¿Bix jeʼel u yáantkoʼon k-xakʼalxook yéetel k-bin teʼ muchʼtáambaloʼoboʼ?

⁶ U jaajileʼ kéen yanak junpʼéel kʼaakʼas kʼojaʼanileʼ ku kʼexpajal u kuxtal máak. Chéen baʼaleʼ maʼ unaj u xuʼulul k-xakʼalxook t-juunaliʼ yéetel k-bin teʼ muchʼtáambaloʼoboʼ. Le publicaciónoʼob yéetel le videoʼoboʼ ku kʼaʼajskoʼobtoʼoneʼ yaʼab sukuʼunoʼob yaantiʼob problemas jeʼex le yaantoʼonoʼ, pero kex beyoʼ chúukaʼan u yóoloʼob tiʼ Jéeoba (1 Ped. 5:9). Teʼ muchʼtáambaloʼoboʼ ku líiʼsaʼal k-óol yéetel ku páajtal k-líiʼsik u yóol u maasil, tsʼoʼoleʼ ku yáantkoʼon xan utiaʼal k-kʼaʼajsik tekstoʼob jeʼel u líiʼskoʼob k-óoleʼ (Rom. 1:11, 12). Wa k-tuukul tiʼ bix u yáantik Jéeoba le máaxoʼob meyajtik le kéen kʼojaʼanchajkoʼob, kéen sajakchajkoʼob wa le kéen u yuʼububaʼob chéen tu juunaloʼobeʼ  yaan u muʼukʼaʼantal k-fe. Tsʼoʼoleʼ yaan k-maas creertik jeʼel u yáantkoʼon xaneʼ.

7. ¿Bix jeʼel k-beetik jeʼex apóstol Juaneʼ?

⁷ Beet tuláakal le ku páajtal utiaʼal u seguer a biskaba yéetel le sukuʼunoʼoboʼ. Junpʼéel epidemia wa junpʼéel pandemiaeʼ jeʼel u beetik maʼ u béeytal k-jach antal yéetel uláakʼ máakoʼobeʼ, tak yéetel le sukuʼunoʼoboʼ. Le kéen úuchuk beyaʼ jeʼel k-uʼuyikba jeʼex apóstol Juaneʼ. Letiʼeʼ jach taak kaʼach u yilik Gayo, u amigo (3 Juan 13, 14). Pero como u yojel maʼ tun páajtal u séeb ilkeʼ tu túuxtajtiʼ junpʼéel carta. Toʼon xaneʼ wa maʼ tu páajtal k-muchʼikba yéetel le sukuʼunoʼoboʼ jeʼel u páajtal k-tʼankoʼobeʼ, k-beetik videollamada wa k-túuxtik mensaje tiʼob. Wa k-beetik beyoʼ maʼ ken k-uʼuyba chéen t-juunal yéetel yaan k-uʼuyikba tranquiloʼon. Chéen baʼaleʼ, ¿kux túun wa jach chiʼichnakoʼon? Wa beyoʼ maʼalob ka tʼaanakoʼon yéetel le ancianoʼoboʼ yéetel ka k-kʼam le áantaj ku tsʼáaikoʼobtoʼonoʼ (Isa. 32:1, 2).

8. ¿Bix jeʼel k-uʼuyikba kéen úuchuk junpʼéel nojoch loobeʼ?

⁸ Maʼ xaaneʼ tsʼoʼok u xáantal chiʼichnakech tumen búul tuʼux kajaʼanech, eel le kʼáaxoʼ wa tu tíituba le luʼumoʼ. Tsʼoʼoleʼ wa ta perdertaj tuláakal baʼax yaantech bey xan wa kíim juntúul máax a yaabiltmeʼ maʼ xaaneʼ jach yaachajaʼan a wóol wa hasta pʼujaʼanech. Pero leloʼ maʼ u kʼáat u yaʼal wa a yaabiltmaj le ayikʼaliloʼoboʼ bey xan wa minaʼan a fejiʼ. Le baʼax úuchtechoʼ jach yaj, le oʼolal yaan máakeʼ jeʼel u páaʼtik ka jach yaachajak a wóoleʼ wa hasta ka pʼuʼujkech (Job 1:11). Chéen baʼaleʼ kex jeʼel bukaʼaj nojchil le problema yaantoʼonoʼ jeʼel u páajtal u yantaltoʼon jeetsʼelileʼ. Koʼox ilik bixi.

9. Le baʼax tu yaʼalaj Jesúsoʼ, ¿bix u prepararkoʼon le kéen yanak junpʼéel nojoch loobil?

⁹ Yaan máakeʼ ku tuklikeʼ mix juntéen kun úuchultiʼ junpʼéel nojoch loobil. Pero toʼoneʼ k-chʼaʼik en cuenta le baʼax tu yaʼalaj Jesúsoʼ, k-ojel yaan u sen úuchul baʼaloʼob kʼaastak yéetel jeʼel u afectarkoʼoneʼ. Jesúseʼ tu yaʼaleʼ táanil tiʼ le xuʼulsajoʼ yaan u sen «tíitkuba le luʼumoʼ» yéetel yaan u yantal nukuch loobiloʼob (Luc. 21:11). Tu yaʼalaj xaneʼ jach yaan u yantal kʼasaʼanil. Lelaʼ ku yilaʼal ikil u sen kíimskuba le máakoʼoboʼ bey xan ikil u sen yaʼabtal le terroristaʼoboʼ (Mat. 24:12). Jesúseʼ maʼ tu yaʼalaj wa chéen le máaxoʼob maʼ tu meyajtikoʼob Jéeoba kun afectarbiloʼob tumen le nukuch loobiloʼoboʼ. Teʼ kʼiinoʼobaʼ tak le máaxoʼob meyajtik Jéeobaoʼ ku muʼyajoʼob yoʼolal le nukuch loobiloʼoboʼ (Isa. 57:1; 2 Cor. 11:25). Maʼ xaaneʼ Jéeobaeʼ maʼ ken u beet junpʼéel milagro utiaʼal u salvarkoʼon kéen yanak junpʼéel nojoch loobil. Pero yaan u yáantkoʼon utiaʼal ka yanaktoʼon jeetsʼelil.

10. ¿Baʼaxten k-eʼesik yaan k-fe wa k-preparartikba antes tiʼ junpʼéel nojoch loobil? (Proverbios 22:3).

¹⁰ Wa ku prepararkuba máak antes tiʼ u yúuchul junpʼéel nojoch loobileʼ maʼ kun sen chiʼichnaktal. Pero wa ku beetik beyoʼ, ¿maʼ wa táan u yeʼesik maʼ tu confiar tiʼ Jéeobaiʼ? Maʼatech. Baʼaxeʼ táan u yeʼesik ku confiar yaan u kanáantaʼal. ¿Baʼaxten? Tumen le Bibliaoʼ ku yaʼalikeʼ kʼaʼabéet k-preparartikba antes tiʼ u yúuchul wa baʼax (xok Proverbios 22:3). Yéetel u xookil le revistaʼoboʼ, le muchʼtáambaloʼoboʼ bey xan yéetel le anuncioʼob ku tsʼaʼabaloʼ u kaajal Jéeobaeʼ ku yaʼaliktoʼon bix unaj k-preparartikba antes tiʼ u yúuchul junpʼéel nojoch loobil. c Wa k-confiar tiʼ Jéeobaeʼ desde beora ken k-beet le baʼax ku yaʼalikoʼ.

11. ¿Baʼax k-kanik tiʼ le baʼax tu beetaj kiik Margaretoʼ?

¹¹ Tuukulnakoʼon tiʼ le baʼax úuch tiʼ kiik Margaretoʼ. Le autoridadoʼoboʼ tu yaʼaloʼobtiʼ ka  jóokʼok tu yotoch tumen táan u yelel le kʼáax naatsʼ teʼ tuʼux kajaʼanoʼ. Como jach yaʼab máakoʼob táan u púutsʼloʼobeʼ chuup kaʼach le carreteraʼob yéetel cocheʼoboʼ, le oʼolal minaʼan tuʼux u máan máak kaʼachi. Tsʼoʼoleʼ como jach yaʼab buutsʼ yaneʼ Margareteʼ pʼáat ichil u coche. Pero como u prepararmuba tubeeleʼ tu salvartuba. Ichil u carteraeʼ u tsʼaamaj kaʼach junpʼéel mapa utiaʼal u yilik baʼax bejil ken u bise. Tsʼoʼoleʼ yáax viajarnajaʼan teʼ bejoʼ, beyoʼ maas chéen chʼaʼabil kun púutsʼul wa ku yúuchul wa baʼax.

12. ¿Baʼaxten unaj k-beetik le baʼax ku yaʼalaʼaltoʼonoʼ?

¹² Utiaʼal k-kanáantaʼaleʼ maʼ xaaneʼ le autoridadoʼoboʼ jeʼel u yaʼalikoʼobtoʼon ka pʼáatkoʼon t-otoch, ka xiʼikoʼon yaanal tuʼux wa ka k-beet uláakʼ baʼaloʼob. Pero yaan jujuntúul máakoʼobeʼ maʼ tu beetkoʼob le baʼax ku yaʼalaʼaltiʼoboʼ. Kux túun toʼon, ¿baʼax unaj k-beetik? Le Bibliaoʼ ku yaʼalik: «Tu yoʼolal Yuumtsileʼ tsʼáabaʼex yáanal u páajtalil tuláakal autoridad tsʼaʼan tumen wíinik. Tsʼáabaʼex yáanal u páajtalil juntúul rey tumen letiʼeʼ nojoch u autoridad, tsʼáabaʼex yáanal u páajtalil le gobernadoroʼoboʼ» (1 Ped. 2:13, 14). U kaajal Jéeobaeʼ ku yaʼaliktoʼon baʼaxoʼob unaj k-beetik utiaʼal k-kanáantikba. Mantatsʼ táan u yaʼaliktoʼon ka k-tsʼáa k-datos tiʼ le ancianoʼoboʼ, beyoʼ séeb kun ojéeltbil tuʼux yanoʼon wa ku yúuchul junpʼéel nojoch loob. Le oʼolaleʼ maʼ u tuʼubul a tsʼáaik a datos tiʼob. Maʼ xaaneʼ u kaajal Jéeobaeʼ yaan u yaʼaliktoʼon ka pʼáatkoʼon t-otoch, ka xiʼikoʼon yaanal tuʼux yéetel bix jeʼel k-kaxtik le baʼaxoʼob kʼaʼabéettoʼonoʼ. Wa maʼ xaaneʼ jeʼel u yaʼalaʼaltoʼon bix jeʼel k-áantik u maasileʼ yéetel baʼax kʼiin jeʼel k-beetkeʼ. Wa maʼ t-uʼuyik tʼaaneʼ jeʼel k-tsʼáaik tu chiʼ kíimil k-kuxtaleʼ bey xan u kuxtal le ancianoʼoboʼ (Heb. 13:17). Kiik Margareteʼ tu yaʼalaj: «Tin salvartinba tumen tin beetaj baʼax ku yaʼalik u kaajal Jéeoba bey xan le ancianoʼoboʼ».

13. Le sukuʼunoʼob ku pʼatik u yotochoʼoboʼ, ¿baʼax ku beetkoʼob utiaʼal ka yanaktiʼob jeetsʼelil?

¹³ Yoʼolal le nukuch loobiloʼoboʼ, le guerraʼob wa ikil u sen baʼateʼel le máakoʼoboʼ yaʼab sukuʼunoʼobeʼ ku kʼaʼabéettal u pʼatik u yotochoʼob. Kex beyoʼ ku yilik u séeb suuktaloʼob teʼ tuʼux ku binoʼob kajtaloʼ yéetel u séeb chʼaʼjoʼoltikoʼob u meyajtikoʼob Jéeoba. Letiʼobeʼ maʼ tu xuʼulul u tsikbaltikoʼob «le maʼalob baʼaloʼob ku yaʼalik u tʼaan Dios» jeʼex tu beetil le cristianoʼob teʼ yáax siglooʼ (Hech. 8:4). Ikil u  beetkoʼob beyoʼ ku tuukuloʼob tiʼ u Reino Dios maʼ tiʼ le problemas yaantiʼoboʼ. Tsʼoʼoleʼ ku kiʼimaktal u yóoloʼob yéetel ku yantal jeetsʼelil tiʼob.

14. ¿Baʼaxten jeʼel u xuʼulul u yantaltoʼon jeetsʼelil le kéen chʼaʼpachtaʼakoʼoneʼ?

¹⁴ Jach ku kiʼimaktal k-óol yéetel ku taasiktoʼon jeetsʼelil k-muchʼikba utiaʼal k-adorartik Jéeoba, k-kaʼansik baʼax ken u beete yéetel k-beetik uláakʼ baʼaloʼob utiaʼal k-adorartik. Chéen baʼaleʼ le kéen chʼaʼpachtaʼakoʼoneʼ ku pʼáatal maʼ tu páajtal k-beetik le baʼaloʼobaʼ. Leloʼ jeʼel u beetik k-chiʼichnaktaleʼ tumen maʼ k-ojel baʼax maas kun úuchliʼ. Normal u yuʼubikuba máak beyoʼ, chéen baʼaleʼ jeʼex tu yaʼalil Jesús tiʼ u discípuloʼobeʼ kʼaʼabéet k-kanáantik maʼ u xuʼulul u yantaltoʼon fe (Juan 16:1, 2). ¿Baʼax túun unaj k-beetik utiaʼal u yantaltoʼon jeetsʼelil kex ka chʼaʼpachtaʼakoʼoneʼ?

15. ¿Baʼaxten maʼ unaj k-sajaktal kéen chʼaʼpachtaʼakoʼoniʼ? (Juan 15:20; 16:33).

¹⁵ Le Bibliaoʼ ku yaʼalik: «Tuláakal le máaxoʼob u kʼáatoʼob u tsʼáaʼob ichil u kuxtaloʼob baʼax tu kaʼansaj Cristo yéetel u adorartoʼob Dioseʼ yaan xan u chʼaʼpachtaʼaloʼob» (2 Tim. 3:12). Andréi, juntúul sukuʼuneʼ, difícilchajtiʼ u creertik wa yaan u chʼaʼpachtaʼal le sukuʼunoʼob teʼ tuʼux kajaʼanoʼ. Letiʼeʼ ku tuklik kaʼachi: «Wayeʼ jach yaʼab Testigoʼob yaan, maʼ tin creertik u láaj kʼaʼalaloʼob». Pero kex bey u tuukuloʼ mantatsʼ chiʼichnak kaʼachi. Chéen baʼaleʼ u maasil sukuʼunoʼobeʼ maʼ tu tukloʼob wa maʼ tun kʼalbiloʼobiʼ. Tu pʼatoʼob tu kʼab Jéeoba tuláakal, le oʼolal maʼ sen chiʼichnakchajoʼobiʼ. Andréi túuneʼ tu yilaj u confiar tiʼ Jéeoba jeʼex tu beetil u maasil sukuʼunoʼoboʼ, yoʼolal leloʼ anchaj jeetsʼelil tiʼ yéetel kiʼimakchaj u yóol kex yaan problemas tiʼ. Toʼon xaneʼ jeʼel u yantaltoʼon jeetsʼelileʼ. U jaajileʼ Jesúseʼ tu yaʼaleʼ yaan k-chʼaʼpachtaʼal, pero tu yaʼalaj xaneʼ jeʼel u chúukpajal k-óol tiʼ Dioseʼ (xok Juan 15:20; 16:33).

16. ¿Baʼax unaj k-beetik kéen chʼaʼpachtaʼakoʼon?

¹⁶ Kéen prohibirtaʼak k-meyajtik Jéeobaeʼ maʼ xaaneʼ u najil Betel wa le ancianoʼoboʼ jeʼel u yaʼalikoʼobtoʼon baʼax unaj k-beetik utiaʼal k-kanáantikbaeʼ, bix kun tsʼaabiltoʼon le janal espiritualoʼ yéetel bix kun seguer k-kʼaʼaytaj. Kéen úuchuk beyoʼ unaj k-beetik le baʼax ku yaʼalaʼaltoʼonoʼ, kex yaan hora maʼ t-jach naʼatik jujunpʼéel baʼaloʼob (Sant. 3:17). Tsʼoʼoleʼ junpuliʼ  maʼ unaj k-tsʼáaik u datos le sukuʼunoʼoboʼ mix k-aʼalik baʼaxoʼob ku beetaʼal teʼ múuchʼulil tiʼ le máaxoʼob maʼ unaj u yojéeltikoʼoboʼ (Ecl. 3:7).

17. Jeʼex tu beetil le apóstoloʼob teʼ yáax siglooʼ, ¿baʼax maʼ unaj u xuʼulul k-beetkiʼ?

¹⁷ Junpʼéel baʼax oʼolal jach ku chʼaʼpachtikoʼon Satanáseʼ tumen ‹kʼubéentaʼantoʼon ka tʼaanakoʼon tu yoʼolal Jesús› (Apo. 12:17). Pero maʼ unaj k-chaʼik k-sajakkúuntaʼal tumen Satanás yéetel le máaxoʼob pʼekmiloʼonoʼ. Wa ku seguer k-kʼaʼaytaj yéetel k-kaʼansik u maasileʼ yaan u kiʼimaktal k-óol yéetel yaan u yantaltoʼon jeetsʼelil kex ka chʼaʼpachtaʼakoʼon. Teʼ yáax siglo, le ka aʼalaʼab tiʼ le apóstoloʼob ka xuʼuluk u kaʼansajoʼobeʼ, letiʼobeʼ tu yuʼuboʼob u tʼaan Dios yéetel seguernaj u kʼaʼaytajoʼob, le oʼolal kiʼimakchaj u yóoloʼob (Hech. 5:27-29, 41, 42). Chéen baʼaleʼ wa prohibirtaʼan k-kʼaʼaytajeʼ unaj k-kanáantik bix ken k-beetil (Mat. 10:16). Wa k-tsʼáaik k-óol k-beeteʼ yaan k-kiʼimakkúuntik u yóol Jéeoba yéetel yaan k-áantik u maasil utiaʼal u salvarkubaʼob.

18. ¿Máax jeʼel u tsʼáaiktoʼon le jeetsʼelil kʼaʼabéettoʼonoʼ?

¹⁸ Jeʼel u yantaltoʼon jeetsʼelil tak kéen muʼyajnakoʼoneʼ. Teʼ súutukiloʼob beyoʼ unaj k-kʼaʼajsikeʼ kʼaʼabéettoʼon le jeetsʼelil ku tsʼáaik Diosoʼ tumen chéen letiʼ jeʼel u yáantkoʼoneʼ. Confiarnakoʼon tiʼ Jéeoba kéen yanak kʼaakʼas kʼojaʼaniloʼob, kéen úuchuk junpʼéel nojoch loobil bey xan kéen chʼaʼpachtaʼakoʼon. Confiarnakoʼon xan tiʼ u kaajal yéetel tuukulnakoʼon tiʼ le jatsʼuts promesaʼob u beetmoʼ. Wa k-beetkeʼ «u Diosil [...] le jeetsʼeliloʼ» maʼ ken u pʼatoʼon t-juunal (Fili. 4:9). Teʼ tuláakʼ xookoʼ yaan k-ilik bix jeʼel k-áantik le sukuʼunoʼob utiaʼal ka yanaktiʼob jeetsʼelil le kéen muʼyajnakoʼoboʼ.