Maʼ, letiʼeʼ u yojel yaan u kʼuchul u kʼiinil u kíimil.

Koʼox ilik uláakʼ versículoʼob chíikaʼan tiʼ le baʼax tu tsʼíibtaj teʼ Salmo 61:8. Letiʼeʼ tu yaʼalaj: «Mantatsʼ kin kʼaay utiaʼal in alabartik a kʼaabaʼ, sáamsamal ken in beet le baʼax in prometermajtechoʼ. Yuum Jéeoba, in Dios, kin alabarkech yéetel tuláakal in puksiʼikʼal, mantatsʼ ken in alabart a kʼaabaʼ [yéetel] mix bikʼin kun xuʼulul in alabartik a kʼaabaʼ» (Sal. 61:8; 86:12; 145:1, 2).

Davideʼ maʼ táan kaʼach u yaʼalik wa maʼ tun kíimiliʼ tumen u yojleʼ deporsi yaan u kíimil yoʼolal le kʼeban yaan tu wíinkliloʼ. Davideʼ tu reconocertaj letiʼeʼ juntúul kʼeban máak (Gén. 3:3, 17-19; Sal. 51:4, 5). Letiʼeʼ u yojleʼ tak máakoʼob jach chúukpaj u yóoloʼob u meyajtoʼob Jéeobaeʼ kíimoʼob jeʼex Abrahán, Isaak yéetel Jacobeʼ. Tsʼoʼoleʼ tu tsʼáaj cuenta táan u bin u xuʼupul u kuxtal (Sal. 37:25; 39:4). Chéen baʼaleʼ le baʼax tu yaʼalaj teʼ Salmo 61:8, ku yeʼesikeʼ letiʼeʼ u chʼaʼtukultmaj u alabartik Jéeoba mantatsʼ wa tuláakal u kʼiiniloʼob u kuxtal (2 Sam. 7:12).

Jujunpʼéel tiʼ le baʼaxoʼob tu tsʼíibtaj Davidoʼ yaan yil yéetel baʼaxoʼob uchaʼan ichil u kuxtal, jeʼex le ku chíikpajal tu encabezadoil le Salmo 18, 51 yéetel 52. Teʼ Salmo 23, Davideʼ tu yaʼaleʼ Jéeobaeʼ bey juntúul j-kanan taman ku nuʼuktik yéetel ku kanáantik u yaalakʼoʼobeʼ. Davideʼ bey xan u kanáantik kaʼach u yaalakʼoʼoboʼ, le oʼolal ku tsʼíiboltik kaʼach u meyajtik Jéeoba tuláakal u kʼiiniloʼob u kuxtal (Sal. 23:6).

Kʼaʼajaktoʼoneʼ le baʼax tu tsʼíibtaj Davidoʼ Dios tsʼáa tu tuukul ka u tsʼíibte. Jujunpʼéel tiʼ le baʼaxoʼob tu tsʼíibtoʼ profecíaʼob kun béeytaloʼob kaʼach kéen máanak kʼiin. Jeʼex teʼ Salmo 110, Davideʼ tu tsʼíibteʼ yaan u kutal Yuumtsil tu x-noʼoj kʼab Dios teʼ kaʼanoʼ yéetel yaan u tsʼaʼabal poder tiʼ. Yéetel le poder kun tsʼaabiltiʼaʼ yaan u tsʼáanchaʼatik u enemigoʼob yéetel yaan u xuʼulsik tiʼ le kaajoʼoboʼ. Tu chʼiʼibal David taal le Mesíasoʼ, le máax kun gobernar desde teʼ kaʼanoʼ yéetel yaan u beetik u sacerdoteil utiaʼal mantatsʼoʼ (Sal. 110:1-6). Ka máan kʼiineʼ Jesúseʼ tu yaʼaleʼ tiʼ letiʼ ku tʼaan le Salmo 110, yéetel yaan u kʼuchul u kʼiinil u béeychajal (Mat. 22:41-45).

Jeʼex k-ilkoʼ Jéeoba nuʼukt David utiaʼal u tsʼíibtik le baʼaloʼob úuch teʼ kʼiinoʼob kuxaʼanoʼ yéetel le baʼaloʼob kun úuchul le kéen kaʼa kuxkíintaʼakoʼ. Beyoʼ Davideʼ yaan u béeytal u alabartik Jéeoba utiaʼal mantatsʼ. Leloʼ ¿bix u yáantkoʼon k-naʼat le baʼax ku yaʼalik Salmo 37:10, 11 yéetel 29? Le versículoʼobaʼ ku tsolkoʼob baʼax úuch tu kaajil Israel bey xan baʼaxoʼob ken k-disfrutart le kéen u béeykunt Dios le baʼaxoʼob u prometermoʼ (ilawil le párrafo 8 yaan teʼ xook «Yaan a wantal tin wéetel teʼ Paraísooʼ» yaan teʼ revistaaʼ).

Le Salmo 61:8 yéetel le uláakʼ versículoʼob tsʼoʼok k-xakʼaltikoʼ ku yáantkoʼon k-naʼateʼ Davideʼ u kʼáat kaʼach u alabart Jéeoba tu úuchben kaajil Israel mientras kuxaʼan. Ku yeʼeskoʼob xan baʼax ken u beet David kéen kaʼa kuxkíintaʼak tumen Jéeoba.