¿Kʼajaʼan Wa Tech?

Wa ta xokaj u revistailoʼob U Pʼíich Tulumil Kanan 2022, ¿jeʼel wa u páajtal a núukik le kʼáatchiʼobaʼ?

¿Baʼax utsil ku taasik k-tsikbal yéetel Jéeoba, k-chʼenxikintik yéetel k-tuukul tiʼ letiʼ?

Yaan k-chʼaʼik maʼalob decisiónoʼob, yaan k-kaʼansaj maas maʼalob, yaan u maas muʼukʼaʼantal k-fe yéetel yaan k-maas yaabiltik Jéeoba (w22.01, pág. 30 yéetel 31).

¿Baʼaxten maʼalob ka maas confiarnakoʼon tiʼ Jéeoba bey xan tiʼ le máaxoʼob u tsʼaamaj utiaʼal u nuʼuktikoʼonoʼ?

Bejlaʼeʼ u kʼiinil k-maas confiar tiʼ Jéeoba. K-eʼesik k-confiar tiʼ letiʼ wa k-beetik baʼax ku yaʼalik u kaajal bey xan le baʼax ku yaʼalik le ancianoʼoboʼ. Beyoʼ kéen káajak le nojoch muʼyajiloʼ yaan k-beetik tuláakal baʼax kun aʼalbiltoʼon kex yaan hora chan jelaʼan k-uʼuyik (w22.02, pág. 4 tak 6).

¿Baʼaxten juntúul ángeleʼ tu yaʼalaj tiʼ Zacarías yaan u yilik junpʼéel plomo tu kʼab Zorobabel? (Zac. 4:8-10).

Le baʼax tu yaʼalaj le ángeloʼ tu yeʼeseʼ kex le israelitaʼob mix baʼal u yilkoʼob le templooʼ yaan u tsʼoʼoksikoʼob yéetel yaan u kʼaʼamal tumen Jéeoba (w22.03, pág. 16 yéetel 17).

¿Bix jeʼel k-tsʼáaik junpʼéel maʼalob ejemplo yéetel le bix k-tʼaanoʼ? (1 Tim. 4:12).

Le kéen k-eʼes k-utsil yéetel le kéen k-respetart le máakoʼob teʼ kʼaʼaytajoʼ, le kéen kʼaaynakoʼon yéetel kéen comentarnakoʼon teʼ muchʼtáambaloʼ, le kéen k-aʼal mantatsʼ u jaajil, le kéen k-líiʼs u yóol u maasil yéetel le kéen k-kanáant maʼ u meyajtoʼon tʼaanoʼob jeʼel u beetik loobeʼ (w22.04, pág. 6 tak 9).

¿Baʼaxten le u wíinklil le tsʼíitsʼik baʼalcheʼ ku yaʼalik Apocalipsis 13:1 yéetel 2, chíikaʼan tiʼ le kantúul baʼalcheʼob ku yaʼalik Daniel capítulo 7?

Le tsʼíitsʼik baʼalcheʼ ku yaʼalik Apocalipsis 13, maʼ tu chíikbesik chéen junpʼéeliliʼ gobierno jeʼex Romaeʼ. Baʼaxeʼ ku chíikbesik tuláakal le gobiernoʼob tsʼoʼok u gobernaroʼob way yóokʼol kaab desde úuchjeakil tak bejlaʼeʼ (w22.05, pág. 9).

¿Bix jeʼel k-eʼesik k-confiar tiʼ u justicia Jéeobaeʼ?

Wa yaan máax ku yaʼaliktoʼon baʼal wa ku beetik junpʼéel baʼal t-contraeʼ, unaj k-ilik maʼ k-pʼuʼujul yéetel maʼ k-chʼaʼpʼektik, baʼaxeʼ unaj k-pʼatik tu kʼab Jéeoba. Letiʼeʼ yaan u yutskíintik tuláakal le muʼyajil tsʼoʼok u taasik le kʼebanoʼ (w22.06, pág. 10 yéetel 11).

¿Baʼax unaj u chʼaʼik en cuenta juntúul sukuʼun kéen orarnak teʼ muchʼtáambaloʼ?

Unaj u kʼaʼajsikeʼ le oraciónoʼ maʼ utiaʼal u tsʼaʼabal consejoiʼ mix utiaʼal u beetaʼal wa baʼax anuncioiliʼ. Tsʼoʼoleʼ maʼ unaj u sen aʼalik «yaʼab tʼaanoʼob» kéen orarnak tu káajbal le muchʼtáambaloʼ (Mat. 6:7) (w22.07, pág. 24, 25).

¿Baʼax tu yóotaj u yaʼal Jesús le ka tu yaʼalaj ‹le máaxoʼob tu beetoʼob baʼaloʼob kʼaastakoʼ› ‹yaan u líikʼloʼob utiaʼal ka juzgartaʼakoʼob›? (Juan 5:29).

Letiʼobeʼ maʼ kun juzgarbiloʼob yoʼolal le baʼaxoʼob tu beetoʼob antes tiʼ u kíimloʼoboʼ. Baʼaxeʼ yaan u juzgartaʼaloʼob yoʼolal le baʼaxoʼob ken u beetoʼob kéen kaʼa kuxkíintaʼakoʼoboʼ (w22.09, pág. 18).

¿Baʼax jatsʼuts anuncioil tu tsʼáaj le sukuʼun Joseph Rutherford teʼ asamblea beetaʼab tu mesil septiembre tiʼ 1922?

Teʼ asamblea beetaʼab tu kaajil Cedar Point (Ohio, Estados Unidos), le sukuʼunoʼ tu yaʼalaj: «¡Ileʼex, le Reyoʼ táan u gobernar! Teʼex unaj a kʼaʼaytikeʼex. Le oʼolal kʼaʼayteʼex, kʼaʼayteʼex, kʼaʼayteʼex le Rey yéetel u Reinooʼ» (w22.10, pág. 3 tak 5).

Jeʼex u yeʼesik Isaías capítulo 30, ¿máakalmáak le óoxpʼéel baʼaxoʼob ku beetik Jéeoba utiaʼal u chúukpajal k-óoloʼ?

Le capítuloaʼ ku yeʼesikeʼ Jéeobaeʼ 1) ku chʼenxikintikoʼon yéetel ku yuʼubik k-oraciónoʼob, 2) ku nuʼuktikoʼon yéetel 3) ku bendecirkoʼon teʼ kʼiinoʼobaʼ yéetel yaan xan u bendecirkoʼon teʼ kʼiinoʼob ku taaloʼoboʼ (w22.11, pág. 9).

¿Baʼaxten jeʼel u páajtal k-aʼalikeʼ le baʼax ku yaʼalik le Salmo 37:10, 11 yéetel 29, béeychajoʼob úuchjeakil yéetel yaan xan u kaʼa béeytaloʼob maʼ kun xáantal?

Le versículoʼobaʼ ku tʼaan tiʼ le jeetsʼelil yanchaj tu kaajil Israel teʼ kʼiinoʼob táan u gobernar Salomónoʼ. Jesúseʼ tu chʼaʼchiʼitaj le versículo 11 utiaʼal u tʼaan tiʼ le Paraíso kun antal way Luʼumoʼ (Mat. 5:5; Luc. 23:43) (w22.12, pág. 8 tak 10 yéetel 14).