Le ka tu yaʼalaj Jéeoba tiʼ le yáax wíinikoʼob «chupeʼex le luʼumaʼ yéetel kanáanteʼex», tu tsʼáaj naʼatbil yaan u kʼuchul u kʼiinil u suut paraísoil tuláakal le Luʼumaʼ (Gén. 1:28). Le máaxoʼob kun kuxtaloʼob utiaʼal mantatsʼ teʼ túumben luʼumoʼ yaan u kʼaʼabéettal u tsʼoʼokbeskoʼob le baʼax u yaʼalmaj Jéeobaoʼ. Le kéen tsʼoʼokok Armagedóneʼ le Luʼumaʼ maʼ junpʼéel paraísoiʼ, tumen le jardín tu beetaj Dios tuʼux tu tsʼáaj le yáax wíinikoʼoboʼ úuch kʼaschajak. Yaʼab meyaj kun beetbil tumen yaan u yutskíintaʼal tuláakal le baʼax tu kʼaskúuntaj wíinikoʼ.

Lelaʼ ku kʼaʼajsiktoʼon le bukaʼaj meyaj anchaj u beetik le israelitaʼob le ka suunajoʼob tu luʼumoʼoboʼ. Letiʼobeʼ 70 años tu beetoʼob tu luʼumil Babilonia yéetel durante le bukaʼaj añosoʼ mix máak kajaʼan kaʼach tu luʼumil Israel. Pero jeʼex tu yaʼalil profeta Isaíaseʼ yéetel u yáantaj Jéeobaeʼ yaan u béeytal u kaʼa jatsʼutskíintikoʼob le luʼumoʼ. Le profecíaoʼ ku yaʼalik: «U tikin luʼumileʼ yaan u beetik  u pʼáatal jeʼex u jardínil Edéneʼ yéetel u desiertoileʼ yaan u beetik u pʼáatal jeʼex u jardín Jéeobaeʼ» (Isa. 51:3). Le israelitaʼob túunoʼ béeychaj u kaʼa jatsʼutskíintikoʼob u luʼumoʼoboʼ. Yéetel u yáantaj xan Jéeobaeʼ le máaxoʼob kun kuxtaloʼob teʼ túumben luʼumoʼ yaan u béeytal u sutkoʼob junpʼéel paraísoil le Luʼumaʼ. ¿Baʼax jeʼel u páajtal a beetik desde beora utiaʼal a weʼesik taak a táakpajal teʼ meyajoʼ?

Por ejemploeʼ tak tuʼux ku páajtaleʼ jeʼel u béeytal a pʼatik limpio a wotocheʼ yéetel a páaktik a terreno utiaʼal u yilaʼal jatsʼuts. Kex a vecinoʼob maʼatech u beetkoʼobeʼ techeʼ jeʼel u páajtal u suuktal a beetkeʼ. Uláakʼ baʼax jeʼel u páajtal a beetkeʼ letiʼe a táakpajal kéen beetaʼak limpieza wa kéen tsʼaʼabak mantenimiento teʼ lugaroʼob tuʼux k-muchʼikba k-adorart Jéeobaoʼ. Wa ka wilik ku béeytaleʼ jeʼel u páajtal a bin áantaj teʼ tuʼux ku yúuchul nukuch loobiloʼoboʼ. Beyoʼ ka weʼesik jach a kʼáat a wáant u maasil. Tukle: «¿Jeʼel wa u béeytal in kanik jujunpʼéel baʼaloʼob jeʼel u meyajten kéen kuxlaken teʼ túumben luʼumoʼ?».

Ka tsʼoʼok u kaʼa kuxkíintik u hija Jairoeʼ, Jesúseʼ tu yaʼalaj ka tsʼaʼabak baʼax u jaant le chan x-chʼúupaloʼ (Mar. 5:42, 43). Como chéen letiʼeʼ maʼ difícilchaj wal u atendertaʼaliʼ. Pero chéen tukult bukaʼaj meyaj kun antal le kéen u béeykunt Jesús le baʼax u prometermaʼ: «Tuláakal le máaxoʼob yanoʼob ichil le muknaloʼoboʼ yaan u yuʼubikoʼob u tʼaan yéetel yaan u jóokʼloʼob» (Juan 5:28, 29). U jaajileʼ le Bibliaoʼ maʼ tu jach aʼalik bix kun áantbil le máaxoʼob kun kaʼa kuxkíintbiloʼoboʼ. Pero k-ojel deporsi yaan u kʼaʼabéettaltiʼob janal, nookʼ yéetel tuʼux u kajtaloʼob. ¿Bix jeʼel a weʼesik taak a wantal teʼ Paraíso utiaʼal a wáantkoʼoboʼ? Tuukulnen tiʼ le preguntaʼobaʼ.

Kéen anunciartaʼak yaan u xíimbaltaʼal a múuchʼulil tumen le superintendente tiʼ circuitooʼ, ¿ka wilik wa a invitartik janal? Wa juntúul sukuʼun wa kiik ku xuʼulul u meyaj Betel bey xan wa juntúul superintendente tiʼ circuito ku xuʼulul u asignacióneʼ, ¿ka wilik wa a wáantkoʼob utiaʼal u kaxtikoʼob tuʼux kun kajtaloʼob? Wa yaan u beetaʼal junpʼéel asamblea regional wa especial teʼ tuʼux kajaʼanechoʼ, ¿ka wilik wa a wáantaj antes wa ken  tsʼoʼokok le asambleaoʼ? ¿Ka wilik wa a kʼamik le sukuʼunoʼob invitartaʼanoʼoboʼ?

Le baʼax ku yaʼalik Hechos 24:15, ku yeʼesikeʼ yaan u kaʼa kuxkíintaʼal u millonesil máakoʼob. Yaʼab tiʼ letiʼobeʼ maʼ tu kʼaj óoltoʼob Jéeobaiʼ, pero teʼ Paraísooʼ yaan u béeytal u kaanbaloʼob tiʼ letiʼ. a Le máaxoʼob tsʼoʼok u xáantal joʼopʼok u meyajtikoʼob Jéeobaoʼ yaan u yáantajoʼob utiaʼal u kaʼansaʼal le máakoʼobaʼ (Isa. 11:9). Charlotte, juntúul kiik tsʼoʼok u bin kʼaʼaytaj Europa, Sudamérica yéetel Áfricaeʼ, jach ku tsʼíiboltik u kʼuchul le kʼiinoʼ. Letiʼeʼ ku yaʼalik: «Jach taak in kaʼansik le máakoʼob kun kaʼa kuxkíintbiloʼoboʼ. Le kéen in xok baʼax tu beetaj wa máax kuxlaj úuchjeakileʼ kin tuklik: ‹Wa ka u kʼaj óolt kaʼach Jéeoba le máakaʼ bejlaʼa yaanal bix kun kuxtal kaʼacheʼ›. Jach kin tsʼíiboltik in wáantkoʼob u kʼaj óoltoʼob Jéeoba yéetel in waʼaliktiʼob jeʼel u bintiʼob maʼalobil wa ka u beetoʼob baʼax ku yaʼalikeʼ».

Le máaxoʼob meyajt Jéeoba kuxlajoʼob antes tiʼ u taal Jesús way Luʼumeʼ yaan u kʼaʼabéettal u kankoʼob yaʼab baʼaloʼob. Jach yaan u kiʼimaktal k-óol k-tsolik tiʼ Daniel bix béeychajik le profecíaʼob tu tsʼíibtoʼ (Dan. 12:8). Tsʼoʼoleʼ yaan xan u kiʼimaktal k-óol k-tsolik tiʼ Rut yéetel tiʼ Noemíeʼ tiʼ u chʼiʼibaloʼob taal le Mesíasoʼ. Jach yaan k-disfrutartik k-kaʼansik le máakoʼoboʼ tumen mix baʼal ken u beet k-chiʼichnaktal.

¿Bix jeʼel a weʼesik taak a táakpajal utiaʼal u kaʼansaʼal le máakoʼob kun kaʼa kuxkíintbiloʼoboʼ? Junpʼéel bixeʼ letiʼe a maas maʼalobkíintik bix a kaʼansajoʼ yéetel a táakpajal teʼ kʼaʼaytaj ku beetaʼal tiʼ tuláakal yóokʼol kaaboʼ (Mat. 24:14). Maʼ xaaneʼ yoʼolal a edad wa uláakʼ baʼaloʼobeʼ maʼ tu páajtal a táakpajal teʼ kʼaʼaytaj jach jeʼex a kʼáatoʼ. Pero wa ka wilik a beetik tuláakal le ku páajtaleʼ yaan a weʼesik preparadoech utiaʼal a kaʼansik le máaxoʼob kun kaʼa kuxkíintbiloʼoboʼ.

Le oʼolaleʼ maʼalob ka a tukult lelaʼ: ¿Jach wa tu jaajil kin tsʼíiboltik in wantal teʼ túumben luʼumoʼ? ¿Kin tsʼíiboltik wa in wáantaj utiaʼal u suʼutul paraísoil le Luʼumaʼ? ¿Kin tsʼíiboltik wa in wáantik yéetel in kaʼansik le máaxoʼob kun kaʼa kuxkíintbiloʼoboʼ? Yaan a weʼesik preparadoech wa ka wilik a táakpajal tiʼ tuláakal le meyajoʼob ku beetaʼal ichil u kaajal Jéeoba bejlaʼoʼ. Tumen le baʼaloʼobaʼ láayliʼ letiʼe baʼaxoʼob kun beetbil teʼ túumben luʼumoʼ.