1. ¿Bix u núukik Jéeoba u oración le máaxoʼob meyajtikoʼ?

 ¿A WOJEL wa Jéeobaeʼ jeʼel u usarkech utiaʼal u núukik u oración juntúul sukuʼuneʼ? Letiʼeʼ jeʼel u usarkech wa ancianoech, siervo ministerialech, precursorech, publicadorech, táankelmech, tsʼoʼok u yantal a jaʼabil, xiibech wa koʼolelech. Le kéen kʼáataʼak áantaj tiʼ Jéeoba tumen juntúul máax meyajtikeʼ jeʼel u meyajtiʼ juntúul anciano bey xan uláakʼ sukuʼunoʼob utiaʼal u líiʼskoʼob u yóoleʼ (Col. 4:11). Jach ku kiʼimaktal k-óol ikil u usarkoʼon Jéeoba utiaʼal k-áantik le sukuʼunoʼob kéen yanak junpʼéel kʼaakʼas kʼojaʼanil, kéen úuchuk junpʼéel nojoch loob wa kéen chʼaʼpachtaʼakoʼon.

2. ¿Baʼaxten istikyaj u yáantaʼal le sukuʼunoʼob kéen yanak junpʼéel epidemiaoʼ?

² Le kéen yanak junpʼéel epidemiaeʼ ku pʼáatal maas istikyaj k-paklan k-áantikba. Por ejemploeʼ maʼ xaaneʼ taak k-bin xíimbalt le sukuʼunoʼob tu yotochoʼoboʼ pero maʼ tu páajtal k-beetik. Wa maʼ xaaneʼ taak k-invitartik janal le máaxoʼob minaʼan taakʼin tiʼoboʼ pero láayliʼ maʼ tu páajtal k-beetkeʼ. Yaan hora xaneʼ kex taak k-áantik u maasileʼ maʼ tu páajtal tumen k-familiaeʼ táan xan u muʼyaj. Kex beyoʼ taak k-áantik le sukuʼunoʼoboʼ, le oʼolal Jéeobaeʼ jach ku kiʼimaktal u yóol kéen u yil táan k-beetik tuláakal le ku páajtal utiaʼal k-áantkoʼoboʼ (Pro. 3:27; 19:17). ¿Bix túun jeʼel k-áantkoʼobeʼ?

3. ¿Baʼax ku kaʼansiktoʼon le baʼax tu beetaj le ancianoʼob yanoʼob tu múuchʼulil Desioʼ? (Jeremías 23:4).

³ Baʼax jeʼel u beetik le ancianoʼoboʼ. Wa ancianoecheʼ ilawil a kʼaj óoltik tubeel le tamanoʼoboʼ (xok Jeremías 23:4). Desi, le kiik t-chʼaʼchiʼitaj teʼ xook máanikoʼ, ku yaʼalik: «Le ancianoʼob yanoʼob kaʼach tin grupooʼ suuk kaʼach u jóokʼloʼob kʼaʼaytaj tin wéetel bey xan yéetel u maasil sukuʼunoʼob. Jach suuk u yáantkoʼonoʼob». b  Yoʼolal leloʼ maas chéen chʼaʼabil úuchik u yáantaʼal Desi tumen le ancianoʼob le ka kíim jujuntúul u láakʼtsiloʼob yoʼolal le COVID-19.

4. ¿Baʼaxten páajchaj u yáantaʼal Desi tumen le ancianoʼoboʼ yéetel baʼax ku kaʼansik leloʼ?

⁴ Desieʼ ku yaʼalik: «Deporsi maʼalob in biskinba yéetel le ancianoʼoboʼ le oʼolal chéen chʼaʼabil úuchik in tsikbaltiktiʼob bix in wuʼuyikinba yéetel baʼax chiʼichnakkúuntiken». Lelaʼ ¿baʼax ku kaʼansik tiʼ le ancianoʼoboʼ? Ku kaʼansikeʼ kʼaʼabéet u suuktal u kanáantkoʼob le tamanoʼoboʼ yéetel u beetkubaʼob u amigoʼob antes tiʼ u yúuchul wa baʼax. Wa yoʼolal junpʼéel kʼaakʼas kʼojaʼanil maʼ tu páajtal a bin a xíimbalt le sukuʼunoʼoboʼ kaxt uláakʼ forma bix jeʼel a tsikbal tu yéeteloʼobeʼ. Desieʼ ku yaʼalik: «Yaan kʼiineʼ u ancianoiloʼob in múuchʼulileʼ ku tʼankenoʼob wa ku túuxtikoʼobten mensaje. Kex in wojel baʼax ku yaʼalik le tekstoʼob ku túuxtikoʼoboʼ jach ku kʼuchul tin puksiʼikʼal».

5. ¿Bix jeʼel u yojéeltik le ancianoʼob baʼax kʼaʼabéet tiʼ le sukuʼunoʼoboʼ, yéetel bix jeʼel u yáantkoʼobeʼ?

⁵ Le ancianoʼoboʼ jeʼel u páajtal u kʼáatkoʼob tiʼ le sukuʼunoʼob baʼax kʼaʼabéettiʼob utiaʼal u yilkoʼob bix jeʼel u yáantkoʼobeʼ, pero unaj u kanáantkoʼob maʼ u suʼlakkúuntikoʼob (Pro. 20:5). ¿Yaan wa tuláakal baʼax kʼaʼabéettiʼob jeʼex janal yéetel tsʼaakeʼ? ¿Jeʼel wa u luʼsaʼaltiʼob meyaj wa u pʼáatal minaʼan tuʼux u kajtaloʼobeʼ? Wa ku kʼaʼabéettaleʼ, ¿jeʼel wa u páajtal k-áantkoʼob utiaʼal u kʼáatkoʼob áantaj tiʼ le gobiernooʼ? Desieʼ tsʼaʼab baʼax kʼaʼabéet tiʼ tumen jujuntúul sukuʼunoʼob. Pero le baʼax maas áantoʼ letiʼe baʼax tu beetaj le ancianoʼob tu yoʼolaloʼ. Letiʼeʼ ku yaʼalik: «Le ancianoʼoboʼ ku oraroʼob kaʼach tin wéetel. Maʼ jach kʼajaʼanten le baʼax tu yaʼaloʼoboʼ, pero le baʼax maʼ tin tuʼubsikoʼ letiʼe bix tin wuʼuyilinbaoʼ. Bey táan kaʼach u yaʼalikten Jéeobaeʼ: ‹Maʼ ta juunal yanechiʼ, tiaʼanen ta wéeteleʼ›» (Isa. 41:10, 13).

6. ¿Bix jeʼel k-paklan áantikba yéetel le sukuʼunoʼob yanoʼob teʼ múuchʼuliloʼ? (Ilawil le fotoʼoboʼ).

⁶ Baʼax jeʼel u beetik le múuchʼuliloʼ. U jaajileʼ letiʼe ancianoʼob tsʼáaik baʼax kʼaʼabéet tiʼ le sukuʼunoʼoboʼ. Pero Jéeobaeʼ ku yaʼalik tiʼ tuláakloʼon ka k-líiʼs u yóol u maasil yéetel ka k-áantoʼob (Gál. 6:10). Por ejemploeʼ maʼ tsaaj ka k-beet junpʼéel nojoch baʼal utiaʼal k-líiʼsik u yóol juntúul máax kʼojaʼaniʼ. Le mejen paalaloʼoboʼ jeʼel u páajtal xan u beetkoʼob junpʼéel tarjeta wa junpʼéel chan dibujo  utiaʼal u líiʼskoʼob u yóol juntúul sukuʼuneʼ. Le táankelmoʼob xanoʼ jeʼel u páajtal u bin u manoʼob baʼax kʼaʼabéet tiʼ juntúul kiikeʼ. Uláakʼ sukuʼunoʼobeʼ jeʼel u páajtal u beetkoʼob janal utiaʼal u biskoʼob tiʼ juntúul máax kʼojaʼaneʼ. Chéen baʼaleʼ wa jach kʼiʼitpajaʼan junpʼéel kʼojaʼanileʼ kʼaʼabéet u líiʼsaʼal u yóol tuláakal le múuchʼuliloʼ. Le oʼolaleʼ le kéen tsʼoʼokok le muchʼtáambaloʼ maʼalob ka pʼáatkoʼon tsikbal junsúut hora teʼ salónoʼ wa tiʼ videoconferencia. Le ancianoʼoboʼ láayliʼ kʼaʼabéet u líiʼsaʼal u yóoloʼobeʼ. Jujuntúul sukuʼunoʼobeʼ ku beetkoʼob tarjetas utiaʼal u tsʼáaikoʼob gracias tiʼ le ancianoʼoboʼ tumen u yojloʼobeʼ le táan junpʼéel epidemiaoʼ jach yaʼab meyaj ku beetkoʼob. Tuláakloʼon unaj k-beetik lelaʼ: «Seguernak a paklan líiʼsik a wóoleʼex yéetel a paklan muʼukʼaʼankúuntik a wóoleʼex» (1 Tes. 5:11).

7. ¿Baʼax jeʼel u yúuchul tiʼ máak kéen úuchuk junpʼéel nojoch loobeʼ?

⁷ Jach séeb jeʼel u kʼexpajal u kuxtal máak kéen úuchuk junpʼéel nojoch loobeʼ. Maʼ xaaneʼ jeʼel u perdertik yaʼab baʼaloʼob jeʼex u yotoch wa jeʼel tak u kíimil máax u yaabiltmeʼ. Lelaʼ jeʼel xan u yúuchul tiʼ le sukuʼunoʼoboʼ. ¿Bix túun jeʼel k-áantkoʼobeʼ?

8. ¿Baʼax unaj u beetik le ancianoʼob yéetel le taatatsiloʼob antes u yúuchul junpʼéel nojoch looboʼ?

⁸ Baʼax jeʼel u beetik le ancianoʼoboʼ. Le ancianoʼoboʼ kʼaʼabéet u kaʼanskoʼob tiʼ le sukuʼunoʼob baʼax kʼaʼabéet u beetkoʼob antes u yúuchul junpʼéel nojoch loob. Tsʼoʼoleʼ kʼaʼabéet u tsʼáaikoʼob u númeroil u teléfonoʼob tiʼob. Margaret, le kiik t-aʼalaj teʼ xook máanikoʼ, ku yaʼalik: «Tin múuchʼulileʼ máansaʼab junpʼéel discurso utiaʼal u yaʼalaʼal baʼax kʼaʼabéet teʼ múuchʼuliloʼ. Teʼeloʼ aʼalaʼabtoʼoneʼ maʼ unaj u náayal k-óoliʼ tumen maʼ tsʼoʼokok u épocail u yelel le kʼáaxoʼoboʼ. Tsʼoʼoleʼ wa le autoridadoʼob ku yaʼalikoʼob ka xiʼikoʼon yaanal tuʼuxeʼ unaj k-beetik tu séebaʼanil». Le discursooʼ máansaʼab teʼ súutukil jach kʼaʼabéetoʼ tumen ka máan cinco semanaʼobeʼ káaj u sen yelel le kʼáaxoʼoboʼ. Taatatsileʼex, le kéen a beeteʼex le adoración ich familiaoʼ tsikbalteʼex baʼax unaj u beetik cada juntúul ichil le familia kéen úuchuk junpʼéel nojoch looboʼ. Wa ka beetkeʼex beyoʼ maʼ kan sen chiʼichnaktaleʼex.

9. ¿Baʼax unaj u beetik le ancianoʼob antes u yúuchul junpʼéel nojoch loobiloʼ bey xan kéen tsʼoʼokok?

⁹ Wa tsʼaʼan a beet a superintendenteil de grupoeʼ, ilawil a chʼaʼik tubeel u datos le sukuʼunoʼoboʼ. Maʼ a páaʼtik u yúuchul junpʼéel nojoch loob utiaʼal a beetik. Beet junpʼéel lista yéetel ilawil a actualizartik. Beyoʼ le kéen úuchuk junpʼéel nojoch loobeʼ yaantech u número tuláakal le publicadoroʼob utiaʼal a wojéeltik baʼax kʼaʼabéettiʼoboʼ. Tsʼáa xan le lista tiʼ u coordinadoril le ancianoʼoboʼ beyoʼ yaan u yaʼalik tiʼ le superintendente tiʼ circuito le baʼax ku yúuchloʼ. U beetaʼal beyaʼ ku taasik yaʼab utsiloʼob. Ka tsʼoʼok u yelel le kʼáax teʼ tuʼux kajaʼan kiik Margaretoʼ le superintendente tiʼ circuitooʼ maʼ weeniʼ. Letiʼeʼ tu máansaj 36 horaʼob táan u nuʼuktik le ancianoʼob utiaʼal u yilaʼal tuʼux yaan le 450 sukuʼunoʼob tu pʼataj u yotochoʼoboʼ yéetel wa yaan baʼax kʼaʼabéettiʼob (2 Cor. 11:27). Úuchik u beetkoʼob beyoʼ páajchaj u kaxtaʼal tuʼux kun pʼáatal le sukuʼunoʼob tu pʼataj u yotochoʼoboʼ.

10. ¿Baʼaxten le ancianoʼoboʼ jach kʼaʼanaʼan u yilkoʼob u kanáantkoʼob le sukuʼunoʼoboʼ? (Juan 21:15).

¹⁰ Letiʼe ancianoʼob unaj u yáantkoʼob le sukuʼunoʼob yéetel le Biblia utiaʼal maʼ u sen chiʼichnaktaloʼoboʼ (1 Ped. 5:2). Kéen úuchuk junpʼéel nojoch loobeʼ le baʼax unaj u yáax ilkoʼoboʼ letiʼe wa maʼalob yanil le sukuʼunoʼoboʼ, wa yaan baʼax u jaantoʼob, u nookʼoʼob bey xan tuʼux u pʼáatloʼob. Maʼ xaaneʼ yaan u kʼaʼabéettal u máan yaʼab meses táan u líiʼsaʼal u yóoloʼob  (xok Juan 21:15). Harold, juntúul sukuʼun táakaʼan tiʼ junpʼéel Comité tiʼ Sucursaleʼ tsʼoʼok u tsikbal yéetel yaʼab sukuʼunoʼob kajaʼanoʼob teʼ tuʼux ku yúuchul nukuch loobiloʼoboʼ. Letiʼeʼ ku yaʼalik: «Maʼ chéen chʼaʼabil u recuperarkuba máakiʼ. Yaʼab sukuʼunoʼobeʼ kex ku kaʼa antal le baʼaxoʼob kʼaʼabéettiʼoboʼ maʼ tu jáan tuʼubultiʼob le baʼax tu aktáantoʼoboʼ, tumen maʼ xaaneʼ kíim máax u yaabiltmoʼob wa tu perdertoʼob junpʼéel baʼal jach u yaabiltmoʼob. Yoʼolal leloʼ jeʼel u kaʼa yaatal u yóoloʼobeʼ. Pero leloʼ maʼ u kʼáat u yaʼal wa minaʼan u fejoʼobiʼ tumen normal u yuʼubikuba máak beyoʼ».

11. ¿Bix kʼaʼabéet u yáantaʼal le sukuʼunoʼob kéen úuchuk junpʼéel nojoch looboʼ?

¹¹ Le ancianoʼoboʼ maʼalob ka u beetoʼob le baʼax ku yaʼalik le tekstoaʼ: «Okʼolneneʼex yéetel le máaxoʼob ku yokʼoloʼoboʼ» (Rom. 12:15). Le máaxoʼob tsʼoʼok u aktáantkoʼob junpʼéel nojoch loobiloʼ kʼaʼabéet u kʼaʼajsaʼaltiʼob yaabiltaʼanoʼob tumen Jéeoba bey xan tumen le sukuʼunoʼoboʼ. Le ancianoʼoboʼ jeʼel u páajtal u yáantkoʼob le sukuʼunoʼob utiaʼal ka orarnakoʼob, ka xakʼalxoknakoʼob, ka xiʼikoʼob muchʼtáambal yéetel ka kʼaʼaytajnakoʼob, beyoʼ yaan u seguer u meyajtikoʼob Jéeoba. Le ancianoʼob xanoʼ jeʼel u páajtal u yáantkoʼob le taatatsiloʼob utiaʼal u líiʼsik u yóol u paalaloʼoboʼ. Por ejemploeʼ maʼalob ka kʼaʼajsaʼak tiʼ le paalaloʼoboʼ kex ka u perdertoʼob yaʼab baʼaloʼobeʼ Jéeobaeʼ yaan u seguer u biskuba tu yéeteloʼob yéetel yaan u yáantaʼaloʼob. Tsʼoʼoleʼ le sukuʼunoʼob yéetel le kiikoʼoboʼ beyoʼob junpʼéel nojoch familia mantatsʼ ken u yáantoʼobeʼ (1 Ped. 2:17).

12. ¿Bix jeʼel u yáantaj le múuchʼulil kéen yanak junpʼéel nojoch loobiloʼ? (Ilawil le fotooʼ).

¹² Baʼax jeʼel u beetik le múuchʼuliloʼ. Wa naatsʼ teʼ tuʼux kajaʼanech ku yúuchul junpʼéel nojoch loobiloʼ kʼáat tiʼ le ancianoʼob bix jeʼel a wáantajeʼ. Maʼ xaaneʼ jeʼel a kʼamik ta wotoch le sukuʼunoʼob tu pʼataj u yotochoʼoboʼ, le sukuʼunoʼob ku binoʼob áantajoʼ, a wáantaj utiaʼal u tʼoʼoxol mercancía wa uláakʼ baʼax kʼaʼabéet tiʼ le sukuʼunoʼoboʼ. Tsʼoʼoleʼ kex wa náach úuch le nojoch loobiloʼ jeʼel xan u páajtal a wáantajeʼ. Jeʼel u páajtal a orar yoʼolal le sukuʼunoʼoboʼ yéetel a tsʼáaik a donación utiaʼal le meyaj ku beetik u kaajal Jéeoba tiʼ tuláakal yóokʼol kaaboʼ (2 Cor. 1:8-11; 8:2-5). Chéen baʼaleʼ wa ku páajtal a bin teʼ tuʼux úuch le nojoch loobiloʼ kʼáat tiʼ le ancianoʼob baʼax kʼaʼabéet a beetik utiaʼal a biniʼ. Wa ka invitartaʼaleʼ maʼ xaaneʼ yaan u tsʼaʼabaltech capacitación utiaʼal a wáantaj teʼ tuʼux maas kʼaʼabéetoʼ.

13. ¿Baʼax ku aktáantik le sukuʼunoʼob teʼ tuʼuxoʼob prohibirtaʼan u adorartaʼal Diosoʼ?

¹³ Le chʼaʼpachtajiloʼ ku beetik u maas yaatal u kuxtal le sukuʼunoʼoboʼ. Le máaxoʼob kajaʼanoʼob teʼ tuʼuxoʼob ku prohibirtaʼal u meyajtaʼal Diosoʼ ku pʼáatal minaʼantiʼob taakʼin, ku kʼojaʼantaloʼob wa ku kíimil máax u yaabiltmoʼob. Tumen yaʼab baʼaloʼob maʼ tu páajtal u beetkoʼobeʼ le ancianoʼoboʼ maʼ tu páajtal u jáan péekoʼob utiaʼal u bin u líiʼs u yóol le sukuʼunoʼoboʼ. Bey úuchik tiʼ Andréi, le sukuʼun t-chʼaʼchiʼitaj teʼ xook máanikoʼ. Juntúul kiik yaan teʼ grupo tuʼux ku kʼaʼaytajoʼ pʼáat minaʼan taakʼin tiʼ, tsʼoʼoleʼ accidentarnaji. Yaʼab u téenel operartaʼabi, le oʼolaleʼ maʼ tu páajtal u meyaj. Chéen baʼaleʼ Jéeobaeʼ tu péeksaj u puksiʼikʼal le sukuʼunoʼob utiaʼal u yáantkoʼob le kiikoʼ. Kex táan le pandemia yéetel prohibirtaʼan yaʼab baʼaloʼobeʼ tu yáantoʼob le kiikoʼ, maʼ tu pʼatoʼob tu juunaliʼ.

14. ¿Bix jeʼel u yeʼesik le ancianoʼob ku confiaroʼob tiʼ Jéeobaoʼ?

¹⁴ Baʼax jeʼel u beetik le ancianoʼoboʼ. Andréieʼ orarnaj tiʼ Jéeoba yéetel tu beetaj tuláakal baʼax yaan tu kʼab utiaʼal u yáantik le kiikoʼ. ¿Bix túun núukaʼabik u oración tumen Jéeoba? Letiʼeʼ tu péeksaj le sukuʼunoʼob maas jeʼel u páajtal u yáantkoʼob le kiikoʼ. Jujuntúuloʼobeʼ tu bisoʼob yiknal doctor yéetel uláakʼoʼobeʼ tu tsʼáajoʼob taakʼin tiʼ. Úuchik u yáantkoʼobeʼ Jéeobaeʼ tu bendecirtaj le sukuʼunoʼob kex maʼ chéen chʼaʼabil le baʼax tu beetoʼoboʼ (Heb. 13:16). Ancianoʼex, wa ku prohibirtaʼal u meyajtaʼal Dios teʼ tuʼux kajaʼaneʼexoʼ kʼubéenteʼex jujunpʼéel meyajoʼob tiʼ le sukuʼunoʼoboʼ (Jer. 36:5, 6). Pero baʼax maas kʼaʼabéet a beetkeʼexeʼ confiarneneʼex tiʼ Jéeoba, letiʼeʼ jeʼel u yáantkeʼex utiaʼal a tsʼáaikeʼex baʼax kʼaʼabéet tiʼ le sukuʼunoʼoboʼ.

15. ¿Baʼax unaj k-beetik desde beora utiaʼal maʼ u xuʼulul k-bisikba kéen yanak chʼaʼpachtajil?

¹⁵ Baʼax jeʼel u beetik le múuchʼuliloʼ. Tu kʼiiniloʼob táan k-chʼaʼpachtaʼaleʼ maʼ xaaneʼ chéen yéetel jujuntúul sukuʼunoʼob kun páajtal k-muchʼikba. Le oʼolal desde bejlaʼeʼ kʼaʼabéet k-bisikba maʼalob yéetel u maasil. Kʼaʼajaktoʼoneʼ tu contra Satanás táan k-baʼateʼel, maʼ tu contra le sukuʼunoʼoboʼ. Tsʼoʼoleʼ wa ku yantal junpʼéel problema ichiloʼoneʼ tu séebaʼanil unaj k-utskíintik (Pro. 19:11; Efe. 4:26). Kʼaʼabéet k-áantik u maasil, maʼ unaj k-páaʼtik u yaʼalaʼaltoʼoniʼ (Tito 3:14). Jach yaʼab utsil tu taasaj úuchik u yáantaʼal le kiik yaan tu grupo  sukuʼun Andréioʼ. Úuchik u beetkoʼob beyoʼ páajchaj u maas biskubaʼob bey junpʼéel familiaeʼ (Sal. 133:1).

16. Jeʼex u yaʼalik Colosenses 4:3 yéetel 18, ¿bix jeʼel k-áantik le sukuʼunoʼob ku chʼaʼpachtaʼaloʼoboʼ?

¹⁶ U milesil sukuʼunoʼobeʼ táan u meyajtikoʼob Jéeoba kex táan u chʼaʼpachtaʼaloʼob. Yanoʼobeʼ hasta kʼalaʼanoʼob cárcel. Le oʼolal maʼalob ka orarnakoʼon tu yoʼolaloʼob bey xan tu yoʼolal u familiaʼob. Maʼalob xan ka orarnakoʼon yoʼolal le máaxoʼob áantik le sukuʼunoʼobaʼ tumen kex jeʼel u kʼaʼalaloʼob xaneʼ ku tsʼáaikoʼob janal espiritual, baʼax kʼaʼabéet tiʼ le sukuʼunoʼoboʼ yéetel ku defenderkoʼob teʼ tribunaloʼoboʼ (xok Colosenses 4:3, 18). c Maʼ unaj u tuʼubultoʼoneʼ k-oraciónoʼobeʼ jach jeʼel u yáantik le sukuʼunoʼob yéetel le kiikoʼob kʼalaʼanoʼoboʼ (2 Tes. 3:1, 2; 1 Tim. 2:1, 2).

17. ¿Bix jeʼel u líiʼskuba máak desde bejlaʼa utiaʼal le chʼaʼpachtajiloʼ?

¹⁷ Ilawil a prepararkabaʼex desde beora utiaʼal le chʼaʼpachtajiloʼ (Hech. 14:22). Chéen baʼaleʼ maʼ a sen tuukuleʼex tiʼ le baʼaloʼob kʼaastak jeʼel u yúuchloʼ. Baʼaxeʼ ilawil a maas biskabaʼex yéetel Jéeoba. Tsʼoʼoleʼ wa yaan a paalaleʼexeʼ áanteʼexoʼob u beetoʼob xan beyoʼ. Wa yaan hora ka sen chiʼichnaktaleʼexeʼ aʼaleʼex tiʼ Jéeoba jach bix a wuʼuyikabaʼex (Sal. 62:7, 8). Tsʼoʼoleʼ múul tsikbalteʼex baʼaxten jeʼel a confiareʼex tiʼ letiʼeʼ. d Preparart a paalaleʼex utiaʼal le chʼaʼpachtajiloʼ jeʼex a beetkeʼex antes tiʼ u yúuchul junpʼéel nojoch loobiloʼ. Beyoʼ maʼ tun sajaktaloʼob yéetel tranquilo ken u yuʼubilubaʼob tumen a kaʼansmoʼob confiar tiʼ Jéeoba.

18. ¿Baʼax ken u beet Jéeoba maʼ kun xáantal?

¹⁸ Le jeetsʼelil ku tsʼáaiktoʼon Diosoʼ ku «kanáantik k-puksiʼikʼal» (Fili. 4:6, 7). Yéetel le jeetsʼelilaʼ Jéeobaeʼ ku yáantkoʼon utiaʼal maʼ k-sajaktal kéen k-aktáant kʼaakʼas kʼojaʼaniloʼob, nukuch loobiloʼob wa chʼaʼpachtajil. Tsʼoʼoleʼ ku meyajtiʼ xan le ancianoʼob utiaʼal u kanáantkoʼonoʼ yéetel ku tsʼáaiktoʼon u páajtalil utiaʼal k-paklan áantikba. Le jeetsʼelil ku tsʼáaiktoʼon Diosoʼ ku prepararkoʼon xan utiaʼal k-aktáantik uláakʼ baʼaloʼob kun úuchul, jeʼex le «nojoch muʼyajiloʼ» (Mat. 24:21, nota). Teʼ kʼiinoʼoboʼ maʼ unaj k-sajaktaliʼ yéetel kʼaʼabéet k-áantik u maasil utiaʼal ka u beetoʼob xan beyoʼ. Kéen tsʼoʼokok le nojoch muʼyajiloʼ mix baʼal kun beetik k-chiʼichnaktal. Jéeobaeʼ yaan u béeykuntik u promesa, yaan u tsʼáaiktoʼon jeetsʼelil utiaʼal mantatsʼ teʼ Paraísooʼ (Isa. 26:3, 4).