1, 2. ¿Baʼax jakʼbeʼen baʼal úuch teʼ Pentecostés tu añoil 33?

TU JAʼATSKABIL domingo teʼ Pentecostés beetaʼab teʼ año 33, tu kaajil Jerusaléneʼ u muchʼmuba 120 discípuloʼob tiʼ junpʼéel cuarto yaan tu kaʼanlil junpʼéel naj (Hech. 1:13-15; 2:1). Maʼ sen úucheʼ Jesúseʼ tu yaʼalajtiʼob ka pʼáatkoʼob teʼ kaajoʼ tumen yaan baʼax kun tsʼaabiltiʼob (Hech. 1:4, 5). ¿Baʼax túun úuchi?

² «Chéen ka téek uʼuyaʼab u juum junpʼéel baʼal teʼ kaʼanoʼ, jach jeʼex u juum junpʼéel kʼaʼamkach iikʼeʼ, ka tu beetaj u yáambal tuláakal le naj[oʼ]». Le discípuloʼob túunoʼ tu yiloʼob «chíikpaj mejen baʼaloʼob beyoʼob kʼáakʼ» yóokʼol u pooloʼobeʼ, ka túun «chuʼupoʼob yéetel espíritu santo» (Hech. 2:2-4). Yéetel le jakʼbeʼen baʼax tu beetaj Jéeoba teʼ kʼiinoʼ tu yeʼesaj tsʼoʼok u tsʼáaik u espíritu santo tiʼ le discípuloʼob muchʼukbaloʼob teʼ kʼiin jeʼeloʼ (Hech. 1:8). Jeʼex k-ilkoʼ letiʼob yáax yéeyaʼaboʼob yéetel espíritu santo * yéetel letiʼob yáax kʼam u jatsʼuts páajtalil u binoʼob kaʼan utiaʼal u gobernaroʼob yéetel Jesús.

3. ¿Bix tu yojéeltil le discípuloʼob tsʼoʼok u yéeyaʼaloʼob yéetel espíritu santo tumen Jéeobaoʼ?

³ Wa ka yanakech ichil le discípuloʼob muchʼukbaloʼob teʼ kʼiin jeʼeloʼ mix bikʼin kun tuʼubultech le baʼax ta wilaj u yúuchloʼ.  Chíikpaj mejen baʼaloʼob beyoʼob kʼáakʼ yóokʼol a pooleʼ, tsʼoʼoleʼ káaj a tʼaan ich jejeláas idiomaʼob (Hech. 2:5-12). Yoʼolal le baʼaxoʼob úuchaʼ jach a wojel tsʼoʼok a yéeyaʼal yéetel espíritu santo tumen Jéeoba. Chéen baʼaleʼ, ¿u kʼáat wa túun u yaʼal kʼaʼabéet u yúuchul junpʼéel jakʼbeʼen baʼal ka u yeʼes tsʼoʼok u yéeyaʼal wa máax? Maʼ. ¿Junpʼéeliliʼ wa bix u yéeyaʼal máak? Maʼatech xan. ¿Baʼaxten? Koʼoneʼex ilik.

4. Teʼ yáax siglooʼ, ¿baʼax kʼiin ka yéeyaʼab jujuntúul máaxoʼob kun binoʼob kaʼan? Tsole.

⁴ Yáaxeʼ koʼoneʼex ilik baʼax kʼiin ku yéeyaʼal wa máax yéetel espíritu santo. Teʼ Pentecostés tu añoil 33, maʼ chéen le 120 discípuloʼob yéeyaʼab yéetel espíritu santooʼ. ¿Baʼaxten k-aʼalik leloʼ? Tumen teʼ kʼiin jeʼeloʼ, jeʼex tu yaʼalil Jesúsoʼ, tsʼaʼab xan espíritu santo tiʼ uláakʼ 3,000 máakoʼob. Chéen baʼaleʼ yéeyaʼaboʼob le ka tsʼoʼok u yokjaʼoboʼ (Hech. 2:37, 38, 41). Le u maasil discípuloʼob yéeyaʼaboʼoboʼ maʼ tu kʼamoʼob espíritu santo jach le kʼiin ka okjaʼanajoʼoboʼ. Jeʼex le samaritanoʼoboʼ tsʼoʼok u chan máan kʼiin okjaʼanakoʼob ka yéeyaʼaboʼob (Hech. 8:14-17). Tsʼoʼoleʼ Cornelio yéetel u láakʼtsiloʼobeʼ yéeyaʼaboʼob táanil tiʼ u yokjaʼob, lelaʼ mix juntéen ilaʼak kaʼachi (Hech. 10:44-48).

5. Jeʼex u yaʼalik Kaʼapʼéel tiʼ Corintios 1:21 yéetel 22, ¿baʼax ku yúuchul kéen yéeyaʼak máak yéetel espíritu santo?

⁵ Beoraaʼ koʼox ilik baʼax ku yúuchul kéen yéeyaʼak máak yéetel espíritu santo. Maʼ xaaneʼ le máax ku yéeyaʼaloʼ tu káajbaleʼ ku yuʼubik maʼ tu merecertik úuchik u yéeyaʼal, le oʼolal ku tuklik: «¿Baʼaxten teen yéeyaʼaben?». Baʼaleʼ uláakʼoʼobeʼ maʼ tu yuʼubikubaʼob beyoʼ. Jeʼel bixakeʼ, apóstol Pabloeʼ tu yaʼalaj jach baʼax ku yúuchul tiʼ tuláakal máax ku yéeyaʼal: «Le ka tsʼoʼok xan a creerkeʼexeʼ, sellartaʼabeʼex * yéetel le espíritu santo aʼalaʼan u tsʼaʼabal tu yoʼolal Cristooʼ. Lelaʼ junpʼéel garantía eʼesik jach tu jaajil yaan k-kʼamik le herenciaoʼ» (Efe. 1:13, 14; tsolajil). Jeʼex k-ilkoʼ, yéetel u espíritu santoeʼ Jéeobaeʼ ku yeʼesiktiʼob jach tsʼoʼok u yéeyikoʼob utiaʼal u binoʼob kaʼan. Bey túunoʼ le espíritu santooʼ «junpʼéel garantía»  ku tsʼaʼabaltiʼob tumen Jéeoba utiaʼal u yeʼesik yaan u binoʼob kajtal teʼ kaʼanoʼ (xok 2 Corintios 1:21, 22).

6. ¿Baʼax unaj u beetik juntúul máax yéeyaʼan utiaʼal ka páajchajak u bin kaʼan?

⁶ Kéen yéeyaʼak wa máax yéetel espíritu santoeʼ, ¿u kʼáat wa u yaʼal jach seguro u bin kaʼan? Maʼ. Lelaʼ chéen ku yeʼesik tsʼoʼok u yéeyaʼal utiaʼal u biniʼ. Baʼaleʼ maʼ unaj u tuʼubsik le baʼax ku yaʼalik le Bibliaaʼ: «Sukuʼuneʼex, beeteʼex tuláakal le ku páajtal utiaʼal ka pʼáatkeʼex kʼamaʼaneʼex yéetel yéeyaʼaneʼex tumen Dios. Tumen wa ku seguer a beetkeʼex le baʼaloʼobaʼ mix bikʼin bíin lúubkeʼex» (2 Ped. 1:10). Jeʼex k-ilkoʼ, le máax yéeyaʼan utiaʼal u bin kaʼaneʼ chéen jeʼel u páajtal u bin wa ku chúukpajal u yóoleʼ (Fili. 3:12-14; Heb. 3:1; Apo. 2:10).

7. ¿Bix u yojéeltik máak tsʼoʼok u yéeyaʼal utiaʼal u bin kaʼan?

⁷ ¿Bix u yojéeltik máak tsʼoʼok u yéeyaʼal utiaʼal u bin kaʼan? Le baʼax tu yaʼalaj apóstol Pablo tiʼ le sukuʼunoʼob yéeyaʼanoʼob yanoʼob Romaoʼ ku yeʼesik bixi. Letiʼeʼ tu yaʼalaj: «Tumen u espíritu santo Dioseʼ maʼ tu beetaj a wuʼuyikabaʼex bey esclavoʼex utiaʼal ka a chʼaʼex saajkil tu kaʼatéeniʼ, baʼaxeʼ ta kʼameʼex le espíritu santo utiaʼal ka máataʼakeʼex bey u paalaloʼob Dioseʼ; tu yoʼolal u espíritu santo Dioseʼ k-aʼalik tiʼ letiʼ: ‹¡Abá, Papá!›. Le espíritu santoaʼ, junmúuchʼ yéetel k-puksiʼikʼaleʼ, ku yeʼeskoʼobtoʼon u paalaloʼon Dios» (Rom. 1:7; 8:15, 16). Bey túunoʼ tiʼ Dioseʼ ku meyaj u espíritu santo utiaʼal u yeʼesik jach tu jaajil tsʼoʼok u yéeyik wa máax utiaʼal u bin kaʼan (1 Tes. 2:12).

8. Jeʼex u yaʼalik Yáax tiʼ Juan 2:20 yéetel 27, ¿baʼaxten juntúul sukuʼun yéeyaʼaneʼ maʼ kʼaʼabéet u yaʼalaʼaltiʼ tumen yaanal máax wa yéeyaʼaniʼ?

⁸ Le máaxoʼob yéeyaʼanoʼob utiaʼal u binoʼob kaʼanoʼ maʼ tu kaʼapʼéeltal u tuukuloʼob, tumen Jéeobaeʼ ku yáantkoʼob u creertoʼob jach tu jaajil tsʼoʼok u yéeyikoʼob (xok 1 Juan 2:20, 27). U jaajileʼ kex yéeyaʼanoʼobeʼ kʼaʼabéet u seguer u kaʼansaʼaloʼob tumen Jéeoba jeʼex u maasil sukuʼunoʼoboʼ. Baʼaleʼ maʼ kʼaʼabéet u yaʼalaʼaltiʼob tumen mix máak wa yéeyaʼanoʼobiʼ. Jéeobaeʼ tsʼoʼok u jach eʼesiktiʼob yéetel u espíritu santo, le muukʼ maas yaan u páajtaliloʼ.

9. Jeʼex u yeʼesik Efesios 1:18, ¿baʼax ku kʼexpajal tiʼ juntúul máax ku yéeyaʼal tumen Dios utiaʼal u bin kaʼan?

⁹ Óoliʼ tuláakal máax meyajtik Dioseʼ maʼ tu kʼuchul u naʼat baʼax ku yúuchul tiʼ máax tsʼoʼok u yéeyaʼal tumen Jéeoba. Leloʼ maʼ jelaʼaniʼ tumen chéen máax tsʼoʼok u yéeyaʼal ku páajtal u naʼatik. Tsʼoʼoleʼ le ka tu beetaj wíinikeʼ Dioseʼ tu tsʼáaj tu puksiʼikʼal u tsʼíibolalil u kuxtal way Luʼumeʼ maʼ teʼ kaʼanoʼ (Gén. 1:28; Sal. 37:29). Chéen baʼaleʼ Dioseʼ tsʼoʼok u yéeyik jujuntúul máakoʼob utiaʼal ka xiʼikoʼob kajtal teʼ kaʼanoʼ. Le oʼolaleʼ le kéen u yéey wa máaxeʼ ku beetik u téek kʼexpajal baʼax ku tsʼíiboltik, bey túunoʼ ku káajal u sen tsʼíiboltik u bin teʼ kaʼanoʼ (xok Efesios 1:18).

10. ¿Baʼax u kʼáat u yaʼal u «síijil máak tu kaʼatéen»? (Ilawil xan le tsolajiloʼ).

¹⁰ Kéen yéeyaʼak juntúul sukuʼun yéetel espíritu santoeʼ ku ‹síijil tu kaʼatéen›. * Jesúseʼ tu yeʼeseʼ wa maʼ yéeyaʼan máak utiaʼal u bin kaʼaneʼ mix bikʼin kun páajtal u naʼatik jach baʼax ku yuʼubik máaxoʼob ku ‹síijloʼob tu kaʼatéen› wa le máaxoʼob ku «síijloʼob tiʼ espíritu santooʼ» (Juan 3:3-8).

11. ¿Bix u kʼexpajal u tuukul juntúul sukuʼun le kéen yéeyaʼak utiaʼal u bin kaʼan?

¹¹ ¿Bix u kʼexpajal u tuukul juntúul sukuʼun kéen yéeyaʼak utiaʼal u bin kaʼan? Táanil tiʼ u yéeyaʼaleʼ jach ku tsʼíiboltik u kuxtal minaʼan u xuul way Luʼumeʼ. Jach taak u yilik u xuʼulsaʼal  tuláakal le kʼasaʼanil tumen Jéeoba yéetel u sutik paraísoil le Luʼumaʼ. Maʼ xaaneʼ táan xan u tsʼíiboltik u kaʼa ilik juntúul u láakʼtsil wa juntúul u amigo kimen. Baʼaleʼ ka yéeyaʼabeʼ kʼexpaj bix u tuukul. Lelaʼ maʼ u kʼáat u yaʼal wa pʼáat maʼ jatsʼuts u yilik le kuxtal way Luʼumoʼ. Maʼ xan kʼexpaj bix u tuukul yoʼolal problemaʼob wa yoʼolal chiʼichnakiloʼobiʼ, mix tumen ku tuklik jeʼel u náakal u yóol kuxtal minaʼan u xuul way Luʼumeʼ. Baʼax úucheʼ yéetel u espíritu santoeʼ, Jéeobaeʼ tu kʼexaj bix u tuukul yéetel tu beetaj u káajal u tsʼíiboltik u bin kaʼan.

12. Jeʼex u yaʼalik Yáax tiʼ Pedro 1:3 yéetel 4, ¿bix u yuʼubikuba le sukuʼunoʼob yéeyaʼanoʼob kéen tuukulnakoʼob tiʼ le nojoch meyaj ken u beetoʼoboʼ?

¹² Le sukuʼun yéeyaʼanoʼ maʼ xaaneʼ ku tuklikeʼ maʼ tu merecertik le nojoch meyaj ken u beetoʼ, baʼaleʼ maʼ kaʼapʼéelchajaʼan u tuukuliʼ tumen u yojel tsʼoʼok u yéeyaʼal tumen Jéeoba. Le oʼolaleʼ kéen tuukulnak tiʼ le jatsʼuts baʼax ken u kʼamoʼ jach táaj ku kiʼimaktal u yóol yéetel ku tsʼíiboltik u tsʼáaik u graciasil tiʼ Jéeoba (xok 1 Pedro 1:3, 4).

13. ¿Bix u yilik le máaxoʼob yéeyaʼanoʼob le kuxtal yaantiʼob way Luʼumoʼ?

¹³ ¿U kʼáat wa túun u yaʼaleʼ le máax tsʼoʼok u yéeyaʼaloʼ ku tsʼíiboltik u séeb kíimil utiaʼal u bin kaʼan? Apóstol Pabloeʼ tu núukaj le kʼáatchiʼaʼ. Ka tsʼoʼok u ketik u wíinklil le máax yéeyaʼan yéetel junpʼéel naj de nookʼeʼ, tu yaʼalaj: «Toʼon máaxoʼon kajaʼanoʼon teʼ naj de nookʼaʼ k-áakam yéetel k-sen chiʼichnaktal. Maʼ tumen wa maʼ k-kʼáat ka u pixoʼon le najaʼ, baʼaxeʼ maas k-kʼáat ka u pixoʼon le uláakʼoʼ, utiaʼal beyoʼ le baʼax ku kʼastaloʼ ka jeelintaʼak tumen le baʼax maʼatech u kʼastaloʼ» (2 Cor. 5:4). Jeʼex k-ilkoʼ, maʼ taak u séeb kíimloʼobiʼ mix náakak u yóoloʼob tiʼ le kuxtaloʼ. Baʼaxeʼ sáamsamal ku disfrutarkoʼob le kuxtal yaantiʼoboʼ yéetel ku yilik u múul meyajtikoʼob Jéeoba yéetel u láakʼtsiloʼob bey xan yéetel u amigoʼob. Kex yaʼab baʼaloʼob ku beetkoʼob way Luʼumeʼ maʼatech u tuʼubultiʼob le jatsʼuts esperanza yaantiʼoboʼ (1 Cor. 15:53; 2 Ped. 1:4; 1 Juan 3:2, 3; Apo. 20:6).

14. Le kʼáatchiʼob yaan teʼ xóotʼolaʼ, ¿baʼax ken u yáantech a naʼate?

¹⁴ Maʼ xaaneʼ ka tuklik: «¿Yéeyaʼanen wa yéetel espíritu santo utiaʼal in bin kaʼan?». Wa bey a tuukuloʼ maʼalob ka chʼaʼ en cuenta le kʼáatchiʼobaʼ: «¿Jach kin tsʼíiboltik wa in beetik baʼax u kʼáat Dios?, ¿jach uts tin tʼaan wa in táakpajal teʼ kʼaʼaytajoʼ?, ¿jatsʼuts wa in wilik in xokik le Biblia yéetel in kaanbal tiʼ ‹le u taamkach naʼat Diosoʼ›?, ¿tsʼoʼok wa u sen bendecirken Jéeoba teʼ kʼaʼaytajoʼ?, ¿kin wuʼuyik wa jach kʼaʼabéet in wáantik u maasil utiaʼal ka kaanbalnakoʼob tiʼ Dios?, ¿jach chíikaʼan wa in wilik bix u yáantken Jéeoba ichil in kuxtal?» (1 Cor. 2:10). Wa táan a beetik yéetel táan u yúuchultech le baʼaxoʼob ku yaʼalik le kʼáatchiʼoboʼ, ¿u kʼáat wa u yaʼal yéeyaʼanech utiaʼal a bin kaʼan? Maas u jaajileʼ maʼ. ¿Baʼaxten? Tumen tuláakal máax meyajtik Jéeoba, kex yéeyaʼan wa maʼeʼ, bey u yuʼubikubaoʼ wa bey xan u yúuchultiʼoʼ. Tsʼoʼoleʼ Jéeobaeʼ ku tsʼáaik u espíritu santo tiʼ tuláakal máax meyajtik, kex yéeyaʼan utiaʼal u bin kaʼan wa maʼ. Wa kaʼapʼéelchajaʼan a tuukul yéetel maʼ a jach ojel wa yéeyaʼanecheʼ, leloʼ ku yeʼesikeʼ maʼ yéeyaʼanech utiaʼal a bin kaʼaniʼ. Máax yéeyaʼaneʼ maʼ kaʼapʼéelchajaʼan u tuukuliʼ. ¡Jach u yojel yéeyaʼan tumen Jéeoba utiaʼal u bin kaʼan!

15. ¿Baʼaxten maʼ tuláakal le máaxoʼob ku tsʼaʼabal espíritu santo tiʼob ku yéeyaʼaloʼob utiaʼal u binoʼob kaʼanoʼ?

¹⁵ Le Bibliaoʼ ku tʼaan tiʼ máaxoʼob chúukpaj u yóoloʼob úuchjeakil tsʼaʼab espíritu santo tiʼob, baʼaleʼ maʼ yéeyaʼaboʼob utiaʼal u binoʼob kaʼaniʼ. Jeʼex Davideʼ nuʼuktaʼab tumen le espíritu santooʼ (1 Sam. 16:13). Lelaʼ le áant u naʼat bix u tuukul Jéeoba yéetel tu nuʼuktaj utiaʼal u  tsʼíibtik jujunpʼéel jaatsoʼob tiʼ le Bibliaoʼ (Mar. 12:36). Kex nuʼuktaʼab David tumen le espíritu santooʼ, apóstol Pedroeʼ tu yaʼaleʼ «maʼ bin kaʼaniʼ» (Hech. 2:34). Le Bibliaoʼ ku yaʼalik xaneʼ Juan Bautistaeʼ chuup yéetel «espíritu santo» kaʼachi (Luc. 1:13-16). Jesús xaneʼ tu yaʼaleʼ «ichil tuláakal le máaxoʼob tsʼoʼok u síijloʼoboʼ mix máak maas nojoch tiʼ Juan Bautista». Baʼaleʼ tu yaʼalaj xaneʼ Juaneʼ maʼ yéeyaʼab utiaʼal ka táakpajak tu Reinoil kaʼaniʼ (Mat. 11:10, 11). Tiʼ Jéeobaeʼ meyajnaj u espíritu santo utiaʼal u yáantik David yéetel Juan Bautista u beetoʼob nukuch meyajoʼob, baʼaleʼ maʼ meyajnajtiʼ utiaʼal u yéeyikoʼob ka xiʼikoʼob kaʼaniʼ. ¿U kʼáat wa túun u yaʼal maʼ jach chúukpaj u yóoloʼob jeʼex le máaxoʼob yéeyaʼanoʼob utiaʼal u binoʼob kaʼanoʼ? Maʼ, letiʼobeʼ chúukpaj u yóoloʼob chéen baʼaleʼ le esperanza yaantiʼoboʼ letiʼe u kuxtaloʼob teʼ Paraíso way Luʼumoʼ (Juan 5:28, 29; Hech. 24:15).

16. ¿Tuʼux ku tsʼíiboltik u kuxtal u maas yaʼabil le máaxoʼob meyajtik Dios teʼ kʼiinoʼobaʼ?

¹⁶ Teʼ kʼiinoʼobaʼ u maas yaʼabil le máaxoʼob meyajtik Jéeoba way Luʼumeʼ maʼ yéeyaʼanoʼob utiaʼal u binoʼob kaʼaniʼ. Jeʼex Abrahán, Sara, David, Juan Bautista yéetel uláakʼ máaxoʼob chúukpaj u yóol u meyajtoʼob Dios úuchjeakileʼ, le máaxoʼob meyajtik Dios xan teʼ kʼiinoʼobaʼ jach ku tsʼíiboltkoʼob u kuxtaloʼob way Luʼum yáanal u nuʼuktaj le Reinooʼ (Heb. 11:10).

17. ¿Baʼax kʼáatchiʼiloʼob kun núukbil teʼ tuláakʼ xookoʼ?

¹⁷ Teʼ kʼiinoʼobaʼ láayliʼ yaan jujuntúul sukuʼunoʼob yéeyaʼanoʼob pʼaatloʼob way Luʼumeʼ, le oʼolaleʼ ku taaktal k-ojéeltik jujunpʼéel baʼaloʼob tu yoʼolaloʼob (Apo. 12:17). Maʼ xaaneʼ taak k-ojéeltik: ¿bix unaj u yuʼubikuba juntúul sukuʼun tsʼoʼok u yéeyaʼal tumen Jéeoba?, ¿bix unaj k-tratartik juntúul sukuʼun ku káajal u jaantik le waaj yéetel u yukʼik le vino teʼ Kʼaʼajsajiloʼ? yéetel ¿unaj wa k-chiʼichnaktal tumen cada añoeʼ táan u yaʼabtal le máaxoʼob jaantik le waaj yéetel ukʼik le vinooʼ? Teʼ tuláakʼ xook kun núukbil le kʼáatchiʼobaʼ.