1. ¿Baʼax tu yaʼalaj Jéeoba kun úuchul teʼ kʼiinoʼobaʼ?

TIʼ JUNPʼÉEL profecía aʼalaʼan kun béeytal teʼ kʼiinoʼobaʼ, Jéeobaeʼ tu yaʼalaj: «Teʼ kʼiinoʼob jeʼeloʼ diez máakoʼob tiʼ tuláakal le idiomaʼob yaan teʼ naciónoʼoboʼ yaan u chʼuytaloʼob tiʼ u nookʼ juntúul judío táan u yaʼalikoʼob: ‹Taak k-bin ta wéeteleʼex, tumen tsʼoʼok k-uʼuyikeʼ Dioseʼ tiaʼan ta wéeteleʼexeʼ›» (Zac. 8:23). Le «judío» ku yaʼalik le tekstoaʼ ku chíikbesik le máaxoʼob yéeyaʼanoʼob yéetel u espíritu santo Diosoʼ, ku yaʼalaʼal xan tiʼob «u Israel Dios» (Gál. 6:16). Le ‹diez máakoʼoboʼ› ku chíikbesik le máaxoʼob ken u kʼamoʼob kuxtal minaʼan u xuul way Luʼumoʼ. Le máaxoʼob kun pʼáatloʼob kuxtal way Luʼumoʼ u yojloʼobeʼ Jéeoba yéeymil le máaxoʼob kun binoʼob kaʼanoʼ yéetel uts tu tʼaan u múul meyajoʼob tu yéeteloʼob.

2. ¿Bix u béeychajal le baʼax ku yaʼalik le Biblia kéen u yaʼal yaan u bin diez máakoʼob tu paach le yéeyaʼanoʼoboʼ?

² U jaajileʼ le máaxoʼob kun pʼáatloʼob kuxtal way Luʼumoʼ maʼ u yojloʼob bix u kʼaabaʼ tuláakal le máaxoʼob yéeyaʼanoʼob kuxaʼanoʼob teʼ kʼiinoʼobaʼ. * Baʼaleʼ láayliʼ jeʼel u páajtal ‹binoʼob› yéetel le yéeyaʼanoʼoboʼ. ¿Bix u beetkoʼob? Le Bibliaoʼ ku yaʼalikeʼ le ‹diez máakoʼoboʼ› yaan u chich machkubaʼob tu «nookʼ juntúul judío» yéetel yaan u yaʼalikoʼob: «Taak k-bin ta wéeteleʼex, tumen tsʼoʼok k-uʼuyikeʼ Dioseʼ tiaʼan ta wéeteleʼexeʼ». Teʼ versículoaʼ chéen juntúul judío ku chʼaʼchiʼitaʼal. Baʼaleʼ le diez máakoʼoboʼ tu tsʼáajoʼob naʼatbil yaʼaboʼob tumen tu yaʼaloʼob: «Ta wéeteleʼex». Lelaʼ ku yeʼesikeʼ tiʼ le máax ku yaʼalaʼal ‹judíooʼ› maʼ juntúul máakiʼ, baʼaxeʼ letiʼe tuláakal le yéeyaʼanoʼob kun binoʼob teʼ kaʼanoʼ. Le máaxoʼob maʼ yéeyaʼanoʼoboʼ ku múul meyajoʼob  yéetel le máaxoʼob kun binoʼob teʼ kaʼanoʼ. Baʼaleʼ maʼatech u tuklikoʼob wa letiʼe yéeyaʼanoʼob u maas nojchiloʼoboʼ tumen u yojloʼobeʼ chéen Jesús u Nojchil ichiloʼob (Mat. 23:10).

3. ¿Baʼax kʼáatchiʼiloʼob kun núukbil teʼ xookaʼ?

³ Teʼ kʼiinoʼobaʼ láayliʼ pʼaatal jujuntúul yéeyaʼanoʼob ichil le máaxoʼob meyajtik Diosoʼ. Le oʼolal yaan sukuʼunoʼobeʼ ku tuklikoʼob: «¿Bix unaj u yuʼubikuba juntúul sukuʼun tsʼoʼok u yéeyaʼal tumen Jéeoba? ¿Bix unaj u tratartaʼal le máaxoʼob ku jaantikoʼob le waaj yéetel ku yukʼikoʼob le vino teʼ Kʼaʼajsajiloʼ? ¿Unaj wa k-chiʼichnaktal tumen táan u maas yaʼabtaloʼob cada año?». Teʼ xook kun núukbil le kʼáatchiʼobaʼ.

4. ¿Baʼaxten maʼ unaj u tuʼubsik le yéeyaʼanoʼob baʼax ku yaʼalik Yáax tiʼ Corintios 11:27 tak 29?

⁴ Yáax tiʼ Corintios 11:27 tak 29, (xoke) ku yaʼalik junpʼéel baʼal maʼ unaj u tuʼubsik le yéeyaʼanoʼoboʼ. Wa juntúul yéeyaʼan ku jaantik le waaj yéetel ku yukʼik le vino pero maʼ tu kuxtal jeʼex u yaʼalik Diosoʼ ku yeʼesik «maʼ tu náajmatik» le jatsʼuts meyaj tsʼaʼantiʼ tumen Diosoʼ (Heb. 6:4-6; 10:26-29). Letiʼobeʼ u yojloʼob kʼaʼabéet u chúukpajal u yóoloʼob utiaʼal u kʼamkoʼob «le premio», wa ‹le kuxtal teʼ kaʼan  kun tsʼaabiltiʼob tumen Dios tu yoʼolal Cristo Jesúsoʼ› (Fili. 3:13-16).

5. ¿Bix unaj u yuʼubikuba le sukuʼunoʼob yéeyaʼanoʼoboʼ?

⁵ U espíritu santo Jéeobaeʼ maʼatech u beetik u creerkuba máak, baʼaxeʼ ku yáantik máak u yeʼes kabal óolal (Efe. 4:1-3; Col. 3:10, 12). Le oʼolal le yéeyaʼanoʼoboʼ maʼatech u tuklikoʼob wa maas maʼaloboʼob tiʼ u maasil. U yojloʼobeʼ kex yéeyaʼanoʼobeʼ maʼatech u tsʼaʼabaltiʼob tumen Jéeoba maas yaʼab espíritu santo. Maʼatech xan u tuklikoʼob wa maas yaʼab baʼax u yojloʼob tiʼ le Biblia ke u maasil máakoʼoboʼ. Tsʼoʼoleʼ mix juntéen ku yaʼalikoʼob tiʼ wa máax: «Teech xaneʼ yéeyaʼanech, unaj a jaantik le waaj yéetel a wukʼik le vino teʼ Kʼaʼajsajiloʼ». Baʼaxeʼ letiʼobeʼ kabal u yóoloʼob yéetel u yojloʼob chéen Jéeoba aʼalik máax yéeyaʼan utiaʼal u bin kaʼan.

6. Yáax tiʼ Corintios 4:7 yéetel 8, ¿baʼax ku yaʼalik maʼ unaj u beetik le yéeyaʼanoʼoboʼ?

⁶ Le yéeyaʼanoʼoboʼ u yojloʼob jach nojoch meyaj tsʼoʼok u kʼubéentaʼaltiʼob tumen Jéeoba, baʼaleʼ maʼatech u páaʼtkoʼob ka píitmáanak u yeʼesaʼaltiʼob tsiikil (Fili. 2:2, 3). U yojloʼob xaneʼ ka yéeyaʼaboʼob tumen Jéeobaeʼ maʼ tiʼ tuláakal yóokʼol kaab tsʼaʼab ojéeltbiliʼ. Le oʼolaleʼ wa le táant u yéeyaʼal juntúul sukuʼun yaan máax maʼ tu creerkeʼ maʼ jelaʼan u yuʼubikubaiʼ. Le Bibliaoʼ ku yaʼalik xaneʼ maʼ unaj k-jáan creertik tuláakal máax ku yaʼalik tsʼoʼok u tsʼaʼabaltiʼ tumen Dios junpʼéel nojoch meyajiʼ (Apo. 2:2). Kéen u kʼaj óoltoʼob xan wa máaxeʼ maʼatech u jáan aʼalikoʼob wa yéeyaʼanoʼob, tumen maʼ u kʼáatoʼob ka tratartaʼakoʼob bey máakoʼob jach especialoʼobeʼ. Tsʼoʼoleʼ mix juntéen ku máan u tsikbaltoʼob wa yéeyaʼanoʼob (xok 1 Corintios 4:7, 8).

7. ¿Baʼax maʼatech u beetik le yéeyaʼanoʼoboʼ, yéetel baʼaxten?

⁷ Le máaxoʼob yéeyaʼanoʼoboʼ maʼatech u biskubaʼob chéen yéetel uláakʼ yéeyaʼanoʼob mix tech u beetkoʼob u chan grupoʼob. Maʼ xan tech u máan u kaxtoʼob uláakʼ sukuʼunoʼob yéeyaʼanoʼob utiaʼal ka u tsikbaltoʼob bix u yuʼubikubaʼob yoʼolal le esperanza yaantiʼoboʼ mix tech u beetik u grupoʼob utiaʼal u múul xokikoʼob le Bibliaoʼ (Gál. 1:15-17). Wa ka u beet le yéeyaʼanoʼob le baʼax táant k-aʼalikaʼ yaan u jatskuba le sukuʼunoʼob teʼ múuchʼuliloʼ. Tsʼoʼoleʼ yaan xan u binoʼob tu contra u espíritu santo Dios, le baʼax beetik u yantal kiʼimak óolal yéetel u múuchʼ meyaj le sukuʼunoʼob teʼ múuchʼuliloʼ (Rom. 16:17, 18).

8. ¿Baʼaxten unaj k-kanáantik bix k-tratartik le yéeyaʼanoʼoboʼ? (Ilawil xan le tsolajiloʼ).

⁸ ¿Bix unaj k-tratartik juntúul sukuʼun wa  juntúul kiik yéeyaʼan? Maʼ maʼalob ka k-sen alabart juntúul u sukuʼun Cristo wa juntúul máax yéeyaʼaniʼ (Mat. 23:8-12). Le Bibliaoʼ ku yaʼalikeʼ ka yanaktoʼon ‹junpʼéel fe jeʼex le yaan tiʼ› le ancianoʼoboʼ, baʼaleʼ maʼatech u yaʼalik ka k-tsaypacht wíinik (Heb. 13:7). Le Bibliaoʼ ku yaʼalik xaneʼ yaan máaxoʼob «ku náajaltikoʼob ka jach respetartaʼakoʼob». Baʼaleʼ maʼatech u yaʼalik ka respetartaʼakoʼob tumen yéeyaʼanoʼob, baʼaxeʼ tumen «maʼalob u meyajoʼob teʼ múuchʼuliloʼ» yéetel tumen «jach ku tsʼáaik u yóoloʼob u tsikbaltoʼob yéetel u kaʼansoʼob u tʼaan Dios» (1 Tim. 5:17). Wa ku píitmáan k-alabartik le yéeyaʼanoʼob yéetel k-tratarkoʼob bey máakoʼob jach especialoʼobeʼ jeʼel k-beetik u suʼlaktaloʼobeʼ * yéetel jeʼel tak k-beetik u tuklikoʼob minaʼan uláakʼ máak jeʼex letiʼobeʼ (Rom. 12:3). ¿Máasaʼ toʼoneʼ jach junpuliʼ maʼ k-kʼáat k-beet u lúubul tiʼ baʼax kʼaas juntúul máax yéeyaʼaniʼ? (Luc. 17:2).

9. ¿Bix jeʼel k-eʼesik tsiikil tiʼ le yéeyaʼanoʼoboʼ?

⁹ ¿Bix jeʼel k-eʼesik tsiikil tiʼ le máaxoʼob yéeyaʼanoʼob tumen Jéeobaoʼ? Maʼ unaj k-kʼáatiktiʼob bix úuchik u yéeyaʼaloʼobiʼ, tumen lelaʼ chéen letiʼob u yojloʼob, maʼ junpʼéel baʼal unaj k-ojéeltik toʼoniʼ (1 Tes. 4:11; 2 Tes. 3:11). Maʼ unaj xan k-tuklik tumen yéeyaʼan juntúul sukuʼuneʼ yéeyaʼan u núup, u taataʼob wa uláakʼ máax ichil u láakʼtsiloʼob. U yéeyaʼal máakeʼ maʼ bey jeʼex u máansaʼal junpʼéel herencia tiʼ wa máaxeʼ, baʼaxeʼ Dios yéeyik máak (1 Tes. 2:12). Maʼ maʼalob xan ka k-beet kʼáatchiʼob jeʼel u beetik u suʼlaktal u láakʼtsiloʼobeʼ. Maʼ unaj k-kʼáatik tiʼ u yatan juntúul sukuʼun yéeyaʼan bix u yuʼubikuba ikil u yojéeltik maʼ tun kuxtal yéetel u yíicham teʼ Paraísooʼ. Toʼoneʼ k-ojleʼ teʼ túumben luʼumoʼ Jéeobaeʼ yaan u tsʼáaik baʼax ku tsʼíiboltik tuláakal baʼal kuxaʼan (Sal. 145:16).

10. ¿Baʼaxten maʼ unaj k-sen utsultʼantik wa k-alabartik u maasiliʼ?

¹⁰ Wa maʼ t-tratartik xan le yéeyaʼanoʼob bey máakoʼob jach especialoʼobeʼ k-kanáantikba. ¿Baʼaxten bey k-aʼalikoʼ? Tumen le Bibliaoʼ ku yaʼalikeʼ jujuntúul yéeyaʼanoʼobeʼ jeʼel u xuʼulul u meyajtikoʼob Dioseʼ (Mat. 25:10-12; 2 Ped. 2:20, 21). Toʼoneʼ maʼatech k-tsaypachtik chéen wíinik, le oʼolal maʼatech k-alabartik wa ‹k-utsultʼantik› juntúul yéeyaʼan wa juntúul sukuʼun úuch joʼopʼok u meyajtik Dios (Jud. 16). Lelaʼ jach ku kanáantkoʼon tumen kex ka xuʼuluk u meyajtikoʼob Jéeobaeʼ, toʼoneʼ yaan u seguer k-meyajtik.

11. ¿Baʼax táan u yúuchul yéetel le máaxoʼob ku jaantikoʼob le waaj yéetel ku yukʼikoʼob le vino teʼ Kʼaʼajsajiloʼ?

¹¹ Teʼ tu tsʼook jaʼaboʼobaʼ le máaxoʼob ku yaʼalikoʼob yéeyaʼanoʼob wa le máaxoʼob ku jaantikoʼob le waaj yéetel ku yukʼikoʼob le vino teʼ Kʼaʼajsajiloʼ pʼíitchajoʼob, baʼaleʼ chéen ka ilaʼabeʼ táan u bin u maas yaʼabtaloʼob. ¿Unaj wa k-chiʼichnaktal yoʼolal le baʼax ku yúuchlaʼ? Maʼatech. Koʼox ilik jujunpʼéel baʼaloʼob eʼesik maʼ unaj k-chiʼichnaktaliʼ.

12. ¿Baʼaxten maʼ unaj k-chiʼichnaktal tumen táan u yaʼabtal le ku jaantikoʼob le waaj yéetel ku yukʼikoʼob le vino teʼ Kʼaʼajsajiloʼ?

¹² «Jéeobaeʼ u kʼaj óol le máaxoʼob u tiaʼaloʼoboʼ» (2 Tim. 2:19). Jéeobaeʼ u yojel jach máaxoʼob le yéeyaʼanoʼoboʼ, baʼaleʼ le sukuʼunoʼob xokik jaytúul máaxoʼob jaantik le waaj yéetel ukʼik le vinooʼ maʼ u yojloʼob jach máaxoʼobiʼ. Ichil le máaxoʼob ku xoʼokloʼoboʼ táakaʼan le sukuʼunoʼob wa kiikoʼob chéen letiʼob tuklik yéeyaʼanoʼoboʼ. Maʼ xaaneʼ yaan sukuʼunoʼobeʼ káaj u jaantikoʼob le waaj yéetel u yukʼikoʼob le  vinooʼ, chéen baʼaleʼ xuʼul u beetkoʼob. Yanoʼob xaneʼ tumen kʼojaʼanoʼobeʼ maʼ jach maʼalob bix u tuukuloʼobiʼ, le oʼolal ku tuklikoʼob yaan u binoʼob gobernar yéetel Jesús teʼ kaʼanoʼ. Jeʼex túun k-ilkoʼ bejlaʼeʼ maʼ tu páajtal k-ojéeltik jach jaytúul tiʼ le yéeyaʼanoʼob pʼaatloʼob way Luʼum kun binoʼob kaʼanoʼ.

13. Le Bibliaoʼ, ¿ku yaʼalik wa jaytúul yéeyaʼanoʼob pʼaatal way Luʼum kéen káajak le nojoch muʼyajiloʼ?

¹³ Tiʼ tuláakal yóokʼol kaab kun antal yéeyaʼanoʼob kéen taalak Jesús u chʼaʼob utiaʼal u biskoʼob kaʼan (Mat. 24:31). Le Bibliaoʼ ku yaʼalikeʼ teʼ tu tsʼook kʼiinoʼobaʼ chéen junpʼíit yéeyaʼanoʼob kun pʼáatloʼob way Luʼumeʼ (Apo. 12:17). Chéen baʼaleʼ maʼ tu yaʼalik jaytúul pʼaatal way Luʼum kéen káajak le nojoch muʼyajiloʼ.

14. ¿Baʼax ku kaʼansiktoʼon Romanos 9:11 yéetel 16 yoʼolal bix u yéeyaʼal le kun binoʼob kaʼanoʼ?

¹⁴ Jéeoba chʼaʼtuklik baʼax kʼiin ken u yéey le máaxoʼob kun binoʼob kaʼanoʼ (Rom. 8:28-30). Jéeobaeʼ káaj u yéeyik le máaxoʼob kun binoʼob kaʼan ka tsʼoʼok u kaʼa kuxkíintik Jesúsoʼ. Maʼ xaaneʼ teʼ yáax siglooʼ tuláakal le sukuʼunoʼob tu meyajtoʼob Diosoʼ yéeyaʼaboʼob. Baʼaleʼ ka máan jujunpʼéel jaʼaboʼobeʼ u maas yaʼabil le máaxoʼob ku yaʼalikoʼob ku meyajtikoʼob Diosoʼ maʼatan u beetkoʼob jeʼex u yaʼalik Diosoʼ. Kex beyoʼ teʼ kʼiinoʼob jeʼeloʼ le junpʼíit jaajil cristianoʼob yanoʼoboʼ yéeyaʼanoʼob. Le sukuʼunoʼobaʼ beyoʼob jeʼex le trigo tu yaʼalaj Jesús kun nuuktal ichil le kʼaakʼas xíiwoʼ (Mat. 13:24-30). Teʼ tu tsʼook kʼiinoʼobaʼ Jéeobaeʼ láayliʼ táan u yéeyik le máaxoʼob kun táakpajloʼob ichil le 144,000. * Bey túunoʼ wa Dios u kʼáat u yéey wa máax le jach taʼaytak le xuʼulsajiloʼ,  ¿máaxoʼon utiaʼal k-aʼalik maʼ maʼalob baʼax ku beetkiʼ? (Xok Romanos 9:11, 16). * Toʼoneʼ maʼ unaj k-tʼaan tu contra Jéeoba jeʼex tu beetil le j-meyajoʼob tu yaʼalaj Jesús tiʼ junpʼéel kettʼaanoʼ. Le j-meyajoʼoboʼ joʼopʼ u kʼuuxiloʼob tumen igual úuchik u boʼotaʼaloʼob yéetel le máaxoʼob meyajnajoʼob chéen junpʼéel horaoʼ (Mat. 20:8-15).

15. ¿Baʼaxten k-aʼalik maʼ tuláakal le yéeyaʼanoʼob táakaʼanoʼob ichil le «esclavo chúukaʼan u yóol yéetel yaan u naʼat» ku yaʼalik Mateo 24:45 tak 47? Tsole.

¹⁵ Maʼ tuláakal le yéeyaʼanoʼob táakaʼanoʼob ichil le «esclavo chúukaʼan u yóol yéetel yaan u naʼat[oʼ]» (xok Mateo 24:45-47). Jeʼex teʼ yáax siglooʼ bejlaʼa xaneʼ Jéeoba yéetel Jesúseʼ chéen yéetel junpʼíit máakoʼobeʼ ku tsʼáaikoʼob le kaʼansaj ku keʼetel yéetel janal tiʼ yaʼab máakoʼoboʼ. Teʼ yáax siglooʼ chéen jujuntúul yéeyaʼanoʼob táakpajoʼob le ka tsʼíibtaʼab le Tsʼíiboʼob ich Griegooʼ. Bejlaʼa xaneʼ chéen junmúuchʼ sukuʼunoʼob yéeyaʼanoʼob tsʼaʼantiʼob u páajtalil u tsʼáaikoʼob tiʼ u kaajal Dios le janal «jach tu yorailoʼ».

16. ¿Baʼax tsʼoʼok a kanik teʼ xookaʼ?

¹⁶ Koʼox kʼaʼajsik baʼax tsʼoʼok k-kanik teʼ xookaʼ. Jéeobaeʼ yaan u tsʼáaik kuxtal minaʼan u xuul way Luʼum tiʼ u maas yaʼabil le máaxoʼob meyajtikoʼ yéetel yaan u tsʼáaik kuxtal minaʼan u xuul teʼ kaʼan tiʼ le junpʼíit máaxoʼob tsʼoʼok u yéeyaʼaloʼob utiaʼal u gobernaroʼob yéetel Jesús teʼ kaʼanoʼ. Jéeobaeʼ ku bendecirtik tuláakal le máaxoʼob meyajtikoʼ, le ‹judíooʼ› bey xan le ‹diez máakoʼoboʼ›. Tsʼoʼoleʼ junpʼéeliliʼ baʼax ku yaʼaliktiʼob ka u beetoʼob bey xan ka chúukpajal u yóoloʼob. Tuláakloʼob unaj u yeʼeskoʼob xan kabal óolal yéetel u múuchʼ meyajoʼob. Tsʼoʼoleʼ tuláakloʼob unaj u yáantajoʼob utiaʼal ka yanak jeetsʼelil teʼ múuchʼuliloʼ. Jach taʼaytak u taal le xuʼulsajiloʼ le oʼolaleʼ unaj u seguer k-meyajtik Jéeoba yéetel maʼ unaj u xuʼulul k-tsaypachtik Cristoiʼ, beyoʼ yaan k-táakpajal ichil le junmúuchʼ tamanoʼob tu yaʼalaj Jesúsoʼ (Juan 10:16).