1. Jeʼex rey Davideʼ, ¿baʼax jeʼel u kʼáatik jujuntúul sukuʼunoʼob tiʼ Jéeobaeʼ?

TULÁAKLOʼON k-kʼáat kuxtal tranquiloil pero yaan horaeʼ ku yantaltoʼon problemas, le oʼolal jeʼel k-chiʼichnaktaleʼ. Yaan sukuʼunoʼobeʼ jeʼel u yuʼubikubaʼob jeʼex rey Davideʼ, juntéeneʼ tu kʼáataj tiʼ Jéeoba: «¿Baʼax kʼiin ken xuʼuluk in sen tuukul yéetel u yaatal u yóol in puksiʼikʼal?» (Sal. 13:2).

2. ¿Baʼax ken k-il teʼ xookaʼ?

² Teʼ kʼiinoʼobaʼ deporsi yaan baʼaxoʼob ken u beet k-chiʼichnaktal, pero yaan baʼaxoʼob jeʼel u páajtal k-beetik utiaʼal maʼ k-sen chʼíikil tuukul tiʼ le baʼaxoʼob ku yúuchultoʼonoʼ. Teʼ xookaʼ yaan k-ilik jujunpʼéel baʼaloʼob beetik k-sen chiʼichnaktal. Kéen tsʼoʼokkeʼ yaan k-ilik seis baʼaloʼob kun áantkoʼon utiaʼal k-uʼuyikba tranquiloil.

3. ¿Baʼaxoʼob beetik u chiʼichnaktal máak maʼ tu páajtal u yutskíintik?

³ Yaan tiʼ le baʼaxoʼob beetik k-chiʼichnaktaloʼ maʼ t-kʼab yaan k-utskíintikoʼobiʼ. Teʼ kʼiinoʼobaʼ séeb u koʼojtal le baʼaloʼob utiaʼal jaantbiloʼ, le nookʼoʼ yéetel yaʼab uláakʼ gastos ku yantal tu yotoch máak. Yaan horaeʼ k-éet meyajoʼob wa k-éet xookoʼobeʼ ku yaʼalikoʼobtoʼon ka núupkʼebanchajkoʼon wa ka k-beet uláakʼ baʼaloʼob maʼ maʼalobtakiʼ, lelaʼ jeʼel u beetik k-chiʼichnaktaleʼ tumen maʼ tu páajtal k-kʼexik bix u tuukuloʼob. Maʼ tu páajtal xan k-beetik u xuʼulul u yantal maleanteʼob yéetel kʼasaʼanil teʼ tuʼux kajaʼanoʼonoʼ.  Tuláakal le baʼaloʼobaʼ ku yúuchul tumen le máakoʼoboʼ maʼ tu beetkoʼob le baʼax ku yaʼalik le Bibliaoʼ. Satanáseʼ u yojleʼ yaan máakoʼobeʼ maʼ ten u meyajtoʼob Jéeoba yoʼolal «u sen chiʼichnakiloʼob le kuxtalaʼ» (Mat. 13:22; 1 Juan 5:19). Le oʼolal ku beetik u sen yantal problemas, beyoʼ le máakoʼoboʼ yaan u chʼíikiloʼob tuukul chéen tiʼ le problemas yaantiʼoboʼ.

4. ¿Baʼax jeʼel u yúuchul tiʼ máak wa yaʼab problemas yaantiʼeʼ?

⁴ Wa yaʼab problemas yaan tiʼ máakeʼ jeʼel u chʼíikil tuukul chéen tiʼ le baʼax ku yúuchultiʼoʼ. Maʼ xaaneʼ yaneʼ como maʼ jach yaʼab u náajaleʼ ku sen tuklik bix ken u beetil yéetel le gastos yaantiʼoʼ. Uláakʼoʼobeʼ saajkoʼob u kʼojaʼantaloʼob tumen maʼ tun béeytal u meyajoʼob, wa saajkoʼob u luʼsaʼal meyajtiʼob. Uláakʼoʼob xaneʼ ku chiʼichnaktaloʼob le kéen u tukloʼob baʼax wal ken u beetoʼob wa ka probartaʼakoʼob yéetel baʼaloʼob kʼaastakiʼ. Yanoʼob xaneʼ ku máansik tu tuukuloʼob wa yaan u beetkoʼob baʼax u kʼáat Jéeoba le kéen atacartaʼak u kaajal Dios tumen le máaxoʼob pʼekmiloʼ. Maʼ xaaneʼ hasta jeʼel u tuklik máakeʼ: «¿Kʼaas wa ta tʼaan ka in sen tukult le baʼaloʼobaʼ?».

5. ¿Baʼaxten tu yaʼalaj Jesús: «Xuʼuluk a chiʼichnaktaleʼex»?

⁵ Jesúseʼ tu yaʼalaj tiʼ u discípuloʼob: «Xuʼuluk a chiʼichnaktaleʼex» (Mat. 6:25). ¿Tu yóotaj wa u yaʼal Jesús de ke jach junpuliʼ maʼ unaj u chiʼichnaktal máakiʼ? Maʼ le tu yóotaj u yaʼaliʼ. Yaan tiʼ le máaxoʼob meyajt Jéeoba úuchjeakiloʼ chiʼichnakchajoʼob, kex beyoʼ maʼ xuʼul u kʼaʼamloʼob tumen Diosiʼ (1 Rey. 19:4; Sal. 6:3). * Yéetel le baʼax tu yaʼalaj Jesúsoʼ chéen taak kaʼach u líiʼsik k-óol. Letiʼeʼ maʼ u kʼáat kaʼach ka xuʼuluk k-meyajtik Jéeoba tumen chʼiikiloʼon tuukul tiʼ le baʼaxoʼob kʼaʼabéettoʼon ichil k-kuxtaloʼ. ¿Baʼax túun jeʼel k-beetik wa k-sen chiʼichnaktaleʼ? (Ilawil le cuadro « Baʼax jeʼel u yáantkecheʼ»).

6. Jeʼex u yaʼalik Filipenses 4:6, 7, ¿baʼax kun áantik máak utiaʼal u yuʼubikuba tranquiloil?

⁶ 1) Orarnen mantatsʼ. Wa ka orar tiʼ Jéeoba le kéen chiʼichnakchajkecheʼ yaan a wuʼuyikaba maʼalobil (1 Ped. 5:7). Le kéen tsʼoʼokok a orareʼ yaan u yantaltech ‹le jeetsʼelil ku tsʼáaik Dios maʼ tu páajtal u naʼataʼal tumen wíinikoʼ› (xok Filipenses 4:6, 7). Wa yaan baʼax chiʼichnakkúuntikecheʼ Jéeobaeʼ jeʼel u tsʼáaiktech u espíritu santo utiaʼal a wuʼuyikaba tranquiloileʼ (Gál. 5:22).

7. ¿Baʼax maʼ unaj u tuʼubul tiʼ máak le kéen orarnakiʼ?

⁷ Le kéen orarnakech tiʼ Jéeobaeʼ aʼaltiʼ jach baʼax ku yúuchultech, máakalmáak le problema yaantechoʼ yéetel bix a wuʼuyikaba. Wa jeʼel u páajtal u yutstal le problemaoʼ kʼáattiʼ ka u maas tsʼáatech naʼat utiaʼal ka béeyak a wilik baʼax jeʼel u páajtal a beetkeʼ. Wa maʼ tu páajtal u yutstaleʼ kʼáat tiʼ Jéeoba ka u yáantech utiaʼal maʼ u píitmáan a tuklik le baʼax ku yúuchultechoʼ. Wa ka waʼaliktiʼ jach bix a wuʼuyikabaeʼ maas séeb jeʼel a tsʼáaik cuenta bix ken u núukil le baʼax ta kʼáatajtiʼoʼ. Chéen baʼaleʼ wa ka wilik bey maʼ tu séeb núukiktecheʼ maʼ u lúubul a wóol. Maʼ u tuʼubultecheʼ kex Jéeoba uts tu tʼaan ka a waʼaltiʼ jach bix a wuʼuyikabaeʼ maas uts tu tʼaan ka suukak a orar tiʼ letiʼ (Luc. 11:8-10).

8. ¿Baʼaxoʼob jeʼel u páajtal k-aʼalik tiʼ Jéeoba kéen orarnakoʼoneʼ?

⁸ Kéen a waʼal tiʼ Jéeoba jach bix a wuʼuyikabaeʼ maʼalob ka tuukulnakech tiʼ tuláakal le baʼaloʼob maʼalobtak tsʼoʼok u tsʼáaiktechoʼ, maʼalob xan ka a tsʼáa u graciasil tiʼ. Yaan kʼiineʼ hasta maʼ ten a kaxt bix a waʼaliktiʼ jach bix a wuʼuyikabaiʼ. Pero maʼ u tuʼubultecheʼ jeʼel u yáantkecheʼ, letiʼeʼ jeʼel u naʼatik bix a  wuʼuyikaba tak chéen ka a waʼaltiʼ: «Jéeoba, kin kʼáat óoltiktech ka a wáanteniʼ» (2 Cró. 18:31; Rom. 8:26).

9. ¿Baʼax unaj k-beetik kéen k-uʼuy saajkoʼon?

⁹ 2) Kʼub a wóol tiʼ Jéeoba, maʼ chéen tiʼ le naʼat yaantechoʼ. Teʼ siglo ocho táanil tiʼ u taal Jesúsoʼ u kajnáaliloʼob Judáeʼ jach sajakchajoʼob ka esclavizartaʼakoʼob tumen le asirioʼoboʼ, le oʼolal tu kʼáatoʼob áantaj tiʼ Egipto (Isa. 30:1, 2). Úuchik u beetkoʼob leloʼ Jéeobaeʼ tu yaʼalajtiʼob yaan u bin kʼaasil tiʼob (Isa. 30:7, 12, 13). Jéeoba túuneʼ tu yaʼalaj tiʼ le profeta Isaías ka u yaʼaltiʼob baʼax unaj u beetkoʼob utiaʼal u xuʼulul u sajaktaloʼoboʼ. Aʼalaʼabtiʼob: «Wa ka pʼáatleʼex tranquiloil yéetel ka weʼeskeʼex a kʼubmaj a wóoleʼex tiʼ teneʼ yaan u yantal a muukʼeʼex» (Isa. 30:15b).

10. Aʼal bey tiʼ baʼax súutukil jeʼel u kʼaʼabéettal k-eʼesik wa yaan k-kʼubik k-óol tiʼ Jéeobaeʼ.

¹⁰ Koʼoneʼex ilik bey tiʼ baʼax súutukil jeʼel u kʼaʼabéettal k-eʼesik wa yaan k-kʼubik k-óol tiʼ Jéeobaeʼ. Maʼ xaaneʼ ku yaʼalaʼal u tsʼaʼabaltech junpʼéel meyaj jach maʼalob u boʼolil chéen baʼaleʼ maʼ tun antaltech tiempo a bin muchʼtáambal wa a jóokʼol kʼaʼaytaj. Maʼ xaaneʼ teʼ tuʼux ka meyajoʼ yaan juntúul xiʼipal wa x-chʼúupal ku yaʼalik taak u biskuba ta wéetel pero maʼ tu meyajtik Jéeoba. Wa maʼ xaan xaneʼ juntúul tiʼ a láakʼtsiloʼob jach a yaabiltmeʼ ku yaʼaliktech: «Yéey baʼax a kʼáat, a religión wa teen». U jaajileʼ maʼ tu kaxtik máak baʼax u beet kéen úuchuktiʼ le baʼaloʼobaʼ pero Jéeobaeʼ yaan u yáantkoʼon utiaʼal k-ilik baʼax jeʼel u páajtal k-beetkeʼ (Mat. 6:33; 10:31; 1 Cor. 7:39). Wa ka úuchuktoʼon le baʼaloʼobaʼ, ¿yaan wa k-kʼubik k-óol tiʼ Jéeoba yéetel k-beetik baʼax ku yaʼalik?

11. Kéen chʼaʼpachtaʼakoʼoneʼ, ¿tiʼ máaxoʼob unaj k-tuukul utiaʼal maʼ k-sajaktal?

¹¹ 3) Kaanbalnakech tiʼ jujuntúul máaxoʼob ku chʼaʼchiʼitaʼal teʼ Bibliaoʼ. Le Bibliaoʼ ku tʼaan tiʼ máaxoʼob tu kʼubaj u yóoloʼob tiʼ Jéeoba yéetel maʼ sajakchajoʼob yoʼolal baʼax tu aktáantoʼobiʼ, yéetel ku tʼaan xan tiʼ máaxoʼob maʼ tu beetoʼobiʼ. Kéen a xok teʼ Biblia yoʼolal le máaxoʼob tu kʼubaj u yóoloʼob tiʼ Jéeobaoʼ jach tsʼáa cuenta baʼax áantoʼob utiaʼal maʼ u sajaktaloʼob kex pʼektaʼaboʼob yéetel chʼaʼpachtaʼaboʼob. Jeʼex le apóstoloʼoboʼ maʼ sajakchajoʼob le ka aʼalaʼabtiʼob tumen le Sanedrín maʼ u seguer u kʼaʼaytajoʼoboʼ. Letiʼobeʼ tu yaʼaloʼob: «Unaj k-uʼuyik u tʼaan Dios, maʼ u tʼaan chéen máakoʼobiʼ» (Hech. 5:29). Kex jaʼajatsʼaʼaboʼobeʼ maʼ sajakchajoʼobiʼ. ¿Baʼaxten? Tumen u yojloʼob táan u beetkoʼob baʼax u kʼáat Jéeoba yéetel yaan u kanáantaʼaloʼob. Le oʼolal «maʼ xuʼul u kaʼanskoʼob yéetel u tsikbaltikoʼob le maʼalob baʼaloʼob» yaan yil yéetel Jesúsoʼ (Hech. 5:40-42). Esteban xaneʼ le jach taʼaytak u kíimsaʼaloʼ jach tranquilo u yilaʼal yéetel maʼ saajkiʼ, le oʼolal le Bibliaoʼ ku yaʼalikeʼ le máakoʼoboʼ «tu yiloʼobeʼ u táan u yicheʼ bey u táan u yich juntúul ángeleʼ» (Hech. 6:12-15). Letiʼeʼ maʼ sajakchajiʼ tumen u yojel táan u beetik baʼax uts tu tʼaan Jéeoba.

12. Jeʼex u yaʼalik 1 Pedro 3:14 yéetel 4:14, ¿baʼaxten jeʼel u páajtal u kiʼimaktal k-óol kex ka chʼaʼpachtaʼakoʼoneʼ?

¹² Le milagroʼob ku beetik kaʼach le apóstoloʼoboʼ tu yeʼesajtiʼob táan u kanáantaʼaloʼob tumen Jéeoba (Hech. 5:12-16; 6:8). Toʼoneʼ maʼ tu páajtal k-beetik milagroʼob jeʼex le apóstoloʼoboʼ. Pero le Bibliaoʼ ku yaʼalikeʼ Jéeobaeʼ yaan u kanáantkoʼon yéetel yaan u tsʼáaiktoʼon u espíritu santo le kéen muʼyajnakoʼon (xok 1 Pedro 3:14; 4:14). Tu lugar k-sen tuklik baʼax ken k-beet kéen chʼaʼpachtaʼakoʼoneʼ maas maʼalob ka k-il baʼax jeʼel u páajtal k-beetik utiaʼal k-maas creertik yaan u salvarkoʼon Jéeoba kéen kʼuchuk u kʼiinileʼ. Jeʼex tu beetil le yáax discípuloʼoboʼ toʼon xaneʼ unaj kʼaʼajsik le promesa tu beetaj Jesúsaʼ: «Tuláakal le máaxoʼob pʼekmileʼexoʼ maʼ kun páajtal u  yaʼalikoʼob wa maʼ jaaj baʼax ka waʼalikeʼexiʼ, mix kun páajtal u baʼateltʼaanoʼob ta wéeteleʼex». Tsʼoʼoleʼ Jesúseʼ ku asegurartiktoʼon lelaʼ: «Wa ku chúukpajal a wóoleʼexeʼ yaan a salvartik a kuxtaleʼex» (Luc. 21:12-19). Maʼ unaj u tuʼubultoʼoneʼ Jéeobaeʼ yaan u kaʼa kuxkíintik le máax chúukpaj u yóol u meyajtoʼ, tumen maʼ tu tuʼubsik kex tsʼoʼok u kíimil.

13. ¿Baʼax jeʼel u páajtal k-kanik tiʼ le máaxoʼob sajakchajoʼob yéetel maʼ tu kʼubaj u yóoloʼob tiʼ Jéeobaiʼ?

¹³ Jeʼel xan u páajtal k-kaanbal tiʼ le máaxoʼob sajakchajoʼob yéetel maʼ tu kʼubaj u yóoloʼob tiʼ Jéeobaiʼ. Le kéen k-xok baʼax tu beetoʼobeʼ yaan k-ilik baʼaxten maʼ unaj k-beetik jeʼex letiʼobeʼ. Koʼox tʼaan tiʼ le baʼax tu beetaj rey Asáoʼ. Le ka káaj u gobernareʼ bin junpʼéel nojoch ejército u atacart u luʼumil Judá, letiʼeʼ jach tu kʼubaj u yóol tiʼ Jéeoba le oʼolal áantaʼab utiaʼal u ganar (2 Cró. 14:9-12). Pero le ka atacartaʼab tumen rey Baasá, ku taal tiʼ luʼumil Israeleʼ, maʼ bey tu beetiliʼ kex maas chichan le ejército atacartoʼ. Tu lugar u kʼubik u yóol tiʼ Jéeoba jeʼex tu beetil le ka káaj u gobernaroʼ tu boʼotaj le sirioʼob utiaʼal ka áantaʼakoʼ (2 Cró. 16:1-3). Tsʼoʼoleʼ le ka tsaʼay junpʼéel kʼaakʼas kʼojaʼanil tiʼeʼ maʼ tu kaxtaj u yáantaj Jéeobaiʼ (2 Cró. 16:12).

14. ¿Baʼax ku kaʼansiktoʼon le baʼaxoʼob maʼ maʼalobtak tu beetaj Asáoʼ?

¹⁴ Asáeʼ le kéen yanak kaʼach problemas tiʼeʼ ku kaxtik u yáantaj Jéeoba. Pero ka máan kʼiineʼ káaj u beetik chéen le baʼax ku tuklik maas maʼalobeʼ. Letiʼeʼ ku tuklik kaʼacheʼ jach yaan u naʼat úuchik u kʼáatik u yáantaj le sirioʼoboʼ, pero maʼ jóokʼ jeʼex úuchik u tuklikoʼ. Le oʼolal Jéeobaeʼ tu túuxtaj juntúul profeta aʼaliktiʼ lelaʼ: «Tumen ta kʼubaj a wóol tiʼ u reyil Siria tu lugar a kʼubik a wóol tiʼ Jéeoba a Dioseʼ, u soldadoʼob u reyil Siriaeʼ tsʼoʼok u púutsʼloʼob ta kʼab» (2 Cró. 16:7). Lelaʼ ku kaʼansiktoʼoneʼ maʼ unaj k-beetik junpʼéel baʼal chéen le bix k-tuklik maas maʼalobeʼ, baʼaxeʼ unaj k-chaʼik u nuʼuktikoʼon Jéeoba yéetel le baʼax ku yaʼalik le Bibliaoʼ. Yaan horaeʼ yaan u kʼaʼabéettal u séeb tuklik máak baʼax ken u beete. Kéen úuchuk leloʼ maʼ unaj u desesperar máakiʼ baʼaxeʼ unaj u kʼubik u yóol tiʼ Jéeoba, beyoʼ yaan u bin maʼalobil tiʼ.

15. ¿Baʼax unaj k-beetik le kéen k-xok le Bibliaoʼ?

¹⁵ 4) Kan tekstoʼob de memoriail. Ilawil a kanik de memoriail le tekstoʼob ku yaʼalik jach kʼaʼabéet u pʼáatal máak tranquiloil yéetel u kʼubik u yóol tiʼ Jéeobaoʼ. Jeʼel u páajtal a xokik kʼaʼameʼ, a tsʼíibtik yéetel a wilik a kʼaʼajsik cada wa baʼax kʼiin. Jéeobaeʼ tu yaʼalaj tiʼ Josué ka u xok sáamsamal u libroil le Leyoʼ yéetel ka tuukulnak tiʼ baʼax ku xokik, beyoʼ yaan u yantal u naʼat. Kéen sajakchajak kaʼach Josué yoʼolal le baʼaxoʼob ku yúuchultiʼoʼ u kʼaʼajsik le baʼaxoʼob tu xokoʼ le áant utiaʼal u yuʼubikuba tranquiloil (Jos. 1:8, 9). Teʼ Bibliaoʼ yaʼab tekstoʼob jatsʼutstak yaan jeʼel u yáantkoʼon utiaʼal k-uʼuyikba tranquiloil le kéen k-uʼuy saajkoʼon wa le kéen sen chiʼichnakchajkoʼon (Sal. 27:1-3; Pro. 3:25, 26).

16. ¿Bix u yáantkoʼon le sukuʼunoʼob utiaʼal k-kʼubik k-óol tiʼ Jéeoba yéetel utiaʼal k-uʼuyikba tranquiloiloʼ?

¹⁶ 5) Bisaba yéetel le sukuʼunoʼoboʼ. Jéeobaeʼ u tsʼaamaj le sukuʼunoʼob utiaʼal u yáantkoʼonoʼoboʼ. Letiʼobeʼ jeʼel u yáantkoʼonoʼob utiaʼal k-kʼubik k-óol tiʼ Jéeobaeʼ bey xan utiaʼal k-uʼuyikba tranquiloil. Le tiaʼanoʼon teʼ muchʼtáambaloʼoboʼ jach yaʼab utsil k-jóoʼsik, ku yáantkoʼon le baʼax ku kaʼansaʼaloʼ, le comentarioʼob ku tsʼáaik le sukuʼunoʼoboʼ bey xan le kéen tsikbalnakoʼon tu yéeteloʼoboʼ (Heb. 10:24, 25). Jach ku líikʼil xan k-óol kéen k-tsikbalt baʼax ku yúuchultoʼon tiʼ juntúul sukuʼun wa juntúul kiik jach maʼalob k-bisikba tu yéetel. Wa jach chiʼichnakoʼoneʼ kéen aʼalaʼaktoʼon «junpʼéel jatsʼuts tʼaan» tumen juntúul tiʼ k-amigoʼobeʼ ku yáantkoʼon utiaʼal k-uʼuyikba maas tranquiloil (Pro. 12:25).

17. Jeʼex u yaʼalik Hebreos 6:19, ¿le esperanza yaan tiʼ máakoʼ bix u yáantik utiaʼal u yuʼubikuba tranquiloil kéen yanak problemas tiʼ?

 ¹⁷ 6) Maʼ a tuʼubsik le esperanza yaantechoʼ. Le k-tuukul tiʼ le baʼaxoʼob kéen u beet u Reino Dios maʼ náach kʼiinoʼ «bey junpʼéel ancla utiaʼal k-kuxtaleʼ», kex ka yanaktoʼon problemaseʼ maʼ t-sajaktal, baʼaxeʼ k-uʼuyikba tranquiloil (xok Hebreos 6:19). Maʼ u tuʼubultecheʼ le Bibliaoʼ ku yaʼalikeʼ tuláakal le baʼaxoʼob beetik k-chiʼichnaktal teʼ kʼiinoʼobaʼ maʼ kun kaʼa kʼaʼajsbiloʼob (Isa. 65:17). Máans ta tuukul tiaʼanech teʼ túumben luʼumoʼ, teʼeloʼ yaan u yantal jeetsʼeliliʼ yéetel maʼ tun antal kʼasaʼaniliʼ (Miq. 4:4). Uláakʼ baʼax jeʼel u yáantkech utiaʼal maʼ a tuʼubsik le esperanza yaantechoʼ letiʼe a tsikbaltik tiʼ u maasiloʼoboʼ. Le oʼolal maʼ u xuʼulul a tsʼáaik a wóol kʼaʼaytaj bey xan a tsʼáaik xook tiʼ le máaxoʼob taak u kaanbaloʼoboʼ. Wa ka beetkeʼ yaan a creertik de ke jach tu jaajil ‹yaan u tsʼaʼabaltech le baʼax ka páaʼtikoʼ› (Heb. 6:11).

18. Jeʼex u bin u náatsʼal u kʼiinil u xuʼulsaʼal tiʼ le kʼasaʼan yóokʼol kaabaʼ, ¿baʼax kun úuchul, yéetel baʼax jeʼel u yáantkoʼoneʼ?

¹⁸ Jeʼex u bin u maas náatsʼal u kʼiinil u xuʼulsaʼal tiʼ le kʼasaʼan yóokʼol kaabaʼ yaan u maas yaʼabtal le problemas ichil k-kuxtaloʼ, lelaʼ jeʼel u beetik k-maas chiʼichnaktaleʼ. Pero u tekstoil le año 2021, ku kʼaʼajsiktoʼoneʼ utiaʼal ka béeyak k-pʼáatal tranquiloil le kéen yanaktoʼon problemaseʼ kʼaʼabéet k-kʼubik k-óol tiʼ Jéeoba maʼ tiʼ le muukʼ ku taal chéen tiʼ toʼonoʼ. Le oʼolal tuláakal le baʼax ka k-beet teʼ añoaʼ ka u yeʼes jach tu jaajil k-creertik le promesa ku beetiktoʼon Jéeobaaʼ: «Wa ka pʼáatleʼex tranquiloil yéetel ka weʼeskeʼex a kʼubmaj a wóoleʼex tiʼ teneʼ yaan u yantal a muukʼeʼex» (Isa. 30:15).