XOOK 4
Baʼaxten k-bin teʼ Kʼaʼajsajiloʼ
«Seguernak a beetkeʼex lelaʼ utiaʼal a kʼaʼajsikeneʼex» (LUC. 22:19).
KʼAAY 20 Ta kʼubaj a kiʼichkelem Paal
TIʼ BAʼAX KUN TʼAAN *
1, 2. 1) ¿Baʼax kʼiin maases k-kʼaʼajsik juntúul máak tsʼoʼok u kíimil? 2) ¿Baʼax tu beetaj Jesús le áakʼab antes tiʼ u kíimsaʼaloʼ?
KEX tsʼoʼok u máan yaʼab años kíimik juntúul máax k-yaabiltmeʼ maʼatech k-tuʼubsik, yéetel maases k-kʼaʼajsik teʼ fecha ka kíimoʼ.
2 Cada añoeʼ u millonesil máakoʼob tiʼ tuláakal yóokʼol kaabeʼ ku muchʼkubaʼob utiaʼal u kʼaʼajsikoʼob úuchik u kíimil juntúul máax jach u yaabiltmoʼob (1 Ped. 1:8). Ku kʼaʼajsikoʼob úuchik u kʼubik u kuxtal Jesucristo utiaʼal u salvarkoʼon tiʼ le kʼeban yéetel tiʼ le kíimiloʼ (Mat. 20:28). Jesúseʼ u kʼáat kaʼach ka kʼaʼajsaʼak tumen u discípuloʼob kéen tsʼoʼokok u kíimil, le oʼolal le áakʼab antes tiʼ u kíimsaʼaloʼ tu beetaj junpʼéel janal especialeʼ ka tu yaʼalaj: «Seguernak a beetkeʼex lelaʼ utiaʼal a kʼaʼajsikeneʼex» (Luc. 22:19).
3. ¿Baʼax ken k-il teʼ xookaʼ?
3 Cada añoeʼ u millonesil máakoʼob ku binoʼob teʼ Kʼaʼajsajiloʼ. Tiʼ le bukaʼaj máakoʼobaʼ chéen junjaats táan u páaʼtik u binoʼob teʼ kaʼanoʼ, u maas yaʼabileʼ táan u páaʼtik u pʼáatloʼob kuxtal way Luʼumeʼ. Teʼ xookaʼ yaan k-ilik baʼax oʼolal tu kaʼajaatsil ku tsʼíiboltkoʼob u binoʼob teʼ Kʼaʼajsajil cada añooʼ yéetel baʼax utsil ku taasiktiʼob. Yáaxeʼ, koʼoneʼex ilik baʼaxten le yéeyaʼanoʼoboʼ ku tsʼíiboltik u binoʼob teʼ Kʼaʼajsajiloʼ.
BAʼAXTEN KU BIN TEʼ KʼAʼAJSAJIL LE YÉEYAʼANOʼOBOʼ
4. ¿Baʼaxten chéen le yéeyaʼanoʼob ku páajtal u jaantikoʼob le waaj yéetel u yukʼikoʼob le vino teʼ Kʼaʼajsajiloʼ?
4 Junpʼéel baʼax oʼolal ku bin le yéeyaʼanoʼob teʼ Kʼaʼajsajiloʼ tumen letiʼobeʼ ku táakpajloʼob tiʼ le waaj yéetel tiʼ le vinooʼ. ¿Baʼaxten ku páajtal u beetkoʼob leloʼ? Utiaʼal k-ojéeltik u núukileʼ koʼoneʼex kʼaʼajsik junpʼéel baʼax tu beetaj Jesús le u tsʼook áakʼab tu máansaj way Luʼumeʼ. Le ka tsʼoʼok u kʼiinbesik le Pascuaoʼ tu beetaj junpʼéel janal especial kʼuch kʼaj óoltbil bey U Ookʼin Janal Yuumtsileʼ. Tu máansaj le waaj yéetel le vino tiʼ le 11 apóstoloʼob chúukaʼan u yóoloʼoboʼ ka tu yaʼalajtiʼob ka u jaantoʼob yéetel ka u yukʼoʼob. Teʼ súutukiloʼ tu chʼaʼchiʼitaj kaʼapʼéel pacto: le túumben pactooʼ yéetel u pactoil le Reinooʼ (Luc. 22:19, 20, 28-30). * Yoʼolal le kaʼapʼéel pacto tu yaʼalaj Jesúsoʼ le apóstoloʼob yéetel uláakʼ sukuʼunoʼob yéeyaʼanoʼobeʼ yaan u kʼuchul u beetubaʼob reyoʼob yéetel sacerdoteʼob teʼ kaʼanoʼ (Apo. 5:10; 14:1). Le u yalab le yéeyaʼanoʼob pʼaatloʼob way Luʼumeʼ táakaʼanoʼob ichil le kaʼapʼéel pacto tu yaʼalaj Jesúsoʼ, le oʼolal chéen letiʼob ku páajtal u jaantikoʼob le waaj yéetel u yukʼikoʼob le vino teʼ Kʼaʼajsajiloʼ.
5. ¿Baʼax táan u páaʼtik le yéeyaʼanoʼoboʼ?
5 Uláakʼ baʼax oʼolal ku bin le yéeyaʼanoʼob teʼ Kʼaʼajsajiloʼ tumen teʼeloʼ ku tuukuloʼob tiʼ le esperanza yaantiʼoboʼ. Letiʼobeʼ táan u páaʼtik u tsʼaʼabaltiʼob junpʼéel wíinklil maʼatech u kʼastal yéetel maʼatech u kíimil. Táan xan u páaʼtkoʼob u kʼuchul u kʼiinil u múul meyajoʼob yéetel Jesús bey xan yéetel le máaxoʼob táakaʼanoʼob ichil le 144,000. Tsʼoʼoleʼ táan xan u páaʼtkoʼob u yantaloʼob tu táan Jéeoba (1 Cor. 15:51-53; 1 Juan 3:2). Le yéeyaʼanoʼoboʼ u yojloʼob yaan u tsʼaʼabaltiʼob le baʼaxoʼob tsʼoʼok k-aʼalikoʼ, chéen baʼaleʼ utiaʼal u páajtal u binoʼob teʼ kaʼanoʼ kʼaʼabéet u chúukpajal u yóoloʼob tak ken kíimkoʼob (2 Tim. 4:7, 8). Letiʼobeʼ jach ku kiʼimaktal u yóoloʼob kéen tuukulnakoʼob tiʼ le baʼax táan u páaʼtkoʼoboʼ (Tito 2:13). ¿Kux túun le ‹uláakʼ tamanoʼoboʼ›? (Juan 10:16). ¿Baʼaxten ku binoʼob teʼ Kʼaʼajsajiloʼ? Koʼoneʼex ilik jujunpʼéel baʼax oʼolal.
BAʼAXTEN KU BIN TEʼ KʼAʼAJSAJIL LE ULÁAKʼ TAMANOʼOBOʼ
6. ¿Baʼaxten cada año ku bin le uláakʼ tamanoʼob teʼ Kʼaʼajsajiloʼ?
6 Junpʼéel baʼax oʼolal ku bin le uláakʼ tamanoʼob teʼ Kʼaʼajsajiloʼ utiaʼal u yilkoʼob bix u beetaʼal, maʼ utiaʼal u táakpajloʼobiʼ. Tu añoil 1938, letiʼe yáax juntéen ka aʼalaʼab tiʼ le uláakʼ tamanoʼob jeʼel u páajtal u binoʼob teʼ Kʼaʼajsajiloʼ. Le revista La Torre del Vigía tiʼ abril tiʼ 1938, tu yaʼaleʼ le uláakʼ tamanoʼoboʼ «jach unaj u binoʼob» teʼ Kʼaʼajsajiloʼ «utiaʼal u yilkoʼob bix u beetaʼal». Tsʼoʼoleʼ tu yaʼalaj: «Letiʼobeʼ jach unaj xan u kiʼimaktal u yóoloʼob teʼ kʼiinoʼ». Jeʼex le máaxoʼob ku binoʼob tiʼ junpʼéel tsʼoʼokol beel kiʼimak u yóoloʼob tak chéen ikil u binoʼoboʼ, le uláakʼ tamanoʼob xanoʼ kiʼimak u yóoloʼob tak chéen ikil u binoʼob teʼ Kʼaʼajsajiloʼ.
7. ¿Baʼaxten le uláakʼ tamanoʼoboʼ uts tu tʼaan u yuʼubikoʼob u discursoil le Kʼaʼajsajiloʼ?
7 Le uláakʼ tamanoʼoboʼ ku tuukuloʼob xan tiʼ le esperanza yaantiʼoboʼ. Letiʼobeʼ uts tu tʼaan u yuʼubikoʼob u discursoil le Kʼaʼajsajiloʼ tumen ku tsoʼolol baʼax ken u beet Jesucristo yéetel le 144,000 ichil le Mil Años kun gobernaroʼoboʼ. Jesucristo yéetel le máaxoʼob kun reinar tu yéeteloʼ yaan u yáantajoʼob utiaʼal u suut paraísoil le Luʼumaʼ yéetel utiaʼal u pʼáatal perfectoil tuláakal máak. Le u millonesil máakoʼob ku binoʼob teʼ Kʼaʼajsajiloʼ jach táan u páaʼtkoʼob u béeytal le baʼax ku yaʼalik Isaías 35:5, 6; 65:21-23 yéetel Apocalipsis 21:3, 4. Le u máansik tu tuukuloʼob tiaʼanoʼob teʼ Paraíso yéetel u láakʼtsiloʼoboʼ ku yáantaj utiaʼal u chúukpajal u yóol u meyajtoʼob Jéeoba yéetel utiaʼal u páaʼtkoʼob u béeykuntik le baʼax u prometermoʼ (Mat. 24:13; Gál. 6:9).
8. Aʼal uláakʼ baʼax oʼolal ku bin le uláakʼ tamanoʼob teʼ Kʼaʼajsajiloʼ.
8 Le uláakʼ tamanoʼoboʼ ku binoʼob teʼ Kʼaʼajsajiloʼ utiaʼal xan u yeʼeskoʼob u yaabiltmoʼob le yéeyaʼanoʼoboʼ yéetel tiaʼanoʼob tu yéeteloʼobeʼ. Le Bibliaoʼ desde úuchjeakil u yaʼaleʼ le yéeyaʼanoʼob yéetel le uláakʼ tamanoʼoboʼ yaan u múul meyajoʼob. Koʼoneʼex ilik jujunpʼéel profecíaʼob ku tʼaanoʼob tiʼ leloʼ.
9. Jeʼex u yaʼalik Zacarías 8:23, ¿bix u yilaʼal le yéeyaʼanoʼob tumen le uláakʼ tamanoʼoboʼ?
9 (Xok Zacarías 8:23). Le profecíaaʼ ku yeʼesik bix u yilaʼal le yéeyaʼanoʼob tumen le uláakʼ tamanoʼoboʼ. Le kéen u yaʼal le profecía «juntúul judío» yéetel «ta wéeteleʼex» táan u tʼaan tiʼ le sukuʼunoʼob yéeyaʼanoʼoboʼ (Rom. 2:28, 29). Le kéen u yaʼal «diez máakoʼob tiʼ tuláakal le idiomaʼob yaan teʼ naciónoʼoboʼ» táan u tʼaan tiʼ le uláakʼ tamanoʼoboʼ. Letiʼobeʼ ku machkubaʼob tiʼ le yéeyaʼanoʼoboʼ, lelaʼ u kʼáat u yaʼaleʼ ku múul adorarkoʼob Jéeoba tu yéeteloʼob. Bey túunoʼ le kéen xiʼik le uláakʼ tamanoʼob teʼ Kʼaʼajsajiloʼ ku yeʼeskoʼob tiaʼanoʼob yéetel le yéeyaʼanoʼoboʼ wa junmúuchʼ yaniloʼob.
10. ¿Bix tsʼoʼok u béeykuntik Jéeoba le profecía ku yaʼalik Ezequiel 37:15-19, 24, 25?
10 (Xok Ezequiel 37:15-19, 24, 25). Jéeobaeʼ tsʼoʼok u béeykuntik le profecía tu yaʼalaj Ezequieloʼ, tumen le yéeyaʼanoʼob yéetel le uláakʼ tamanoʼoboʼ junmúuchʼ yaniloʼob. Le profecíaoʼ ku tʼaan tiʼ kaʼapʼéel cheʼob. Le yéeyaʼanoʼob utiaʼal u binoʼob teʼ kaʼanoʼ letiʼob le cheʼ u tiaʼal Judáoʼ (le tribu tuʼux ku yéeyaʼal kaʼach le reyoʼob ku gobernaroʼob Israeloʼ). Le máaxoʼob táan u páaʼtik u pʼáatloʼob kuxtal way Luʼumeʼ letiʼob le cheʼ u tiaʼal Efraínoʼ. * Jéeobaeʼ u yaʼalmeʼ yaan u muchʼkoʼob utiaʼal u pʼáatloʼob «junpʼéeliliʼ cheʼ». U kʼáat u yaʼaleʼ le kéen káajak u nuʼuktaʼaloʼob tumen rey Jesucristoeʼ yaan u múuchʼ adorarkoʼob Jéeoba. Le oʼolal cada añoeʼ le yéeyaʼanoʼob yéetel le uláakʼ tamanoʼoboʼ ku binoʼob teʼ Kʼaʼajsajiloʼ, maʼ bey kaʼajaats tamanoʼobeʼ baʼaxeʼ bey junmúuchʼ tamanoʼob yáanal u nuʼuktaj ‹juntúuliliʼ j-kanan tamaneʼ› (Juan 10:16).
11. Le tamanoʼob ku yaʼalik Mateo 25:31-36, 40, ¿bix u yáantkoʼob le sukuʼunoʼob yéeyaʼanoʼoboʼ?
11 (Xok Mateo 25:31-36, 40). Le tamanoʼob ku yaʼalaʼal teʼ tekstoaʼ letiʼe utsul máakoʼob kuxaʼanoʼob teʼ tu tsʼook kʼiinoʼobaʼ yéetel táan u páaʼtkoʼob u kuxtaloʼob way Luʼumeʼ. Letiʼobeʼ chúukaʼan u yóol u yáantoʼob le sukuʼunoʼob yéeyaʼanoʼob utiaʼal u tsʼoʼokbeskoʼob le nojoch meyaj kʼubéentaʼantiʼoboʼ: le u kʼaʼaytajoʼob yéetel u kaʼanskoʼob le máakoʼob tiʼ tuláakal yóokʼol kaaboʼ (Mat. 24:14; 28:19, 20).
12, 13. Aʼal uláakʼ bix u yáantaʼal le yéeyaʼanoʼob tumen le uláakʼ tamanoʼoboʼ.
12 Cada añoeʼ wa jaypʼéel semanaʼob antes tiʼ le Kʼaʼajsajiloʼ le uláakʼ tamanoʼoboʼ jach ku yáantkoʼob le sukuʼunoʼob yéeyaʼanoʼoboʼ. ¿Bix u beetkoʼob? Letiʼe kéen u tsʼáa u yóol u invitartoʼob le jaytúul máak ku páajtal utiaʼal u binoʼob teʼ Kʼaʼajsajiloʼ (ilawil le cuadro « ¿Tsʼoʼok wa u káajal a líiʼskaba utiaʼal le Kʼaʼajsajiloʼ?»). Kex minaʼan mix juntúul sukuʼun yéeyaʼan tu múuchʼuliloʼobeʼ le uláakʼ tamanoʼoboʼ ku líiʼskubaʼob utiaʼal u kʼiinbeskoʼob le Kʼaʼajsajiloʼ. Letiʼobeʼ kiʼimak u yóoloʼob u yáantkoʼob le sukuʼunoʼob yéeyaʼanoʼoboʼ, tumen u yojloʼobeʼ tuláakal le baʼax ku beetkoʼob yoʼolal le yéeyaʼanoʼoboʼ bey tiʼ Jesús táan u beetkoʼobeʼ (Mat. 25:37-40).
13 Le sukuʼunoʼob yéeyaʼanoʼob bey xan le uláakʼ tamanoʼoboʼ, ¿baʼaxten unaj u binoʼob teʼ Kʼaʼajsajiloʼ?
BAʼAXTEN K-BIN TEʼ KʼAʼAJSAJILOʼ
14. ¿Bix tsʼoʼok u yeʼesik Jéeoba yéetel Jesús jach u yaabiltmoʼonoʼob?
14 Tumen k-agradecertik le yaabilaj tu yeʼesajtoʼon Jéeoba yéetel Jesúsoʼ. Jéeobaeʼ jejeláas bix tsʼoʼok u yeʼesik u yaabiltmoʼon, chéen baʼaleʼ le baʼax maas nojoch tsʼoʼok u beetkoʼ letiʼe úuchik u túuxtik u Hijo kíimil t-oʼolaloʼ (Juan 3:16). Jesúseʼ tu yeʼesaj xan jach u yaabiltmoʼon tumen tu yóotaj u kʼub u kuxtal t-oʼolal (Juan 15:13). U jaajileʼ maʼ tu páajtal k-boʼotiktiʼob tuláakal le baʼax tsʼoʼok u beetkoʼoboʼ, chéen baʼaleʼ yéetel baʼax k-beetkeʼ jeʼel u páajtal k-eʼesik k-agradecertik le baʼax tu beetoʼoboʼ (Col. 3:15). Le kéen xiʼikoʼon teʼ Kʼaʼajsajiloʼ k-agradecertik le yaabilaj tu yeʼesoʼobtoʼonoʼ yéetel k-eʼesik k-yaabiltmoʼob xan.
15. Le yéeyaʼanoʼob yéetel le uláakʼ tamanoʼoboʼ, ¿baʼaxten jach ku agradecerkoʼob le boʼol tu beetaj Jesúsoʼ?
15 Tumen k-agradecertik le boʼol tu beetaj Jesúsoʼ (Mat. 20:28). Le yéeyaʼanoʼoboʼ jach ku agradecerkoʼob le baʼax tu beetaj Jesúsoʼ, tumen beyoʼ ku yantaltiʼob junpʼéel jatsʼuts esperanza. Le kéen u tsʼáa u fejoʼob tiʼ le baʼax tu beetaj Jesúsoʼ ku yilaʼal toj u kuxtaloʼob tumen Jéeoba yéetel ku kʼamkoʼob bey u paalaloʼobeʼ (Rom. 5:1; 8:15-17, 23). Le uláakʼ tamanoʼoboʼ ku agradecerkoʼob xan le baʼax tu beetaj Jesúsoʼ, tumen le kéen u tsʼáa u fejoʼob tiʼ u kʼiʼikʼel tu wekoʼ ku kʼaʼamloʼob tumen Dios, ku béeytal u meyajtikoʼob yéetel yaan u páajtal u salvarkubaʼob tu kʼiiniloʼob «le nojoch muʼyajiloʼ» (Apo. 7:13-15). Le kéen xiʼik le yéeyaʼanoʼob yéetel le uláakʼ tamanoʼob teʼ Kʼaʼajsajiloʼ ku yeʼeskoʼob jach ku agradecerkoʼob le boʼol tu beetaj Jesúsoʼ.
16. Aʼal uláakʼ baʼax oʼolal k-bin teʼ Kʼaʼajsajiloʼ.
16 Tumen taak k-uʼuyik u tʼaan Jesús. Kex jeʼel baʼaxak esperanzail yaantoʼoneʼ tuláakloʼon taak k-beetik le baʼax tu yaʼalaj Jesús teʼ áakʼab le ka tu yáax kʼiinbesaj le Kʼaʼajsajiloʼ. Letiʼeʼ tu yaʼalaj: «Seguernak a beetkeʼex lelaʼ utiaʼal a kʼaʼajsikeneʼex» (1 Cor. 11:23, 24).
BAʼAX UTSIL KU TAASIKTOʼON
17. ¿Baʼaxten le k-bin teʼ Kʼaʼajsajiloʼ ku maas natsʼkoʼon tiʼ Jéeoba?
17 Tumen ku maas natsʼkoʼon tiʼ Jéeoba (Sant. 4:8). Jeʼex tsʼoʼok k-ilkoʼ le kéen xiʼikoʼon teʼ Kʼaʼajsajiloʼ k-maas tuukul tiʼ le esperanza yaantoʼonoʼ yéetel tiʼ le yaabilaj tsʼoʼok u yeʼesiktoʼon Jéeobaoʼ (Jer. 29:11; 1 Juan 4:8-10). Tsʼoʼoleʼ k-ojleʼ le esperanza yaantoʼonoʼ seguro u béeytal. Ku tsʼoʼokoleʼ Dioseʼ mix bikʼin u xuʼulul u yaabiltikoʼon, le kéen tuukulnakoʼon tiʼ le baʼaloʼob jeʼeloʼ k-maas yaabiltik Jéeoba yéetel k-maas náatsʼal tu yiknal (Rom. 8:38, 39).
18. Le kéen tuukulnakoʼon tiʼ le baʼax tu beetaj Jesúsoʼ, ¿baʼax ku péeksikoʼon k-beete?
18 Tumen ku péeksikoʼon k-seguert u ejemplo Jesús (1 Ped. 2:21). Jujunpʼéel kʼiinoʼob antes tiʼ le Kʼaʼajsajiloʼ k-kʼaʼajsik jujunpʼéel baʼaxoʼob tu beetaj Jesús le tiaʼan way Luʼumeʼ, bix úuchik u kíimsaʼal yéetel bix úuchik u kaʼa kuxkíintaʼal. Tsʼoʼoleʼ teʼ discurso ku máansaʼal tu yorail le Kʼaʼajsajiloʼ ku kʼaʼajsaʼaltoʼon bukaʼaj u yaabiltmiloʼon Jesús (Efe. 5:2; 1 Juan 3:16). Le kéen k-xok le baʼaxoʼob tu beetaj Jesús yéetel le kéen tuukulnakoʼon tiʼ leloʼ ku péeksikoʼon xíimbal «jeʼex úuchik u xíimbal» letiʼoʼ (1 Juan 2:6).
19. ¿Baʼax unaj k-beetik utiaʼal k-pʼáatal ichil u yaabilaj Dios?
19 Tumen ku yáantkoʼon k-maas chʼaʼtukult k-pʼáatal ichil u yaabilaj Dios (Jud. 20, 21). Le kéen k-beet tuláakal le ku páajtal utiaʼal k-uʼuyik u tʼaan Dios, utiaʼal k-alabartik u kʼaabaʼ yéetel utiaʼal k-kiʼimakkúuntik u yóol u puksiʼikʼaleʼ k-pʼáatal ichil u yaabilaj (Pro. 27:11; Mat. 6:9; 1 Juan 5:3). K-bin teʼ Kʼaʼajsajiloʼ ku tsʼáaiktoʼon u muukʼil utiaʼal k-aʼalik tiʼ Jéeoba: «In kʼáat in bisinba ta wéetel mantatsʼ».
20. ¿Baʼax oʼolal unaj k-bin teʼ Kʼaʼajsajiloʼ?
20 Jeʼex tsʼoʼok k-ilkoʼ wa táan k-páaʼtik k-bin teʼ kaʼan bey xan wa táan k-páaʼtik k-pʼáatal k-kuxtal wa Luʼumeʼ jach yaan baʼax oʼolal k-bin cada año teʼ Kʼaʼajsajiloʼ. Teʼ kʼiin jeʼeloʼ k-kʼaʼajsik Jesucristo, juntúul máax jach k-yaabiltmaj. Ku tsʼoʼokoleʼ k-kʼaʼajsik xan le baʼax maas nojoch tsʼoʼok u beetik Jéeoba t-oʼolaloʼ, le úuchik u kʼubik u kuxtal u Hijo utiaʼal u salvarkoʼonoʼ. Teʼ añoaʼ le Kʼaʼajsajiloʼ yaan u beetaʼal tu áakʼabil viernes 15 tiʼ abril tiʼ 2022. Toʼoneʼ k-yaabiltmaj Jéeoba yéetel u Hijo le oʼolal mix baʼal jeʼel u beetik maʼ k-bin teʼ Kʼaʼajsajiloʼ.
KʼAAY 16 Nojbeʼenkúunteʼex Jéeoba yoʼolal u Paal
^ Kex wa yéeyaʼanoʼon utiaʼal k-bin teʼ kaʼanoʼ bey xan wa táan k-páaʼtik k-kuxtal teʼ Paraíso way Luʼumeʼ cada añoeʼ tuláakloʼon k-tsʼíiboltik k-bin teʼ Kʼaʼajsajiloʼ. Teʼ xookaʼ yaan u tsoʼolol baʼax oʼolal unaj k-biniʼ yéetel baʼax utsil ku taasiktoʼon.
^ Utiaʼal a wojéeltik u maasil yoʼolal le túumben pacto yéetel u pactoil le Reinooʼ ilawil le xook ku kʼaabaʼtik «Yaan u yantal junpʼéel u reinoil sacerdoteʼob», jóokʼ tiʼ U Pʼíich Tulumil Kanan 15 tiʼ octubre tiʼ 2014, página 15 tak 17.
^ Utiaʼal a wojéeltik u maasil yoʼolal le kaʼapʼéel cheʼob ku yaʼalik Ezequiel capítulo 37, ilawil le libro Yaan u kaʼa adorartaʼal chéen Jéeoba, página 129 tak 135, párrafo 3 tak 17.
