LE LEYOʼ ku yaʼalik kaʼacheʼ jeʼel u páajtal u kʼuʼubul mukuyoʼob wa palomaʼob tiʼ Jéeobaeʼ. Tiʼ tuláakal le leyoʼob ku tʼaanoʼob tiʼ le sacrificioʼoboʼ suuk u múul chʼaʼchiʼitaʼal le kaʼapʼéel clase chʼíichʼoʼobaʼ. Beyoʼ le israelitaʼoboʼ jeʼel u páajtal u kʼubkoʼob jeʼel máakalmáak kaʼacheʼ (Lev. 1:14; 12:8; 14:30). Le baʼax ku yaʼalik kaʼach le leyaʼ jach maʼalob, tumen yaan kʼiineʼ ku pʼáatal minaʼan mukuyoʼob tu luʼumil Israel. ¿Baʼaxten?

Le mukuyoʼoboʼ suuk u yantaloʼob Israel teʼ mesoʼob tuʼux ku beetik ooxoloʼ. Chéen baʼaleʼ tu mesil octubre le kéen káajak le keʼeliloʼ, le mukuyoʼoboʼ ku binoʼob tuláakʼ tuʼuxoʼob maʼ jach keʼeliʼ. Yéetel ku kaʼa suutoʼob tu luʼumil Israel le kéen káajak le ooxoliloʼ (Cant. 2:11, 12; Jer. 8:7). Le oʼolal tu kʼiinil keʼelileʼ le israelitaʼoboʼ istikyaj u kaxtikoʼob mukuyoʼob utiaʼal u kʼuboʼob.

Chéen baʼaleʼ tu luʼumil Israeleʼ bul año yaan palomaʼobiʼ, tsʼoʼoleʼ suuk xan u yalakʼtaʼal (ket yéetel Juan 2:14, 16). Junpʼéel libroeʼ ku yaʼalikeʼ teʼ kaajoʼob yanoʼob teʼ bandaoʼ, «le máakoʼoboʼ suuk u yalakʼtikoʼob le palomaʼoboʼ. Tiʼ cada naj kaʼacheʼ suuk u beetaʼal junpʼéel jool teʼ pakʼ utiaʼal u yantal le palomaʼoboʼ» (ket yéetel Isaías 60:8).

¿Baʼax ku kaʼansiktoʼon lelaʼ? Úuchik u chaʼik tiʼ le israelitaʼob ka u kʼuboʼob chʼíichʼoʼob maʼ talam u kaxtaʼaloʼoboʼ ku kaʼansiktoʼoneʼ Jéeobaeʼ nojoch u yaabilaj yéetel ku naʼatik máak.