1, 2. ¿Bix u yáantkoʼon Isaías 65:16, 17 utiaʼal u chúukpajal k-óol?

TU AÑOIL 2017, le asamblea regionaloʼ tu kʼaabaʼtaj: «¡Seguernak a tsʼáaik a wóol!». Teʼ asambleaoʼ kaʼansaʼabtoʼon bix jeʼel u chúukpajal k-óol k-aguantart le baʼaxoʼob ku yúuchultoʼonoʼ. Beoraaʼ tsʼoʼok u máan cuatro años yéetel láayliʼ táan k-aguantartik le baʼaxoʼob táan k-muʼyajtik teʼ yóokʼol kaabaʼ.

² ¿Baʼaxoʼob táan k-muʼyajtik teʼ kʼiinoʼobaʼ? Maʼ xaaneʼ táan k-muʼyaj tumen kíim juntúul k-láakʼtsil wa k-amigo, yaantoʼon junpʼéel kʼaakʼas kʼojaʼanil, tsʼoʼok k-chʼíijil, uchaʼan junpʼéel nojoch loob tuʼux kajaʼanoʼon, jach kʼasaʼan le máakoʼoboʼ, táan k-chʼaʼpachtaʼal wa táan k-muʼyajtik le COVID-19. ¿Máasaʼ jach k-tsʼíiboltik ka kʼuchuk u kʼiinil u xuʼulsaʼal le baʼaloʼobaʼ? Kéen úuchuk lelaʼ maʼ ten k-kaʼa chiʼichnaktal tu yoʼolaloʼob (xok Isaías 65:16, 17).

3. ¿Baʼax kʼaʼabéet k-beetik yéetel baʼaxten?

³ Maʼ chéen chʼaʼabil le kuxtal yaantoʼon bejlaʼoʼ yéetel maʼ xaaneʼ maʼ tun xáantaleʼ yaan k-aktáantik uláakʼ baʼaloʼob maas yajtak (Mat. 24:21). Le oʼolaleʼ unaj u seguer u chúukpajal k-óol. Jesúseʼ tu yaʼalaj baʼaxten unaj k-beetik lelaʼ, letiʼeʼ tu yaʼalaj: «Wa ku chúukpajal a wóoleʼexeʼ yaan a salvartik a kuxtaleʼex» (Luc. 21:19). Junpʼéel baʼax jeʼel u yáantkoʼoneʼ letiʼe k-tuukul tiʼ bix tsʼoʼok u chúukpajal u yóol le máaxoʼob táan u aktáantkoʼob baʼaloʼob jeʼex le k-muʼyajtikoʼ.

4. ¿Baʼaxten Jéeobaeʼ letiʼe máax maas tsʼoʼok u chúukpajal u yóoloʼ?

⁴ Jéeobaeʼ letiʼe máax maas tsʼoʼok u chúukpajal u yóoloʼ. ¿Baʼaxten k-aʼalik lelaʼ? Teʼ yóokʼol kaabaʼ jach yaan baʼaloʼob kʼaastakiʼ tumen Satanás nuʼuktik. Wa Jéeoba u kʼáateʼ jeʼel u páajtal u xuʼulsikeʼ, chéen baʼaleʼ táan u páaʼtik u kʼuchul u kʼiinil u yaʼalmaj utiaʼal u beetik lelaʼ (Rom. 9:22). Koʼoneʼex  ilik nueve baʼaloʼob táan u aguantartik tak bejlaʼeʼ.

5. ¿Baʼaxten k-aʼalik maʼatech u respetartaʼal u kʼaabaʼ Dios, yéetel bix a wuʼuyikaba yoʼolal leloʼ?

⁵ Maʼ u respetartaʼal u kʼaabaʼ. Jéeobaeʼ u yaabiltmaj u kʼaabaʼ yéetel u kʼáat ka respetartaʼak tumen tuláakal máak (Isa. 42:8). Chéen baʼaleʼ tsʼoʼok u máan kex 6,000 años mixbaʼalkúuntaʼak u kʼaabaʼ (Sal. 74:10, 18, 23). Lelaʼ úuch tu jardínil Edén le ka tu beetaj u Kʼaasilbaʼal u tuklaʼal tumen Adán yéetel Eva maʼ u kʼáat Jéeoba ka yanak kiʼimak óolal tiʼobiʼ (Gén. 3:1-5). Yoʼolal le baʼax úuchaʼ tak bejlaʼeʼ ku creertaʼaleʼ Jéeobaeʼ maʼ tu tsʼáaik tiʼ máak le baʼaxoʼob kʼaʼabéettiʼoʼ. Jesúseʼ maʼ u kʼáat kaʼach ka seguernak u mixbaʼalkúuntaʼal u kʼaabaʼ Jéeobaiʼ, le oʼolaleʼ tu yaʼalaj tiʼ u discípuloʼob ka u kʼáatoʼob ich oración lelaʼ: «K-Taata yanech teʼ kaʼanoʼ, santificartaʼak a kʼaabaʼ» (Mat. 6:9).

6. ¿Baʼaxten tsʼoʼok u chaʼik Jéeoba u máan tiempo?

⁶ U yaʼalaʼal maʼ letiʼ unaj u gobernariʼ. Chéen Jéeoba yaan u derechoil u gobernar teʼ kaʼanoʼ bey xan teʼ Luʼumoʼ, yéetel minaʼan uláakʼ máax maas maʼalob u gobernar tiʼ letiʼ (Apo. 4:11). Chéen baʼaleʼ le Kʼaasilbaʼaloʼ tsʼoʼok u beetik u tuklaʼal tumen le ángeloʼob yéetel le máakoʼob maʼ Dios unaj u gobernariʼ. Utiaʼal u yeʼesaʼal chéen táan u tuus Satanáseʼ kʼaʼabéet kaʼach u máan tiempo. Tumen jach yaan u naʼateʼ Jéeobaeʼ tsʼoʼok u chaʼik u gobernarkuba tu juunal wíinik, beyoʼ yaan u chíikpajleʼ wa maʼ tu chʼaʼikoʼob en cuenta Jéeobaeʼ maʼ tu páajtal u bin utsil tiʼob (Jer. 10:23). Yoʼolal u paciencia Dioseʼ yaan u béeytal u yeʼesik chéen letiʼ maas maʼalob u gobernar yéetel chéen u Reino kun taasik kiʼimak óolal way Luʼumeʼ.

7. ¿Máaxoʼob tu tsʼáajubaʼob tu contra Jéeoba, yéetel baʼax kun úuchultiʼob?

⁷ U tsʼáaikuba jujuntúul tiʼ u paalaloʼob tu contra. Ka tu beetaj Jéeoba u ángeloʼob yéetel le yáax wíinikoʼoboʼ perfectoʼob. Chéen baʼaleʼ juntúul tiʼ u ángeloʼobeʼ tu tsʼáajuba tu contra, le oʼolal tu kʼaabaʼtaj Satanás. Letiʼeʼ tu beetaj u tsʼáaikuba tu contra Dios, Adán yéetel Eva, uláakʼ ángeloʼob yéetel uláakʼ wíinikoʼob (Jud. 6). Ka máan kʼiineʼ jujuntúul máaxoʼob yaan ichil u kaajil Israeleʼ kex yéeyaʼanoʼob tumen Jéeobaeʼ, tu tsʼáajubaʼob xan tu contra yéetel káaj u adorarkoʼob yaanal diosoʼob (Isa. 63:8, 10). Le baʼax úuchaʼ jach tu beetaj u yaatal u yóol Jéeoba, chéen baʼaleʼ letiʼeʼ tsʼoʼok u chúukpajal u yóol u páaʼt u kʼuchul u kʼiinil u xuʼulsik tiʼ le máaxoʼob ku tsʼáaikubaʼob tu contraoʼ. Teʼ kʼiin jeʼeloʼ jach yaan u kiʼimaktal k-óol tumen tak toʼon táan k-muʼyajtik le baʼaloʼob ku beetik le máakoʼob kʼasaʼanoʼoboʼ.

8, 9. ¿Baʼaxoʼob ku yaʼalaʼal tu contra Jéeoba yéetel bix jeʼel k-eʼesik maʼ jaajeʼ?

⁸ Le baʼaloʼob maʼ jaajtak ku yaʼalik le Kʼaasilbaʼaloʼ. Le ka tʼaanaj u Kʼaasilbaʼal tu contra Jobeʼ tu tsʼáaj naʼatbileʼ le máakoʼoboʼ chéen ku meyajtikoʼob Dios yoʼolal le baʼaxoʼob ku tsʼaʼabaltiʼoboʼ (Job 1:8-11; 2:3-5). Tak bejlaʼeʼ láayliʼ letiʼe baʼax ku beetik u creertaʼaloʼ (Apo. 12:10). Chéen baʼaleʼ toʼoneʼ k-eʼesik chéen táan u tuus u Kʼaasilbaʼal kéen chúukpajak k-óol, yéetel kéen k-meyajt Jéeoba yéetel yaabilaj. Wa k-beetik beyoʼ jeʼex úuchik yéetel Jobeʼ Jéeobaeʼ yaan u bendecirkoʼon (Sant. 5:11).

⁹ Tiʼ Satanáseʼ ku meyaj u nuuktakil le religiónoʼob utiaʼal u yaʼalik kʼasaʼan Dios  yéetel letiʼ beetik bin u muʼyaj máak. Jeʼex kéen kíimik juntúul chan paaleʼ ku yaʼalikoʼobeʼ Dios bin bis kaʼan tumen kʼaʼabéet juntúul chan ángel tiʼ. ¿Máasaʼ jach ku pʼatkoʼob kʼaasil u kʼaabaʼ Dios yéetel le baʼax ku kaʼanskoʼobaʼ? Toʼoneʼ k-ojel maʼ jaaj le baʼax ku yaʼalikoʼobaʼ. Le kéen kʼojaʼanchajkoʼon wa kéen kíimik juntúul máax jach k-yaabiltmeʼ maʼatech k-aʼalik wa u culpa Dios, baʼaxeʼ k-creertik yaan u kʼuchul u kʼiinil u luʼsik le baʼax k-muʼyajtikoʼ. Le oʼolaleʼ maʼalob ka k-tsikbalt tiʼ uláakʼ máakoʼob bukaʼaj u yaabiltmiloʼon Jéeoba, beyoʼ letiʼ xaneʼ yaan u yantal baʼax u núuk tiʼ u Kʼaasilbaʼal (Pro. 27:11).

10. ¿Baʼax ku kaʼansiktoʼon Salmo 22:23, 24 tu yoʼolal Jéeoba?

¹⁰ U muʼyaj máaxoʼob meyajtik. Jéeobaeʼ jach ku chʼaʼik óotsilil, le oʼolaleʼ ku yaatal u yóol kéen u yil táan k-muʼyaj ikil k-chʼaʼpachtaʼal, ikil k-kʼojaʼantal wa tu yoʼolal le kʼebanoʼ (xok Salmo 22:23, 24). Letiʼeʼ jach ku tsʼíiboltik u xuʼulsik le baʼaxoʼob beetik k-muʼyajoʼ (ket yéetel Éxodo 3:7, 8; Isaías 63:9). Maʼ tun xáantaleʼ yaan u béeykuntik le promesa u beetmaʼ: «Yaan u choʼik tuláakal u jaʼil u yichoʼob, maʼ tun yantal kíimil, mix okʼol, mix kʼiʼinamil yéetel mix máak kun muʼyaj» (Apo. 21:4).

11. ¿Bix u yuʼubikuba Jéeoba kéen u kʼaʼajs le máaxoʼob chúukpaj u yóoloʼob tak ka kíimoʼoboʼ?

¹¹ U kíimil u amigoʼob. ¿Bix u yuʼubikuba ta tʼaan Jéeoba kéen u kʼaʼajs le máaxoʼob chúukpaj u yóoloʼob tak ka kíimoʼoboʼ? Letiʼeʼ jach ku tsʼíiboltik u kaʼa ilkoʼob (Job 14:15). Jéeobaeʼ jach taak wal u yilik tu kaʼatéen Abrahán, u amigooʼ (Sant. 2:23). Wa Moisés, le máax jach ku tʼaan tu yéetel kaʼachoʼ (Éxo. 33:11). Jach ku tsʼíiboltik xan wal u kaʼa uʼuyik u kʼaay David bey xan le uláakʼ máaxoʼob tsʼíibt  le salmosoʼ (Sal. 104:33). Kex tsʼoʼok u kíimil le máaxoʼob meyajtaʼ letiʼeʼ maʼ u tuʼubsmoʼobiʼ (Isa. 49:15). Jéeobaeʼ ku kʼaʼajsik jach bixoʼob tumen tu táaneʼ «le máakoʼobaʼ kuxaʼanoʼob» (Luc. 20:38). Maʼ tun xáantaleʼ letiʼeʼ yaan u kaʼa kuxkíintikoʼob yéetel yaan u kiʼimaktal u yóol kéen u yuʼub u oraciónoʼob yéetel kéen u yil bix u kaʼa adorartaʼal. Lelaʼ jach ku kiʼimakkúuntik k-óol, maases wa tsʼoʼok u kíimil juntúul máax jach k-yaabiltmaj.

12. ¿Baʼax maas beetik u yaatal u yóol Jéeoba?

¹² Le baʼaxoʼob ku beetik le máakoʼob kʼasaʼanoʼob tiʼ u maasiloʼ. Le ka tu tsʼáajuba tu contra Jéeoba le yáax wíinikoʼob teʼ tu jardínil Edénoʼ, Jéeobaeʼ u yojliliʼ yaan u maas kʼastal le yóokʼol kaabaʼ. Letiʼeʼ u pʼeek u yilik u beetaʼal injusticia yéetel uláakʼ baʼaloʼob kʼaastak. Tsʼoʼoleʼ jach ku yaatal u yóol kéen u yil u beetaʼal u muʼyaj le máaxoʼob maʼ tu páajtal u defenderkubaʼob jeʼex le kimen u taataʼoboʼ, wa le kimen u yíichamoʼoboʼ (Zac. 7:9, 10). Chéen baʼaleʼ maas ku yaatal u yóol kéen u yil bix u beetaʼal u muʼyaj yéetel bix u kʼaʼalal le máaxoʼob meyajtikoʼ. Maʼ unaj u tuʼubultoʼoneʼ Jéeobaeʼ u yaabiltmaj tuláakal le máaxoʼob táan u chúukpajal u yóol u aguantartoʼob le baʼaxoʼob ku yúuchul teʼ kʼiinoʼobaʼ.

13. ¿Bix tsʼoʼok u kʼastal wíinik teʼ kʼiinoʼobaʼ, yéetel baʼax ken u beet Jéeoba?

¹³ U kʼastal wíinik. Dioseʼ tu beetoʼon jeʼex letiʼeʼ, chéen baʼaleʼ Satanáseʼ mantatsʼ táan u yilik bix u kʼaskúuntik k-tuukul. Le ka tu yilaj Jéeoba le baʼaxoʼob kʼaastak ku beetik le wíinikoʼob tu kʼiiniloʼob Noéoʼ «yaachaj u yóol úuchik u beetik máak way yóokʼol kaabeʼ yéetel jach tristechaji» (Gén. 6:5, 6, 11). Bejlaʼeʼ tsʼoʼok u maas kʼastal u kuxtal wíinik. Satanáseʼ jach uts tu tʼaan u yilik bix tsʼoʼok u suuktal u beetaʼal baʼaloʼob kʼaastak jeʼex u núupkʼebantal le xiiboʼob yéetel le koʼoleloʼoboʼ wa u yantal baʼax u yil juntúul xiib yéetel u yéet xiibil wa juntúul koʼolel yéetel u yéet koʼolelil (Efe. 4:18, 19). Chéen baʼaleʼ maas jach ku kiʼimaktal u yóol kéen lúubuk juntúul máax meyajtik Jéeoba tiʼ le baʼaloʼob beyaʼ. Le kéen u tukult Jéeoba tsʼoʼok u pʼiistaleʼ yaan u yeʼesik jach táaj u pʼeek le baʼaloʼobaʼ.

14. ¿Baʼax táan u beetik wíinik tiʼ le Luʼum yéetel tiʼ le baʼalcheʼoboʼ?

¹⁴ U kʼaskúuntaʼal le Luʼumaʼ. «Máakeʼ mantatsʼ ku pechʼ óoltik u yéet máakil utiaʼal u beetik kʼaas tiʼ», tsʼoʼoleʼ maʼ táan u kanáantik le Luʼum mix le baʼalcheʼob jeʼex u yaʼalmil Jéeobaoʼ (Ecl. 8:9; Gén. 1:28). Jujuntúul científicoʼobeʼ preocupadoʼob tumen ku yaʼalikoʼobeʼ maʼ kun xáantaleʼ yaan u xuʼulul u yantal kex junpʼéel millón tiʼ le jejeláas baʼaloʼob kuxaʼanoʼoboʼ. Chéen baʼaleʼ toʼoneʼ jach k-tsʼáaik gracias tiʼ Jéeoba tumen letiʼeʼ yaan u «xuʼulsik tiʼ le máaxoʼob táan u kʼaskúuntikoʼob le luʼumoʼ» yéetel yaan u sutik paraísoil (Apo. 11:18; Isa. 35:1).

15, 16. ¿Baʼax unaj u péeksikoʼon utiaʼal u chúukpajal k-óol jeʼex Jéeobaeʼ? Aʼal junpʼéel ejemplo.

¹⁵ Jéeobaeʼ tsʼoʼok u máan u milesil años joʼopʼok u aguantartik yaʼab baʼaloʼob (ilawil le cuadro « Le baʼaxoʼob táan u aguantartik Jéeobaoʼ»). Wa Jéeoba u kʼáateʼ jeʼel u páajtal u jáan xuʼulsik tiʼ le kʼasaʼan yóokʼol kaabaʼ, chéen baʼaleʼ yaʼab utsil tsʼoʼok k-kʼamik ikil u yeʼesik paciencia. Tuukulnakoʼon tiʼ lelaʼ: koʼox aʼalikeʼ juntúul máak yéetel u yataneʼ táan u páaʼtkoʼob u síijil u chaambaloʼob. Chéen baʼaleʼ ku yaʼalaʼaltiʼobeʼ le kéen síijik le chaambaloʼ kʼojaʼan yéetel maʼ tun xáantal u kuxtal. Kex u yojloʼob  yaan u muʼyajoʼobeʼ jach ku kiʼimaktal u yóoloʼob kéen síijik le chaambaloʼ. Tumen u yaabiltmoʼobeʼ yaan u chúukpajal u yóoloʼob u tsʼáaʼob u maas maʼalobil tiʼ.

¹⁶ Toʼon xaneʼ kʼebanoʼon kéen síijikoʼon, kex beyoʼ Jéeobaeʼ u yaabiltmoʼon yéetel ku kanáantkoʼon (1 Juan 4:19). Le taatatsiloʼob tsʼoʼok k-aʼalikoʼ maʼ tu páajtal u tsʼakikoʼob u chaambaloʼoboʼ, chéen baʼaleʼ Jéeobaeʼ jeʼel u páajtal u yáantkoʼoneʼ yéetel u tsʼaamaj u kʼiinil utiaʼal u xuʼulsik baʼax beetik u muʼyaj u paalaloʼoboʼ (Mat. 24:36). K-ojéeltik u yaabiltmoʼoneʼ unaj u yáantkoʼon utiaʼal u chúukpajal k-óol k-aguantart le baʼaxoʼob k-muʼyajtikoʼ.

17. ¿Bix u yáantkoʼon Hebreos 12:2, 3 utiaʼal u chúukpajal k-óol?

¹⁷ Jéeobaeʼ letiʼe máax maas tsʼoʼok u yeʼesiktoʼon bix unaj u chúukpajal k-óoloʼ. Jesúseʼ tu yilaj xan u beetik beyoʼ. Le ka taal way Luʼumeʼ chúukpaj u yóol u aguantart u yaʼalaʼal baʼal tiʼ, u mixbaʼalkúuntaʼal yéetel u chʼuykíintaʼal teʼ cheʼoʼ (xok Hebreos 12:2, 3). Le baʼax áantoʼ letiʼe u kaanbal tiʼ u ejemplo Jéeobaoʼ, toʼon xaneʼ bey unaj k-beetkoʼ.

18. ¿Bix u yáantkoʼon 2 Pedro 3:9 utiaʼal k-ilik le utsil ku taasik úuchik u yeʼesik paciencia Jéeobaoʼ?

¹⁸ (Xok 2 Pedro 3:9). Jéeobaeʼ jach u yojel baʼax kʼiin maas maʼalob utiaʼal u xuʼulsik le kʼasaʼan yóokʼol kaabaʼ. Úuchik u yeʼesik pacienciaeʼ bejlaʼeʼ u millonesil máakoʼob meyajtik yéetel alabartik. Tuláakal le máakoʼobaʼ ku tsʼáaikoʼob u graciasil tiʼ Jéeoba tumen tu yoʼolal u pacienciaeʼ béeychaj u síijloʼob, u kaanbaloʼob yéetel u kʼubik u kuxtaloʼob tiʼ letiʼ. Le kéen u kʼam le u millonesil máakoʼob le baʼaxoʼob u yaʼalmaj Jéeobaoʼ yaan u tsʼáaikoʼob cuenta jach maʼalob úuchik u chúukpajal u yóol Jéeoba.

19. ¿Baʼax unaj k-chʼaʼtuklik k-beetik yéetel baʼax utsil ken u taastoʼon?

¹⁹ U ejemplo Jéeobaeʼ ku yáantkoʼon utiaʼal maʼ u xuʼulul u kiʼimaktal k-óol kex táan k-muʼyaj. Kex yaʼab baʼaloʼob tsʼoʼok u beetik le Kʼaasilbaʼaloʼ, le Bibliaoʼ ku yaʼalikeʼ Jéeobaeʼ juntúul «Dios kiʼimak u yóol» (1 Tim. 1:11). Toʼon xaneʼ jeʼel u páajtal u kiʼimaktal k-óol mientras táan k-páaʼtik u santificartaʼal u kʼaabaʼ Jéeoba, u yeʼesaʼal chéen letiʼ yaan u derechoil u gobernar, u xuʼulsik le baʼaloʼob kʼaastakoʼ bey xan le problemasoʼ. K-ojéeltik yaan baʼaloʼob tsʼoʼok u chúukpajal u yóol u aguantarteʼ ku beetik k-chʼaʼtuklik xan u chúukpajal k-óol. Wa k-beetik beyoʼ yaan k-ilik u béeytal le baʼax ku yaʼalik le Bibliaaʼ: «Kiʼimak u yóol le máax ku chúukpajal u yóol muʼyaj le kéen probartaʼakoʼ, tumen le kéen kʼaʼamak tumen Dioseʼ yaan u kʼuʼubultiʼ u coronail le kuxtal u yaʼalmaj Jéeoba u tsʼáaik tiʼ le máaxoʼob maʼ tu xuʼulul u yaabiltikoʼoboʼ» (Sant. 1:12).