Kʼáatchiʼob ku beetaʼal
¿Maʼalob wa ka okok ich Internet u testigoʼob Jéeoba utiaʼal u kaxtik u novioʼob wa u noviaʼob?
Jéeobaeʼ u kʼáat ka yanak kiʼimak óolal tiʼ le máaxoʼob ku tsʼoʼokol u beeloʼoboʼ yéetel maʼ u pʼatkubaʼob (Mat. 19:4-6). Wa teech taak u tsʼoʼokol a beeleʼ, ¿baʼax jeʼel u yáantkech utiaʼal a kaxtik juntúul maʼalob íichamtsil wa juntúul maʼalob atantsileʼ? Tumen Jéeoba beetmiloʼoneʼ u yojel baʼax kʼaʼabéet k-beetik utiaʼal u bintoʼon utsil le kéen joʼopʼok k-bisikba yéetel wa máax bey xan le kéen tsʼoʼokok k-beel. Koʼoneʼex ilik jujunpʼéel baʼax ku yaʼalik le Biblia jach jeʼel u yáantkoʼonoʼ.
Yáaxeʼ maʼ unaj u tuʼubultoʼoneʼ: «Minaʼan uláakʼ baʼax maas séeb u tuus yéetel jach kʼasaʼan ke le puksiʼikʼaloʼ» (Jer. 17:9). Le kéen joʼopʼok u biskuba kaʼatúul máakoʼob taak u tsʼoʼokol u beeloʼobeʼ u suukileʼ jach séebaʼan u saʼatal u yóoloʼob. Wa ku chʼaʼtuklik u tsʼoʼokol u beeloʼob chéen yoʼolal leloʼ jeʼel u bin kʼaasil tiʼobeʼ (Pro. 28:26). Le oʼolal antes tiʼ u yaʼalik u yaabiltmubaʼob yéetel u chʼaʼtuklik u tsʼoʼokol u beeloʼobeʼ kʼaʼabéet u kʼaj óoltikubaʼob tubeel.
Proverbios 22:3, ku yaʼalik: «Le máax yaan u naʼatoʼ ku taʼakikuba kéen u yil junpʼéel peligro, pero le máax maʼ jach yaan u naʼatoʼ ku seguertik u beel, le oʼolal ku yilik u consecuenciail». ¿Baʼax jeʼel u yúuchul tiʼ máak wa ku yokol teʼ sitioʼob yaan Internet bey xan wa ku meyajtiʼ aplicaciónoʼob utiaʼal u kaxtik u novio wa u noviaoʼ? Yaan jujuntúul máaxoʼobeʼ káaj u biskubaʼob yéetel wa máax tu kʼaj óoltoʼob teʼ Internetoʼ, chéen baʼaleʼ tuʼusoʼob yéetel ka tsʼoʼokeʼ muʼyajoʼob. Yaan máakoʼob xan teʼ sitioʼobaʼ kʼasaʼanoʼob, chéen taak u tuskoʼob máak utiaʼal u yoklikoʼob u taakʼin. Yaan tiʼ letiʼobeʼ ku yaʼalikoʼob u testigoʼob Jéeoba.
Yaan bin xan aplicaciónoʼob wa sitioʼobeʼ ku yaʼalikoʼob bin tiʼ máak máax yéetel maʼalob ka tsʼoʼokok u beel. Chéen baʼaleʼ, ¿maʼalob wa ka u chaʼa máak tiʼ junpʼéel aplicación ka u kaxt máax yéetel ken u máans u yalab u kuxtal? ¿Máasaʼ maʼatech? U jaajileʼ maas jach jeʼel u yáantkoʼon le baʼax ku yaʼalik le Bibliaoʼ (Pro. 1:7; 3:5-7).
Proverbios 14:15, ku yaʼaliktoʼon xan: «Le máax maʼ jach yaan u naʼatoʼ ku creertik tuláakal baʼax ku yaʼalaʼal, pero le máax yaan u naʼatoʼ ku jach ilik tuʼux ku tsʼáaik u yook». Antes k-chʼaʼtuklik u tsʼoʼokol k-beel yéetel wa máaxeʼ unaj k-kʼaj óoltik tubeel. Lelaʼ ¿jeʼel wa u páajtal k-beetik chéen yéetel Interneteʼ? Tak le máaxoʼob úuch joʼopʼok u tsikbaloʼob tiʼ Internetoʼ, ¿jeʼel wa u páajtal u yaʼalaʼal u kʼaj óoltmubaʼob tubeeleʼ? Yaan jujuntúul máaxoʼob tu tukloʼob tsʼoʼok u kaxtikoʼob máax yéetel maʼalob ka tsʼoʼokok u beeloʼobeʼ, le ka kʼuch u kʼiinil u kʼaj óoltikoʼobeʼ tu yuʼuboʼob bey láalaʼab síis jaʼ tu yóokʼoloʼobeʼ wa hasta óolak jóokʼok u yáalkaboʼob.
Juntúul tiʼ le máaxoʼob tsʼíibt u libroil Salmosoʼ tu yaʼalaj: «Maʼatech in máan yéetel le máakoʼob ku tuusoʼoboʼ, yéetel kin náachkuntikinba tiʼ le máaxoʼob ku taʼakikoʼob jach bixoʼoboʼ» (Sal. 26:4). Yaʼab máakoʼobeʼ utiaʼal maʼ u jach kʼaj óoltaʼal bixoʼobeʼ ku tsʼíibtikoʼob baʼaloʼob maʼ jaajtak tu perfiloʼobiʼ. Yaan tiʼ letiʼobeʼ ku yaʼalikoʼob u testigoʼob Jéeoba. Chéen baʼaleʼ, ¿okjaʼanajaʼanoʼob wa? ¿U tsʼaamaj wa u yóoloʼob u meyajtoʼob Dios? ¿U yaabiltmoʼob wa Jéeoba? ¿Bix u yilaʼaloʼob tumen le múuchʼuliloʼ? ¿Ku yilaʼaloʼob wa bey máakoʼob maʼ maʼalob ka u bisuba máak tu yéeteloʼobeʼ? (1 Cor. 15:33; 2 Tim. 2:20, 21). Tu táan Dioseʼ, ¿libreʼob wa utiaʼal u tsʼoʼokol u beeloʼob? Le baʼaloʼobaʼ chéen jeʼel u páajtal u yojéeltik máak wa ku tsikbal yéetel le sukuʼunoʼob kʼaj óoltmil le máax yéetel ku tsikbal Internetoʼ (Pro. 15:22). Juntúul máax meyajtik Dioseʼ junpuliʼ maʼ tu chʼaʼtuklik u tsʼoʼokol u beel yéetel juntúul máax maʼ okjaʼanajaʼaniʼ wa mix tech u meyajtik Dios (2 Cor. 6:14; 1 Cor. 7:39).
¿Tuʼux túun jeʼel u páajtal k-kʼaj óoltik juntúul máax utiaʼal u tsʼoʼokol k-beeleʼ? Jeʼel u páajtal k-kʼaj óoltik teʼ muchʼtáambaloʼoboʼ, teʼ asambleaʼoboʼ wa tiʼ uláakʼ súutukiloʼob.
Le máaxoʼob ku múul máanskoʼob tiempooʼ maas jeʼel u tsʼáaikoʼob cuenta wa maʼalob ka tsʼoʼokok u beeloʼobeʼ
Wa maʼ tu páajtal k-muchʼikba jeʼex tu kʼiiniloʼob le COVID-19, ku meyajtoʼon aplicaciónoʼob utiaʼal k-conectartikba teʼ muchʼtáambaloʼoboʼ, teʼeloʼ jeʼel u páajtal k-kʼaj óoltik uláakʼ sukuʼunoʼob wa kiikoʼob maʼ tsʼokaʼan u beeloʼobiʼ. Ku páajtal k-ilik bix u máansik u asignaciónoʼob yéetel ku páajtal k-uʼuyik bix u comentaroʼob (1 Tim. 6:11, 12). Jeʼel u páajtal xan k-kʼaj óoltik le sukuʼunoʼob wa le kiikoʼob teʼ salaʼob ku beetaʼal kéen tsʼoʼokok le muchʼtáambaloʼoboʼ wa tiʼ uláakʼ súutukiloʼob ku muchʼkuba le sukuʼunoʼoboʼ. Beyoʼ jeʼel u páajtal k-kʼaj óoltik jach bix juntúul máakeʼ, yéetel k-ilik bix u tratartik u maasil (1 Ped. 3:4). Jeʼex kun bin u kʼaj óoltikuba máak yéetel wa máaxeʼ jeʼel u páajtal u yilkoʼob wa igual baʼax u chʼaʼtukultmaj u beetkoʼob yéetel u kuxtaloʼobeʼ, wa jeʼel u páajtal u naʼatkubaʼobeʼ bey xan wa jeʼel u páajtal u tsʼoʼokol u beeloʼobeʼ.
Le máax táan u kaxtik u novio wa u noviaeʼ wa ku chʼaʼik en cuenta le baʼax ku yaʼalik le Bibliaoʼ maas jeʼel u bin utsil tiʼ le kéen tsʼoʼokok u beeleʼ. U libroil Proverbioseʼ ku yaʼalik: «Le máax tsʼoʼok u kaxtik juntúul maʼalob atantsileʼ [wa juntúul maʼalob íichamtsileʼ] tsʼoʼok u kaxtik junpʼéel baʼal maʼalob, yéetel ku kʼamik u yutsil Jéeoba» (Pro. 18:22).
