DONEʼ juntúul u j-jaajkunaj Jéeoba kajaʼan tu luʼumil Canadá, letiʼeʼ jach ku yilik u náatsʼal tsikbal yéetel le máaxoʼob minaʼan u yotochoʼob ku pʼáatloʼob chéen teʼ calleʼoboʼ. Letiʼeʼ ku tsikbaltik bix úuchik u yáantik juntúuliʼ: «Petereʼ juntúul máak chéen bey u máan teʼ calleʼoboʼ, maʼ in wil mix juntúul máak jach táaj sucio jeʼex letiʼoʼ. Jach séeb u yaʼalik baʼal yéetel maʼatech u chaʼik u náatsʼal máak tu yiknal. Kex taak u yáantaʼaleʼ maʼatech u kʼamik». Kex beyoʼ, Doneʼ maas tiʼ catorce años tu yilaj u yeʼesik u yutsil tiʼ.

Junpʼéel kʼiineʼ Petereʼ tu kʼáataj tiʼ Don: «¿Baʼaxten ka wilik a wáantiken? Mix máak uláakʼ beetik in cuentail. ¿Baʼaxten techeʼ taak a wáantiken?». Doneʼ meyajnaj óoxpʼéel tekstoʼob tiʼ utiaʼal u yáantik yéetel yaabilaj. Yáaxeʼ tu kʼáatajtiʼ wa u yojel yaan u kʼaabaʼ Dios, tsʼoʼoleʼ ka tu yaʼalajtiʼ ka u xok teʼ Biblia Salmo 83:18. Ka tsʼoʼokeʼ, utiaʼal u yeʼesiktiʼ baʼaxten jach taak u yáantikeʼ tu yaʼalajtiʼ ka u xok Romailoʼob 10:13 yéetel 14, tuʼux ku yaʼalik: «Tuláakal máax ku chʼaʼchiʼitik u kʼaabaʼ Jéeobaeʼ yaan u salvarkuba». Tu tsʼookeʼ Doneʼ tu xokaj Mateo 9:36, tuʼux ku yaʼalik: «Le ka tu yilaj [Jesús] le yaʼabkach máakoʼoboʼ, tu chʼaʼaj óotsilil tiʼob tumen beyoʼob tamanoʼob loobiltaʼanoʼob yéetel kʼiʼitpajaʼanoʼob minaʼan mix máak kanáantkoʼobeʼ». Ka tsʼoʼokeʼ tu yaʼalaj tiʼ Peter ka u xoke. Ka tsʼoʼok u xokikeʼ táan u yáalal u jaʼil u yich, ka tu kʼáataj: «¿Teneʼ juntúulen wa tiʼ le tamanoʼobaʼ?».

Petereʼ káaj u kʼexik u kuxtal. Ichkíilnaji, tu tsʼikaj u meʼex yéetel tu búukintaj le nookʼ síiʼan tiʼ tumen Donoʼ. Desde teʼ kʼiin jeʼeloʼ ku yilik u pʼáatal limpioil sáamsamal.

Petereʼ sáamsamal ku tsʼíibtik kaʼach baʼax ku yúuchul tiʼ. Le baʼaxoʼob u yáax tsʼíibtmoʼ ku tʼaanoʼob tiʼ baʼaloʼob yajtak uchaʼantiʼ, baʼaleʼ le u tsʼookoʼoboʼ maʼatech. Junpʼéel tiʼ le baʼaxoʼob tu tsʼíibtoʼ ku yaʼalik: «Bejlaʼeʼ tin kanaj bix u kʼaabaʼ Dios. Bejlaʼeʼ kin tʼaan yéetel Jéeoba ken orarnaken. Jach kiʼimak in wóol úuchik in kʼaj óoltik u kʼaabaʼ. Doneʼ ku yaʼalikeʼ jeʼel u páajtal in wilik  Jéeoba bey in amigoeʼ, mantatsʼ yaan tiempo tiʼ utiaʼal u yuʼubiken, jeʼel baʼalak hora ka in tʼaneʼ yéetel jeʼel baʼaxak ka in waʼaltiʼeʼ».

Le u tsʼook baʼaxoʼob tu tsʼíibtoʼ tu beetaj utiaʼal u kiik yéetel utiaʼal u yíitsʼin. Ku yaʼalik:

«Bejlaʼeʼ maʼ maʼalob in wuʼuyikinbaiʼ. Tumen tsʼoʼok in chʼíijil. Chéen baʼaleʼ kex wa letiʼe u tsʼook kʼiin kuxaʼanenaʼ, in wojel yaan in wilik tu kaʼatéen in amigo [Don] teʼ Paraísooʼ. Wa táan a xokikeʼex lelaʼ u kʼáat u yaʼaleʼ tsʼoʼok in kíimil. Baʼaleʼ wa tu kʼiinil in muʼukul ka wilkeʼex juntúul máak maʼ a kʼaj óoleʼexeʼ, tʼaaneneʼex tu yéetel, yéetel beet uts a xokikeʼex le chan libro azulaʼ [letiʼeʼ táan u tʼaan tiʼ le libro La verdad que lleva a vida eterna, tsʼaʼabtiʼ wa jaypʼéel años jeakiloʼ]. * Lelaʼ ku yaʼalikeʼ yaan in kaʼa ilik in amigo teʼ Paraísooʼ. Teneʼ jach kin creertik yaan u béeytal. A sukuʼuneʼex jach u yaabiltmeʼex, Peter».

Ka tsʼoʼok u muʼukleʼ, Ummi, u kiik Petereʼ, tu yaʼalaj: «Petereʼ tu tʼanen walajki dos añosaʼ. Yáax in wuʼuyik kiʼimak u yóoloʼ, hasta táan u cheʼej». Letiʼeʼ tu yaʼalaj tiʼ Don: «Yaan in xokik le libroaʼ, tumen wa tu beetaj u kʼexik u kuxtal in wíitsʼineʼ, u kʼáat u yaʼaleʼ maʼalob baʼax ku kaʼansik». Ummieʼ tu yóotaj ka xíimbaltaʼak tumen juntúul kiik utiaʼal ka u múul xokoʼob le libro ¿Baʼax jach tu jaajil ku kaʼansik le Bibliaoʼ?

Toʼon xaneʼ maʼ unaj k-sajaktal k-kʼaʼayt le maʼalob péektsil tiʼ le máakoʼob chéen yoʼolal bix u yilaʼaloʼoboʼ, unaj k-eʼesik yaabilaj tiʼob yéetel unaj u chúukpajal k-óol k-áantoʼob (1 Tim. 2:3, 4). Wa k-beetkeʼ, maʼ xaaneʼ jeʼel u páajtal k-áantik u maasil u kʼex u kuxtal, jeʼex Petereʼ. Tumen yanoʼobeʼ uts u puksiʼikʼaloʼob. K-ojel Dios, le máax «paktik le puksiʼikʼaloʼ», jeʼel u beetik u náatsʼal tu yiknal tak le máakoʼob beyoʼ (1 Sam. 16:7; Juan 6:44).