Teʼ tekstoaʼ ku chʼaʼchiʼitaʼal nueve jatsʼuts modosoʼob, ku yaʼalik: «Le espíritu santooʼ ku beetik u yantal tiʼ máak le modos jeʼelaʼ: yaabilaj, kiʼimak óolal, jeetsʼelil, paciencia, utsil puksiʼikʼal, utsil, fe, maʼ u séeb kʼuuxil máak yéetel u controlarkuba máak». Chéen baʼaleʼ maʼ chéen le modos jeʼel u páajtal u yantal tiʼ máakoʼ.

Koʼox ilik baʼax tu yaʼalaj Pablo teʼ versículoʼob yanoʼob antes tiʼ u tʼaan tiʼ le jatsʼuts modosoʼobaʼ, tu yaʼalaj: «Le baʼaxoʼob ku túulchʼintaʼal u beet máak tumen u kʼeban wíinkliloʼ [...] letiʼe jeʼeloʼobaʼ: núupkʼeban, éekʼ kuxtal, kuxtal ich x-maʼ suʼtalil, u adorartaʼal imagenoʼob, j-meenil, pʼekbail, baʼatelil, tsʼíikilil, séeb pʼuʼujul, baʼateltʼaanoʼob, u jatskuba máak, sectaʼob, u tsʼíiboltaʼal baʼal u tiaʼal yaanal, káaltalil, kʼiinbesajoʼob tuʼux mix baʼal ku tsʼaʼabal u pʼiis, bey xan uláakʼ baʼaloʼob jeʼex leloʼobaʼ» (Gál. 5:19-21). Le ka tu yaʼalaj Pablo «uláakʼ baʼaloʼob jeʼex leloʼobaʼ» tu tsʼáaj naʼatbileʼ yaan u maasil baʼaloʼob ku túulchʼintaʼal u beet máak tumen u kʼeban wíinklil, jeʼex le ku yaʼalik Colosenses 3:5. Bey u yúuchul yéetel le nueve jatsʼuts modosoʼob ku yaʼalik Gálatas 5:22 yéetel 23. Teʼ listaoʼ Pabloeʼ maʼ tu táakbesaj tuláakal le jatsʼuts modos ku beetik u yantal le espíritu santooʼ.

Uláakʼ baʼax áantkoʼon k-naʼat yaan u maasil jatsʼuts modoseʼ, letiʼe kéen k-ket baʼax tu yaʼalaj Pablo tu libroil Gálatas yéetel le baʼax tu yaʼalaj tu libroil Efesiosoʼ. Letiʼeʼ tu yaʼalaj: «Juntúul máak ku kuxtal ich sáasileʼ ku yeʼesik u yutsil tiʼ tuláakal baʼal, ku beetik baʼax toj yéetel ku kuxtal jeʼex u yaʼalik u jaajiloʼ» (Efe. 5:8, 9). Le utsil ku chʼaʼchiʼitaʼal teʼelaʼ junpʼéel jatsʼuts modos ku yeʼesik le máax ku kuxtal ichil sáasililoʼ, chéen baʼaleʼ táakaʼan xan ichil le jatsʼuts modos ku beetik u yantal le espíritu santooʼ. Lelaʼ ku yeʼesikeʼ le uláakʼ kaʼapʼéel modos ku yaʼalik Efesiosoʼ láayliʼ jatsʼuts modosoʼob ku beetik u yantal xan le espíritu santooʼ, le oʼolal jeʼel u páajtal kaʼach u yoksik Pablo teʼ Gálatas 5:22 yéetel 23.

Pabloeʼ tu yaʼalaj xan tiʼ Timoteo unaj u yantaltiʼ seis jatsʼuts modosoʼob, tu yaʼalajtiʼ: «Xeen tu paach le justiciaoʼ, ilawil a tsʼáaik a wóol a meyajt Dios, xeen tu paach le fejoʼ, le yaabilajoʼ, le chúukaʼan óolaloʼ yéetel ilawil maʼ a séeb kʼuuxil» (1 Tim. 6:11). Tiʼ le jatsʼuts modosoʼob tu yaʼalaj Pablooʼ chéen óoxpʼéel ku beetik u yantal le espíritu santooʼ: le fejoʼ, le yaabilajoʼ yéetel le maʼ u séeb kʼuuxil máakoʼ. Chéen baʼaleʼ utiaʼal u bin Timoteo tu paach le justicia, u tsʼáaik u yóol u meyajt Dios yéetel u yeʼesik chúukaʼan óolaloʼ kʼaʼabéettiʼ u yáantaj le espíritu santo xanoʼ (ket yéetel Colosenses 3:12; 2 Pedro 1:5-7).

Jeʼex k-ilkoʼ Gálatas 5:22 yéetel 23, maʼ tu yaʼalik tuláakal le jatsʼuts modos jeʼel u yantal tiʼ máak yéetel u yáantaj le espíritu santooʼ. Le espíritu santooʼ jeʼel u yáantkoʼon utiaʼal u yantaltoʼon le nueve jatsʼuts modosoʼob ku yaʼalik Gálatasoʼ. Chéen baʼaleʼ jeʼel xan u yáantkoʼon utiaʼal ka yanaktoʼon le u maasil jatsʼuts modos ku páaʼtik Dios ka yanak tiʼ le máaxoʼob muʼukʼaʼan u fejoʼoboʼ. Tsʼoʼoleʼ jeʼel xan u yáantkoʼon k-búukint «le túumben modos beetaʼan jeʼex uts tu tʼaan Dioseʼ, jeʼex u yaʼalik le jaajil justiciaoʼ bey xan le fejoʼ» (Efe. 4:24).