XOOK 26
«Suuneneʼex tin wiknal»
«Suuneneʼex tin wiknal, beyoʼ yaan xan in suut ta wiknaleʼex» (MAL. 3:7).
KʼAAY 102 Unaj k-áantik máax lubaʼan u yóol
TIʼ BAʼAX KUN TʼAAN *
1. ¿Bix u yuʼubikuba Jéeoba kéen suunak juntúul chan taman?
TEʼ XOOK máanoʼ t-kaneʼ Jéeobaeʼ bey juntúul j-kanan taman jach u yaabiltmaj u yalakʼ tamanoʼob yéetel ku tsʼáaik u yóol u kaxt le saatloʼoboʼ. Juntéenjeakeʼ Jéeobaeʼ tu yaʼalaj tiʼ le israelitaʼob náachchajoʼob tiʼ letiʼoʼ: «Suuneneʼex tin wiknal, beyoʼ yaan xan in suut ta wiknaleʼex». Jéeobaeʼ tak teʼ kʼiinoʼobaʼ bey u yuʼubikubaoʼ, letiʼeʼ ku yaʼalik: «Teneʼ maʼatech in kʼexpajal» (Mal. 3:6, 7). Tsʼoʼoleʼ Jesúseʼ tu yaʼaleʼ Jéeoba yéetel le ángeloʼoboʼ jach ku kiʼimaktal u yóoloʼob kéen u yiloʼob tsʼoʼok u suut juntúul chan taman saatal kaʼachi (Luc. 15:10, 32).
2. ¿Baʼax ken k-xakʼalt teʼ xookaʼ?
2 Teʼ xookaʼ yaan k-xakʼaltik óoxpʼéel tsikbal tu yaʼalaj Jesús ku yeʼesik unaj k-áantik le máaxoʼob tsʼoʼok u náachtaloʼob tiʼ u kaajal Jéeobaoʼ. Koʼox ilik máakalmáak le modos unaj k-eʼesiktiʼob utiaʼal k-áantkoʼob suutoʼ. Tsʼoʼoleʼ yaan xan k-ilik baʼaxten maʼalob ka k-beet tuláakal le ku páajtal utiaʼal k-áantkoʼob kéen suunakoʼoboʼ.
UNAJ K-KAXTIK LE TAAKʼIN SAATLOʼ
3, 4. ¿Baʼaxten le koʼolel ku chʼaʼchiʼitaʼal tiʼ Lucas 15:8 tak 10, jach tu tsʼáaj u yóol u kaxt le chan taakʼin saʼattiʼoʼ?
3 Utiaʼal k-kaxtik le máaxoʼob taak u suutoʼob tu yiknal Jéeobaoʼ jach unaj k-tsʼáaik k-óoliʼ. Tu Evangelioil Lucaseʼ, Jesúseʼ tsikbalnaj yoʼolal juntúul koʼolel ku máan u kaxt junpʼéel u taakʼinil dracma tu sataj. Teʼ tsikbaloʼ Jesúseʼ tu yeʼeseʼ le koʼoleloʼ jach tu tsʼáaj u yóol u kaxt le taakʼinoʼ (xok Lucas 15:8-10).
4 Tu kʼiiniloʼob Jesúseʼ juntúul x-chʼúupal ku tsʼoʼokol u beeleʼ suuk u siʼibiltiʼ tumen u maama diez u pʼéelal u taakʼinil dracma. Teʼ tsikbal tu yaʼalaj Jesúsoʼ le koʼoleloʼ maʼ xaaneʼ tu sataj junpʼéel tiʼ le taakʼin siʼibtiʼoʼ. Letiʼeʼ ku tuklik lúub teʼ luʼumoʼ le oʼolal ku tʼabik u lámpara utiaʼal u yilik wa jeʼel u kaxtikeʼ. Chéen baʼaleʼ maʼ tu kaxtiʼ, tumen le lámparaoʼ maʼ xaaneʼ maʼ tu kʼuchul u juul tak tuʼux lúub le taakʼinoʼ. Utiaʼal u kaxtik túuneʼ ku míistik le najoʼ. ¡Chan kiʼimakchaj wal u yóol le ka tu yilaj tiaʼan le taakʼin ichil le taʼ míisoʼ! Jesúseʼ ku yaʼalikeʼ le koʼoleloʼ jach kiʼimakchaj u yóoleʼ ka tu tʼanaj u amigaʼob yéetel u vecinaʼob utiaʼal u yaʼaliktiʼob tsʼoʼok u kaxtik.
5. ¿Baʼaxten jach kʼaʼabéet u yáantaʼal le sukuʼunoʼob tsʼoʼok u náachtaloʼoboʼ?
5 Le baʼax tu tsikbaltaj Jesúsoʼ ku kaʼansiktoʼoneʼ le kéen saʼatak wa baʼax tiʼ máakeʼ unaj u tsʼáaik u yóol u kaxte. Bey unaj u beetaʼal xan le kéen áantaʼak le sukuʼunoʼob tsʼoʼok u xuʼulul u kʼaʼaytajoʼoboʼ. Maʼ xaaneʼ úuch xiʼikoʼob muchʼtáambal tumen binoʼob kajtal yaanal tuʼux yéetel maʼ kʼaj óolaʼanoʼob tumen le sukuʼunoʼoboʼ. Yoʼolal lelaʼ maʼ chéen chʼaʼabil u yáantaʼaloʼobiʼ. U jaajileʼ yaʼab tiʼ letiʼobeʼ u kʼáatoʼob suut ichil u kaajal Jéeoba, chéen baʼaleʼ utiaʼal ka suunakoʼobeʼ jach kʼaʼabéet u yáantaʼaloʼob.
6. ¿Bix jeʼel u yáantaj le múuchʼulil utiaʼal u kaxtaʼal le máaxoʼob tsʼoʼok u náachtaloʼoboʼ?
6 ¿Máaxoʼob unaj u yáantajoʼob utiaʼal ka suunak le sukuʼunoʼoboʼ? Letiʼe ancianoʼoboʼ, le precursoroʼoboʼ yéetel le láakʼtsiloʼoboʼ, u jaajileʼ tuláakal le múuchʼuliloʼ. ¿Yaan wa juntúul a amigo wa a láakʼtsil tsʼoʼok u xuʼulul u jóokʼol kʼaʼaytaj? ¿Tsʼoʼok wa a kʼaj óoltik juntúul tiʼ letiʼob ikil a jóokʼol kʼaʼaytaj joonaj joonajil wa ikil a kʼaʼaytaj teʼ tuʼux yaʼab u máan máakoʼ? Wa beyoʼ aʼaltiʼeʼ wa u kʼáat ka xíimbaltaʼakeʼ jeʼel a tsʼáaik u númeroil u celular wa u dirección tiʼ le ancianoʼoboʼ.
7. ¿Baʼax k-kanik tiʼ le baʼax ku beetik sukuʼun Thomas utiaʼal u yáantik le máaxoʼob tsʼoʼok u náachtaloʼoboʼ?
7 ¿Baʼax unaj u beetik le ancianoʼob utiaʼal u yáantkoʼob suut le máaxoʼob tsʼoʼok u náachtaloʼob tiʼ u kaajal Jéeobaoʼ? Koʼox ilik baʼax tu beetaj Thomas, * juntúul anciano kajaʼan España. Letiʼeʼ tsʼoʼok u yáantik kex 40 sukuʼunoʼob utiaʼal ka suunakoʼob ichil u kaajal Jéeoba. Thomaseʼ ku yaʼalik: «Yáaxeʼ kin kʼáatik tiʼ le sukuʼunoʼob wa u yojloʼob tuʼux kajakbal sukuʼunoʼob tsʼoʼok u xuʼulul u jóokʼloʼob kʼaʼaytajoʼ. Tsʼoʼoleʼ kin kʼáatiktiʼob xan wa yaan máaxoʼob u kʼaj óoloʼob tsʼoʼok u xuʼulul u binoʼob muchʼtáambal. U maas yaʼabil tiʼ letiʼobeʼ jach ku kiʼimaktal u yóoloʼob kéen u yiloʼob táan u yáantajoʼob utiaʼal u kaxtaʼal le máaxoʼob tsʼoʼok u náachtaloʼoboʼ. Tsʼoʼoleʼ kéen in xíimbalt juntúul tiʼ le sukuʼunoʼob xuʼul u bin muchʼtáambaloʼ kin kʼáatiktiʼ bix yanil u paalal bey xan u láakʼtsiloʼob. Yaneʼ ku bisik kaʼach u paalal teʼ muchʼtáambaloʼ, hasta jujuntúul tiʼ letiʼobeʼ maʼ xaaneʼ joʼopʼ u jóokʼloʼob kʼaʼaytaj. Tak letiʼob unaj u yáantaʼaloʼob utiaʼal ka suunakoʼob ichil u kaajal Jéeoba».
UNAJ K-ÁANTIK U PAALAL JÉEOBA SAATLOʼOBOʼ
8. Jeʼex u yaʼalik Lucas 15:17 tak 24, ¿bix tratartaʼabik le hijotsil tumen u taataoʼ?
8 ¿Máakalmáak le modos unaj k-eʼesik utiaʼal k-áantik le máaxoʼob tsʼoʼok u náachtaloʼob tiʼ u kaajal Jéeobaoʼ? Koʼoneʼex ilik baʼax k-kanik tiʼ u tsikbalil le paal saatal kaʼachoʼ (xok Lucas 15:17-24). Jesúseʼ tu tsikbalteʼ le ka kʼaʼaj u yiikʼ le paaloʼ tu chʼaʼtuklaj u suut tu yotoch. Le ka tu yilaj le taatatsil táan u suut u hijooʼ bin áalkabil tu yiknaleʼ, tu méekʼeʼ ka tu tsʼuʼutsʼaj. Le paaloʼ jach yaachajaʼan u yóol yoʼolal le baʼax tu beetoʼ yéetel tu tukleʼ maʼ tu merecertik ka tratartaʼak bey juntúul hijotsileʼ. Le taatatsiloʼ péeknaj u yóol le ka tu yilaj tsʼoʼok u arrepentir u hijooʼ. Le oʼolaleʼ tu beetaj junpʼéel fiesta utiaʼal u kʼamik yéetel tu yaʼalaj ka tsʼaʼabaktiʼ le nookʼ maas jatsʼutsoʼ. Beyoʼ tu yeʼesajtiʼ ku kʼamik bey u hijoeʼ maʼ bey juntúul u j-meyajeʼ.
9. ¿Baʼax jatsʼuts modosil unaj u yantaltoʼon utiaʼal k-áantik le máaxoʼob tsʼoʼok u náachtaloʼoboʼ? (Ilawil le cuadro « Bix jeʼel k-áantik máax taak u suuteʼ»).
9 Jéeobaeʼ bey jeʼex le taatatsil ku chʼaʼchiʼitaʼal teʼ tsikbalaʼ. U yaabiltmaj le sukuʼunoʼob tsʼoʼok u náachtaloʼob tiʼ letiʼoʼ yéetel u kʼáat ka suunakoʼob tu yiknal. Wa k-beetik jeʼex letiʼeʼ jeʼel u páajtal k-áantik le sukuʼunoʼob utiaʼal ka suunakoʼob ichil u kaajal Jéeobaoʼ. Utiaʼal k-áantkoʼobeʼ kʼaʼabéet k-eʼesiktiʼob paciencia, k-tsʼáaikba tu lugaroʼob yéetel k-yaabiltikoʼob. ¿Baʼaxten jach kʼaʼabéet u yantaltoʼon le modosoʼobaʼ, yéetel bix jeʼel k-eʼesik kéen k-áant le sukuʼunoʼoboʼ?
10. ¿Baʼaxten kʼaʼabéet k-eʼesik paciencia kéen k-áant máax tsʼoʼok u náachtal tiʼ Jéeoba?
10 Kʼaʼabéet u yantaltoʼon paciencia tumen yaan u bisik tiempo tiʼ le sukuʼun u kaʼa yaabiltik Jéeobaoʼ. Yaʼab sukuʼunoʼob tsʼoʼok u suutoʼob ichil u kaajal Jéeobaeʼ ku yaʼalikoʼobeʼ yaʼab u téenel xíimbaltaʼaboʼob tumen le ancianoʼob yéetel u maasil sukuʼunoʼoboʼ. Nancy, juntúul kiik ku taal tu noojol-lakʼinil Asiaeʼ, ku yaʼalik: «Juntúul in amiga yaan teʼ múuchʼuliloʼ tu sen áanten. Letiʼeʼ jach tu yaabilten yéetel tu yilen bey u kiikeʼ. Mantatsʼ ku kʼaʼajsikten le jatsʼuts baʼaloʼob t-múul beetoʼ. Le kéen in tsikbalttiʼ bix in wuʼuyikinbaeʼ jach ku chʼenxikintiken, yéetel wa ku yilik kʼaʼabéet u tsolnuʼuktikeneʼ ku beetik. Letiʼeʼ jach tu jaajil juntúul maʼalob amiga, jach tu yáanten le ka kʼaʼabéetchajtenoʼ».
11. ¿Baʼaxten kʼaʼabéet k-naʼatik bix u yuʼubikuba máax yaachajaʼan u yóol?
11 U yaatal u yóol máakeʼ bey junpʼéel llaga ku beetik u muʼyaj máakeʼ. Baʼaleʼ u tsʼáaikuba máak tu lugar le máax ku muʼyajoʼ bey jeʼex ka jiʼibik junpʼéel tsʼaak teʼ llaga utiaʼal u yutstaloʼ. Yaan sukuʼunoʼobeʼ tsʼoʼok u máan años náachchajkoʼob tiʼ Jéeoba tumen yaachaj u yóoloʼob yoʼolal junpʼéel baʼax beetaʼabtiʼob tumen uláakʼ sukuʼun. Le oʼolal maʼ taak u kaʼa meyajtikoʼob Jéeobaiʼ. Yaan xaneʼ ku tuklikoʼobeʼ maʼ justo bix úuchik u tratartaʼaloʼobiʼ. Le sukuʼunoʼob ku yuʼubikubaʼob beyaʼ jach kʼaʼabéet u chʼenxikintaʼaloʼob yéetel u naʼataʼal bix u yuʼubikubaʼob (Sant. 1:19). María, juntúul kiik náachchaj kaʼach tiʼ Jéeobaeʼ, ku yaʼalik: «Kʼaʼabéet kaʼach máax yéetel in tsikbal, ka u yáanten yéetel ka u naʼat bix in wuʼuyikinba».
12. ¿Baʼaxten Jéeobaeʼ ku ketik u yaabilaj yéetel junpʼéel suum?
12 Le Bibliaoʼ ku yaʼalikeʼ le yaabilaj ku yuʼubik Jéeoba tu yoʼolal máaxoʼob meyajtikoʼ bey jeʼex junpʼéel suumeʼ. ¿Baʼaxten ku keʼetel beyoʼ? Koʼox ilik. Koʼox aʼalikeʼ lúubech teʼ kʼáaʼnáaboʼ yéetel táan a búulul, tsʼoʼoleʼ jach táaj síis le jaʼoʼ. Juntúul máak túun tiaʼan teʼ barcooʼ ku puliktech junpʼéel salvavidas. Techeʼ jach ku kiʼimaktal a wóol, tumen leloʼ ku yáantkech utiaʼal maʼ u seguer a búulul. Chéen baʼaleʼ utiaʼal maʼ a búululeʼ kʼaʼabéettech uláakʼ baʼal, maʼ chéen le salvavidasoʼ. Utiaʼal u páajtal a naʼakal teʼ barcooʼ kʼaʼabéet u puʼulultech junpʼéel suum utiaʼal a chʼuykaba yéetel ka kóolaʼakech. Jeʼel u páajtal u yaʼalaʼaleʼ bey tu beetil Jéeoba yéetel le israelitaʼob náachchajoʼob tiʼ letiʼoʼ. Jéeobaeʼ tu yaʼalaj: «Tiʼ teneʼ meyajnaj [...] le yaabilaj bey suumoʼob utiaʼal in natsʼkoʼob tin wiknaloʼ» (Ose. 11:4). Teʼ kʼiinoʼobaʼ Jéeobaeʼ u kʼáat xan u kaʼa natsʼ tu yiknal le máaxoʼob tsʼoʼok u náachtaloʼob tiʼ letiʼoʼ yéetel bey táan u búululoʼob ich yaʼab problemaseʼ. Dioseʼ u kʼáat u yáantoʼob utiaʼal ka suunakoʼob yéetel u kʼáat xan ka u yojéeltoʼobeʼ jach u yaabiltmoʼob. Toʼoneʼ jeʼel u páajtal k-áantik Jéeoba utiaʼal u yeʼesik u yaabilaj tiʼobeʼ.
13. Tsikbalt junpʼéel baʼax uchaʼan eʼesik wa k-yaabiltik le máaxoʼob tsʼoʼok u náachtaloʼoboʼ jeʼel u kaʼa natsʼkubaʼob yiknal Jéeobaeʼ.
13 Kʼaʼabéet k-kʼaʼajsik tiʼ le sukuʼunoʼob tsʼoʼok u xuʼulul u kʼaʼaytajoʼoboʼ jach yaabiltaʼanoʼob tumen Jéeoba bey xan toʼon. Pablo, le sukuʼun t-chʼaʼchiʼitaj teʼ xook máanoʼ, maas tiʼ 30 años náachchaj kaʼach tiʼ Jéeoba. Letiʼeʼ ku yaʼalik: «Juntéenjeak le ka jóokʼen temprano tin wotocheʼ juntúul kiik yaan u jaʼabileʼ tu saludarten ka tu tʼanen yéetel yaabilaj. Ka túun túupʼ in wokʼol. Tin waʼalajtiʼeʼ Jéeoba túuxt tin wiknal. Le baʼax tu beetoʼ tu yáanten in kaʼa natsʼinba tu yiknal Jéeoba».
UNAJ K-EʼESIK YAABILAJ TIʼ LE MÁAXOʼOB TSʼOʼOK U NÁACHTALOʼOB TIʼ JÉEOBAOʼ
14. Jeʼex u yaʼalik Lucas 15:4 yéetel 5, ¿baʼax ku beetik le j-kanan taman le kéen u kaxt le chan taman saatloʼ?
14 Kex tsʼoʼok u káajal u binoʼob muchʼtáambal yéetel u jóokʼloʼob kʼaʼaytajeʼ unaj u seguer k-áantkoʼob yéetel k-líiʼsik u yóoloʼob. Maʼ xaaneʼ yaachajaʼan u yóoloʼob yéetel ku yuʼubikubaʼob jeʼex le paal tu tsikbaltaj Jesúsoʼ. Tsʼoʼoleʼ tumen táant u jóokʼloʼob ichil u kʼasaʼan yóokʼol kaab Satanáseʼ unaj u yáantaʼaloʼob u yaabiltoʼob Jéeoba. Le oʼolal unaj k-áantkoʼob utiaʼal ka muʼukʼaʼanchajak u fejoʼob. Tu tsikbalil le chan taman saʼatoʼ, Jesúseʼ tu yaʼaleʼ le j-kanan tamanoʼ tu chʼaʼajeʼ ka tu naʼaksaj tu keléembal utiaʼal u bisik tu yiknal u maasil tamanoʼoboʼ. Chéen baʼaleʼ utiaʼal u beetik tuláakal leloʼ le j-kanan tamanoʼ tu jóoʼsaj tiempo yéetel tu xupaj u muukʼ utiaʼal u kaxtik. Tsʼoʼoleʼ tumen u yojel maʼ tu páajtal u suut le chan taman chéen tu juunaloʼ tu tsʼáaj u yóol u yáante (xok Lucas 15:4, 5).
15. ¿Bix jeʼel k-áantik le sukuʼunoʼob u kʼáatoʼob suut ichil u kaajal Jéeobaoʼ? (Ilawil le cuadro « Junpʼéel folleto jach maʼalob»).
15 Maʼ xaaneʼ utiaʼal k-áantik le sukuʼunoʼob ka muʼukʼaʼanchajak u fejoʼoboʼ yaan u kʼaʼabéettal k-jóoʼsik tiempo yéetel k-xupik k-muukʼ utiaʼal k-áantkoʼob (Rom. 15:1). Utiaʼal k-áantkoʼobeʼ Jéeobaeʼ ku tsʼáaiktoʼon u espíritu santo, u tsʼaamajtoʼon le Bibliaoʼ yéetel le publicaciónoʼoboʼ. ¿Bix jeʼel k-beetkeʼ? Juntúul sukuʼun úuch joʼopʼok u beetik u ancianoileʼ, ku yaʼalik: «Óoliʼ tuláakal le sukuʼunoʼob ku suutoʼob ichil u kaajal Jéeobaoʼ ku kʼaʼabéettal u tsʼaʼabal xook tiʼob». * Le oʼolaleʼ wa le ancianoʼob ku yaʼaliktoʼon ka k-áant juntúul tiʼ le sukuʼunoʼobaʼ unaj k-beetik yéetel kiʼimak óolal. Le ancianooʼ tu yaʼalaj xan: «Le sukuʼunoʼob ku suutoʼob ichil u kaajal Jéeobaoʼ kʼaʼabéet juntúul maʼalob amigo tiʼob, juntúul máax jeʼel u páajtal u confiaroʼob tiʼeʼ».
KU YANTAL KIʼIMAK ÓOLAL KAʼAN YÉETEL LUʼUM
16. ¿Baʼax eʼesik le ángeloʼoboʼ táan u yáantkoʼob le máaxoʼob taak u suutoʼob ichil u kaajal Jéeobaoʼ?
16 Yaʼab baʼaxoʼob eʼesikeʼ le ángeloʼoboʼ táan u yáantkoʼob le máaxoʼob taak u suutoʼob ichil u kaajal Jéeobaoʼ (Apo. 14:6). Koʼox ilik baʼax úuch tiʼ Silvio, juntúul sukuʼun kajaʼan Ecuador. Letiʼeʼ tu sen kʼáat óoltaj tiʼ Jéeoba ka áantaʼak suut teʼ múuchʼuliloʼ. Le maʼ tsʼoʼokok u oraroʼ kʼuch kaʼatúul ancianoʼob tu yotoch. Desde teʼ súutukiloʼ le ancianoʼoboʼ jach tu yilaj u yáantkoʼob yéetel yaabilaj.
17. ¿Bix k-uʼuyikba kéen k-áant le sukuʼunoʼob taak u suutoʼob ichil u kaajal Jéeobaoʼ?
17 Jach ku kiʼimakkúuntik k-óol k-áantik le máaxoʼob taak u suutoʼob tu yiknal Jéeobaoʼ. Koʼox ilik baʼax ku yaʼalik Salvador, juntúul precursor jach ku tsʼáaik u yóol u yáant le sukuʼunoʼob tsʼoʼok u xuʼulul u jóokʼloʼob kʼaʼaytajoʼ. Ku yaʼalik: «Le kéen in wil tsʼoʼok u suut ichil u kaajal Jéeoba juntúul sukuʼun náachchajaʼan kaʼacheʼ jach ku kiʼimaktal in wóol, hasta ku yáalal u jaʼil in wich. Ku kiʼimakkúuntik in wóol in wilik bix u jóoʼsik Jéeoba juntúul u chan alakʼ taman tiʼ u yóokʼol kaab Satanás. Tsʼoʼoleʼ jach maʼalob in wuʼuykimba kéen in tukult múul meyajnajen yéetel Jéeoba» (Hech. 20:35).
18. Wa teech náachchajaʼanech tiʼ u kaajal Jéeobaeʼ, ¿baʼax maʼ unaj u tuʼubultechiʼ?
18 Wa teech tsʼoʼok a náachtal tiʼ u kaajal Jéeobaeʼ maʼ u tuʼubultecheʼ Jéeobaeʼ u yaabiltmech yéetel u kʼáat ka suunakech tu kaajal. Chéen baʼaleʼ utiaʼal ka béeyakeʼ kʼaʼabéet a tsʼáaik a wóoliʼ. Kʼaʼajaktecheʼ jeʼex le taatatsil tu yaʼalaj Jesúsoʼ, Jéeobaeʼ táan u páaʼtik ka suunakech ichil u familia. Le kéen u yil táan a taaleʼ yaan u kʼamkech yéetel kiʼimak óolal.
KʼAAY 103 Jéeobaeʼ u tsʼaamaj j-kanan tamanoʼob
^ xóot’ol 5 Tiʼ tuláakal le máaxoʼob tsʼoʼok u máan tiempo xuʼuluk u jóokʼloʼob kʼaʼaytaj yéetel u binoʼob muchʼtáambaleʼ, Jéeobaeʼ ku yaʼaliktiʼob: «Suuneneʼex tin wiknal». Tuláakloʼon jeʼel u páajtal k-áantik le sukuʼunoʼob tsʼoʼok u náachtaloʼob utiaʼal ka suunakoʼob tu yiknal Jéeobaoʼ. Teʼ xookaʼ yaan k-kanik bix jeʼel k-beetkeʼ.
^ xóot’ol 7 Kʼexaʼan jujunpʼéel kʼaabaʼob.
^ xóot’ol 15 Yaneʼ jeʼel u yáantaʼal wa ka u xok jujunpʼéel jaatsoʼob tiʼ le libro Pʼáatkech ichil u yaabilaj Diosoʼ. Baʼaleʼ uláakʼoʼobeʼ maas jeʼel u yáantaʼaloʼob wa ka u xokoʼob jujunpʼéel capítuloʼob tiʼ le libro Acerquémonos a Jehová. Le Comité tiʼ Servicio tiʼ le Múuchʼuliloʼ letiʼob ken u chʼaʼtukloʼob máax jeʼel u páajtal u tsʼáaik le xookoʼ.
^ xóot’ol 68 FOTOʼOB: Óoxtúul sukuʼunoʼobeʼ ku yáantkoʼob juntúul máax taak u suut ichil u kaajal Jéeoba. Le yáaxoʼ mantatsʼ ku túuxtik mensaje tiʼ, le u kaʼatúuloʼ ku yeʼesik láayliʼ u yaabiltmeʼ yéetel le u yóoxtúuloʼ ku yeʼesik ku naʼatik bix u yuʼubikuba le táan u chʼenxikintikoʼ.
