1. ¿Baʼax tu núukaj Pedro tiʼ le máakoʼoboʼ?

TU AÑOIL 33 tsʼoʼokok u taal Jesúseʼ, yaʼab xiiboʼob yéetel koʼoleloʼob muchʼukbaloʼob Jerusalén. Letiʼobeʼ jejeláas tuʼux u taaloʼob yéetel jejeláas idiomaʼob ku tʼankoʼob. Teʼ kʼiin jeʼeloʼ úuch junpʼéel baʼal mix juntéen úuchuk kaʼachi. Jujuntúul judíoʼobeʼ joʼopʼ u tʼaanoʼob ich jejeláas idiomaʼob. Chéen baʼaleʼ le baʼax maas kʼaʼanaʼan úuch teʼ kʼiin jeʼeloʼ maʼ letiʼe úuchik u tʼaanoʼob ich jejeláas idiomaʼoboʼ, baʼaxeʼ letiʼe baʼax tu yaʼalaj le judíoʼoboʼ yéetel le baʼax tu yaʼalaj le apóstol Pedrooʼ. Letiʼeʼ tu tsolajtiʼobeʼ utiaʼal u salvarkubaʼobeʼ kʼaʼabéet u tsʼáaik u fejoʼob tiʼ Jesús. Le baʼax aʼalaʼabtiʼoboʼ kʼuch tu puksiʼikʼaloʼobeʼ, ka tu kʼáatoʼob tiʼ Pedro: «¿Baʼax kʼaʼabéet k-beetik?». Pedro túuneʼ tu núukajtiʼob: «Okjaʼanak cada juntúul tiʼ teʼex» (Hech. 2:37, 38).

2. ¿Baʼax ken k-il teʼ xookaʼ? (Ilawil u yáax páginail le revistaaʼ).

² Teʼ kʼiin jeʼeloʼ óoliʼ 3,000 máakoʼob okjaʼanajoʼob, bey káajik le nojoch meyaj tu kʼubéentaj Jesús tiʼ u discípuloʼoboʼ. Bejlaʼeʼ láayliʼ táan u beetaʼal le meyajaʼ, chéen baʼaleʼ teʼ kʼiinoʼobaʼ yaʼab tiempo ku bisik u yáantaʼal juntúul máak okjaʼ maʼ chéen wa jaypʼéel horaʼobiʼ. Maʼ xaaneʼ jeʼel u bisik wa jaypʼéel meseseʼ, junpʼéel año wa maas tiempo. Le máaxoʼob tsʼáaik xook tiʼ wa máaxoʼ u yojloʼob maʼ chéen chʼaʼabil u beetaʼal lelaʼ. Teʼ xookaʼ yaan k-ilik bix jeʼel u páajtal k-áantik juntúul j-xoknáal utiaʼal ka okjaʼanakeʼ.

3. Jeʼex u yaʼalik Mateo 28:19, 20, ¿baʼax unaj u beetik le j-xoknáal antes tiʼ u yokjaʼoʼ?

³ Antes tiʼ u yokjaʼ le j-xoknáaloʼ kʼaʼabéet u tsʼáaik ichil u kuxtal le baʼax ku kanik teʼ Bibliaoʼ (xok Mateo 28:19, 20). Bey túunoʼ jeʼex tu yaʼalil Jesúseʼ yaan u pʼáatal jeʼex le «máak jach yaan u naʼat tu beetaj u yotoch yóoʼ cháaltun[oʼ]» (Mat. 7:24, 25; Luc. 6:47, 48). Beoraaʼ koʼoneʼex ilik óoxpʼéel baʼaloʼob jeʼel u páajtal k-beetik utiaʼal k-áantik le j-xoknáal u tsʼáa ichil u kuxtal le baʼax ku kanikoʼ.

4. ¿Bix jeʼel k-áantik le j-xoknáal antes tiʼ u yokjaʼoʼ? (Ilawil le cuadro « Áant le j-xoknáal u tsʼáa metas ichil u kuxtaloʼ»).

⁴ Áant le j-xoknáal u tsʼáa metas ichil u kuxtaloʼ. ¿Baʼaxten kʼaʼabéet k-beetik leloʼ? Utiaʼal k-naʼatikeʼ koʼox aʼalikeʼ táan k-viajar tiʼ junpʼéel lugar jach náach yanil. Utiaʼal maʼ k-kaʼanal táan k-viajareʼ maʼ xaaneʼ jeʼel k-chʼaʼtuklik k-jeʼelel tiʼ jujunpʼéel lugaroʼob jatsʼuts k-ilkeʼ. Bey túun xanoʼ le j-xoknáaloʼ utiaʼal maʼ u yilik bey yaʼab u bin utiaʼal u yokjaʼeʼ jeʼel u páajtal u beetik jujunpʼéel baʼaloʼob utiaʼal u meyajtik Jéeoba antes tiʼ u yokjaʼeʼ. Utiaʼal k-áantik le j-xoknáaloʼ jeʼel u páajtal u meyajtoʼon le cuadro «Beet lelaʼ», ku taasik le libro Disfrutart le kuxtaloʼ. Le kéen tsʼoʼokkeʼ k-tsoliktiʼ baʼax utsil jeʼel u kʼamik wa ku beetik le baʼax ku yaʼalik le cuadrooʼ. Chéen baʼaleʼ wa k-kʼáat ka u tsʼáa uláakʼ metas ichil u kuxtaleʼ jeʼel u páajtal k-tsʼíibtik teʼ tuʼux ku yaʼalik «Uláakʼ baʼax jeʼel a beetkeʼ». Teʼ súutukaʼ maʼalob ka k-xakʼalt yéetel le j-xoknáal bix u bin le metas u tsʼaamaj ichil u kuxtaloʼ.

5. Jeʼex u yaʼalik Marcos 10:17-22, ¿baʼax tu yaʼalaj Jesús tiʼ juntúul máak ayikʼal, yéetel baʼaxten tu yaʼalajtiʼ?

⁵ Áant le j-xoknáal u kʼex u kuxtaloʼ (xok Marcos 10:17-22). Kex u yojel maʼ chéen chʼaʼabileʼ Jesúseʼ tu yaʼalaj tiʼ juntúul máak ayikʼal ka u kon tuláakal le baʼaxoʼob yaantiʼoʼ  (Mar. 10:23). ¿Baʼaxten tu yaʼalajtiʼ? Tumen u yaabiltmaj le máakoʼ. Toʼoneʼ maʼ xaaneʼ saajkoʼon k-aʼal tiʼ le j-xoknáal baʼax unaj u kʼexik ichil u kuxtaloʼ tumen k-tuklik maʼ kʼuchuk u kʼiinil k-aʼaliktiʼiʼ wa tumen k-ojel ku bisik tiempo (Col. 3:9, 10). Chéen baʼaleʼ wa k-séeb aʼalik tiʼ le j-xoknáal baʼax unaj u kʼexik ichil u kuxtaloʼ, letiʼeʼ jeʼel u séeb tsʼáaik ichil u kuxtal le baʼax ku kanikoʼ. Tsʼoʼoleʼ yaan u tsʼáaik cuenta jach tu jaajil k-yaabiltmaj (Sal. 141:5; Pro. 27:17).

6. ¿Baʼaxten unaj k-beetik kʼáatchiʼob tiʼ le j-xoknáaloʼ?

⁶ Utiaʼal k-ilik wa táan u naʼatik le j-xoknáal le baʼax táan u xokikoʼ maʼalob ka k-beet kʼáatchiʼob tiʼ. Wa ku suuktal k-beetik beyoʼ maas maʼ kun difíciltal k-aʼaliktiʼ baʼaxoʼob kʼaʼabéet u kʼexik ichil u kuxtal. Le libro Disfrutart le kuxtaloʼ ku taasik yaʼab kʼáatchiʼob. Jeʼex le xook 4, ku taasik le kʼáatchiʼaʼ: «¿Bix ta tʼaan u yuʼubikuba Jéeoba kéen a tʼan tu kʼaabaʼ?». Le xook 9 xanoʼ ku taasik le kʼáatchiʼaʼ: «¿Baʼaxoʼob jeʼel a kʼáatik ich oracióneʼ?». Maʼ xaaneʼ tu káajbaleʼ le j-xoknáaloʼ maʼ ten u jáan núuke, le oʼolal utiaʼal k-áantikeʼ jeʼel u páajtal k-aʼaliktiʼ ka tuukulnak tiʼ le tekstoʼob ku taasik le xookoʼ bey xan tiʼ le fotoʼob wa dibujoʼoboʼ.

7. ¿Bix jeʼel u meyajtoʼon u experiencia uláakʼ sukuʼunoʼob utiaʼal k-áantik le j-xoknáaloʼ?

⁷ Le kéen k-il tsʼoʼok u naʼatik le j-xoknáal baʼax unaj u beetkoʼ, maʼalob ka k-tsikbalttiʼ jujunpʼéel baʼaloʼob tsʼoʼok u beetik le máaxoʼob meyajtik Diosoʼ. Wa k-ilik maʼ chéen chʼaʼabil tiʼ le j-xoknáal u bin muchʼtáambaloʼ jeʼel u páajtal k-eʼesiktiʼ le video Jéeobaeʼ u tsʼaamaj u yóol u kanáanten, lelaʼ ku chíikpajal teʼ xook 14 tiʼ le jaats «Kan u maasil». Teʼ jaats ku kʼaabaʼtik «Utiaʼal u maas naʼatik» bey xan teʼ jaats «Kan u maasil» ku taasik le libro Disfrutart le kuxtaloʼ, ku tʼaan tiʼ baʼax áant jujuntúul máaxoʼob meyajtik Dios. * Le kéen k-xakʼalt yéetel le j-xoknáaloʼ maʼ unaj k-aʼaliktiʼ: «Wa letiʼ béeychaj u beetkeʼ u kʼáat u yaʼaleʼ jeʼel xan u páajtal a beetkeʼ». Baʼaxeʼ maas maʼalob wa tu juunal ka u tsʼáa cuenta. Jeʼel u páajtal k-aʼaliktiʼ baʼaxoʼob áant le máax chíikpaj teʼ video utiaʼal u tsʼáaik ichil u kuxtal le baʼax ku yaʼalik le Bibliaoʼ, maʼ xaaneʼ junpʼéel teksto wa uláakʼ wa baʼax.

8. ¿Bix jeʼel k-áantik le j-xoknáal u yaabilt Jéeobaoʼ?

⁸ Áant le j-xoknáal u yaabilt Jéeobaoʼ. Maʼalob ka k-jóoʼs u súutukil k-tsikbal tiʼ u jatsʼuts modos Jéeoba. Unaj k-áantik u yil le j-xoknáaloʼ Jéeobaeʼ juntúul «Dios kiʼimak u yóol» yéetel mantatsʼ tiaʼan naatsʼ tiʼ le máaxoʼob yaabiltmiloʼ (1 Tim. 1:11; Heb. 11:6). Unaj k-eʼesik tiʼ le j-xoknáal le utsiloʼob jeʼel u taasiktiʼ wa ku tsʼáaik ichil u kuxtal le baʼax ku kanikoʼ yéetel unaj k-tsoliktiʼeʼ leloʼ junpʼéel bix u yeʼesik u yaabilaj Jéeoba tiʼ letiʼ (Isa. 48:17, 18). Jeʼex u bin u maas yaabiltik Jéeobaeʼ bey kun maas taaktal u kʼexik u kuxtaloʼ (1 Juan 5:3).

9. Marcos 10:29, 30, ¿bix jeʼel u yáantik le j-xoknáal utiaʼal u yokjaʼ kex yaan u kʼaʼabéettal u pʼatik jujunpʼéel baʼaloʼoboʼ?

⁹ Jeʼex le máak ayikʼal t-chʼaʼchiʼitaj teʼ párrafo 5, maʼ xaaneʼ le j-xoknáaloʼ yaan u kʼaʼabéettal u pʼatik jujunpʼéel baʼaloʼob utiaʼal u páajtal u yokjaʼ. Jeʼex wa u meyaj ku bin tu contra le baʼax ku yaʼalik le Bibliaoʼ yaan u kʼaʼabéettal u pʼatik. Wa maʼ xaaneʼ yaan u kʼaʼabéettal u xuʼulul u biskuba yéetel máaxoʼob maʼ u yaabiltmoʼob  Jéeobaiʼ. Tsʼoʼoleʼ maʼ xaaneʼ yaan tak u pʼektaʼal tumen u láakʼtsiloʼob. Jesúseʼ tu yaʼaleʼ yaan máakoʼobeʼ yaan u difíciltal u beetkoʼob lelaʼ, chéen baʼaleʼ tu yaʼalaj xaneʼ Jéeobaeʼ yaan u tsʼáaik junpʼéel nojoch familia tiʼ le máaxoʼob kun chúukpajal u yóol u meyajtoʼoboʼ (xok Marcos 10:29, 30). ¿Bix jeʼel k-áantik le j-xoknáal utiaʼal u táakpajal ichil junpʼéel familia jeʼex tu yaʼalil Jesúsoʼ?

10. ¿Baʼax ku kaʼansiktoʼon le baʼax tu yaʼalaj Manueloʼ?

¹⁰ Áant le j-xoknáaloʼ. Letiʼeʼ kʼaʼabéet u yilik jach tu jaajil taak k-áantik. Manuel, juntúul sukuʼun kajaʼan Méxicoeʼ, le ka tu kʼaʼajsaj bix úuchik u tsʼaʼabal xook tiʼeʼ, tu yaʼalaj: «Le máax tsʼáaikten kaʼach xookoʼ le kéen kʼuchkeʼ yáax baʼax ku kʼáatkeʼ, bix in wanil. Leloʼ tu yáanten in tsikbalttiʼ baʼax ku yúuchulten. Bey úuchik xan in tsʼáaik cuenta jach tu jaajil taak u yáantkenoʼ».

11. ¿Baʼaxten maʼalob ka k-máans tiempo yéetel le j-xoknáaloʼ?

¹¹ Jesúseʼ tu máansaj tiempo yéetel u discípuloʼob, toʼon xaneʼ unaj k-máansik tiempo yéetel le j-xoknáaloʼ (Juan 3:22). Wa tsʼoʼok u káajal u tsʼáaik ichil u kuxtal le baʼax ku kanik yéetel k-ilik maʼalobeʼ jeʼel u páajtal k-invitartik t-otoch utiaʼal k-múul janal wa utiaʼal k-múul chaʼantik le JW Broadcastingoʼ^®. Teʼ kʼiinoʼob táan u beetik u fiesta le máakoʼoboʼ le j-xoknáaloʼ jach jeʼel u kiʼimaktal u yóol wa ka k-invitarteʼ tumen maʼ xaaneʼ ku yuʼubikuba tu juunal. Kazibwe, juntúul sukuʼun kajaʼan Ugandaeʼ, ku yaʼalik: «Teneʼ yaʼab baʼaloʼob tin kanaj tiʼ Jéeoba le táan in xookoʼ bey xan le ka tin máansaj tiempo yéetel le sukuʼun tsʼáaikten xookoʼ. Tin tsʼáaj cuentaeʼ Jéeobaeʼ jach u yaabiltmaj le máaxoʼob meyajtikoʼ yéetel letiʼobeʼ kiʼimak u yóoloʼob. Jach bey in kʼáat kuxtal kaʼachoʼ».

12. ¿Baʼaxten maʼalob ka k-invitart jejeláas sukuʼunoʼob utiaʼal ka u láakʼintoʼon tsʼaa xook?

¹² Invitart uláakʼ sukuʼunoʼob utiaʼal ka u láakʼintechoʼob tsʼaa xook. Maʼ xaaneʼ yaan kʼiineʼ maas chéen chʼaʼabil k-ilik bin t-juunal  wa u láakʼintikoʼon juntúuliliʼ sukuʼun. U jaajileʼ leloʼ maʼ kʼaasiʼ chéen baʼaleʼ wa ku láakʼintikoʼon jejeláas sukuʼunoʼobeʼ maas yaan u jóoʼsik u yutsil le j-xoknáaloʼ. Dimitri, juntúul sukuʼun kajaʼan Moldaviaeʼ, ku yaʼalik: «Cada juntúul sukuʼun láakʼintik le máax tsʼáaikten xookoʼ jatsʼuts bix u kaʼansaj. Leloʼ tu yáanten in wileʼ jejeláas bix jeʼel in tsʼáaik ichil kuxtal le baʼax kin kanikoʼ. Tsʼoʼoleʼ tumen yaʼab sukuʼunoʼob yéetel kiikoʼob tin kʼaj óolteʼ maʼ jach suʼlakchajen le ka yáax binen teʼ muchʼtáambaloʼ».

13. ¿Baʼaxten unaj k-áantik le j-xoknáal utiaʼal u bin teʼ muchʼtáambaloʼ?

¹³ Áant le j-xoknáal utiaʼal u bin muchʼtáambaloʼ. ¿Baʼaxten? Tumen Jéeoba aʼalik ka k-muchʼba yéetel táakaʼan ichil le adoración k-tsʼáaiktiʼoʼ (Heb. 10:24, 25). Tsʼoʼoleʼ jeʼel u páajtal k-aʼalikeʼ le sukuʼunoʼoboʼ bey k-láakʼtsiloʼobeʼ. Le baʼaxoʼob ku kaʼansiktoʼon Jéeobaoʼ jeʼel u páajtal u keʼetel yéetel janaleʼ le oʼolal le kéen xiʼikoʼon teʼ muchʼtáambaloʼoboʼ bey k-múul janal yéetel le sukuʼunoʼoboʼ. Unaj k-áantik le j-xoknáal utiaʼal u bin muchʼtáambaloʼ tumen leloʼ jach kʼaʼabéet utiaʼal u béeytal u yokjaʼ. Chéen baʼaleʼ maʼ xaaneʼ yaan baʼax jeʼel u beetik maʼ u bineʼ, ¿bix jeʼel u páajtal k-áantik yéetel le libro Disfrutart le kuxtaloʼ?

14. ¿Bix jeʼel k-áantik le j-xoknáal utiaʼal u bin muchʼtáambaloʼ?

¹⁴ Utiaʼal k-áantik le j-xoknáal utiaʼal u bin muchʼtáambaloʼ jeʼel u páajtal u meyajtoʼon le xook 10 tiʼ le libro Disfrutart le kuxtaloʼ. Antes tiʼ u jóoʼsaʼal le libroaʼ kʼáataʼab tiʼ jujuntúul sukuʼunoʼob ka u xakʼaltoʼob yéetel le j-xoknáaloʼoboʼ. Letiʼobeʼ tu yiloʼob jach ku taasik utsil le xook jeʼelaʼ. Chéen baʼaleʼ lelaʼ maʼ u kʼáat u yaʼal wa unaj k-páaʼtik k-kʼuchul teʼ xook 10 utiaʼal k-invitartik le j-xoknáal teʼ muchʼtáambaloʼ. Baʼaxeʼ unaj k-invitartik desde ken káajak u xook t-éetel. Le j-xoknáaloʼoboʼ jejeláas baʼax ku aktáantkoʼob yéetel maʼ junpʼéeliliʼ bix u bin u kaanbaloʼobiʼ, le oʼolaleʼ unaj k-ilik bix jeʼel k-áantik cada juntúul tiʼ letiʼobeʼ. Tsʼoʼoleʼ maʼ unaj u lúubul k-óol wa k-ilik maʼ tu jáan bin muchʼtáambaliʼ baʼaxeʼ unaj u chúukpajal k-óol k-áante.

15. ¿Baʼax jeʼel u beetik u sajaktal le j-xoknáaloʼ?

¹⁵ Maʼ xaaneʼ le ka káaj k-xokik le Bibliaoʼ chan saajkoʼon k-beetba u testigo Jéeoba. Maʼ xaaneʼ t-tuklaj junpuliʼ maʼ tun páajtal k-jóokʼol kʼaʼaytaj joonaj joonajil. Wa maʼ xaaneʼ saajkoʼon ka pʼektaʼakoʼon tumen k-láakʼtsiloʼob wa tumen k-amigoʼob. Wa bey úuchiktoʼonoʼ jeʼel u páajtal k-naʼatik bix u yuʼubikuba le j-xoknáaloʼ. Jesúseʼ tu yaʼaleʼ yaan máakoʼobeʼ yaan u sajaktaloʼob, chéen baʼaleʼ letiʼeʼ tu yáantaj u discípuloʼob utiaʼal maʼ u sajaktaloʼob u meyajtoʼob Jéeoba (Mat. 10:16, 17, 27, 28). ¿Bix úuchik u yáantkoʼob? ¿Bix jeʼel k-áantik le j-xoknáaloʼob teʼ kʼiinoʼobaʼ?

16. ¿Bix jeʼel u páajtal k-áantik le j-xoknáal utiaʼal ka u tsikbalt le baʼaxoʼob ku kanikoʼ?

¹⁶ Áant le j-xoknáal utiaʼal ka u tsikbalt le baʼaxoʼob ku kanikoʼ. Maʼ xaaneʼ u discípuloʼob Jesúseʼ chan saajkoʼob kaʼach kʼaʼaytaj, chéen baʼaleʼ Jesúseʼ tu yáantaj u yiloʼob tiʼ máaxoʼob jeʼel u kʼaʼaytajoʼobeʼ yéetel baʼax unaj u yaʼalikoʼob (Mat. 10:5-7). ¿Bix jeʼel u páajtal k-beetik jeʼex letiʼeʼ? Jeʼel u páajtal k-áantik le j-xoknáal u yil tiʼ máax jeʼel u páajtal u kʼaʼaytajoʼ. Utiaʼal lelaʼ jeʼel u páajtal k-kʼáatiktiʼ wa yaan máax u kʼaj óol u kʼáat u kan junpʼéel baʼax ku kaʼansik le Bibliaoʼ. Le kéen tsʼoʼokkeʼ jeʼel u páajtal k-múul preparartikba yéetel le j-xoknáal utiaʼal u yilik bix jeʼel u tsolik le baʼax ku creerkoʼ. Utiaʼal k-ensayar tu yéeteleʼ jeʼel u  páajtal u meyajtoʼon le jaats «Baʼax suuk u yaʼalaʼal» yéetel «Baʼax suuk u kʼáataʼal» ku chíikpajal teʼ libro Disfrutart le kuxtaloʼ. Jeʼel u páajtal k-áantik le j-xoknáal utiaʼal ka u yil bix jeʼel u meyajtiʼ le Biblia utiaʼal u núukik tubeel le baʼaxoʼob ku kʼáataʼaltiʼoʼ.

17. ¿Bix jeʼel u meyajtoʼon Mateo 10:19, 20, 29-31 utiaʼal k-áantik le j-xoknáal confiar tiʼ Jéeobaoʼ?

¹⁷ Áant le j-xoknáal utiaʼal u confiar tiʼ Jéeobaoʼ. Jesúseʼ tu yaʼalaj tiʼ u discípuloʼobeʼ yaabiltaʼanoʼob tumen Jéeoba, le oʼolal yaan u yáantaʼaloʼob (xok Mateo 10:19, 20, 29-31). Toʼon xaneʼ maʼalob ka k-áant u yil le j-xoknáal yaan xan u yáantaʼal tumen Jéeobaoʼ. Utiaʼal k-áantik confiar tiʼ Jéeobaeʼ maʼalob ka orarnakoʼon tu yéetel tu yoʼolal u metas. Franciszek, kajaʼan Poloniaeʼ, ku yaʼalik: «Le máax tsʼáaikten xook kaʼachoʼ suuk u orar yoʼolal le baʼaxoʼob tsʼoʼok in chʼaʼtuklik in beetkoʼ. Le ka tin wilaj bix u núukaʼal u oración tumen Jéeobaeʼ teen xaneʼ káaj in orar. Teneʼ tin wilaj bix tu núukil Jéeoba in oración le ka yanchaj in kʼáatik permiso tin meyaj utiaʼal in bin muchʼtáambal yéetel teʼ asambleaʼoboʼ».

18. ¿Bix u yilik Jéeoba tuláakal le meyaj ku beetaʼal utiaʼal u yáantaʼal le máakoʼob náatsʼal tiʼ letiʼoʼ?

¹⁸ ¿Kux túun wa maʼ táan k-tsʼáaik xook tiʼ mix máakiʼ? ¿Jeʼel wa u páajtal k-áantik le j-xoknáaloʼob utiaʼal ka okjaʼanakoʼoboʼ? Jeʼeleʼ. Junpʼéel bix k-áantajeʼ letiʼe kéen k-láakʼint wa máax utiaʼal u tsʼáaik xookoʼ. Jéeobaeʼ u yaabiltmaj tuláakal le j-xoknáaloʼoboʼ yéetel jach ku apreciartik tuláakal le meyaj ku beetaʼal utiaʼal u yáantaʼaloʼob ka náatsʼkoʼob tiʼ letiʼoʼ (Isa. 52:7).