Pabloeʼ tu tsʼíibtaj: «Teneʼ kíimen tu yoʼolal le leyoʼ. Chéen baʼaleʼ yoʼolal lelaʼ kʼuchen kuxtal tu táan Dios» (Gál. 2:19).

Le ka tu yaʼalaj leloʼ Pabloeʼ yaan baʼax kaʼach táan u tsolik tiʼ le sukuʼunoʼob yanoʼob Galaciaoʼ. Yaan jujuntúul tiʼ letiʼobeʼ tsʼoʼok u káajal kaʼach u creerkoʼob utiaʼal u salvarkubaʼobeʼ kʼaʼabéet u tsʼoʼokbeskoʼob baʼax ku yaʼalik u Ley Moisés, ichileʼ táakaʼan le u circuncidarkubaʼoboʼ. Chéen baʼaleʼ Pabloeʼ u yojel Dioseʼ maʼatech u kʼáatik ka u circuncidartuba le máaxoʼob meyajtikoʼ. Le oʼolal tu yeʼesaj maʼ jaaj le baʼax tsʼoʼok u káajal kaʼach u creertaʼaloʼ, yéetel tu yáantaj le sukuʼunoʼob utiaʼal ka u tsʼáa u fejoʼob tiʼ le u kuxtal Jesús tu kʼuboʼ (Gál. 2:4; 5:2).

Le Bibliaoʼ ku yaʼalikeʼ le kéen kíimik máakeʼ ku tuʼubultiʼ tuláakal baʼal yéetel kex jeʼel baʼaxak ka úuchuk way yóokʼol kaabeʼ mix baʼal ku yúuchul tiʼ letiʼ (Ecl. 9:5). Le ka tu yaʼalaj Pablo «kíimen tu yoʼolal le leyoʼ» táan kaʼach u yaʼalikeʼ minaʼan páajtalil tiʼ u Ley Moisés tu yóokʼol letiʼ. Letiʼeʼ u yojleʼ kʼuch kuxtal tu táan Dios yoʼolal u kuxtal Jesús tu kʼuboʼ.

U jaajileʼ Pabloeʼ kʼuch kuxtal tu táan Dios «tu yoʼolal le leyoʼ». Maʼ xaaneʼ lelaʼ jelaʼan k-uʼuyik tumen Pabloeʼ u yaʼalmeʼ «juntúul máakeʼ maʼatech u yilaʼal toj u kuxtal ikil u tsʼoʼokbesik baʼax ku yaʼalik u Ley Moisés, baʼaxeʼ chéen yoʼolal u fe tiʼ Cristo Jesús» (Gál. 2:16). Chéen baʼaleʼ maʼ unaj u tuʼubultoʼoneʼ le Leyoʼ yaan baʼax oʼolal tsʼaʼab úuchjeakil. Pabloeʼ tu yaʼalaj tiʼ le sukuʼunoʼob yaan Galaciaoʼ: «Tsʼaʼab utiaʼal ka u chíikbes u kʼeban wíinik tak ken kʼuchuk le chʼiʼibal, le máax tiʼ aʼalaʼan u tsʼaʼabal le herenciaoʼ» (Gál. 3:19). Chíikpajeʼ wíinikeʼ maʼ tu páajtal u tsʼoʼokbesik tuláakal baʼax ku yaʼalik le Leyoʼ yéetel kʼaʼabéet juntúul máax ka u kʼub u kuxtal tu yoʼolaloʼob. Le Leyoʼ tu yeʼesaj xan tiʼ le kaajoʼ Jesús le «chʼiʼibal» aʼalaʼanoʼ. Wa ku tsʼáaikoʼob u fejoʼob tiʼ Jesúseʼ jeʼel u páajtal u yaʼalaʼal toj u kuxtaloʼob tu táan Dioseʼ (Gál. 3:24). Aʼalaʼab toj u kuxtal Pablo tumen tu kʼamaj Jesús yéetel tu tsʼáaj u fe tiʼ letiʼ. Bey túunoʼ letiʼeʼ kíim tu yoʼolal le Leyoʼ chéen baʼaleʼ kuxlaj tu táan Dios. Le Leyoʼ pʼáat minaʼan páajtalil tiʼ tu yóokʼol Pablo chéen baʼaleʼ Dioseʼ yaan kaʼach páajtalil tiʼ tu yóokʼol.

Pabloeʼ tu yaʼalaj xan tiʼ le sukuʼunoʼob yaan Romaoʼ: «In sukuʼuneʼex, jeʼex yanil kaʼachoʼ, teʼexeʼ tsʼokaʼan a beeleʼex kaʼach yéetel le Leyoʼ, chéen baʼaleʼ leloʼ xuʼul úuchik u kʼubik u kuxtal Cristo [...]. Chéen baʼaleʼ beoraaʼ tsʼoʼok k-luʼsaʼal yáanal le Leyoʼ, tumen le Leyoʼ tsʼoʼok u pʼáatal minaʼan u páajtalil t-óokʼol» (Rom. 7:4, 6). Teʼ tekstoaʼ bey xan teʼ Gálatas 2:19, Pabloeʼ maʼ táan kaʼach u yaʼalik kíimoʼob tumen kʼebanchajoʼob tu táan le Leyoʼ baʼaxeʼ táan kaʼach u yaʼalik maʼ kʼaʼabéet u tsʼoʼokbeskoʼobiʼ. Le Leyoʼ tsʼoʼok u pʼáatal kaʼach minaʼan páajtalil tiʼ tu yóokʼol Pablo mix tu yóokʼol uláakʼ sukuʼunoʼob jeʼex letiʼeʼ tumen u tsʼaamaj u fejoʼob tiʼ Cristo Jesús.