XOOK 19
Bix unaj u yeʼesaʼal yaabilaj yéetel justicia kéen beetaʼak baʼax kʼaas
«Mix ta táan yaan kúuchil utiaʼal le j-kaʼanal ichoʼoboʼ. Techeʼ a pʼekmaj le loolob máakoʼoboʼ» (SAL. 5:4).
KʼAAY 142 Tsʼáa a fe tiʼ baʼax u yaʼalmaj Dios
TIʼ BAʼAX KUN TʼAAN *
1-3. 1) Jeʼex u yaʼalik Salmo 5:4 tak 6, ¿bix u yilik Jéeoba u beetaʼal baʼax kʼaas? 2) ¿Baʼaxten k-aʼalikeʼ u beetaʼal kʼaas tiʼ le mejen paalaloʼoboʼ ku bin tu contra «u ley Cristo»?
JÉEOBAEʼ u pʼekmaj u beetaʼal baʼax kʼaas (xok Salmo 5:4 tak 6). Le oʼolal jach u pʼekmaj u beetaʼal baʼax kʼaas tiʼ le mejen paalaloʼoboʼ. Jeʼex Jéeobaeʼ, toʼon xaneʼ k-pʼekmaj u beetaʼal baʼax kʼaas tiʼ le mejen paalaloʼoboʼ, le oʼolal maʼatech k-chéen ilik ka beetaʼak bey teʼ múuchʼuliloʼ (Rom. 12:9; Heb. 12:15, 16).
2 U beetaʼal baʼax kʼaas tiʼ le mejen paalaloʼoboʼ ku bin tu contra «u ley Cristo», lelaʼ letiʼe baʼaxoʼob tu kaʼansaj Jesús yéetel le baʼaxoʼob tu yaʼaloʼ bey xan yéetel le baʼaxoʼob tu beetoʼ (Gal. 6:2). ¿Baʼaxten k-aʼalik beyoʼ? Tumen jeʼex t-kanaj teʼ xook máanikoʼ, u ley Cristoeʼ nuʼuktaʼan tumen le yaabilaj yéetel tumen le justiciaoʼ. Wa k-beetik baʼax ku nuʼuktik le leyaʼ, maʼ ken k-beet baʼax kʼaas tiʼ le mejen paalaloʼoboʼ, baʼaxeʼ yaan k-tratartikoʼob yéetel yaabilaj. Juntúul máax beetik kʼaas tiʼ juntúul chan paaleʼ ku kaxtik chéen u yutsil yéetel ku beetik u sajaktal, tsʼoʼoleʼ ku beetik u yuʼubik maʼ yaabiltaʼaniʼ.
3 Bejlaʼeʼ tuláakal tuʼux ku beetaʼal kʼaas tiʼ le mejen paalaloʼoboʼ, lelaʼ ku beetik u muʼyaj tak le máaxoʼob meyajtik Diosoʼ. ¿Baʼaxten? Tumen yaʼab «kʼasaʼan máakoʼob[eʼ]» jeʼel u yookloʼob xan ichil le múuchʼuliloʼ (2 Tim. 3:13). Tsʼoʼoleʼ yaan tiʼ le máaxoʼob ku yaʼalikoʼob ku meyajtikoʼob Diosoʼ tu chaʼaj u kʼastal u tuukuloʼob, le oʼolal ku beetkoʼob kʼaas tiʼ le mejen paalaloʼoboʼ. Koʼoneʼex ilik baʼaxten leloʼ junpʼéel nojoch kʼeban. Tsʼoʼoleʼ k-ilik baʼax ku beetik le ancianoʼob kéen lúubuk máak tiʼ junpʼéel kʼaakʼas kʼeban, jeʼex u beetaʼal kʼaas tiʼ le mejen paalaloʼoboʼ yéetel baʼax unaj u beetik le taatatsiloʼob utiaʼal u kanáantik u mejen paalaloʼoboʼ. *
JUNPʼÉEL KʼAAKʼAS KʼEBAN
4, 5. U beetaʼal baʼax kʼaas tiʼ juntúul chan paaleʼ, ¿baʼaxten junpʼéel kʼeban ku beetaʼal tu contra?
4 Le máaxoʼob ku beetaʼal kʼaas tiʼoboʼ ku xáantal táan u muʼyajoʼob. Tsʼoʼoleʼ maʼ chéen letiʼob ku muʼyajoʼobiʼ, baʼaxeʼ tak u láakʼtsiloʼob bey xan le sukuʼunoʼob teʼ múuchʼuliloʼ. U beetaʼal baʼax kʼaas tiʼ le mejen paalaloʼoboʼ junpʼéel kʼaakʼas kʼeban tu táan Dios.
5 Junpʼéel kʼeban tu contra le máax ku beetaʼal kʼaas tiʼoʼ. * U beetaʼal kʼaas yéetel u beetaʼal u muʼyaj u maasileʼ junpʼéel nojoch kʼeban. Jeʼex ken k-il teʼ tuláakʼ xookoʼ, jach ku beetaʼal u muʼyaj le mejen paalal ku beetaʼal kʼaas tiʼoboʼ. Tumen ku traicionartaʼal tumen juntúul máax suuk tu yéetel, tsʼoʼoleʼ ku beetik u sajaktal. Le oʼolal unaj k-kanáantik le mejen paalaloʼoboʼ. Tsʼoʼoleʼ unaj k-líiʼsik u yóol yéetel k-áantik le máaxoʼob tsʼoʼok u beetaʼal kʼaas tiʼoboʼ (1 Tes. 5:14).
6, 7. ¿Baʼaxten le máax ku beetik kʼaas tiʼ juntúul chan paaloʼ ku kʼebantal tu contra le múuchʼuliloʼ yéetel tu contra le autoridadoʼoboʼ?
6 Junpʼéel kʼeban tu contra le múuchʼuliloʼ. Wa juntúul máax teʼ múuchʼulil ku beetik kʼaas tiʼ juntúul chan paaloʼ ku beetik u yúuchul tʼaan kʼaas tu contra le múuchʼuliloʼ (Mat. 5:16; 1 Ped. 2:12). Baʼaleʼ maʼ maʼalob ka tuklaʼak tuláakal le máaxoʼob meyajtik Dios beetik baʼax kʼaas jeʼex tu beetiloʼ, tumen letiʼobeʼ u tsʼaamaj u yóoloʼob u meyajtoʼob Dios «yoʼolal le fe» yaantiʼoboʼ (Jud. 3). Maʼatech k-chéen ilik u beetaʼal baʼax kʼaas tumen juntúul máax yaan ichil le múuchʼulil maʼ tu arrepentiroʼ, tumen ku beetik u yúuchul tʼaan kʼaas tiʼ u maasiloʼob.
7 Junpʼéel kʼeban tu contra le autoridadoʼoboʼ. Le máaxoʼob meyajtik Jéeobaoʼ unaj u tsʼáaikubaʼob «yáanal u páajtalil le autoridadoʼob[oʼ]» (Rom. 13:1). Toʼoneʼ bey k-beetkoʼ. Wa juntúul máax teʼ múuchʼulil ku beetik baʼax ku bin tu contra le ley tsʼaʼan tumen le autoridadoʼob, jeʼex u beetik kʼaas tiʼ juntúul chan paaloʼ, ku kʼebantal tu contraʼob (ket yéetel Baʼaxoʼob 25:8). Kex le ancianoʼob maʼ tsʼaʼan u páajtalil u yilkoʼob ka beetaʼak le baʼax ku yaʼalik le leyoʼob tsʼaʼan tumen le autoridadoʼoboʼ, maʼatech u taʼakikoʼob utiaʼal maʼ u castigartaʼal yoʼolal le kʼeban tu beetoʼ (Rom. 13:4). Le máax kʼebanchajoʼ yaan u jochik le baʼax tu pakʼoʼ (Gal. 6:7).
8. ¿Bix u yilik Dios u kʼebantal máak tu contra u yéet máakil?
8 Ku kʼebantal tu contra Jéeoba (Sal. 51:4). Kéen kʼebanchajak máak tu contra uláakʼ máakeʼ, ku kʼebanchajal xan tu contra Dios. Koʼoneʼex ilik junpʼéel baʼax eʼesik ichil le Ley tsʼaʼab tiʼ u kaajil Israel tumen Jéeobaoʼ. Le Leyoʼ ku yaʼalikeʼ le máax ku yookol wa ku tusik u yéet máakiloʼ ku kʼebantal tu contra Jéeoba, tumen ku beetik baʼax u pʼeek (Lev. 6:2-4). Le oʼolaleʼ juntúul máax ku beetik kʼaas tiʼ juntúul chan paal teʼ múuchʼuliloʼ ku kʼebantal tu contra Dios yéetel ku beetik u yúuchul tʼaan kʼaas tiʼ u kʼaabaʼ. Le oʼolal toʼoneʼ k-pʼektik u beetaʼal kʼaas tiʼ le mejen paalaloʼoboʼ, tumen junpʼéel nojoch kʼeban pʼektaʼan tumen Dios.
9. ¿Baʼax áantajil tsʼoʼok u tsʼáaik u kaajal Jéeoba, yéetel baʼaxten?
9 U kaajal Jéeobaeʼ tsʼoʼok u yúuchtal joʼopʼok u tsʼáaik nuʼuktaj yéetel le Biblia yoʼolal baʼax unaj u beetaʼal kéen beetaʼak kʼaas tiʼ juntúul chan paaloʼ. Jeʼex tu revistailoʼob U Pʼíich Tulumil Kanan yéetel ¡Aajkech! yaantoʼonoʼ, ku tsolkoʼob baʼax unaj u beetik le máaxoʼob beetaʼab kʼaas tiʼob tu mejentakiloʼoboʼ, bix jeʼel u yáantaʼaloʼob yéetel u líiʼsaʼal u yóoloʼobeʼ, tsʼoʼoleʼ ku yaʼalikoʼob xan bix unaj u kanáantaʼal le mejen paalal tumen u taataʼoboʼ. Tsʼoʼok xan u yaʼalaʼal tiʼ le ancianoʼob baʼax unaj u beetkoʼob kéen beetaʼak baʼax kʼaas tiʼ juntúul chan paal tumen wa máaxoʼ. U kaajal Jéeobaeʼ cada táan u yaʼalik baʼax unaj u beetik le ancianoʼob kéen úuchuk baʼaloʼob beyaʼ. Beyoʼ ku yilpajal ka beetaʼak baʼax ku yaʼalik u ley Cristo kéen beetaʼak baʼax kʼaas tiʼ juntúul chan paal.
BAʼAX UNAJ U BEETAʼAL KÉEN KʼEBANCHAJAK WA MÁAX
10-12. 1) ¿Baʼax unaj u kʼaʼajsik le ancianoʼob kéen tʼaanakoʼob yéetel juntúul máax tsʼoʼok u lúubul tiʼ junpʼéel nojoch kʼeban, yéetel baʼaxoʼob unaj u chʼaʼikoʼob en cuentail? 2) Jeʼex u yaʼalik Santiago 5:14 yéetel 15, ¿baʼax ku yilik u beetik le ancianoʼoboʼ?
10 Kéen kʼebanchajak wa máaxeʼ, le ancianoʼoboʼ unaj u kʼaʼajskoʼobeʼ utiaʼal u beetkoʼob baʼax kʼaʼabéet jeʼex u nuʼuktik u ley Cristoeʼ, unaj u yeʼeskoʼob yaabilaj yéetel u beetkoʼob baʼax toj tu táan Dios. Le oʼolal jejeláas baʼaxoʼob ku chʼaʼikoʼob en cuentail. Ku yilkoʼob ka kiliʼichkúuntaʼak u kʼaabaʼ Dios (Lev. 22:31, 32; Mat. 6:9). Ku yilkoʼob xan u kanáantkoʼob le sukuʼunoʼob utiaʼal maʼ u xuʼulul u meyajtikoʼob Diosoʼ yéetel ku yáantkoʼob le máax beetaʼab kʼaas tiʼoʼ.
11 Tsʼoʼoleʼ le ancianoʼoboʼ ku yilik u yáantkoʼob le máax kʼebanchaj utiaʼal u seguer u meyajtik Jéeobaoʼ (xok Santiago 5:14, 15). Le máax ku beetik le baʼaxoʼob kʼaastak ku tsʼíiboltikoʼ, ku yeʼesikeʼ kʼojaʼan tu táan Dios. Leloʼ ku yeʼesikeʼ maʼ maʼalob bix u biskuba yéetel Jéeobaiʼ. * Le ancianoʼoboʼ beyoʼob doctoroʼobeʼ, tumen jeʼel u páajtal u yáantkoʼob le máax kʼojaʼan, wa le máax kʼebanchajoʼ. Le tsolnuʼukoʼob ku tsʼáaikoʼob yéetel le Bibliaoʼ jeʼel u yáantik le máax kʼebanchaj utiaʼal u páajtal u kaʼa biskuba yéetel Diosoʼ. Baʼaleʼ lelaʼ chéen jeʼel u páajtal wa jach tu jaajil arrepentirnajaʼaneʼ (Bax. 3:19; 2 Cor. 2:5-10).
12 Bey túunoʼ yaan junpʼéel nojoch meyaj tiʼ le ancianoʼoboʼ. Ku yilkoʼob u yeʼeskoʼob yaabilaj tiʼ u mejen tamanoʼob Jéeoba tsʼaʼan u kanáantoʼoboʼ (1 Ped. 5:1-3). Le oʼolal ku beetkoʼob tuláakal le ku páajtal utiaʼal u yuʼubikuba maʼalobil le sukuʼunoʼoboʼ. Bey túunoʼ, kéen u yojéeltoʼob yaan máax tsʼoʼok u lúubul tiʼ junpʼéel nojoch kʼeban, jeʼex le u beetaʼal kʼaas tiʼ juntúul chan paaloʼ, maʼatech u pʼatkoʼob chéen beyoʼ. ¿Baʼax túun ku beetkoʼob? Koʼoneʼex xakʼaltik le kʼáatchiʼob ku chíikpajal tu káajbal le xóotʼol 13, 15 yéetel 17.
13, 14. ¿Ku beetik wa le ancianoʼob le baʼaxoʼob ku yaʼalik le ley tsʼaʼan tumen le autoridadoʼob yaan yil yéetel u beetaʼal kʼaas tiʼ le mejen paalaloʼoboʼ? Tsole.
13 ¿Ku beetik wa le ancianoʼob le baʼaxoʼob ku yaʼalik le ley tsʼaʼan tumen le autoridadoʼob yaan yil yéetel u beetaʼal kʼaas tiʼ le mejen paalaloʼoboʼ? Ku beetkoʼob. Teʼ tuʼuxoʼob tsʼaʼan le leyoʼobaʼ ku respetartaʼal tumen le ancianoʼoboʼ (Rom. 13:1). Lelaʼ maʼatech u bin tu contra u ley Dios (Bax. 5:28, 29). Le oʼolal kéen ojéeltaʼak tumen le ancianoʼob tsʼoʼok u beetaʼal kʼaas tiʼ juntúul chan paaloʼ, tu séebaʼanil ku kʼáatkoʼob tu najil Betel baʼax unaj u beetkoʼob utiaʼal u tsʼoʼokbeskoʼob baʼax ku yaʼalik le leyoʼ.
14 Le ancianoʼoboʼ ku yaʼalikoʼob tiʼ le máax beetaʼab baʼax kʼaasoʼ, tiʼ u taataʼob yéetel tiʼ le máaxoʼob u yojloʼob le baʼax úuchoʼ jeʼel u páajtal u takpooloʼob tiʼ le autoridadoʼob wa u kʼáatoʼoboʼ. Baʼaleʼ ¿kux túun wa le máax beet kʼaas tiʼ le chan paaloʼ juntúul tiʼ le máaxoʼob yanoʼob teʼ múuchʼuliloʼ yéetel tsʼoʼok u yaʼabtal máaxoʼob ojéeltik? ¿Unaj wa u tuklik máak maʼ unaj u takpool utiaʼal maʼ u yaʼalaʼal baʼax kʼaas tiʼ u kʼaabaʼ Diosiʼ? Maʼatech. Tumen le máax kʼebanchajoʼ letiʼ beetik u yaʼalaʼal baʼax kʼaas tiʼ u kʼaabaʼ Dios.
15, 16. 1) Yoʼolal le baʼax ku yaʼalik Yáax tiʼ Timoteo 5:19, ¿baʼaxten kʼaʼabéet kex kaʼatúul testigo utiaʼal ka beetaʼak junpʼéel comité judicial? 2) ¿Baʼax ku beetik le ancianoʼob kéen taʼakak u pool wa máax teʼ múuchʼulil tsʼoʼok u beetik kʼaas tiʼ juntúul chan paaloʼ?
15 ¿Baʼaxten kʼaʼabéet kex kaʼatúul testigo utiaʼal ka páajchajak u beetaʼal junpʼéel comité judicial? Tumen bey u yaʼalik le Bibliaoʼ. Lelaʼ junpʼéel tiʼ le baʼaxoʼob ku yaʼalik u ley Jéeoba utiaʼal u beetaʼal junpʼéel baʼax tojoʼ. Wa le máax kʼebanchaj maʼ tu yaʼalik wa tsʼoʼok u lúubul tiʼ kʼebanoʼ, kʼaʼabéet kaʼatúul testigo aʼalik utiaʼal u béeytal u beetaʼal junpʼéel comité judicial (Deu. 19:15; Mat. 18:16; xok 1 Timoteo 5:19). ¿U kʼáat wa túun u yaʼal kʼaʼabéet kaʼatúul testigo utiaʼal ka béeyak u taʼakal u pool tu táan le autoridadoʼoboʼ? Maʼatech. Lelaʼ maʼ kʼaʼabéet utiaʼal u máansaʼal tu táan le autoridadoʼob junpʼéel baʼax kʼaas tsʼoʼok u beetaʼaloʼ.
16 Kéen taʼakak u pool wa máax teʼ múuchʼulil tsʼoʼok u beetik kʼaas tiʼ juntúul chan paaleʼ, le ancianoʼoboʼ ku beetkoʼob kaʼapʼéel baʼal. Yáaxeʼ, ku yilkoʼob ka beetaʼak baʼax ku yaʼalik le ley tsʼaʼan tumen le autoridadoʼob yaan yil yéetel u beetaʼal kʼaas tiʼ le mejen paalaloʼoboʼ. U kaʼapʼéeleʼ, ku xakʼaltikoʼob baʼax ku yaʼalik le Biblia utiaʼal u yilkoʼob jach bix úuchik bey xan wa kʼaʼabéet u beetkoʼob junpʼéel comité judicialoʼ. Wa le máax takaʼan u pool ku yaʼalik maʼ jaaj le baʼax ku yaʼalaʼal tu contraoʼ, le ancianoʼoboʼ ku yuʼubikoʼob baʼax ku yaʼalik le kaʼatúul testigooʼ. Unaj u beetaʼal junpʼéel comité judicial wa yaan kex kaʼatúul máax aʼalik kʼebanchaj wa máax: le máax ku takpooloʼ yéetel le máax il wa jach tu jaajil tu beetaj kʼaas tiʼ le chan paaloʼ wa tiʼ uláakʼ mejen paalal. * Kex chéen juntúul máax ku takpooleʼ, maʼ u kʼáat u yaʼal wa chéen táan u tuusiʼ. Tak wa minaʼan kaʼatúul testigo utiaʼal u yeʼesaʼal jach kʼebanchaj wa máaxeʼ, le ancianoʼoboʼ ku tuklikoʼobeʼ maʼ xaaneʼ jach tu jaajil tu beetaj kʼaas tiʼ le chan paaloʼ. Le oʼolal yaan u seguer u yáantkoʼob le máax beetaʼab kʼaas tiʼoʼ, tsʼoʼoleʼ yaan u jach kanáantkoʼob u maasil teʼ múuchʼulil tiʼ le máax takaʼan u pooloʼ (Bax. 20:28).
17, 18. ¿Baʼax meyajil ku beetik junpʼéel comité judicial?
17 ¿Baʼax meyajil ku beetik junpʼéel comité judicial? Le ancianoʼob táakaʼanoʼob ichil le comiteoʼ ku jach ilkoʼob wa le máax kʼebanchajoʼ jeʼel u páajtal u seguer u pʼáatal ichil le múuchʼuliloʼ. Le tʼaan judicialoʼ maʼ u kʼáat u yaʼal wa letiʼe ancianoʼob chʼaʼtuklik wa yaan u castigartaʼal tumen le autoridadoʼoboʼ wa maʼ. Le ancianoʼoboʼ maʼatech u yoksikubaʼob tiʼ bix kun castigartbil le máax kʼebanchajoʼ (Rom. 13:2-4; Tito 3:1).
18 Le ancianoʼob yanoʼob ichil le comité judicialoʼ chéen ku yilkoʼob wa le máax kʼebanchajoʼ jeʼel u páajtal u pʼáatal teʼ múuchʼuliloʼ wa maʼ. Yoʼolal le baʼaxoʼob ku yaʼalik le Bibliaoʼ ku tsʼáaikoʼob cuenta wa arrepentirnajaʼan le máax kʼebanchajoʼ wa maʼ. Wa maʼatecheʼ ku jóoʼsaʼal ichil le múuchʼuliloʼ, tsʼoʼoleʼ ku tsʼaʼabal u yojéelt le sukuʼunoʼoboʼ le máakoʼ maʼ j-jaajkunaj tiʼ Jéeobaiʼ (1 Cor. 5:11-13). Chéen baʼaleʼ wa arrepentirnajaʼaneʼ maʼ kun jóoʼsbil teʼ múuchʼuliloʼ. Kex beyoʼ le ancianoʼoboʼ yaan u yaʼalikoʼobtiʼeʼ, maʼ xaaneʼ mix bikʼin kun tsʼaabiltiʼ u beet wa baʼax meyajil teʼ múuchʼuliloʼ. Tsʼoʼoleʼ yaan u maas kanáantkoʼob u maasil mejen paalal teʼ múuchʼuliloʼ. Maʼ xaaneʼ yaan u yaʼalikoʼob tiʼ le taatatsiloʼob ka u kanáant u mejen paalaloʼob tiʼ le máax beet baʼax kʼaasoʼ. Le kéen u beetoʼobeʼ maʼ ken u yaʼaloʼob tiʼ máax tsʼoʼok u beetaʼal kʼaas tumen le máakoʼ.
BIX JEʼEL U KANÁANTIK U PAALAL LE TAATATSILOʼOBOʼ
Le taatatsiloʼoboʼ ku kanáantik u paalaloʼob utiaʼal maʼ u beetaʼal kʼaas tiʼob le kéen u tsikbaltoʼobtiʼob baʼaloʼob yaan yil yéetel le núupchital jeʼex u bin u nuuktaloʼoboʼ. Utiaʼal leloʼ ku meyajtiʼob le baʼaxoʼob jóoʼsaʼan tumen u kaajal Jéeobaoʼ. (Ilawil le xóotʼol 19 tak 22).
19-22. ¿Bix jeʼel u páajtal u kanáantik u paalal le taatatsiloʼoboʼ? (Ilawil le foto yaan tu yáax táan juʼunil le revistaaʼ).
19 Le taatatsiloʼoboʼ unaj u kanáantik u paalaloʼob tiʼ jeʼel baʼalak jeʼel u beetik kʼaas tiʼobeʼ. * Taatatsileʼex, a paalaleʼexeʼ junpʼéel siibal ku taal tiʼ Dios (Sal. 127:3). Jach unaj a kanáantkeʼexoʼob. ¿Baʼax jeʼel u páajtal a beetkeʼex utiaʼal maʼ u beetaʼal kʼaas tiʼ a mejen paalaleʼexeʼ?
20 Yáaxeʼ, unaj a wojéeltikeʼex jach baʼaxoʼob táakaʼan tiʼ u beetaʼal kʼaas tiʼ juntúul chan paal. Kʼaj óolteʼex máaxoʼob beetik kʼaas tiʼ le mejen paalaloʼoboʼ yéetel baʼax ku yaʼalikoʼob utiaʼal u tuskoʼob. Jach beeteʼex u cuentailoʼob teʼ tuʼuxoʼob ka tuklikeʼex jeʼel u beetaʼal kʼaas tiʼoboʼ (Pro. 22:3; 24:3). Kʼaʼajakteʼexeʼ le máaxoʼob maases beetik kʼaasoʼ letiʼe máaxoʼob kʼaj óolaʼanoʼob tumen le mejen paalaloʼob yéetel suuk u biskubaʼob tu yéeteloʼoboʼ.
21 U kaʼapʼéeleʼ, tsikbalneneʼex mantatsʼ yéetel a mejen paalaleʼex (Deu. 6:6, 7). Jach chʼenxikinteʼex baʼax ku yaʼalikoʼob (Sant. 1:19). Kʼaʼajakteʼexeʼ jeʼel u talamtal u tsikbaltik le chan paal le baʼax beetaʼabtiʼoʼ. Maʼ xaaneʼ ku sajaktal maʼ u creertaʼal baʼax ku yaʼalik. Wa maʼ xaaneʼ sajakkúuntaʼab tumen le máax beet kʼaas tiʼ utiaʼal maʼ u yaʼalik mix baʼaloʼ. Wa ka tsʼáaikeʼex cuenta yaan baʼax ku yúuchul tiʼ a mejen paalaleʼexeʼ, kʼáateʼextiʼob yéetel yaabilaj baʼax ku yúuchultiʼob yéetel jach chʼenxikinteʼex baʼax ku yaʼalikoʼob.
22 U yóoxpʼéeleʼ, kaʼanseʼex tiʼ a mejen paalaleʼex baʼax unaj u beetkoʼob. Tsikbalteʼextiʼob baʼaloʼob yaan yil yéetel le núupchital jeʼex u bin u nuuktaloʼobeʼ. Kaʼanseʼextiʼob baʼax unaj u yaʼalikoʼob wa u beetkoʼob wa yaan máax ku yóotik u machoʼob tuʼux maʼ unajiʼ. Meyajnakteʼex le baʼaxoʼob jóoʼsaʼan tumen u kaajal Jéeoba tuʼux ku yaʼalaʼal bix unaj u kanáantaʼal le mejen paalaloʼoboʼ (ilawil le cuadro « Baʼaxoʼob ku yaʼalaʼal tiʼ le taatatsiloʼob yéetel tiʼ le paalaloʼoboʼ»).
23. ¿Bix k-ilik le u beetaʼal kʼaas tiʼ le mejen paalaloʼoboʼ, yéetel baʼax kʼáatchiʼil kun núukbil teʼ tuláakʼ xookoʼ?
23 Toʼon u j-jaajkunajoʼob Jéeobaeʼ k-ilik junpʼéel nojoch kʼeban le u beetaʼal kʼaas tiʼ le mejen paalaloʼoboʼ. Le múuchʼuliloʼoboʼ ku nuʼuktikubaʼob yéetel u ley Cristo, le oʼolal maʼatech u taʼakikoʼob baʼax u beetmaj juntúul máak utiaʼal maʼ u castigartaʼal. Baʼaleʼ ¿bix jeʼel k-áantik le máaxoʼob tsʼoʼok u beetaʼal kʼaas tiʼoboʼ? Lelaʼ yaan k-xakʼaltik teʼ tuláakʼ xookoʼ.
KʼAAY 103 Jéeobaeʼ u tsʼaamaj j-kanan tamanoʼob
^ xóot’ol 5 Le xookaʼ yaan u yáantkoʼon k-il bix jeʼel k-kanáantik le mejen paalaloʼob utiaʼal maʼ u beetaʼal kʼaas tiʼoboʼ (abuso sexual). Yaan k-ilik baʼax unaj u beetik le ancianoʼob utiaʼal u kanáantkoʼob le sukuʼunoʼob teʼ múuchʼuliloʼ yéetel bix jeʼel u kanáantik u paalal le taatatsiloʼoboʼ.
^ xóot’ol 3 BAʼAX KU TSOʼOLOL: U beetaʼal baʼax kʼaas tiʼ le mejen paalaloʼoboʼ táakaʼan le jejeláas baʼaloʼob kʼaastak ku beetik wa máax utiaʼal u béeykuntik u kʼaakʼas tsʼíibolaloʼoboʼ. Ichil lelaʼ táakaʼan u núupchital máak yéetel juntúul chan paal, sexo oral, sexo anal, u báaytaʼal u xiibil wa u x-chʼuupil, u yiimoʼob wa u nalgaʼob. Kex maases tiʼ le mejen x-chʼúupalal ku beetaʼal kʼaasoʼ, yaan kʼiineʼ tak tiʼ le mejen xiʼipalaloʼoboʼ. Tsʼoʼoleʼ kex maases letiʼe xiiboʼob beetik kʼaas tiʼ le mejen paalaloʼoboʼ yaan jujuntúul koʼoleloʼob beetik xan.
^ xóot’ol 5 BAʼAX KU TSOʼOLOL: Teʼ xook yéetel teʼ tuláakʼoʼ, yaan k-tʼaan tiʼ máax beetaʼab baʼax kʼaas tiʼ tu chichnil. Baʼaleʼ k-kʼáat ka naʼataʼakeʼ letiʼeʼ maʼ kʼebanchajaʼaniʼ, baʼaxeʼ chéen beetaʼab kʼaas tiʼ yéetel beetaʼab u muʼyaj.
^ xóot’ol 11 Kex kʼojaʼan tu táan Dios juntúul máax ku kʼebantaleʼ yaan u kʼubik cuenta tiʼ Jéeoba yoʼolal baʼaxoʼob ku beetik (Rom. 14:12).
^ xóot’ol 16 Juntúul tiʼ le taatatsiloʼob wa uláakʼ máax yéetel ku biskuba le chan paaloʼ jeʼel u páajtal u bin u yaʼal tiʼ le ancianoʼob le baʼax úuchoʼ. Beyoʼ le chan paaloʼ maʼ kun beetbil u maas yaatal u yóol. Le ancianoʼoboʼ mix juntéen ken u yaʼaloʼob tiʼ le chan paal ka pʼáatak tu yiknaloʼob le táan u tʼaanoʼob yéetel le máax beet kʼaas tiʼoʼ.
^ xóot’ol 19 Le baʼaxoʼob ku yaʼalaʼal tiʼ le taatatsiloʼob teʼ xookaʼ láayliʼ letiʼe baʼax unaj u beetik le máaxoʼob kanáantik uláakʼ mejen paalaloʼ.
