TEʼ AÑO máanikoʼ, u milesil sukuʼunoʼob tiʼ tuláakal yóokʼol kaabeʼ tsʼaʼab u beet u ancianoiloʼob yéetel u siervo ministerialiloʼob. Wa tiaʼanech ichiloʼobeʼ jach kiʼimak wal xan a wóoleʼ.

Kex beyoʼ maʼ xaaneʼ chan saajkech, leloʼ maʼ jelaʼaniʼ. Jason, juntúul táankelem sukuʼuneʼ, ku yaʼalik: «Ka tsʼaʼaben in beet in ancianoileʼ tin tuklaj maʼ kun páajtal in beetik». Tak Moisés yéetel Jeremíaseʼ tu yaʼaloʼob maʼ tu páajtal u beetkoʼob kaʼach le meyaj tsʼaʼabtiʼob tumen Jéeobaoʼ (Éxo. 4:10; Jer. 1:6). ¿Bey wa xan a wuʼuyikabaoʼ? ¿Baʼax jeʼel u yáantkech utiaʼal a beetik tubeeleʼ? Koʼox ilik baʼax tu beetaj Timoteo (Bax. 16:1-3).

Letiʼeʼ yaan kex 20 años tiʼ ka invitartaʼab tumen Pablo utiaʼal ka xiʼik kʼaʼaytaj tu yéetel. Maʼ xaaneʼ tu káajbaleʼ chan sajak u beet le meyajoʼob tsʼaʼabtiʼoʼ (1 Tim. 4:11, 12; 2 Tim. 1:1, 2, 7). Baʼaleʼ ka máan diez añoseʼ, Pabloeʼ tu yaʼalaj tiʼ le múuchʼulil yaan kaʼach Filiposoʼ: «Kin páaʼtik tiʼ Yuumtsil Jesús ka páajchajak in séeb túuxtik Timoteo ta wiknaleʼex [...]. Tumen minaʼanten uláakʼ máak jach jeʼex Timoteoeʼ» (Fili. 2:19, 20).

¿Bix kʼuchik u beetuba juntúul jach maʼalob ancianoil Timoteo? Koʼox ilik seis baʼaxoʼob tu beetaj.

1. Tu kaxtaj u yutsil u maasil. Pabloeʼ tu yaʼalaj tiʼ le sukuʼunoʼob yanoʼob Filiposoʼ jach ku kaxtaʼal u yutsiloʼob tumen Timoteo (Fili. 2:20). Timoteoeʼ tu kaxtaj u yutsil u maasil, tu líiʼsaj u yóoloʼob u meyajtoʼob Dios yéetel tu xupuba u yáantoʼob.

William, tsʼoʼok maas tiʼ veinte años joʼopʼok u beetik u ancianoileʼ, ku yaʼalik tiʼ le máaxoʼob maʼ úuch tsʼaʼabak u beet u ancianoiloʼob wa u siervo ministerialiloʼoboʼ: «Tratart le sukuʼunoʼob yéetel yaabilajoʼ. Ilawil a wáantkoʼob yéetel baʼaxoʼob kʼaʼabéettiʼob, maʼ chéen unaj a wilik a beetik u maasil meyajoʼob kʼaʼabéet teʼ múuchʼuliloʼ». Maʼ a beetik jeʼex u choferil junpʼéel autobús chéen ku yilik u séeb kʼuchul teʼ paraderoʼob, le oʼolal maʼatech u jeʼelel u chʼaʼ le máakoʼob páaʼtikoʼ.

2. Tu tsʼáaj táanil u meyajtik Dios. Ka tʼaanaj Pablo tiʼ u jelaʼanil baʼax ku beetik Timoteoeʼ, tu yaʼalaj: «Tuláakal le u maasil máakoʼoboʼ chéen u yutsiloʼob ku kaxtikoʼob, maʼ le baʼaloʼob yaan yil yéetel Cristo Jesusoʼ» (Fili. 2:21). Pabloeʼ tu tsʼáaj cuentaeʼ le sukuʼunoʼob kajaʼanoʼob Roma, le tuʼux yaan ka tu tsʼíibtaj le cartaoʼ, chéen chʼiikloʼob tiʼ baʼaxoʼob kʼaʼabéettiʼob. Kex jeʼel u páajtal u beetkoʼob u maasil utiaʼal u meyajtikoʼob Dioseʼ, maʼ tu beetoʼobiʼ. Timoteoeʼ maʼ bey u beetik kaʼachiʼ. Kéen yanak u páajtalil u maas táakpajal teʼ kʼaʼaytajoʼ, ku yaʼalik jeʼex Isaíaseʼ, letiʼeʼ tu yaʼalaj: ‹Jeʼelenaʼ, túuxteniʼ› (Isa. 6:8).

¿Baʼax jeʼel a beetik utiaʼal a wáantik le sukuʼunoʼob teʼ múuchʼulil yéetel a beetik u maasil baʼaxoʼob kʼaʼabéettecheʼ? Yáaxeʼ kʼaʼabéet a kanik a wil máakalmáak le baʼaxoʼob «maas kʼaʼanaʼantakoʼ» (Fili. 1:10). Ilawil kʼaʼanaʼantak le baʼaxoʼob kaʼanaʼan u yilik Diosoʼ. U kaʼapʼéeleʼ, kiʼimakchajak a wóol yéetel junpʼíit baʼal. Maʼ a beetik le baʼaxoʼob ku bisiktech yaʼab tiempo yéetel ku beetik a sen kaʼanaloʼ. Pabloeʼ tu yaʼalaj tiʼ Timoteo: «Náachkuntaba tiʼ le tsʼíibolaloʼob ku taasik le táankelmiloʼ; xeen tu paach le justiciaoʼ,  le fejoʼ, le yaabilajoʼ, le jeetsʼeliloʼ» (2 Tim. 2:22).

3. Tu tsʼáaj u yóol u meyajt Jéeoba. Pabloeʼ tu kʼaʼajsaj tiʼ le filiposiloʼoboʼ: «Teʼexeʼ a wojleʼex baʼax tsʼoʼok u yeʼesik Timoteo yéetel u kuxtal, tumen jeʼex u beetik juntúul hijotsil yéetel u taataeʼ, letiʼeʼ múul meyajnaj tin wéetel bey palitsil utiaʼal u maas kʼaʼaytaʼal le maʼalob péektsiloʼ» (Fili. 2:22). Timoteoeʼ maʼ maʼakʼóoliʼ. Múul meyajnaj yéetel Pablo, leloʼ áantajnaj utiaʼal u maas biskubaʼob.

Yaʼab meyaj jeʼel a beetik ichil u kaajal Dioseʼ. Wa ka beetkeʼ yaan u kiʼimaktal a wóol yéetel yaan a maas yaabiltik le sukuʼunoʼoboʼ. Le oʼolaleʼ ilawil mantatsʼ ka «yanak yaʼab baʼal a [beet] tiʼ u meeyjil Yuumtsil» (1 Cor. 15:58).

4. Tu beetaj baʼax tu kanaj. Pabloeʼ tu tsʼíibtaj tiʼ Timoteo: «Techeʼ jach tsʼoʼok a chʼenxikintik in kaʼansaj, jach a wojel bix kuxliken, baʼax in chʼaʼtukultmaj in beetik, bix le fe yaantenoʼ, bix in weʼesik chúukaʼan óolal, bix le yaabilaj yaantenoʼ yéetel bix u chúukpajal in wóol muʼyaj» (2 Tim. 3:10). Tumen Timoteo tu beetaj baʼax tu kaneʼ, tsʼaʼab u maasil meyaj u beete (1 Cor. 4:17).

¿Yaan wa juntúul sukuʼun ka wilik bey a maestroeʼ? Wa minaʼaneʼ kaxt juntúuliʼ. Tom, úuch joʼopʼok u beetik u ancianoileʼ, ku yaʼalik: «Juntúul sukuʼun úuch joʼopʼok u beetik u ancianoileʼ tu yáanten, le oʼolal tin wilaj bey in maestroeʼ. Suukchaj in kʼáatik u yáantaj yéetel kin beetik le baʼax ku yaʼalikoʼ. Leloʼ tu yáanten utiaʼal maʼ in sajaktal in beet le meyajoʼob ku kʼubéentaʼaltenoʼ».

5. Tsʼáa a wóol xook. Pabloeʼ tu yaʼalaj tiʼ Timoteo: «Seguernak a muʼukʼaʼankúuntikaba yéetel u tuukulil a maas meyajtik Dios» (1 Tim. 4:7). Juntúul atletaeʼ yaan máax kaʼansik, baʼaleʼ kʼaʼabéet xan u entrenar chéen tu juunal. Pabloeʼ tu yaʼalaj tiʼ Timoteo: «Maʼ u xuʼulul a tsʼáaik a wóol xook tu táan u maasil, a líiʼsik u yóoloʼob yéetel a kaʼanskoʼob [...]. Chʼik a tuukul tiʼ le baʼaloʼobaʼ; jach tsʼáa a wóol a beetoʼob utiaʼal ka jach ilaʼak tumen tuláakal máak bix táan a bin táanil» (1 Tim. 4:13-15).

Teech xaneʼ unaj a maas maʼalobkíintik le baʼaxoʼob a wojel a beetoʼ. Mantatsʼ unaj a wilik a maas kaanbal. Ilawil a kʼaj óoltik bix u yaʼalik u kaajal Dios ka beetaʼak wa baʼax meyajil. Tsʼoʼoleʼ maʼ a confiar chéen tiʼ le baʼaxoʼob a wojel a beetoʼ. Maʼ unaj a tuklik wa maʼ tsaaj a xakʼalxook utiaʼal a wilik bix unaj u beetaʼal junpʼéel meyaj chéen tumen úuch joʼopʼok a beetik a ancianoiliʼ. Jeʼex tu beetil Timoteoeʼ «maʼ u xuʼulul a kanáantkaba yéetel mantatsʼ jach kanáant baʼax ka kaʼansik» (1 Tim. 4:16).

6. Tu chaʼaj u nuʼuktaʼal tumen u kiliʼich muukʼ Jéeoba. Pabloeʼ tu yaʼalaj tiʼ Timoteo ka u kanáant le meyaj kʼubéentaʼabtiʼ «yéetel u yáantaj le kiliʼich muuk[oʼ]» (2 Tim. 1:14). Utiaʼal u beetkeʼ unaj u chaʼik u nuʼuktaʼal tumen le kiliʼich muukʼoʼ.

Donald, úuch káajak u beetik u ancianoileʼ, ku yaʼalik: «Le ancianoʼob yéetel le siervo ministerialoʼoboʼ kʼaʼabéet u yilkoʼob maʼ u xuʼulul u biskubaʼob yéetel Dios. Beyoʼ maʼ kun xuʼulul ‹u yantal u muukʼoʼob›. Wa ka kʼáatkeʼex u kiliʼich muukʼ Dios yéetel ka weʼeskeʼex le jatsʼuts modos ku taal tiʼoʼ, jach nojoch áantaj ken a tsʼáaʼex tiʼ le sukuʼunoʼoboʼ» (Sal. 84:7; 1 Ped. 4:11).

Jach jatsʼuts u yilaʼal bix u maas tsʼáaik u yóol u meyajtoʼob Dios le sukuʼunoʼob táant u tsʼaʼabal u beet u ancianoiloʼob wa u siervo ministerialiloʼob, jeʼex techoʼ. Jason, le máax t-aʼalaj tu káajbal le xookaʼ, ku yaʼalik: «Ichil tuláakal le jaʼaboʼob joʼopʼok in beetik in ancianoiloʼ tsʼoʼok in kanik yaʼab baʼaloʼob, bejlaʼeʼ maas maʼatech in sajaktal kéen tsʼaʼabakten wa baʼax meyajil. Uts tin wich in beetik tuláakal le baʼaxoʼob ku kʼubéentaʼaltenoʼ».

Kux túun teech, ¿yaan wa u seguer a tsʼáaik a wóol a maas meyajt Dios? Ilawil a beetik jeʼex tu beetil Timoteooʼ. Beyoʼ jach yaan a wáantaj ichil u kaajal Jéeoba.