1. ¿Baʼax k-tsʼíiboltik ka u beet k-láakʼtsiloʼob?

JUNTÚUL kiik ku kʼaabaʼtik Paulineeʼ * ku yaʼalik: «Desde ka tin kʼaj óoltaj u jaajileʼ tin tsʼíiboltaj ka kʼaj óoltaʼak xan tumen tuláakal in láakʼtsiloʼob utiaʼal ka múul kuxlakoʼon teʼ Paraísooʼ. In kʼáat kaʼach ka meyajtaʼak xan Jéeoba tumen in chan hijo bey xan tumen Wayne, in wíicham». Wa yaan tiʼ k-láakʼtsiloʼob maʼ u kʼaj óoltoʼob Dios mix u yaabiltmoʼobeʼ, maʼ xaaneʼ k-uʼuyikba jeʼex le kiikoʼ.

2. ¿Baʼax kʼáatchiʼiloʼob ken k-núuk teʼ xookaʼ?

² Maʼ tu páajtal k-obligartik k-láakʼtsiloʼob ka u kʼamoʼob le maʼalob péektsiloʼ. Baʼaleʼ jeʼel u páajtal k-áantkoʼob u kʼamoʼob le baʼax ku yaʼalik le Bibliaoʼ (2 Tim. 3:14, 15). ¿Baʼaxten unaj k-kʼaʼaytik le maʼalob péektsil tiʼ k-láakʼtsiloʼoboʼ? ¿Baʼaxten unaj k-naʼatik bix u yuʼubikubaʼob? ¿Baʼax jeʼel u páajtal k-beetik utiaʼal ka u yaabiltoʼob xan Jéeobaeʼ? ¿Bix jeʼel k-áantaʼal tumen le sukuʼunoʼob teʼ múuchʼuliloʼ?

3. Jeʼex u yaʼalik U kaʼapʼéel tsʼíib Pedro 3:9, ¿baʼaxten unaj k-kʼaʼaytik le maʼalob péektsil tiʼ k-láakʼtsiloʼoboʼ?

³ Maʼ kun xáantaleʼ Jéeobaeʼ yaan u xuʼulsik tiʼ u yóokʼol kaab Satanás. Baʼaleʼ yaan u salvartikuba le máaxoʼob u kʼáatoʼob ka yanak le kuxtal minaʼan u xuul tiʼoboʼ (Bax. 13:48). Toʼoneʼ k-xupik k-tiempo yéetel k-muukʼ utiaʼal k-kʼaʼaytik le maʼalob  péektsil tiʼ le máakoʼob teʼ tuʼux kajaʼanoʼonoʼ, le oʼolal jach k-tsʼíiboltik xan ka meyajtaʼak Jéeoba tumen k-láakʼtsiloʼob. K-Taata jach u yaabiltmoʼonoʼ «maʼ u kʼáat ka xuʼulsaʼak tiʼ mix máakiʼ, baʼaxeʼ u kʼáat ka u kʼex u tuukul tuláakal máak» (xok 2 Pedro 3:9).

4. ¿Baʼax maʼ maʼalob jeʼel k-beetik kéen kʼaʼaytajnakoʼon tiʼ k-láakʼtsiloʼobeʼ?

⁴ Unaj k-kʼaʼajsikeʼ yaan junpʼéel bix maʼalob jeʼel k-kʼaʼaytik le maʼalob péektsiloʼ yéetel junpʼéel bix maʼ maʼalobiʼ. Maʼ xaaneʼ k-kanáantik bix k-kʼaʼaytaj tiʼ juntúul máax maʼ k-kʼaj óoliʼ, baʼaleʼ kéen kʼaʼaytajnakoʼon tiʼ juntúul k-láakʼtsileʼ juntaatsʼ k-aʼaliktiʼ baʼax unaj u beetik.

5. ¿Baʼax unaj k-chʼaʼik en cuentail kéen kʼaʼaytajnakoʼon tiʼ k-láakʼtsiloʼob?

⁵ Kéen k-kʼaʼajs baʼaxoʼob t-aʼalaj le ka yáax kʼaʼaytajnajoʼon tiʼ k-láakʼtsiloʼobeʼ, maʼ xaaneʼ ku yaatal k-óol yoʼolal bix úuchik k-beetik, tumen k-tsʼáaik cuenta jeʼel u páajtal k-aʼaliktiʼob yaanal bix kaʼacheʼ. Apóstol Pabloeʼ tu yaʼalaj tiʼ le sukuʼunoʼoboʼ: «Tʼaanakeʼex mantatsʼ yéetel utsil bey a kiʼikuntmeʼex a tʼaaneʼex yéetel taʼabeʼ, bey túunoʼ yaan a kankeʼex bix jeʼel a núukikeʼex u tʼaan cada juntúul máakeʼ» (Col. 4:5, 6). Unaj u kʼaʼajaltoʼon le baʼax ku yaʼalik le teksto kéen kʼaʼaytajnakoʼon tiʼ k-láakʼtsiloʼoboʼ. Wa maʼeʼ maʼ ken k-áantoʼob u meyajtoʼob Jéeoba, baʼaxeʼ yaan k-beetik u maas náachtaloʼob tiʼ.

6, 7. ¿Baʼaxten unaj u naʼatik máak bix u yuʼubikuba u núup maʼatech u meyajtik Jéeoba? Tʼaanen tiʼ junpʼéel baʼax uchaʼan.

⁶ Unaj k-naʼatik bix u yuʼubikubaʼob. Pauline, le t-chʼaʼchiʼitaj tu káajbaloʼ, ku yaʼalik: «Tu káajbaleʼ chéen tiʼ le baʼaxoʼob ku yaʼalik le Biblia taak in tsikbal yéetel in wíichamoʼ. Maʼatech k-tsikbal tiʼ yaanal baʼal». Baʼaleʼ Wayneeʼ maʼ yaʼab baʼax u yojel tiʼ le Bibliaoʼ, le  oʼolal maʼatech u jach naʼatik le baʼax ku tsoliktiʼoʼ. Ku yilkeʼ Paulineeʼ chéen tiʼ u religión ku tuukul. Le oʼolal sajakchaj ka joʼopʼ u tuklik tsʼoʼok u yoksikuba u yatan tiʼ junpʼéel religión maʼ maʼalobiʼ yéetel chéen táan u tuʼusul.

⁷ Paulineeʼ ku yaʼalikeʼ tu tsʼáaj cuenta maas ku máansik tiempo yéetel le sukuʼunoʼob de tardeoʼ bey xan tu jóokʼbal semana kéen xiʼik muchʼtáambal, kéen jóokʼok kʼaʼaytaj bey xan uláakʼ súutukiloʼob. Letiʼeʼ ku yaʼalik: «Yaan kʼiineʼ kéen kʼuchuk Wayne t-otocheʼ maʼ kulaʼan mix máakiʼ, le oʼolal ku yuʼubikuba chéen tu juunal». Letiʼeʼ jach ku tuklik u yatan bey xan u chan hijo. Maʼ u kʼaj óol le máaxoʼob yéetel táan u biskubaʼoboʼ, kʼuch tak u tukleʼ Paulineeʼ maas maʼalob u yilik u yantal tu yéeteloʼob. Le oʼolal tu yaʼalajtiʼ u kʼáat ka u divorciartubaʼob. ¿Máasaʼ le kiikoʼ unaj u naʼatik kaʼach bix u yuʼubikuba u yíicham?

8. Jeʼex u yaʼalik U yáax tsʼíib Pedro 3:1 yéetel 2, ¿baʼax maas ku beetaʼal u cuentail tumen k-láakʼtsiloʼob?

⁸ Baʼaxoʼob k-beetik. K-láakʼtsiloʼobeʼ maases ku beetkoʼob u cuentail le baʼaxoʼob k-beetkoʼ, maʼ le baʼaxoʼob k-aʼalikoʼ (xok 1 Pedro 3:1, 2). Ka máan kʼiineʼ Paulineeʼ tu tsʼáaj cuenta maʼ maʼalob baʼax ku beetik kaʼachiʼ. Letiʼeʼ ku yaʼalik: «In wojel Wayneeʼ u yaabiltmoʼon yéetel maʼ u kʼáat ka k-divorciartbaiʼ. Baʼaleʼ le baʼax tu yaʼaloʼ tu beetaj in wilik unaj in beetik tuláakal baʼal jeʼex u yaʼalik Jéeobaoʼ. Tin wileʼ maʼ unaj in sen tʼaaniʼ, baʼaxeʼ kʼaʼabéet in beetik baʼax maʼalob u yile». Bey túunoʼ tu xulaj u sen tsikbaltik tiʼ u yíicham le baʼax ku yaʼalik le Bibliaoʼ, ka joʼopʼ u tsikbaltikoʼob baʼax ku yúuchultiʼob sáamsamal. Wayneeʼ tu yileʼ u yataneʼ maas maʼatech u séeb pʼuʼujul yéetel u hijoeʼ jach ku yuʼubik tʼaan (Pro. 31:18, 27, 28). Ka tu yilaj bix u yáantaʼal le kiik yéetel u hijo tumen le Bibliaoʼ,  joʼopʼ u kʼamik le baʼax ku yaʼalikoʼ (1 Cor. 7:12-14, 16).

9. ¿Baʼaxten maʼ unaj u xuʼulul k-áantik k-láakʼtsiloʼobiʼ?

⁹ Maʼ u xuʼulul k-áantkoʼob. Jéeobaeʼ ku yeʼesik bix unaj k-beetik. Letiʼeʼ yaʼab u téenel ku tsʼáaik u páajtalil tiʼ le máakoʼob u yuʼubikoʼob le maʼalob péektsil utiaʼal u kʼamkoʼob le kuxtal minaʼan u xuuloʼ (Jer. 44:4). Apóstol Pablo xaneʼ tu yaʼalaj tiʼ Timoteo maʼ u xuʼulul u yáantik u maasil, tumen beyoʼ yaan u salvartikuba letiʼ bey xan le máaxoʼob chʼenxikintikoʼ (1 Tim. 4:16). Tumen k-yaabiltmaj k-láakʼtsiloʼobeʼ k-kʼáat ka u kʼaj óoltoʼob le baʼaxoʼob ku kaʼansik le Bibliaoʼ. Jeʼex Paulineeʼ, le baʼaxoʼob tu yaʼalaj yéetel tu beetoʼ jach tu yáantaj u yíicham. Bejlaʼeʼ kiʼimak u yóol, tumen ku múul meyajtik Jéeoba yéetel u yíicham, tu kaʼatúulaloʼob precursoroʼob yéetel Wayneeʼ táan u beetik u ancianoil.

10. ¿Baʼaxten unaj u chúukpajal k-óol k-áant k-láakʼtsiloʼob?

¹⁰ Unaj u chúukpajal k-óol. Ka joʼopʼ k-meyajtik Dioseʼ, maʼ xaaneʼ k-láakʼtsiloʼobeʼ talamchaj u suuktal tiʼob le baʼaxoʼob k-creertik yéetel le baʼaxoʼob k-beetkoʼ. Le yáax baʼax tu yiloʼoboʼ letiʼe úuchik u xuʼulul k-táakpajal teʼ kʼiinbesajoʼob suuk k-beetik kaʼach tu yéeteloʼoboʼ bey xan tiʼ política. Maʼ xaaneʼ tu káajbaleʼ kʼuuxilnajoʼob t-éetel (Mat. 10:35, 36). Baʼaleʼ maʼ unaj k-tuklik wa maʼ ken u kʼex u tuukuloʼobiʼ. Wa ku xuʼulul k-áantkoʼob u naʼatoʼob le baʼaxoʼob k-creertikoʼ, u jaajileʼ táan k-aʼalik maʼ tu náajaltikoʼob u kuxtaloʼob utiaʼal minaʼan u xuul. Baʼaleʼ Jéeobaeʼ u tsʼaamaj Jesús utiaʼal u juzgart le máakoʼoboʼ, maʼ toʼoniʼ (Juan 5:22). Wa ku chúukpajal k-óoleʼ, maʼ xaaneʼ kéen máanak kʼiineʼ, k-láakʼtsiloʼobeʼ jeʼel u kʼamkoʼob le maʼalob péektsiloʼ (ilawil le cuadro « Meyajnaktoʼon le sitio yaantoʼon ich Internetoʼ»).

11-13. ¿Baʼax k-kanik tiʼ le bix úuchik u yáantik Alice u taataʼoboʼ?

¹¹ K-tratartikoʼob maʼalob, baʼaleʼ maʼ unaj k-chaʼik u kʼexkoʼob k-tuukuliʼ (Pro. 15:2). Koʼoneʼex ilik baʼax úuch tiʼ Alice. Letiʼeʼ maʼ yiknal u taataʼob kajaʼan ka tu kʼaj óoltaj le baʼax ku yaʼalik le Bibliaoʼ, letiʼobeʼ maʼatech u creertikoʼob Dios yéetel jach u yoksmubaʼob tiʼ política. Aliceeʼ tu tsʼáaj cuentaeʼ unaj u tsikbaltik tiʼ u taataʼob le baʼax ku kanik teʼ Bibliaoʼ. Ku yaʼalik: «Wa maʼ ta séeb tsikbaltiktiʼob baʼaxoʼob túumbentak ka creertikeʼ yaan u maas kʼuuxiloʼob ta wéetel». Le oʼolal joʼopʼ u túuxtik cartaʼob tiʼ u taataʼob tuʼux ku kʼáatiktiʼob baʼax ku tuklikoʼob yoʼolal jujunpʼéel baʼax ku kaʼansik le Biblia, jeʼex le yaabilajoʼ (1 Cor. 13:1-13). Ku tsʼáaik u diosboʼotikil tiʼob úuchik u tsʼáaikoʼob baʼaxoʼob kʼaʼabéettiʼ, tsʼoʼoleʼ ku manik baʼaloʼob u síi tiʼob. Kéen xiʼik u xíimbaltoʼobeʼ ku yilik u yáantik u maama yéetel le meyajoʼob ku beetik ichil u yotochoʼ. Baʼaleʼ ka tu tsikbaltaj tiʼ u taataʼob baʼaxoʼob ku creertikeʼ, maʼ jáan kʼaʼam tiʼiʼ.

¹² Le tiaʼan tu yotoch u taataʼoboʼ ku xokik le Biblia sáamsamaloʼ. Aliceeʼ ku yaʼalik: «Leloʼ tu yáantaj in maama u yil jach kʼaʼanaʼan in wilik le baʼax ku yaʼalik le Bibliaoʼ». U papá xaneʼ káaj u xokik le Biblia utiaʼal u yilik baʼaxten tsʼoʼok u kʼexpajal u hija yéetel utiaʼal u kaxtik baʼax maʼ maʼalob ichiliʼ. Aliceeʼ ku yaʼalik: «Tin tsʼáaj junpʼéel Biblia tiʼ yéetel tsʼíibnajen ichil utiaʼal in waʼaliktiʼ u tiaʼal». ¿Baʼax túun úuchi? Maʼ páajchaj u kaxtaʼal mix baʼal maʼ maʼalob ichil le Biblia tumen u taataoʼ, baʼaxeʼ utschaj tu yich le baʼax ku yaʼalikoʼ.

¹³ Unaj k-eʼesik utsil, baʼaleʼ maʼ unaj k-chaʼik u kʼeʼexel k-tuukul kex ka k-aktáant talamiloʼobiʼ (1 Cor. 4:12b). Aliceeʼ pʼektaʼab tumen u maama. Letiʼeʼ ku yaʼalik: «Ka okjaʼanajeneʼ in maamaeʼ tu yaʼaleʼ jach kʼasaʼanen». ¿Baʼax túun  tu beetaj Alice? Letiʼeʼ ku yaʼalik: «Maʼ chéen tin wuʼuyaj baʼax tu yaʼaliʼ, baʼaxeʼ tin waʼalajtiʼ tsʼoʼok in chʼaʼtuklik in meyajtik Jéeoba yéetel maʼ ken in pʼate. Tin waʼalaj xan tiʼeʼ jach in yaabiltmaj. Okʼolnajoʼon tu kaʼatúulaloʼon, tsʼoʼoleʼ tin beetaj junpʼéel kiʼikiʼ janal utiaʼal k-jaante. Desde teʼ kʼiin jeʼeloʼ in maamaeʼ tu tsʼáaj cuentaeʼ tsʼoʼok in wáantaʼal tumen le Biblia utiaʼal in weʼesik jatsʼuts modosoʼ».

14. ¿Baʼaxten maʼ unaj k-chaʼik u kʼeʼexel k-tuukul tumen k-láakʼtsiloʼobiʼ?

¹⁴ Maʼ xaaneʼ k-láakʼtsiloʼobeʼ maʼ tu séeb naʼatkoʼob baʼaxten jach k-tsʼáaik k-óol k-meyajt Jéeoba. Jeʼex le ka tu chʼaʼtuklaj Alice u pʼatik u meyaj utiaʼal u beetik u precursorailoʼ, joʼopʼ u yokʼol u maama tu kaʼatéen. Baʼaleʼ Aliceeʼ maʼ tu kʼexaj le baʼax u chʼaʼtukultmaj u beetkoʼ. Letiʼeʼ ku yaʼalik: «Wa ka chaʼik u kʼeʼexel a tuukul tumen a láakʼtsiloʼobeʼ maʼ kun xuʼulul u beetkoʼob. Baʼaleʼ wa ka tsoliktiʼob yéetel yaabilaj baʼax ka tuklikeʼ, maʼ xaaneʼ jeʼel u yuʼubikoʼob baʼax ka waʼalikeʼ». Lelaʼ bey úuchik tiʼoʼ. Bejlaʼeʼ u papá yéetel u maamaeʼ táan u beetik u precursoriloʼob, tsʼoʼoleʼ u papaeʼ táan u beetik u ancianoil.

15. Jeʼex u yaʼalik Mateo 5:14 tak 16 yéetel U yáax tsʼíib Pedro 2:12, ¿bix jeʼel u yáantaʼal k-láakʼtsiloʼob tumen «le maʼalob baʼaloʼob» ku beetik le sukuʼunoʼoboʼ?

¹⁵ Jéeobaeʼ ku meyajtiʼ «le maʼalob baʼaloʼob» ku beetik le máaxoʼob meyajtik utiaʼal u natsʼik uláakʼ máakoʼob tu yiknaloʼ (xok Mateo 5:14-16; 1 Pedro 2:12). Wa a núup maʼ tu meyajtik Jéeobaeʼ, ¿u kʼaj óol wa le sukuʼunoʼob teʼ múuchʼuliloʼ? Pauline, le kiik t-chʼaʼchiʼitaj tu káajbal le xookaʼ, ku invitartik le sukuʼunoʼob tu yotoch utiaʼal ka kʼaj óoltaʼakoʼob tumen  Wayne, u yíichamoʼ. Letiʼeʼ áantaʼab tumen juntúul sukuʼun utiaʼal ka xuʼuluk u pʼektik u maasil. Ku yaʼalik: «Tu kʼáataj vacaciones utiaʼal u taal u chaʼant junpʼéel partido tin wéetel. Leloʼ tu yáanten in wileʼ letiʼeʼ ku kuxtal jeʼex u maasil máakoʼobeʼ».

16. ¿Baʼaxten unaj k-invitartik k-láakʼtsiloʼob teʼ muchʼtáambaloʼoboʼ?

¹⁶ Junpʼéel bix jeʼel k-áantik k-láakʼtsiloʼobeʼ letiʼe kéen k-invitartoʼob utiaʼal ka xiʼikoʼob muchʼtáambal t-éeteloʼ (1 Cor. 14:24, 25). Le yáax tuʼux bin Wayneoʼ letiʼe Kʼaʼajsajiloʼ, tumen tsʼoʼok u suut tu meyaj, tsʼoʼoleʼ le muchʼtáambal jeʼeloʼ maas maʼatech u xáantal. Letiʼeʼ ku yaʼalik: «Maʼ tin naʼataj tuláakal le baʼax tsoʼoloʼ, baʼaleʼ maʼ tuʼubten bix úuchik in tratartaʼal tumen le sukuʼunoʼoboʼ. Letiʼobeʼ náatsʼoʼob u saludartenoʼob. Tin wilaj jach utsoʼob». Juntúul sukuʼun yéetel u yataneʼ ku méekʼikoʼob u chan hijo Pauline teʼ muchʼtáambaloʼ bey xan kéen jóokʼok kʼaʼaytaj. Le oʼolaleʼ ka tu chʼaʼtuklaj Wayne u kanik le baʼaxoʼob ku creertik Paulineeʼ, tu kʼáataj tiʼ le sukuʼun ka xooknak tu yéeteloʼ.

17. ¿Baʼax maʼ unaj k-tuklikiʼ, baʼaleʼ baʼaxten maʼ unaj u xuʼulul k-áantik k-láakʼtsiloʼobiʼ?

¹⁷ Tuláakloʼon k-tsʼíiboltik ka meyajtaʼak Jéeoba tumen k-láakʼtsiloʼob. Baʼaleʼ u jaajileʼ kex ka k-beet tuláakal le ku páajtal utiaʼal k-áantkoʼobeʼ, maʼ xaaneʼ maʼ ken u meyajtoʼob. Chéen baʼaleʼ maʼ unaj k-tuklik wa tiʼ toʼon yaan u culpailiʼ, tumen maʼ tu páajtal k-obligartik mix máak u kʼam le baʼax k-creertikoʼ. Kex beyoʼ maʼ unaj u tuʼubultoʼoneʼ wa ku chúukpajal k-óol k-meyajt Jéeoba yéetel kiʼimak óolaleʼ, maʼ xaaneʼ jeʼel u kʼexik u tuukuloʼobeʼ. Le oʼolal unaj k-orar tu yoʼolaloʼob, unaj k-tsikbaltiktiʼob yéetel tsiikil le maʼalob péektsiloʼ yéetel maʼ unaj u xuʼulul k-áantkoʼobiʼ (Bax. 20:20). Toʼoneʼ jach k-creertik Jéeobaeʼ yaan u bendecirtik le baʼaxoʼob k-beetik utiaʼal k-áantkoʼoboʼ. Wa k-chʼenxikintaʼal tumen k-láakʼtsiloʼobeʼ yaan u salvartikubaʼob.