LE FEJOʼ jach yaan u páajtalil. Kex taak k-náachkuntaʼal tiʼ Dios tumen Satanaseʼ le fejoʼ ku yáantkoʼon k-tup «tuláakal u tʼabaʼan flechaʼob le j-Kʼasaʼanoʼ» (Efe. 6:16). Tsʼoʼoleʼ le fejoʼ ku yáantkoʼon utiaʼal k-aktáantik talamiloʼob jach nuuktak jeʼex le witsoʼoboʼ. Jesuseʼ tu yaʼalaj tiʼ u disipuloʼob: «Wa a fejeʼex bukaʼaj jeʼex junpʼéel u neekʼ mostazaeʼ jeʼel u páajtal a waʼalikeʼex tiʼ le puʼukaʼ: ‹Lukʼkech teʼelaʼ ka xiʼikech teʼeloʼ›, le puʼuk túunoʼ yaan u beetik» (Mat. 17:20). Tumen jach jeʼel k-áantaʼal tumen le fejoʼ maʼalob ka tuukulnakoʼon tiʼ le kʼáatchiʼobaʼ: ¿Baʼax le fejoʼ? ¿Baʼax jeʼel u yáantkoʼon utiaʼal k-eʼesik k-fejeʼ? ¿Bix jeʼel k-maas muʼukʼaʼankúuntikeʼ? ¿Tiʼ máax unaj k-tsʼáaik k-fe? (Rom. 4:3).

Le fejoʼ maʼ chéen u kʼáat u yaʼal u creertik máak le baʼax ku yaʼalik le Bibliaoʼ, tumen tak le demonioʼob ku creertikoʼob yaan Diosoʼ yéetel ku kikilankiloʼob tu táan (Sant. 2:19). ¿Baʼax túun le fejoʼ?

Kéen tsoʼolok teʼ Biblia baʼax le fejoʼ ku yaʼalikeʼ táakaʼan kaʼapʼéel baʼal ichil. Yáaxeʼ, ku yaʼalikeʼ «fejeʼ letiʼ u kʼubik u yóol máak u páaʼt junpʼéel baʼal jach u yojel yaan u yúuchul» (Heb. 11:1a). Wa yaan k-fejeʼ k-jach creertik tuláakal baʼax ku yaʼalik Jéeobaeʼ jaaj yéetel yaan u béeytal. Dioseʼ tu yaʼalaj tiʼ le israelitaʼoboʼ: «Maʼ tu páajtal u pʼáatal maʼ u béeychajal le núuptʼaan in beetmaj yéetel le kʼiin bey xan yéetel le áakʼaboʼ, le oʼolaleʼ maʼ tu páajtal u pʼáatal maʼ [u] kʼuchul le kʼiinoʼ mix le áakʼab jach tu jaʼabil[oʼ]. Le núuptʼaan in beetmaj yéetel in palitsil David[oʼ], maʼ tu páajtal maʼ u béeychajal» (Jer. 33:20, 21). ¿Yaan wa kʼiin k-tuklik maʼ kun jóokʼol le Kʼiin wa maʼ kun tʼúubul, ka pʼáatak maʼ u yáakʼabtal yéetel maʼ u sáastaloʼ? Wa maʼatech k-tuklik jeʼel u xuʼulul u suut le Luʼum tu baʼpach le Kʼiinoʼ, ¿unaj wa k-tuklik maʼ kun béeytal le baʼaxoʼob ku yaʼalik le Máax beetmil le baʼaloʼobaʼ? Maʼatech (Isa. 55:10, 11; Mat. 5:18).

U kaʼapʼéeleʼ, fejeʼ u kʼáat u yaʼal «u yeʼesaʼal jach jaaj junpʼéel baʼal kex maʼ tu páajtal u yilaʼal» (Heb. 11:1b). Koʼox tuklikeʼ juntúul chan paaleʼ ku kʼáatiktoʼon baʼaxten k-creertik yaan le iikʼoʼ. Kex mix juntéen k-il le iikʼoʼ maʼ talam jeʼel k-tsoliktiʼ baʼaxoʼob eʼesik jach tu jaajil yaneʼ, jeʼex u chʼaʼik u yiikʼ máakoʼ yéetel k-uʼuyik u saltikoʼon. Kéen u yil le chan paal jach jaaj lelaʼ ku joʼopʼol u creertik junpʼéel baʼal kex maʼatech u yilik. Bey túun xanoʼ le fejoʼ ku yáantkoʼon k-il jach jaaj junpʼéel baʼal kex maʼ tu yilaʼal (Rom. 1:20).

Tumen le fe ku yantal kéen u yil máak jach jaaj junpʼéel baʼaloʼ, unaj k-chúukaʼan kʼaj óoltik le jaaj utiaʼal u yantaltoʼonoʼ (1 Tim. 2:4). Baʼaleʼ yaan uláakʼ baʼax unaj k-beetik. Apóstol Pabloeʼ tu yaʼaleʼ «yéetel u puksiʼikʼal máakeʼ ku yeʼesik yaan u fe» (Rom. 10:10). Maʼ chéen unaj k-creertik u jaajiliʼ, baʼaxeʼ jach unaj k-ilik koʼoj u tojol. Beyoʼ yaan k-eʼesik fe, lelaʼ u kʼáat u yaʼaleʼ  yaan k-kuxtal jeʼex uts tu tʼaan Dioseʼ (Sant. 2:20). Juntúul máax maʼ u yaabiltmaj le u jaajiloʼ, maʼ tu creertik kex yaan baʼaxoʼob eʼesik jach jaaj wa ku kaxtik chéen baʼaxoʼob u yaʼal utiaʼal u beetik chéen baʼax u kʼáat (2 Ped. 3:3, 4; Jud. 18). Yoʼolal lelaʼ, maʼ tuláakal le máaxoʼob il le milagroʼob beetaʼab úuchjeakil anchaj u fejoʼoboʼ (Núm. 14:11; Juan 12:37). U kiliʼich muukʼ Dioseʼ ku beetik u yantal u fe chéen le máaxoʼob yaabiltik u jaajiloʼ yéetel ku pʼektikoʼob le tuusoʼ (Gal. 5:22; 2 Tes. 2:10, 11).

Rey Davideʼ juntúul tiʼ le máaxoʼob meyajt Dios úuchjeakil jach muʼukʼaʼan u fejoʼ (Heb. 11:32, 33). Baʼaleʼ maʼ tuláakal u láakʼtsiloʼob anchaj u fejoʼobiʼ. Jeʼex Eliab, u sukuʼuneʼ, tu yeʼesaj minaʼan u fe tumen tu kʼeyaj David le ka tu kʼáataj baʼax kun tsʼaabil tiʼ le máax kun kíimsik Goliatoʼ (1 Sam. 17:26-28). Mix máak ku síijil yéetel fe, tsʼoʼoleʼ mix juntúul taatatsil jeʼel u máansik tiʼ u paalaloʼobeʼ. Bey túunoʼ Davideʼ anchaj u fe, tumen jach maʼalob úuchik u biskuba yéetel Dios.

Le Salmo 27, ku yaʼalik baʼax áant David utiaʼal u muʼukʼaʼantal u fe (versículo 1). Letiʼeʼ tuukulnaj tiʼ le baʼaxoʼob úuch ichil u kuxtaloʼ yéetel bix kanáantaʼabik tumen Jéeoba tiʼ le máaxoʼob pʼekmiloʼ (versículo 2 yéetel 3). Jach uts tu tʼaan u bin teʼ tabernáculo (versículo 4) utiaʼal u adorartik Jéeoba yéetel u maasil israelitaʼoboʼ (versículo 6). Orarnaj mantatsʼ tiʼ Jéeoba utiaʼal u kʼáatik u yáantaj (versículo 7 yéetel 8). Tu kʼáataj xan tiʼ Jéeoba ka kaʼansaʼak u beet baʼax maʼalob (versículo 11). Letiʼeʼ jach kʼaʼanaʼan u yilik le fejoʼ, le oʼolal tu kʼáataj tuʼux jeʼel u yantal wa maʼ u yantal kaʼach u fejeʼ (versículo 13).

Wa k-beetik le baʼaxoʼob ku yaʼalik le Salmo 27, jeʼel u yantaltoʼon junpʼéel fe jeʼex le anchaj tiʼ Davidoʼ. Le fejoʼ ku yantal yoʼolal le baʼaxoʼob k-kanikoʼ, le oʼolaleʼ wa mantatsʼ k-xakʼalxoktik le Biblia yéetel u maasil publicacionoʼoboʼ maas maʼ kun talamtaltoʼon k-eʼesik fe (Sal. 1:2, 3). Kéen xakʼalxooknakoʼoneʼ unaj k-jóoʼsik u súutukil utiaʼal k-tuukul tiʼ le baʼax k-xokikoʼ, beyoʼ yaan k-maas yaabiltik Jéeoba. Wa k-yaabiltmaj Jéeobaeʼ yaan k-ilik k-eʼesik k-fe kéen k-adorart teʼ muchʼtáambaloʼoboʼ bey xan kéen k-kʼaʼayt tiʼ u maasil le jatsʼuts baʼaloʼob ku taal u kʼiinil u yúuchloʼ (Heb. 10:23-25). K-eʼesik xan fe kéen orarnakoʼon yéetel kéen chúukpajak k-óol k-aktáant le talamiloʼoboʼ (Luc. 18:1-8). Bey túunoʼ unaj k-orar mantatsʼ tiʼ Jéeoba, tumen k-ojel letiʼeʼ jach u tsʼaamaj u yóol u yáantoʼon (1 Tes. 5:17; 1 Ped. 5:7). Le fejoʼ ku péeksikoʼon k-beet baʼax maʼalob, tsʼoʼoleʼ kéen k-beet baʼaloʼob maʼalobtakeʼ ku muʼukʼaʼantal (Sant. 2:22).

Le áakʼab táanil tiʼ u kíimiloʼ, Jesuseʼ tu yaʼalaj tiʼ u disipuloʼob: «Tsʼáa a fejeʼex tiʼ Dios yéetel  tsʼáa a fejeʼex xan tiʼ teen» (Juan 14:1). Jeʼex k-ilkoʼ unaj k-tsʼáaik k-fe tiʼ Jesús, maʼ chéen tiʼ Jéeobaiʼ. ¿Bix jeʼel k-beetkeʼ? Koʼoneʼex ilik óoxpʼéel bixi.

Yáaxeʼ, unaj k-ilik le u kuxtal Cristo tu kʼuboʼ bey junpʼéel siibal ku tsʼáaik Dios tiʼ toʼoneʼ. Apóstol Pabloeʼ tu yaʼalaj: «Le kuxtal yaanten beoraaʼ letiʼe yaanten yoʼolal le fe in tsʼaamaj tiʼ u Paal Diosoʼ, máax tu yaabilten yéetel tu kʼubaj u kuxtal tin woʼolal» (Gal. 2:20). Kéen k-tsʼáa k-fe tiʼ Jesuseʼ, k-ilkeʼ tu kʼubaj u kuxtal t-oʼolal, letiʼe baʼax ku meyaj tiʼ Jéeoba utiaʼal u perdonartik k-kʼebanoʼob, ku tsʼáaiktoʼon u páajtalil u yantaltoʼon kuxtal minaʼan u xuul yéetel ku yeʼesik jach yaabiltaʼanoʼon tumen Dios (Rom. 8:32, 38, 39; Efe. 1:7). K-ojéeltik lelaʼ jach ku líiʼsik k-óol (2 Tes. 2:16, 17).

U kaʼapʼéeleʼ, unaj k-orar tiʼ Jéeoba tu kʼaabaʼ Jesús. Yoʼolal u kuxtal tu kʼuboʼ ku páajtal k-orar tiʼ Jéeoba «utiaʼal ka u chʼaʼtoʼon óotsilil yéetel utiaʼal ka u yeʼestoʼon u nojoch utsil ken u yáantoʼon jach teʼ kʼiin kʼaʼabéettoʼonoʼ» (Heb. 4:15, 16; 10:19-22). Le oracionoʼ ku yáantkoʼon utiaʼal k-chʼaʼtuklik maʼ k-lúubul tiʼ kʼeban (Luc. 22:40).

U yóoxpʼéeleʼ, unaj k-uʼuyik u tʼaan Jesús. Apóstol Juaneʼ tu yaʼalaj: «Le máax ku tsʼáaik u fe tiʼ le Paaloʼ yaan u yantal kuxtal minaʼan u xuul tiʼ, le máax maʼ tu yuʼubik u tʼaan le Paaloʼ maʼ ken u yil le kuxtaloʼ, baʼaxeʼ u pʼujaʼanil Dios kun pʼáatal tu yóokʼol» (Juan 3:36). Teʼ tekstoaʼ Juaneʼ tu yaʼaleʼ utiaʼal u yeʼesik u fe máakeʼ unaj u yuʼubik tʼaan. Bey túunoʼ k-eʼesik yaan k-fe tiʼ Jesús kéen k-beet le baʼaxoʼob ku yaʼalikoʼ. Tsʼoʼoleʼ k-tsʼoʼokbesik «u ley Cristo» kéen k-beet tuláakal le baʼax tu kaʼansoʼ (Gal. 6:2). K-uʼuyik xan u tʼaan kéen k-beet le baʼaxoʼob ku yaʼalik le «palitsil chúukaʼan u yóol yéetel yaan u naʼat[oʼ]» (Mat. 24:45). Wa k-beetik le baʼaxoʼob ku yaʼaliktoʼon Jesusoʼ yaan u chúukpajal k-óol k-aktáant le talamiloʼoboʼ (Mat. 7:24, 25).

Juntéenjeakeʼ juntúul máakeʼ tu yaʼalaj tiʼ Jesús: «¡Yaan in fe! ¡Áanten tuʼux ku bineltikten fe!» (Mar. 9:24). Le máakaʼ yaan kaʼach u fe, baʼaleʼ tu yeʼesaj kabal óolal yéetel tu yaʼalaj kʼaʼabéet u maas muʼukʼaʼankúuntik. Jeʼex letiʼeʼ toʼon xaneʼ yaan k-aktáantik wa baʼax talamil tuʼux kun kʼaʼabéettal k-maas muʼukʼaʼankúuntik k-fe. Tuláakloʼon jeʼel u páajtal k-muʼukʼaʼankúuntik desde bejlaʼeʼ. Jeʼex tsʼoʼok k-ilkoʼ k-beetik kéen k-xakʼalxokt u Tʼaan Dios yéetel kéen tuukulnakoʼon tiʼ le baʼax ku yaʼalikoʼ, lelaʼ yaan u beetik k-maas yaabiltik Jéeoba. K-fejeʼ ku muʼukʼaʼantal xan kéen k-adorart Jéeoba junmúuchʼ yéetel le sukuʼunoʼoboʼ, kéen k-kʼaʼayt tiʼ u maasil le jatsʼuts baʼaloʼob ku taal u kʼiinil u yúuchloʼ yéetel kéen orarnakoʼon mantatsʼ. Wa k-beetkeʼ yaan u muʼukʼaʼantal k-fe yéetel yaan k-pʼáatal tiʼ u yaabilaj Dios (Jud. 20, 21).