1-3. 1) Aʼal junpʼéel tiʼ le baʼaloʼob maas kʼaʼanaʼan k-creertikoʼ. 2) ¿Baʼaxten jach kʼaʼanaʼan? (Ilawil le dibujo yaan tu káajbal le xookaʼ.)

WA KA kʼáataʼaktech máakalmáak le baʼaloʼob maas kʼaʼanaʼantak ka creertikoʼ, ¿baʼax jeʼel a núukikeʼ? Maʼ xaaneʼ yaan a waʼalikeʼ Jéeoba beetmil tuláakal baʼal yéetel letiʼ tsʼáaiktoʼon kuxtal. Yaan a waʼalik xaneʼ ka creertik kíim Jesucristo utiaʼal u boʼotik k-kʼebanoʼob. Jeʼel tak a waʼalikeʼ yaan u kʼuchul u kʼiinil k-kuxtal minaʼan u xuul teʼ Paraísooʼ. Chéen baʼaleʼ, ¿yaan wa a waʼalik ka creertik le kaʼa kuxtaloʼ?

² Kex k-creertik yaan k-salvartikba ken tsʼoʼokok le nojoch muʼyajil yéetel yaan k-kuxtal minaʼan u xuul way Luʼumeʼ, yaan baʼax oʼolal k-táakbesik le kaʼa kuxtal ichil le baʼaloʼob maas kʼaʼanaʼantak k-creertikoʼ. Apóstol Pabloeʼ, utiaʼal u yeʼesik jach kʼaʼanaʼan le kaʼansajaʼ, tu yaʼalaj: «Wa maʼ kun kaʼa kuxkíintbil le kimenoʼoboʼ, mix Cristo túun kaʼa kuxkíintaʼak». Wa maʼ kaʼa kuxkíintaʼak Jesucristoeʼ, u kʼáat u yaʼaleʼ maʼ táan u gobernariʼ yéetel chéen kunel le baʼaxoʼob k-kaʼansik yoʼolal u gobiernooʼ (xok 1 Corintoiloʼob 15:12-19). Baʼaleʼ maʼ beyiʼ, tumen k-ojel kaʼa kuxkíintaʼabi. Maʼ beyoʼon jeʼex le saduceoʼob, u nuuktakil le judíoʼoboʼ, letiʼobeʼ ku yaʼalikoʼobeʼ  maʼ tu páajtal u kaʼa kuxtal le kimenoʼoboʼ. Baʼaleʼ toʼoneʼ kex ka cheʼejtakoʼoneʼ k-defendertik le kaʼansajaʼ (Mar. 12:18; Bax. 4:2, 3; 17:32; 23:6-8).

³ Pabloeʼ tu tsʼíibteʼ «u kaʼa kuxkíintaʼal le kimenoʼoboʼ» táakaʼan ichil «le yáax baʼaloʼob yaan yil yéetel Cristo» unaj u kanik máakoʼ (Heb. 6:1, 2). Lelaʼ ku yeʼesik jach tu creertaj le kaʼa kuxtaloʼ (Bax. 24:10, 15, 24, 25). Baʼaleʼ le úuchik u yaʼalik letiʼe «yáax baʼaloʼob» ku kanik máak yoʼolal le «kiliʼich baʼaloʼob u yaʼalmaj Diosoʼ», maʼ tu yóotaj u yaʼal wa chéen bey jeʼel baʼaxak kaʼansajileʼ (Heb. 5:12). ¿Baʼaxten?

4. ¿Baʼax kʼáatchiʼiloʼob jeʼel u beetaʼaltoʼon yoʼolal le kaʼa kuxtaloʼ?

⁴ Ka káaj u tsʼaʼabaltoʼon xook yéetel le Bibliaoʼ, t-kanaj bix úuchik u kaʼa kuxkíintaʼal Lázaro yéetel uláakʼ máakoʼob úuchjeakil. T-kanaj xaneʼ Abrahán, Job yéetel Danieleʼ jach tu creertoʼob yaan u kʼuchul u kʼiinil u kaʼa kuxkíintaʼal le kimenoʼoboʼ. Chéen baʼaleʼ, ¿láayliʼ wa yaan u béeytal le kaʼa kuxtal kex tsʼoʼok u máan yaʼab años aʼalaʼakoʼ? ¿Jach wa tu jaajil ku yaʼalik le Biblia baʼax kʼiin ken béeychajkoʼ? Koʼoneʼex ilik baʼax ku yaʼalik le Bibliaoʼ.

5. ¿Baʼax tiʼ ken k-yáax tʼaan teʼ xookaʼ?

⁵ Maʼ xaaneʼ maʼ tu talamtal k-creertik jeʼel u kaʼa kuxtal juntúul máax maʼ úuch kíimkeʼeʼ (Juan 11:11; Bax. 20:9, 10). Chéen baʼaleʼ, ¿kux túun wa ka aʼalaʼaktoʼon yaan u kaʼa kuxkíintaʼal juntúul máak, baʼaleʼ tak ken máanak yaʼab años? ¿Jeʼel wa k-creertik u yúuchul kex úuch kíimik le máakoʼ? U jaajileʼ tuláakloʼon k-creertik tsʼoʼok u yúuchul junpʼéel baʼal beyoʼ. ¿Máax tiʼ úuchi? Le baʼax úuchoʼ, ¿bix jeʼel u yáantkoʼon k-creert le kaʼa kuxtal kun antaloʼ?

6. ¿Bix béeychajik tiʼ Jesús le Salmo 118?

⁶ Le Salmo 118, ku tuklaʼal tsʼíibtaʼab tumen Davidoʼ, ku tʼaan tiʼ le kaʼa kuxtal jeʼeloʼ. Ku yaʼalik: «Yuumtsil, beettoʼon uts. [¡Salvartoʼoniʼ!] [...] ¡Kiʼikiʼtʼantbil le máax ku taal tu kʼaabaʼ Yuumtsiloʼ!». Maʼ xaaneʼ ku kʼaʼajaltoʼoneʼ letiʼe baʼax aʼalaʼab le ka ook Jesús tu kaajil Jerusalén tu kʼiinil 9 tiʼ nisán, le maʼ yaʼab u bin u kíimsaʼaloʼ (Sal. 118:25, 26; Mat. 21:7-9). Baʼaleʼ le salmoaʼ, ¿táan wa u tʼaan tiʼ juntúul máak yaan u kaʼa kuxkíintaʼal ken máanak yaʼab años? Le salmoaʼ ku yaʼalik xan: «Le tuunich pʼektaʼab tumen le j-pakʼbaloʼoboʼ kʼuch u beet u noj tuunichil le chuunpakʼoʼ» (Sal. 118:22).

7. ¿Baʼax beetaʼab tiʼ Jesús tumen le judíoʼoboʼ?

⁷ «Le j-pakʼbaloʼob», wa le máaxoʼob beetik le najoʼ, letiʼe u nuuktakil le judíoʼoboʼ. Letiʼobeʼ maʼ tu kʼamoʼob Jesús bey Mesíasileʼ. Tu kúulpachkuntoʼob yéetel tu yaʼaloʼob ka kíimsaʼak (Luc. 23:18-23). Le oʼolal jeʼel u páajtal u yaʼalaʼal letiʼob kíims Jesuseʼ.

8. ¿Bix jeʼel u kʼuchul Jesús «u beet u noj tuunichil le chuunpakʼ[oʼ]»?

⁸ Wa pʼektaʼab yéetel kíimsaʼab Jesuseʼ, ¿bix túun jeʼel u kʼuchul «u beet u noj tuunichil le chuunpakʼoʼ»? Chéen jeʼel u béeytal wa ku kaʼa kuxkíintaʼaleʼ. Bey tu yaʼalil Jesús tu tsikbalil juntúul máak tu túuxtaj u palitsiloʼob yiknal le máaxoʼob meyajtik u pakʼal uvaoʼ. Letiʼobeʼ tu jaʼajatsʼoʼob yéetel tu poʼopochʼoʼob le palitsiloʼoboʼ. Bey úuchik xan u maltratartaʼal u profetaʼob Dios tumen le israelitaʼoboʼ. Tu tsʼookeʼ tu túuxtaj u paal, le máax u yaabiltmoʼ, tumen tu tuklaj jeʼel u beetaʼal u cuentaileʼ. Chéen baʼaleʼ tu kíimsoʼob. Ka tsʼoʼok u tsikbaltik Jesús lelaʼ, tu chʼaʼchiʼitaj u profecíail Salmo 118:22 (Luc. 20:9-17). Letiʼe baʼax tu chʼaʼchiʼitaj xan apóstol Pedro ka tʼaanaj tu táan u nuuktakil le judíoʼob, le ancianoʼob yéetel escribaʼob muchʼlajoʼob Jerusalenoʼ. Tu yaʼalajtiʼobeʼ kex tu kíimsoʼob «Jesucristo le Nazaretiloʼ» ka tsʼoʼokeʼ  «kaʼa kuxkíintaʼab tumen Dios». Tu tsʼookeʼ tu yaʼalajtiʼob: «Jesuseʼ letiʼ ‹le tuunich ta taaseʼex bey mix baʼaliloʼ, teʼex máaxeʼex beetik le najoʼ, baʼaleʼ le nojoch tuunichaʼ tsʼoʼok u tsʼaʼabal utiaʼal u chuunpakʼil le najoʼ›» (Bax. 3:15; 4:5-11; 1 Ped. 2:5-7).

9. ¿Baʼax aʼalaʼab tu profecíail Salmo 118:22?

⁹ Jeʼex t-ilaj teʼ Salmo 118:22, aʼalaʼab yaan u yantal junpʼéel kaʼa kuxtal kex tsʼoʼok u máan yaʼab años aʼalaʼak. Le Mesíasoʼ yaan u pʼektaʼal yéetel yaan u kíimsaʼal. Chéen baʼaleʼ yaan u kaʼa kuxkíintaʼal yéetel yaan «u beet[ik] u noj tuunichil le chuunpakʼoʼ». Ka tsʼoʼok u kaʼa kuxkíintaʼal u Hijo Dioseʼ, chéen letiʼ jeʼel u páajtal u salvartikoʼoneʼ, tumen «way Luʼumeʼ maʼ tsʼaʼan uláakʼ kʼaabaʼ ichil le máakoʼob utiaʼal ka páajchajak k-salvartaʼal tu yoʼolaloʼ» (Bax. 4:12; Efe. 1:20).

10. 1) ¿Baʼax profecíail aʼalaʼab teʼ Salmo 16:10? 2) ¿Bix k-ojéeltik maʼ tiʼ David ku tʼaan le salmooʼ?

¹⁰ Koʼoneʼex xakʼaltik uláakʼ teksto tʼaanaj tiʼ junpʼéel kaʼa kuxtal. Lelaʼ tsʼíibtaʼab maas tiʼ mil años táanil tiʼ u yúuchul. K-xakʼaltik lelaʼ jeʼel u yáantkoʼon creert yaan u yantal junpʼéel kaʼa kuxtal kex tsʼoʼok u máan yaʼab años aʼalaʼakeʼ. Le Salmo 16, ku tuklaʼal David xan tsʼíibtoʼ, ku yaʼalik: «Maʼ bíin a pʼaten ichil le muknaloʼ; ¡maʼ bíin a xúumpʼat ichil muksaj, le máax a yaabiltmajoʼ!» (Salmo 16:10). Le tʼaanoʼobaʼ maʼ u kʼáat u yaʼal wa mix bikʼin kun kíimil David wa mix bikʼin kun bin teʼ Seol, le tuʼux yaan le kimenoʼoboʼ. U Tʼaan Dioseʼ jach tʼáalkab u yaʼalik Davideʼ chʼíiji yéetel kíimi, tsʼoʼoleʼ «muʼuk yéetel u [úuchben] chʼiʼibaloʼob tu kaajal» (1 Rey. 2:1, 10). Wa bey úuchik tiʼ Davidoʼ, ¿tiʼ máax túun ku tʼaan le Salmo 16:10?

11. ¿Baʼax kʼiin ka tʼaanaj Pedro tiʼ baʼax ku yaʼalik Salmo 16:10?

¹¹ Maas tiʼ mil años tsʼíibtaʼak tumen Davideʼ, apóstol Pedroeʼ tu chíikbesaj tiʼ máax béeychaji. Chéen wa jaypʼéel semanaʼob kíimik yéetel kaʼa kuxlak Jesuseʼ, Pedroeʼ tʼaanaj tu táan u milesil judíoʼob yéetel máaxoʼob u kʼammaj u religión le judíoʼob utiaʼal u tsolik le baʼax ku yaʼalik Salmo 16:10 (xok Baʼaxoʼob 2:29-32). Letiʼeʼ tu yaʼalaj junpʼéel baʼax jach u yojloʼob: Davideʼ kíimi yéetel muʼuki. Tsʼoʼoleʼ tu yaʼaleʼ Davideʼ «tu yojéeltaj yaan u kaʼa kuxkíintaʼal le Cristooʼ, yéetel tʼaanaj tiʼ leloʼ». Jeʼex u yaʼalik le Bibliaoʼ, mix máak aʼal wa maʼ bey úuchikoʼ.

12. 1) ¿Bix béeychajik Salmo 16:10? 2) ¿Bix u yeʼesik jach yaan u kaʼa kuxtal le kimenoʼob le baʼax ku yaʼalikoʼ?

¹² Utiaʼal u yeʼesik jach jaaj baʼax ku yaʼalikeʼ, Pedroeʼ tu chʼaʼchiʼitaj le baʼax tu yaʼalaj David teʼ Salmo 110:1 (xok Baʼaxoʼob 2:33-36). Le baʼax tu tsolaj jeʼex u yaʼalik le Bibliaoʼ, tu beetaj u creertaʼaleʼ Jesuseʼ ‹Yuumtsil yéetel Cristo›. Tuláakloʼobeʼ tu tsʼáajoʼob cuenta béeychaj le Salmo 16:10 úuchik u kaʼa kuxkíintaʼal Jesusoʼ. Ka máan kʼiineʼ apóstol Pabloeʼ tu tsolaj xan tu táan le judíoʼob yanoʼob tu noj kaajil Antioquía, tiʼ u luʼumil Pisidiaoʼ. Tumen jach jatsʼuts tu yuʼubiloʼob le baʼax kaʼansaʼabtiʼoboʼ, tu kʼáatoʼob ka tsoʼolok u maasil tiʼob (xok Baʼaxoʼob 13:32-37, 42). Le baʼax tu yaʼalaj Pablooʼ unaj xan u yáantkoʼon k-creert le profecíaʼob ku tʼaanoʼob tiʼ le kaʼa kuxtaloʼ jach jaajtak kex úuch aʼalaʼakoʼob.

13. ¿Baʼax jeʼel u tuklaʼal yoʼolal le kaʼa kuxtaloʼ?

¹³ Jach ku líikʼil k-óol k-ojéeltik yaan u kaʼa kuxtal le kimenoʼob kex úuch aʼalaʼakoʼ. Chéen baʼaleʼ yaan máax jeʼel u tuklikeʼ: «¿Bukaʼaj tiempo túun unaj in páaʼtik u kaʼa kuxtal in láakʼtsiloʼob? ¿Baʼax kʼiin u kaʼa kuxtaloʼob?». Kʼaʼajaktoʼoneʼ Jesuseʼ tu yaʼalaj tiʼ u apostoloʼobeʼ yaan baʼaloʼob maʼ u yojloʼobiʼ mix tu páajtal u yojéeltikoʼob teʼ kʼiinoʼob jeʼeloʼ. Yaʼab baʼaloʼob «chéen tiʼ le Taata yaan teʼ kaʼan yaan u páajtalil u yaʼalik  baʼax kʼiin ken úuchkoʼ» (Bax. 1:6, 7; Juan 16:12). Baʼaleʼ leloʼ maʼ u kʼáat u yaʼal wa maʼ tu páajtal k-ojéeltik baʼax kʼiin ken kaʼa kuxlak le kimenoʼoboʼ.

14. ¿Baʼax u jelaʼanil úuchik u kaʼa kuxtal Jesús tiʼ le kaʼa kuxlajoʼob táanil tiʼ letiʼoʼ?

¹⁴ K-tuukul tiʼ le profecíaʼob ku tʼaanoʼob tiʼ le kaʼa kuxtaloʼ jeʼel u yáantkoʼon k-naʼateʼ. Baʼaleʼ unaj k-kʼaʼajsikeʼ le úuchik u kaʼa kuxtal Jesusoʼ jach especial, tumen wa maʼ úuchik u kaʼa kuxtaleʼ mix juntúul tiʼ toʼon jeʼel u páajtal u kaʼa kuxtal u láakʼtsileʼ. Le máaxoʼob kaʼa kuxlajoʼob táanil tiʼ letiʼ, jeʼex le kaʼa kuxkíintaʼaboʼob tumen Elías yéetel Eliseooʼ, maʼ kuxlajoʼob utiaʼal mantatsʼiʼ. Baʼaxeʼ kíimoʼob, muʼukoʼob yéetel suunajoʼob luʼumil. Baʼaleʼ Cristoeʼ ‹tsʼoʼok u líiʼsaʼal ichil le kimenoʼoboʼ›, letiʼeʼ «maʼ tu kaʼa kíimil», tumen «le kíimiloʼ minaʼan páajtalil tiʼ tu yóokʼol». Bejlaʼeʼ tiaʼan teʼ kaʼan «utiaʼal kʼiinoʼob minaʼan u xuu[loʼ]» (Rom. 6:9; Apo. 1:5, 18; Col. 1:18; 1 Ped. 3:18).

15. ¿Baʼaxten ku yaʼalaʼal tiʼ Jesús «yáax máak»?

¹⁵ Jesuseʼ kaʼa kuxlaj bey juntúul ángel teʼ kaʼanoʼ. Letiʼe yáax máak kaʼa kuxlaj beyoʼ, baʼaleʼ yaan uláakʼ máaxoʼob kun kaʼa kuxkíintbiloʼob beyoʼ (Bax. 26:23). Jesuseʼ tu yaʼalaj tiʼ u apostoloʼob yaan u binoʼob teʼ kaʼan utiaʼal u gobernaroʼob tu yéeteloʼ (Luc. 22:28-30). Baʼaleʼ utiaʼal u béeytaleʼ, táanil yaan u kíimloʼob, tsʼoʼoleʼ ku kaʼa kuxkíintaʼaloʼob bey angeloʼob, jeʼex Jesuseʼ. Pabloeʼ bey tu yaʼalil: «Cristoeʼ tsʼoʼok u líiʼsaʼal ichil le kimenoʼoboʼ; Cristoeʼ letiʼe yáax máak kaʼa kuxkíintaʼab ichil le máaxoʼob kimenoʼoboʼ». Tsʼoʼoleʼ ka tu yaʼaleʼ yaan uláakʼ máaxoʼob kun kaʼa kuxkíintbiloʼob utiaʼal u binoʼob kaʼan. Tu yaʼalaj: «Tu tsoolol kun tsʼaabil kuxtal tiʼ cada juntúul: yáaxeʼ tiʼ Cristo, tsʼoʼoleʼ tiʼ le máaxoʼob u tiaʼaloʼob Cristo tu yáamil le kʼiinoʼob way yanoʼ» (1 Cor. 15:20, 23).

16. ¿Bix u yáantkoʼon le Biblia k-ojéelt baʼax kʼiin ken kaʼa kuxlak le máaxoʼob kun binoʼob kaʼanoʼ?

¹⁶ Le baʼax tu yaʼalaj Pablooʼ ku yeʼesik baʼax kʼiin ken kaʼa kuxlak le máaxoʼob kun binoʼob kaʼanoʼ: tu yáamil le kʼiinoʼob way yaan Cristooʼ. U j-jaajkunajoʼob Jéeobaeʼ úuch joʼopʼok u kaʼanskoʼobeʼ, le Bibliaoʼ ku yeʼesikeʼ le «kʼiinoʼob way [yaan]» Cristooʼ káaj tu añoil 1914. Bejlaʼeʼ láayliʼ way yaneʼ, tsʼoʼoleʼ jach taʼaytak u xuʼulsaʼal tiʼ le kʼasaʼan yóokʼol kaabaʼ.

17, 18. ¿Baʼax kun úuchul tiʼ jujuntúul tiʼ le yéeyaʼanoʼob tu kʼiinil wa yaan Cristooʼ?

¹⁷ Le Bibliaoʼ ku maas tsolik bix kun kaʼa kuxtal le máaxoʼob kun binoʼob kaʼanoʼ. Ku yaʼalik: «Maʼ k-kʼáat ka pʼáatak maʼ a wojéeltikeʼex le baʼaxoʼob yaan yil yéetel le máaxoʼob kimenoʼoboʼ [...]. Toʼoneʼ k-creertik kíim Jesús yéetel kaʼa kuxkíintaʼabi, le oʼolal k-creertik xaneʼ le máaxoʼob tsʼoʼok u kíimloʼob ikil u tsaypachtikoʼob Jesusoʼ yaan xan  u kaʼa kuxkíintaʼaloʼob tumen Dios utiaʼal ka yanakoʼob yéetel Jesús». Tsʼoʼoleʼ ku yaʼalik: «Toʼon máaxoʼon kuxaʼanoʼon tak tu kʼiinil way yaan Yuumtsileʼ, junpuliʼ maʼ táan k-máan táanil tiʼ le máaxoʼob tsʼoʼok u kíimloʼoboʼ, tumen Yuumtsileʼ yaan u yéemel desde teʼ kaʼan táan u tʼaan yéetel autoridad [...]; teʼ súutuk túun jeʼeloʼ, le u disipuloʼob Cristo kimenoʼoboʼ letiʼob kun yáax líikʼloʼob. Ku tsʼoʼokoleʼ, toʼon máaxoʼon púutsʼoʼon tiʼ le kíimiloʼ yaan k-téek bisaʼal junmúuchʼ tu yéeteloʼob ichil le múuyaloʼob utiaʼal ka k-ilba yéetel Yuumtsil teʼ iikʼoʼ; bey túunoʼ mantatsʼ ken k-antal tu yiknal Yuumtsil» (1 Tes. 4:13-17).

¹⁸ Le máaxoʼob kun binoʼob kaʼanoʼ káaj u kaʼa kuxtaloʼob le maʼ úuch káajak le «kʼiinoʼob way [yaan]» Cristooʼ. Le sukuʼunoʼob yéeyaʼanoʼob utiaʼal u binoʼob kaʼan kuxaʼanoʼob way Luʼum tu kʼiinil le nojoch muʼyajiloʼ ‹yaan u téek bisaʼaloʼob› teʼ múuyaloʼoboʼ (Mat. 24:31). Le Bibliaoʼ ku yaʼalikeʼ le kun ‹téek bisbiloʼoboʼ› maʼ kun kíimloʼob, lelaʼ u kʼáat u yaʼaleʼ maʼ kun xáantal kimenoʼob, yaan u «jelbesaʼa[loʼob] tu séebaʼanil, chéen bey ka u mutsʼ yéetel ka u pʼil u yich máakeʼ; lelaʼ yaan u yúuchul le táan u paʼaxal le u tsʼook trompetaoʼ» (1 Cor. 15:51, 52).

19. ¿Baʼaxten «maas maʼalob» le kaʼa kuxtal kun antal maʼ kun xáantaloʼ?

¹⁹ U maas yaʼabil le máaxoʼob meyajtik Dios yéetel chúukaʼan óolal teʼ kʼiinoʼobaʼ maʼ yéeyaʼanoʼob utiaʼal u binoʼob kaʼaniʼ mix utiaʼal u gobernaroʼob yéetel Cristo teʼ kaʼanoʼ. Táan u páaʼtkoʼob u xuʼulsaʼal le kʼasaʼan yóokʼol kaab tu «kʼiinil Jéeoba[oʼ]». Mix máak u yojel jach baʼax kʼiin le xuʼulsajiloʼ, baʼaleʼ le Bibliaoʼ ku yeʼesik jach naatsʼ yanil (1 Tes. 5:1-3). Ken tsʼoʼokkeʼ yaan uláakʼ máakoʼob kun kaʼa kuxkíintbiloʼob. U millonesil kimenoʼobeʼ yaan u kaʼa kuxtaloʼob utiaʼal u kajtaloʼob teʼ Paraíso way Luʼumoʼ. Yaan u luʼsaʼal u kʼebanoʼob yéetel yaan u kuxtaloʼob minaʼan u xuul. Bíin «líiʼsaʼakoʼob ichil le kimenoʼob junpʼéel bix maas maʼalob» tiʼ le máaxoʼob kaʼa kuxkíintaʼaboʼob úuchjeakiloʼ, tumen letiʼobeʼ maʼ kun kaʼa kíimloʼob (Heb. 11:35).

20. ¿Bix k-ojéeltik tu tsoolol kun kaʼa kuxtal le kimenoʼoboʼ?

²⁰ Le Bibliaoʼ ku yaʼalikeʼ «tu tsoolol kun tsʼaabil kuxtal tiʼ cada juntúul» tiʼ le máaxoʼob kun binoʼob kaʼanoʼ (1 Cor. 15:23). Le oʼolal jeʼel u páajtal k-aʼalikeʼ tu tsoolol xan kun kaʼa kuxkíintbil le máaxoʼob kun pʼáatloʼob way Luʼumaʼ. Lelaʼ jeʼel u beetik k-tuklikeʼ: «¿Baʼax kʼiin túun ken kaʼa kuxlak le máaxoʼob maʼ úuch kíimkoʼoboʼ? ¿Tu káajbal wa le Mil Años kun Reinar Cristo utiaʼal u kʼaʼamloʼob tumen u láakʼtsiloʼob yéetel tumen u amigoʼoboʼ? ¿Kux túun le máaxoʼob chúukpaj u yóol u meyajtoʼob Dios úuchjeakil jach maʼalob úuchik u nuʼuktajoʼoboʼ? ¿Yaan wa ta tʼaan u yáax kaʼa kuxtaloʼob utiaʼal u nuʼuktikoʼob u maasil máaxoʼob meyajtik Dios? ¿Kux túun le máaxoʼob maʼ tu meyajtoʼob Jéeobaoʼ? ¿Baʼax kʼiin yéetel tuʼux kun kaʼa kuxtaloʼob?». Yaʼab baʼaxoʼob ku taaktal k-ojéeltik, baʼaleʼ maʼ letiʼe baʼax unaj k-tsʼaatáantikoʼ. Maas maʼalob ka k-páaʼt u kʼiinil u yúuchul utiaʼal k-ilik. Tumen jach yaan u taasiktoʼon kiʼimak óolal k-ilik baʼaxoʼob ken u beet Jéeoba.

21. ¿Baʼax táan k-páaʼtik u kʼuchul u kʼiinil?

²¹ Le maʼ kʼuchuk le kʼiinoʼ, unaj k-maas muʼukʼaʼankúuntik k-fe tiʼ Jéeoba. Jesuseʼ tu yaʼaleʼ Jéeobaeʼ yaan u kaʼa kuxkíintik le máaxoʼob pʼaatloʼob tu tuukuloʼ (Juan 5:28, 29; 11:23). Jesuseʼ tu yeʼeseʼ Dioseʼ jeʼel u páajtal u kaʼa kuxkíintik le kimenoʼoboʼ. Tu yaʼaleʼ utiaʼal letiʼeʼ bey kuxaʼan Abrahán, Isaak yéetel Jacobeʼ (Luc. 20:37, 38). Bey túunoʼ jeʼel u páajtal xan k-aʼalik jeʼex tu yaʼalil Pabloeʼ: «Teneʼ táan xan in páaʼtik u kaʼa kuxkíintaʼal le kimenoʼob jeʼex u yaʼalmil Diosoʼ» (Bax. 24:15).