¿Ta xokaj wa u tsʼook revistailoʼob U Pʼíich Tulumil Kanan? Wa beyoʼ, ilawil wa jeʼel a núukik le kʼáatchiʼobaʼ:

¿Bix u yeʼesik le Biblia ku naʼatik Dios baʼax k-muʼyajtikoʼ?

Le ka palitsiltaʼab le israelitaʼob Egiptooʼ, Dioseʼ u yojel muʼyajnajoʼob yéetel yaachaj tu yóol ka tu yilaj bix u muʼyajoʼob (Éxo. 3:7; Isa. 63:9). Dioseʼ tu beetoʼon jeʼel bix letiʼeʼ, le oʼolal jeʼel u páajtal k-eʼesik u jatsʼuts modoseʼ. Letiʼeʼ ku chʼaʼiktoʼon óotsilil kex yaan hora k-tuklik maʼatech k-náajaltik (wp18.3, táan juʼun 8 yéetel 9).

¿Bix úuchik u yáantik Jesús le máakoʼob utiaʼal ka xuʼuluk u pʼektikoʼob u maasiloʼ?

Tu kʼiiniloʼob Jesuseʼ, yaʼab judíoʼobeʼ ku pʼektikoʼob u maasil. Cristoeʼ tu yeʼesaj u kʼaʼabéetil u yeʼesik máak kabal óolal yéetel tu yaʼalaj maʼ unaj u kaʼantal u yich máakiʼ. Tu yaʼalaj tiʼ u disipuloʼobeʼ unaj u yaabiltikubaʼob jeʼex sukuʼuntsiloʼobeʼ (w18.06, táan juʼun 9 yéetel 10).

¿Baʼax k-kanik tiʼ le úuchik u yaʼalik Dios maʼ kun okol Moisés teʼ Luʼum Aʼalaʼan u Tsʼaʼabaloʼ?

Moiseseʼ mantatsʼ ku kaxtik kaʼach u nuʼuktaj Jéeoba (Deu. 34:10). Tu tsʼoʼokbal le cuarenta años táan u máan le israelitaʼob teʼ desiertooʼ, joʼopʼ u kʼuuxiloʼob tu kaʼatéen, tumen minaʼan jaʼ u yukʼoʼob. Dioseʼ tu yaʼalaj tiʼ Moisés ka u tʼan le tuunichoʼ. Baʼaleʼ letiʼeʼ jatsʼbil tu beetaj. Maʼ xaaneʼ Jéeobaeʼ jach pʼuʼuj tu contra Moisés, tumen maʼ tu beetaj le baʼax tu yaʼalajtiʼoʼ, wa maʼ xaaneʼ tumen maʼ tu tsʼáaj nojbeʼenil tiʼ Jéeoba yoʼolal le milagrooʼ (Núm. 20:6-12). Lelaʼ ku kaʼansiktoʼoneʼ jach unaj k-beetik baʼax ku yaʼalik Jéeoba yéetel k-tsʼáaik nojbeʼenil tiʼ (w18.07, táan juʼun 13 yéetel 14).

¿Baʼax jeʼel k-beetik wa suuk k-jáan juzgartik u maasil chéen yoʼolal bix u yilaʼaleʼ?

Yaan óoxpʼéel baʼaloʼob jeʼel u beetik k-juzgartik maʼ maʼalob u maasileʼ: tuʼux u taal máak, yoʼolal u taakʼin wa yoʼolal u jaʼabil. Le oʼolal unaj k-ilik u maasil jeʼex u yilaʼaloʼob tumen Jéeobaoʼ (Bax. 10:34, 35) (w18.08, táan juʼun 8 tak 12).

¿Bix jeʼel u yáantaj le sukuʼunoʼob tsʼoʼok u yantal u jaʼabiloʼob teʼ múuchʼuliloʼoboʼ?

Le sukuʼunoʼob tsʼoʼok u yantal u jaʼabiloʼob ku tsʼaʼabal yaanal meyaj u beetoʼoboʼ láayliʼ yaabiltaʼanoʼob tumen Dioseʼ, tsʼoʼoleʼ jeʼel u páajtal u yáantkoʼob u maasileʼ. Jeʼel u páajtal u yáantkoʼob le íichamtsiloʼob maʼ j-Jaajkunajoʼoboʼ, le inactivoʼoboʼ, ku tsʼáaikoʼob xook tiʼ yaʼab máakoʼob yéetel jejeláas bix u táakpajloʼob teʼ kʼaʼaytajoʼ (w18.09, táan juʼun 8 tak 11).

¿Baʼax nuʼukuliloʼob tsʼaʼantoʼon utiaʼal k-kaʼansaj?

Tsʼaʼantoʼon le tarjetaʼoboʼ, le invitacionoʼoboʼ, ocho tratadoʼob jach maʼalob beetaʼaniloʼob yéetel u revistail U Pʼíich Tulumil Kanan yéetel ¡Despertad! Tsʼoʼoleʼ yaantoʼon xan jujunpʼéel folletoʼob, kaʼapʼéel libro utiaʼal u tsʼaʼabal xook yéetel kanpʼéel videoʼob, jeʼex le ku kʼaabaʼtik ¿Baʼaxten unaj a xokik le Bibliaoʼ? (w18.10, táan juʼun 16).

¿Baʼax unaj u beetik le máax meyajtik Dios utiaʼal u manik u jaajil, jeʼex u yaʼalik Proverbios 23:23?

Maʼ kʼaʼabéet taakʼin utiaʼal u manik máak u jaajiliʼ. Baʼaleʼ kʼaʼabéet tiempo yéetel u beetik máak tuláakal le ku páajtal utiaʼal u kaxtikoʼ (w18.11, táan juʼun 4).

¿Baʼax k-kanik tiʼ bix úuchik u tratartaʼal Gómer tumen Oseas?

Gomereʼ núupkʼebanchaj yaʼab u téenel. Baʼaleʼ perdonartaʼab tumen Oseas, le oʼolal maʼ tu pʼatiʼ. Wa juntúul máax meyajtik Dios ku núupkʼebantaleʼ jeʼel u páajtal u perdonartaʼal tumen u núupeʼ. Wa le máax tuʼus ku núupchital yéetel u núupoʼ, ku pʼáatal maʼ tu páajtal u divorciarkubaʼob (w18.12, táan juʼun 13).