JUNTÚUL precursora ku kʼaabaʼtik Sylviana, yaan 25 años tiʼeʼ, ku yaʼalik: «Kéen joʼopʼok u tsikbaltaʼal tumen in amigoʼob bix kiʼimakil u yóoloʼob ikil u beetik u precursoriloʼob tuʼux maas kʼaʼabéet áantajeʼ, ku taaktal xan in beetik jeʼex letiʼoboʼ. Chéen baʼaleʼ kin tuklik kaʼach maʼ tu páajtal in bin áantaj tuʼux kʼaʼabéet».

¿Tsʼoʼok wa a wuʼuyikaba jeʼex Sylvianaoʼ? ¿Ku taaktal wa a bin kʼaʼaytaj tuʼux kʼaʼabéet áantaj, chéen baʼaleʼ saajkech maʼ a béeytal? Wa beyoʼ maʼ u lúubul a wóol. Jéeobaeʼ tsʼoʼok u yáantik yaʼabkach sukuʼunoʼob utiaʼal u béeytal u maas táakpajloʼob teʼ kʼaʼaytaj kex yaan baʼax beetik u talamtaltiʼoboʼ. ¿Bix tsʼoʼok u yáantaʼaloʼob? Utiaʼal k-ojéeltikeʼ koʼox ilik baʼax ku yúuchul Madagascar, le kanpʼéel isla maas nojochoʼ.

Teʼ tu tsʼook diez añosaʼ, maas tiʼ 70 precursoroʼob yéetel j-kʼaʼaytajoʼob ku taaloʼob tiʼ 11 luʼumiloʼob tsʼoʼok u binoʼobiʼ. * Teʼ isla yaan tu luʼumil Áfricaaʼ jach maʼalob u tsʼáaik u yich le paakʼaloʼoboʼ yéetel yaʼab máak creertik baʼax ku yaʼalik le Bibliaoʼ. Tsʼoʼoleʼ yaʼab sukuʼunoʼob kajaʼanoʼob teʼ nojoch islaaʼ, tsʼoʼok u binoʼob tiʼ uláakʼ kaajoʼob tuʼux maas kʼaʼabéet áantaj utiaʼal u kʼaʼaytikoʼob le baʼax ku kaʼansik le Bibliaoʼ. ¿A kʼáat wa a kʼaj óolt jujuntúuloʼobiʼ?

Louis yéetel Perrineeʼ tsʼoʼok treinta años tiʼob ka lukʼoʼob Francia utiaʼal u binoʼob Madagascar. Úuch taakchajak u binoʼob kʼaʼaytaj táanxel luʼumil, chéen baʼaleʼ Perrineeʼ sajak. Letiʼeʼ ku yaʼalik: «Saajken bin tuʼux maʼ in kʼaj óoliʼ. Yaj tin wóol wa ka in pʼat in láakʼtsiloʼob, in múuchʼulil, in wotoch, in kaajal yéetel baʼax suuk in beetik. Baʼaleʼ le baʼax maas talamkúuntik in binoʼ letiʼe in saajkiloʼ». Kex beyoʼ tu añoil 2012, Perrineeʼ tu chʼaʼtuklaj u bin yéetel u yíicham. ¿Bix túun u yuʼubikuba bejlaʼeʼ? Perrineeʼ ku yaʼalik: «Kéen tuukulnaken tiʼ le baʼaxoʼob jatsʼutstak tsʼoʼok k-ilkoʼ, kin wuʼuyik tsʼoʼok u maas muʼukʼaʼantal in fe, tumen tsʼoʼok in wilik bix u yáantkoʼon Jéeoba». Louis xaneʼ ku yaʼalik: «Teʼ yáax Kʼaʼajsajil t-ilaj way Madagascaroʼ diez u túulal máaxoʼob k-tsʼáaik xook tiʼob taaloʼobiʼ».

 ¿Baʼax áantoʼob utiaʼal ka seguernak u pʼáatloʼob áantaj Madagascar kex tu aktáantoʼob talamiloʼob? Tu kʼáatoʼob áantaj tiʼ Jéeoba utiaʼal u chúukpajal u yóoloʼob (Fili. 4:13). Louiseʼ ku yaʼalik: «T-tsʼáaj cuentaeʼ Jéeobaeʼ ku núukik k-oracionoʼob yéetel ku beetik u jéetsʼel k-óol. Tsʼoʼoleʼ béeychaj k-chʼikik k-tuukul tiʼ le baʼaxoʼob jatsʼutstak ku yúuchultoʼon teʼ kʼaʼaytajoʼ. K-amigoʼob yanoʼob Francia xaneʼ tu túuxtoʼobtoʼon correoʼob yéetel cartaʼob utiaʼal u líiʼskoʼob k-óol» (Fili. 4:6, 7; 2 Cor. 4:7).

Jéeobaeʼ tu bendecirtaj Louis yéetel Perrine úuchik u chúukpajal u yóoloʼob. Louiseʼ ku yaʼalik: «Tu mesil octubre tiʼ 2014, binoʼon teʼ Escuela Bíblica utiaʼal le Tsʼokaʼan u Beeloʼob * beetaʼab Franciaoʼ. Leloʼ junpʼéel u siibal Jéeoba mix bikʼin ken k-tuʼubse». Ka tsʼoʼok le xookoʼ jach kiʼimakchaj u yóoloʼob úuchik u kaʼa túuxtaʼaloʼob Madagascar.

Sukuʼun Didier yéetel Nadine, u yataneʼ, maas tiʼ 50 años yaantiʼob ka lukʼoʼob Francia utiaʼal u binoʼob Madagascar tu añoil 2010. Didiereʼ ku yaʼalik: «T-táankelmileʼ t-beetaj k-precursoril, ka tsʼoʼokeʼ anchaj óoxtúul k-paalal. Ka nuukchajoʼobeʼ joʼopʼ k-tuklik k-bin áantaj táanxel luʼumil». Nadineʼ ku yaʼalik: «Maʼ jach taak in bin kaʼachiʼ, tumen maʼ in kʼáat in pʼat in paalaliʼ, baʼaleʼ letiʼobeʼ tu yaʼaloʼobtoʼon: ‹Wa ka bineʼex áantaj táanxel luʼumileʼ, ¡yaan u kiʼimaktal k-óol ta woʼolaleʼex!›. Leloʼ tu yáantoʼon utiaʼal k-chʼaʼtuklik k-bin. Bejlaʼeʼ náach tiʼob kajaʼanoʼon, baʼaleʼ kiʼimak k-óol, tumen suuk k-tʼaan tu yéeteloʼob».

Didier yéetel Nadineʼ talamchaj u kankoʼob le idioma malgacheoʼ. Nadineʼ ku yaʼalik ich báaxal tʼaan: «Bejlaʼeʼ maʼ paalaloʼon utiaʼal k-séeb kanik wa baʼaxiʼ». ¿Bix túun tu kaniloʼob le idiomaoʼ? Yáaxeʼ binoʼob tiʼ junpʼéel múuchʼulil tuʼux ku tʼaʼanal francés. Ka máan kʼiineʼ tu yiloʼob jeʼel u páajtal u máanoʼob tiʼ junpʼéel múuchʼulil tuʼux ku tʼaʼanal malgacheeʼ. Nadineʼ ku yaʼalik: «Kéen jóokʼkoʼon kʼaʼaytajeʼ k-tsikbal yéetel máaxoʼob jatsʼuts u yilkoʼob u xokikoʼob le Bibliaoʼ yéetel uts tu tʼaanoʼob k-xíimbaltikoʼob. Ka káajeʼ tin tuklaj bey chéen táan in wayakʼtikeʼ. Jach jatsʼuts in wilik in beetik in precursorail wayeʼ. Cada ken aajkeneʼ kin tuklik: ‹¡Yaaske yaan in jóokʼol kʼaʼaytaj bejlaʼeʼ!›».

Didiereʼ ku cheʼej kéen kʼaʼajaktiʼ baʼaxoʼob úuchtiʼ le táan u kanik malgacheoʼ. Letiʼeʼ ku yaʼalik: «Tu káajbaleʼ kéen in nuʼukt le muchʼtáambaloʼ maʼ tin naʼatik baʼax ku núukik le sukuʼunoʼoboʼ, le oʼolal chéen kin tsʼáaik u diosboʼotikil tiʼob. Juntéenjeakeʼ, ka tsʼoʼok in tsʼáaik u diosboʼotikil yoʼolal baʼax tu núukaj juntúul kiikeʼ, le sukuʼunoʼob kulukbaloʼob paachil tiʼoʼ joʼopʼ u piʼikʼtik u pooloʼob utiaʼal in wilik maʼ maʼalob bix úuchik u núukikiʼ. Ka túun tin jáan aʼalaj tiʼ juntúul sukuʼun ka u tsole. Kexiʼ wa maʼalob úuchik u tsolikeʼ».

Tiʼ junpʼéel asamblea beetaʼab 2005, Thierry yéetel  Nadia, u yataneʼ, tu chaʼantoʼob le drama Koʼoneʼex ilik bix jeʼel k-maas meyajtik Dios utiaʼal k-nojbeʼenkúuntikeʼ, le tuʼux ku yeʼesik bix kuxlajik Timoteooʼ. Le baʼax tu chaʼantoʼoboʼ kʼuch tu puksiʼikʼaloʼob, ka maas taakchaj u binoʼob áantaj tuʼux kʼaʼabéet j-kʼaʼaytajoʼob. Thierryeʼ ku yaʼalik: «Le táan k-papaxkʼab ka tsʼoʼok le dramaoʼ, tin kʼáataj tiʼ in watan: ‹¿Tuʼux jeʼel k-bin áantajeʼ?›. Letiʼeʼ tu yaʼalajteneʼ láayliʼ letiʼe baʼax ku tuklikoʼ». Maʼ xáanchaj ka joʼopʼ u beetkoʼob baʼax kʼaʼabéet utiaʼal u binoʼobiʼ. Nadiaeʼ ku yaʼalik: «Joʼopʼ k-ilik u pʼíittal baʼaxoʼob yaantoʼon. Ka tsʼoʼokeʼ béeychaj k-láaj butʼik ichil kanpʼéel maleta».

Letiʼobeʼ kʼuchoʼob Madagascar tu añoil 2006, desde ka kʼuchoʼobeʼ jach jatsʼuts úuchik u yilkoʼob u kʼaʼaytajoʼobiʼ. Nadiaeʼ ku yaʼalik: «Le bix u kʼaʼamal le maʼalob péektsil wayoʼ jach ku beetik u kiʼimaktal k-óol».

Chéen baʼaleʼ seis años kʼuchkoʼobeʼ le sukuʼun yéetel u yatanoʼ tu aktáantoʼob junpʼéel talamil. Marie-Madeleine, u maama Nadia kajaʼan Franciaeʼ, lúubeʼ ka tu paʼaj u pool yéetel tu kachaj u kʼab. Thierry yéetel Nadiaeʼ tsikbalnajoʼob yéetel u doctor Marie-Madeleine, ka tsʼoʼokeʼ tu kʼáatoʼob tiʼ Marie-Madeleine wa jeʼel u yóotik bin kajtal tu yéeteloʼob Madagascareʼ. Kex tsʼoʼok 80 años tiʼeʼ tu yóotaj bin. ¿Bix u yuʼubikuba Marie-Madeleine teʼeloʼ? Letiʼeʼ ku yaʼalik: «Yaan baʼaxoʼob maʼ suukchajakteniʼ, kex maʼ yaʼab áantaj ku páajtal in tsʼáaikeʼ yaabiltaʼanen teʼ múuchʼuliloʼ. Le baʼax maas kiʼimakkúuntik in wóoloʼ letiʼe u páajtal u seguer u kʼaʼaytaj in hija yéetel u yíicham tuʼux ku jach kʼaʼamal le maʼalob péektsiloʼ».

Juntúul sukuʼun ku kʼaabaʼtik Riana yéetel tsʼoʼok maas tiʼ veinte años tiʼeʼ líikʼ tu kaajil Alaotra Mangoro. Lelaʼ junpʼéel kaaj tuʼux jach ku tsʼáaik u yich le paakʼaloʼob yaan tu lakʼinil Madagascaroʼ. Rianaeʼ jach ku jóoʼsik maʼalob calificacionoʼob tu escuela, le oʼolal taak kaʼach u xokik junpʼéel carrera. Baʼaleʼ ka tsʼoʼok u xokik le Bibliaoʼ kʼexpaj u tuukul. Letiʼeʼ ku yaʼalik: «Ka tin tsʼoʼoksaj in xookeʼ tin waʼalaj tiʼ Jéeoba: ‹Wa ku jóokʼol maʼalob in exameneʼ, kin beetik in precursoril›». Ka tsʼoʼok u xook Rianaeʼ tu beetaj u precursoril. Tu kʼubéentuba tu yotoch juntúul precursor yéetel tu kaxtaj junpʼéel meyaj ku chaʼik u beetik u precursoril. Letiʼeʼ ku yaʼalik: «Letiʼe baʼax maas maʼalob tsʼoʼok in chʼaʼtuklik in beetkoʼ».

U láakʼtsiloʼobeʼ maʼ tu naʼatkoʼob baʼaxten tu chʼaʼtuklaj u pʼatik u xook. Letiʼeʼ ku yaʼalik: «In papá, in tío yéetel in tía abuelaeʼ u kʼáatoʼob ka xiʼiken xook teʼ universidadoʼ. Baʼaleʼ mix baʼal ken u beet in pʼatik in precursoril». Maʼ xáanchajeʼ Rianaeʼ taakchaj u bin áantaj tuʼux maas kʼaʼabéet. ¿Baʼaxten? Letiʼeʼ ku yaʼalik: «U jaats máakoʼobeʼ tu yokloʼob yaʼab baʼaloʼob tin wotoch. Leloʼ tu beetaj in tuukul tiʼ u muchʼkíintaʼal ‹ayikʼaliloʼob teʼ kaʼan›, jeʼex tu yaʼalil Jesusoʼ. Ka túun tin chʼaʼtuklaj in maas meyajtik Dios» (Mat. 6:19, 20). Rianaeʼ bin kajtal tu noojolil Madagascar, tuʼux kajaʼan le antandroyoʼoboʼ. Teʼeloʼ maʼ tu jach kʼáaxal cháakiʼ yéetel kex 325 leguas (1,300 kilómetros) u náachil tiʼ le tuʼux kajaʼan kaʼachoʼ. ¿Baʼaxten jach náachchaji?

Junpʼéel mes táanil tiʼ u yoklaʼaleʼ, Rianaeʼ káaj u tsʼáaik xook tiʼ kaʼatúul máakoʼob tiʼ u chʼiʼibalil antandroy. Tu kanaj u yaʼal jujunpʼéel tʼaanoʼob ichil u idiomaʼob ka joʼopʼ u tuukul tiʼ le bukaʼaj máakoʼob maʼ u yuʼuboʼob u maʼalob péektsilil le Reino ichil le chʼiʼibal jeʼeloʼ. Letiʼeʼ ku yaʼalik: «Tin kʼáataj tiʼ Jéeoba ka u yáanten utiaʼal u béeytal in bin tuʼux ku tʼaʼanal le idioma tandroyoʼ».

Le ka kʼuchoʼ maʼ anchaj tuʼux u kaxtik meyajiʼ. Ka aʼalaʼabtiʼ tumen juntúul máak: «¿Baʼaxten taalech? Le máakoʼob wayaʼ ku bin u kaxtoʼob meyaj teʼ tuʼux lukʼechoʼ». Kaʼapʼéel semana tiʼ leloʼ, Rianaeʼ bin teʼ asamblea regionaloʼ. Tumen tsʼoʼok u xuʼupul taakʼin tiʼeʼ joʼopʼ u tuklik baʼax ken u beete. Tu tsʼook kʼiinil le asambleaoʼ juntúul sukuʼuneʼ tu jalkʼesaj junpʼéel baʼal tu bolsa. Ka tu yileʼ taakʼin tsʼaʼabtiʼ, lelaʼ ku tsʼáaik utiaʼal u suut yiknal le antandroyoʼoboʼ yéetel utiaʼal u manik yogur u kone. Letiʼeʼ ku yaʼalik: «Tin wileʼ Jéeobaeʼ jach tu yáanten teʼ súutuk kʼaʼabéettenoʼ. Beoraaʼ jeʼel u páajtal u seguer in wáantik le máakoʼob u kʼaj óoltoʼob Jéeobaoʼ». Tsʼoʼoleʼ yaʼab meyaj yaan beetbil xan teʼ múuchʼuliloʼ. Rianaeʼ ku yaʼalik: «Cada quince días kin máansik junpʼéel tsoltʼaan utiaʼal tuláakal. Jéeobaeʼ táan u kaʼansiken ichil  u kaajal». Teʼ kʼiinoʼobaʼ Rianaeʼ láayliʼ táan u yáantik le máakoʼob tʼanik le idioma tandroy utiaʼal u kʼaj óoltoʼob Jéeobaoʼ.

Jéeobaeʼ ku yaʼalikeʼ yaan u bendecirtik máaxoʼob ku tsʼáaik u yóol u meyajtoʼob (Isa. 65:16). Bey túunoʼ kéen k-beet tuláakal le ku páajtal utiaʼal k-aktáantik jeʼel baʼaxak talamil utiaʼal k-bin áantaj tuʼux maas kʼaʼabéeteʼ, Jéeobaeʼ ku bendecirkoʼon. Jeʼex Sylviana, le máax t-aʼalaj tu káajbal le xookaʼ, ku tuklik kaʼacheʼ maʼ tu béeytal u bin áantaj tuʼux maas kʼaʼabéet. ¿Baʼaxten tuukulnaj beyoʼ? Letiʼeʼ ku yaʼalik: «Tumen nueve centímetros kóomil in x-tsʼíik okil tiʼ le x-noʼojoʼ, kojlankil in máan, le oʼolal séeb in kaʼanal».

Kex beyoʼ tu añoil 2014, Sylvianaeʼ tu chʼaʼtuklaj u bin yéetel Sylvie Ann, uláakʼ juntúul precursora yaan tu múuchʼulil. Le chan kaaj tuʼux binoʼoboʼ maas tiʼ 21 leguas (85 kilómetros) náachil tiʼ u yotoch. Kex maʼ chéen chʼaʼabileʼ Sylvianaeʼ béeychaj u beetik le baʼax úuch joʼopʼok u tsʼíiboltikoʼ. Tsʼoʼoleʼ tu kʼamaj junpʼéel jatsʼuts bendición. Letiʼeʼ ku yaʼalik: «Jach junpʼéel año xiʼikeneʼ, Doratine, juntúul maamatsil tin tsʼáaj xook tiʼeʼ, okjaʼanaj tiʼ junpʼéel asamblea tiʼ circuito».

Le baʼax ku tsikbaltik le sukuʼunoʼobaʼ ku kaʼansiktoʼoneʼ wa ku chúukpajal k-óol k-aktáant jeʼel baʼaxak utiaʼal k-maas táakpajal teʼ kʼaʼaytajoʼ, yaan k-ilik jach jaaj le baʼax ku yaʼalik Jéeobaaʼ: «Teen tsʼáaik a muukʼ, teen áantkech» (Isa. 41:10). Lelaʼ yaan u beetik k-maas bisikba tu yéetel. Tsʼoʼoleʼ wa k-bin áantaj yéetel kiʼimak óolal tuʼux maas kʼaʼabéet j-kʼaʼaytajoʼob, teʼ luʼumil tuʼux yanoʼon wa tuláakʼ luʼumiloʼ, ku yáantkoʼon utiaʼal k-beetik uláakʼ meyajoʼob teʼ túumben luʼumoʼ. Didier, tsʼoʼok k-yáax chʼaʼchiʼitikeʼ, ku yaʼalik: «U yáantaj máak tuʼux maas kʼaʼabéeteʼ junpʼéel bix u líiʼskuba utiaʼal le kuxtal ku taal u kʼiiniloʼ». K-tsʼíiboltik ka yaʼabchajak le sukuʼunoʼob ku yóotkoʼob bin áantaj yéetel kiʼimak óolal utiaʼal u kʼamkoʼob xan le kaʼansajaʼ.