1, 2. 1) ¿Baʼax ku yilik Jéeoba kéen u muchʼuba u millonesil máakoʼob utiaʼal U Ookʼin Janal Yuumtsil? (Ilawil le foto yaan tu yáax táan juʼunil le revistaaʼ). 2) ¿Baʼax ken k-il teʼ xookaʼ?

¿BAʼAX ku yilik Jéeoba kéen u muchʼuba u millonesil máakoʼob utiaʼal U Ookʼin Janal Yuumtsil? Maʼ chéen ku yilik yaʼab máakoʼob u muchʼmubaʼobiʼ, baʼaxeʼ ku yilik cada juntúul tiʼ le ku binoʼoboʼ. Cada añoeʼ ku yilik máaxoʼob ku binoʼobiʼ. Ichiloʼobeʼ tiaʼan tak le táan u chʼaʼpachtaʼaloʼoboʼ. Yanoʼobeʼ maʼatech u binoʼob teʼ muchʼtáambaloʼob cada semanaoʼ, baʼaleʼ ku yuʼubikoʼob unaj u binoʼob teʼ Kʼaʼajsajiloʼ. Jéeobaeʼ ku yilik xan le máaxoʼob yáax u binoʼoboʼ, maʼ xaaneʼ tumen taak u yilkoʼob bix u beetaʼal.

² Jéeobaeʼ jach ku kiʼimaktal u yóol kéen u yil bukaʼaj máakoʼob ku binoʼob utiaʼal le Kʼaʼajsajiloʼ (Luc. 22:19). Baʼaleʼ le baʼax ku yilkoʼ maʼ jaytúul ku biniʼ, baʼaxeʼ baʼaxten ku binoʼobiʼ. Teʼ xookaʼ yaan k-xakʼaltik le kʼáatchiʼaʼ: ¿Baʼaxten maʼ chéen tu Ookʼin Janal Yuumtsil k-biniʼ, baʼaxeʼ tak teʼ muchʼtáambaloʼob ku beetaʼal tumen Jéeoba cada semanaoʼ? Koʼoneʼex ilik baʼax modosil péeksikoʼon utiaʼal ka xiʼikoʼoniʼ.

3, 4. 1) ¿Baʼaxten k-bin teʼ muchʼtáambaloʼoboʼ? 2) ¿Baʼax modosil k-eʼesik kéen xiʼikoʼon teʼ muchʼtáambaloʼoboʼ? 3) Jeʼex u yaʼalik Yáax tiʼ Corintoiloʼob 11:23 tak 26, ¿baʼaxten maʼ unaj k-peʼertik le Kʼaʼajsajiloʼ?

³ Toʼoneʼ k-bin teʼ muchʼtáambaloʼoboʼ, tumen táakaʼanoʼob ichil le adoración k-tsʼáaik tiʼ Diosoʼ. Tsʼoʼoleʼ k-biniʼ, tumen tiʼ k-kaʼansaʼal tumen Jéeobaiʼ. Le máaxoʼob ku taaskubaʼob nojbaʼaliloʼ ku tuklikoʼob mix máak unaj u kaʼansiktiʼob mix baʼal  (3 Juan 9). Baʼaleʼ toʼoneʼ k-kʼáat ka kaʼansaʼakoʼon tumen Jéeoba bey xan tumen u kaajal (Isa. 30:20; Juan 6:45).

⁴ Kéen xiʼikoʼon teʼ muchʼtáambaloʼoboʼ k-eʼesik kabal k-óol yéetel jeʼel k-kʼamik le kaʼansaj ku tsʼáaik Diosoʼ. Tsʼoʼoleʼ kéen xiʼikoʼon tu Kʼaʼajsajil kíimik Cristoeʼ, maʼatech k-bin chéen tumen k-tuklik unaj k-biniʼ, baʼaxeʼ tumen kabal k-óol yéetel k-kʼáat k-beet le baʼax tu yaʼalaj Jesusaʼ: «Maʼ u xuʼulul a beetkeʼex lelaʼ utiaʼal a kʼaʼajsikeneʼex» (xok 1 Corintoiloʼob 11:23-26). Le muchʼtáambalaʼ ku yáantkoʼon k-maas creert baʼax kéen u beet Jéeoba yéetel ku kʼaʼajsiktoʼon bukaʼaj u yaabiltmiloʼon. Baʼaleʼ letiʼeʼ u yojel maʼ chéen juntéen ichil junpʼéel año unaj u líiʼsaʼal k-óoliʼ. Le oʼolal u tsʼaamaj le muchʼtáambaloʼob cada semanaoʼ yéetel ku yaʼaliktoʼon ka xiʼikoʼoniʼ. Le kabal óolaloʼ ku péeksikoʼon k-beet baʼax ku yaʼalik. Le oʼolal k-máansik yaʼab tiempo utiaʼal k-líiʼsikba yéetel le baʼaxoʼob kun ilbiloʼ bey xan utiaʼal ka xiʼikoʼoniʼ.

5. ¿Baʼaxten le máaxoʼob kabal u yóoloʼoboʼ ku kʼamkoʼob u invitación Jéeoba?

⁵ Cada añoeʼ yaʼab máakoʼob kʼamik yéetel kabal óolal u invitacionil utiaʼal u binoʼob kaanbal tiʼ Jéeoba teʼ muchʼtáambaloʼoboʼ (Isa. 50:4). U suukileʼ yáax teʼ Kʼaʼajsajil ku binoʼoboʼ, tsʼoʼoleʼ ku káajal u binoʼob tu maasil muchʼtáambaloʼoboʼ (Zac. 8:20-23). Tuláakloʼon, tak le túumbenoʼoboʼ, jach jatsʼuts k-ilik k-kaʼansaʼal yéetel k-nuʼuktaʼal tumen Dios, le máax kanáantkoʼon yéetel salvartikoʼonoʼ (Sal. 40:17). U jaajileʼ minaʼan uláakʼ baʼax maas kʼaʼanaʼan tiʼ le muchʼtáambaloʼob tuʼux k-kaʼansaʼal tumen Jéeoba yéetel tumen Jesús, le máax jach u yaabiltmoʼ (Mat. 17:5; 18:20; 28:20).

6. ¿Bix áantaʼabik juntúul nojoch máak tumen le kabal óolal utiaʼal ka xiʼik teʼ Kʼaʼajsajiloʼ?

⁶ Cada añoeʼ k-beetik tuláakal le ku páajtal utiaʼal k-invitartik le jaytúul máakoʼob ku páajtal utiaʼal u Kʼaʼajsajil kíimik Jesuseʼ. Yaʼab máaxoʼob kabal u yóoloʼobeʼ tsʼoʼok u jóoʼskoʼob u yutsil úuchik u kʼamkoʼob le invitacionoʼ. Lelaʼ bey tu beetil juntúul nojoch máak. Juntéenjeakeʼ tsʼaʼabtiʼ tumen juntúul sukuʼun le invitacionoʼ, baʼaleʼ tu yaʼaleʼ maʼ kun béeytal u bin. Tu áakʼabil le Kʼaʼajsajiloʼ, le sukuʼunoʼ jaʼakʼ u yóol ka tu yilaj u yokol le nojoch máak teʼ Najil Reinooʼ. Yoʼolal bix úuchik u kʼaʼamal tumen le sukuʼunoʼoboʼ káaj u bin tiʼ tuláakal le muchʼtáambaloʼoboʼ. Bey túunoʼ ichil junpʼéel añoeʼ chéen tiʼ óoxpʼéel muchʼtáambal maʼ biniʼ. ¿Baʼax áant u kʼex u tuukul utiaʼal ka xiʼikiʼ? Le sukuʼun invitartoʼ tu yaʼalaj: «Tumen letiʼeʼ jach kabal u yóol». Jach chíikaʼan u yilaʼaleʼ Jéeoba natsʼ le nojoch máak ichil u kaajaloʼ. Bejlaʼeʼ tsʼoʼok u yokjaʼ (2 Sam. 22:28; Juan 6:44).

7. ¿Bix u yáantkoʼon k-eʼes kabal óolal le baʼax k-kanik teʼ muchʼtáambaloʼob yéetel kéen k-xok le Bibliaoʼ?

⁷ Le baʼax k-kanik teʼ muchʼtáambaloʼob yéetel le baʼax k-xokik teʼ Bibliaoʼ ku yáantkoʼon utiaʼal k-eʼesik kabal óolal. Le semanaʼob táanil tiʼ le Kʼaʼajsajiloʼ, le muchʼtáambaloʼoboʼ ku tʼaanoʼob tiʼ le baʼaxoʼob tu beetaj Jesusoʼ yéetel bix úuchik u yeʼesik kabal óolal le ka tu kʼubaj u kuxtal t-oʼolaloʼ. Le kʼiinoʼob táanil tiʼ le Kʼaʼajsajiloʼ ku yaʼalaʼaltoʼon ka k-xok ichil le Biblia le bix úuchik u kíimil yéetel le bix úuchik u kaʼa kuxtaloʼ. Tuláakal lelaʼ ku yáantkoʼon utiaʼal ka taakchajak k-tsʼáaik u graciasil yoʼolal le baʼax tu beetoʼ. Tsʼoʼoleʼ ku péeksikoʼon utiaʼal k-eʼesik xan kabal óolal yéetel ka k-beet baʼax ku yaʼalik Dios, kex ka talamchajak k-beetik (Luc. 22:41, 42).

8. ¿Bix tu yeʼesil Jesús maʼ saajkiʼ?

⁸ Jesuseʼ maʼ tu chʼaʼaj saajkiliʼ, lelaʼ letiʼe uláakʼ modos unaj k-eʼesik xanoʼ. Tuukulnakoʼon tiʼ bix úuchik u yeʼesik teʼ kʼiinoʼob táanil  tiʼ u kíimsaʼaloʼ. Letiʼeʼ u yojel taʼaytak u beetaʼal u sen muʼyaj tumen le máaxoʼob pʼekmiloʼ, yaan u jaʼajatsʼaʼal yéetel yaan u kíimsaʼal (Mat. 20:17-19). Kex beyoʼ chúukpaj u yóol tak tu xuul. Le ka kʼuch le súutuk jeʼeloʼ, tu yaʼalaj tiʼ u apostoloʼob yaan tu yéetel tu jardinil Getsemanioʼ: «Líikʼeneʼex, koʼoneʼex. ¡Ileʼex! Le máax kun traicionartikenoʼ tsʼoʼok u náatsʼal» (Mat. 26:36, 46). Ka taal machbil tumen le máakoʼoboʼ, tu yaʼalaj máax letiʼ, tsʼoʼoleʼ ka tu yaʼalaj tiʼ le soldadoʼob ka u chaʼob u bin le apostoloʼoboʼ (Juan 18:3-8). ¿Máasaʼ tu yeʼesaj jach maʼ saajkiʼ? Teʼ kʼiinoʼobaʼ, le sukuʼunoʼob yéeyaʼanoʼob utiaʼal u binoʼob kaʼan yéetel le uláakʼ tamanoʼoboʼ ku yeʼeskoʼob xan maʼ saajkoʼobiʼ. ¿Bix u beetkoʼob?

9. 1) ¿Baʼaxten maʼ unaj k-sajaktal bin tiʼ tuláakal le muchʼtáambaloʼoboʼ? 2) Le baʼaxoʼob k-beetkoʼ, ¿bix jeʼel u yáantik le sukuʼunoʼob kʼalaʼanoʼob carceloʼ?

⁹ Maʼ xaaneʼ jeʼel u yantal baʼaxoʼob talamkúuntik k-bin tiʼ tuláakal le muchʼtáambaloʼoboʼ. Wa ku yúuchultoʼon beyoʼ, kʼaʼabéet maʼ k-sajaktal. Yaan sukuʼunoʼobeʼ kʼojaʼanoʼob, yaachajaʼan u yóoloʼob wa lubaʼan u yóoloʼob. Yanoʼob xaneʼ ku chʼaʼpachtaʼaloʼob tumen u láakʼtsiloʼob wa tumen le gobiernoʼoboʼ. Tuukulnakoʼon tiʼ le sukuʼunoʼob kʼalaʼanoʼob cárcel yoʼolal le baʼaxoʼob ku creertikoʼoboʼ. K-tuklikeʼ, ¿jeʼel wa u yáantaʼaloʼob yoʼolal le baʼaxoʼob k-beetkoʼ? (Heb. 13:3). Kéen u yojéeltoʼob táan k-tsʼáaik k-óol k-meyajt Jéeoba kex táan k-aktáantik talamiloʼobeʼ ku líikʼil u yóoloʼob utiaʼal maʼ u sajaktaloʼob u meyajtoʼob Jéeoba yéetel chúukaʼan óolal. Lelaʼ bey úuchik tiʼ apóstol Pablo. Le kʼalaʼan cárcel tu kaajil Romaoʼ, jach ku kiʼimaktal u yóol kéen u yojéelt le sukuʼunoʼoboʼ u tsʼaamaj u yóoloʼob u meyajtoʼob Dios (Fili. 1:3-5, 12-14). Le maʼ yaʼab u bin u jáalkʼabtaʼal, wa chéen pʼel jáalkʼabtaʼabikeʼ, tu tsʼíibtaj u cartail Hebreoʼob. Teʼ cartaoʼ tu yaʼalaj tiʼ le sukuʼunoʼob maʼ unaj u xuʼulul u muchʼkubaʼob yéetel u paklan yaabiltikubaʼoboʼ (Heb. 10:24, 25; 13:1).

10, 11. 1) ¿Máaxoʼob unaj k-invitartik utiaʼal le Kʼaʼajsajiloʼ? 2) ¿Baʼax oʼolal ku yaʼalik Efesoiloʼob 1:7 unaj k-beetik?

¹⁰ K-eʼesik maʼ saajkoʼon xan kéen k-invitart teʼ Kʼaʼajsajil k-láakʼtsiloʼob, k-éet meyajoʼob wa k-vecinoʼob. ¿Baʼaxten k-invitarkoʼob? Tumen k-tsʼáaik u graciasil tiʼ Jéeoba yéetel tiʼ Jesús yoʼolal le baʼax tu beetoʼob t-oʼolaloʼ. Tsʼoʼoleʼ k-kʼáat k-áant le máakoʼob utiaʼal ka u yiloʼob bix jeʼel u kʼamkoʼob «u nojoch utsil» Jéeoba yoʼolal le u kuxtal Jesús tu kʼubaj t-oʼolaloʼ (xok Efesoiloʼob 1:7; Apo. 22:17).

¹¹ Kéen xiʼikoʼon teʼ muchʼtáambaloʼoboʼ k-eʼesik uláakʼ jatsʼuts modos. Jéeoba yéetel Jesuseʼ ku yeʼeskoʼob xan le jatsʼuts modosaʼ.

12. 1) ¿Bix u yáantkoʼon le muchʼtáambaloʼob utiaʼal k-maas yaabiltik Jéeoba yéetel Jesusoʼ? 2) Jeʼex u yeʼesik Kaʼapʼéel tiʼ Corintoiloʼob 5:14 yéetel 15, ¿bix jeʼel k-beetik jeʼex Jesuseʼ?

¹² K-yaabilaj tiʼ Jéeoba yéetel tiʼ Jesuseʼ, ku péeksikoʼon utiaʼal ka xiʼikoʼon teʼ muchʼtáambaloʼoboʼ, leloʼobaʼ ku yáantkoʼon utiaʼal  k-maas eʼesik yaabilaj. ¿Baʼaxten? Tumen teʼ muchʼtáambaloʼoboʼ mantatsʼ ku kʼaʼajsaʼaltoʼon le baʼaxoʼob tsʼoʼok u beetkoʼob t-oʼolaloʼ (Rom. 5:8). Le Kʼaʼajsajiloʼ ku yáantkoʼon tuukul tiʼ le nojoch yaabilaj ku yeʼeskoʼob tak tiʼ le máaxoʼob maʼatech u yilkoʼob wa jach kʼaʼanaʼan le u kuxtal Jesús tu kʼubaj t-oʼolaloʼ. Toʼoneʼ jach nojoch baʼal k-ilik, le oʼolal k-kʼáat kuxtal jeʼex Jesús sáamsamaleʼ (xok 2 Corintoiloʼob 5:14, 15). Tsʼoʼoleʼ k-péeksaʼal tumen k-puksiʼikʼal utiaʼal k-tsʼáaik u graciasil tiʼ yoʼolal u kuxtal u Hijo tu kʼubaj t-oʼolaloʼ. Junpʼéel bix jeʼel k-beetkeʼ, letiʼe k-núukik le kʼáatchiʼob ku beetaʼal teʼ muchʼtáambaloʼoboʼ.

13. ¿Bix jeʼel k-eʼesik bukaʼaj k-yaabiltmil Dios yéetel u Hijoeʼ?

¹³ Kéen k-xupba utiaʼal k-meyajtik Jéeobaeʼ k-eʼesik bukaʼaj k-yaabiltmil letiʼ bey xan u Hijo. U suukileʼ ku kʼaʼabéettal k-beetik jujunpʼéel kʼeexoʼob utiaʼal u béeytal k-bin teʼ muchʼtáambaloʼoboʼ. Yaan sukuʼunoʼobeʼ ku binoʼob teʼ muchʼtáambal ku beetaʼal yáam semana, kex jach kaʼanaʼanoʼob yoʼolal le meyajoʼob tu beetoʼob teʼ kʼiinoʼ. Uláakʼ muchʼtáambaloʼ ku beetaʼal tu jóokʼbal semana, u kʼiinil u jeʼelskuba máak. ¿Ku yilik wa Jéeoba kéen xiʼikoʼon teʼ muchʼtáambaloʼob kex jach kaʼanaʼanoʼonoʼ? Ku yilik. Wa maas yaʼab baʼaxoʼob k-beetik utiaʼal ka xiʼikoʼon teʼ muchʼtáambaloʼoboʼ, maas nojoch baʼal u yilik le yaabilaj k-eʼesiktiʼoʼ (Mar. 12:41-44).

14. ¿Bix u yáantkoʼon le baʼax tu beetaj Jesusoʼ?

¹⁴ Jesuseʼ tu yeʼesaj bix unaj k-xupikba utiaʼal k-áantik u maasil yéetel yaabilaj. Maʼ chéen le úuchik u tsʼáaik u kuxtal tu yoʼolal u disipuloʼoboʼ, baʼaxeʼ tumen tu tsʼáaj táanil u yutsil u maasil sáamsamal. Letiʼeʼ ku muchʼkuba tu yéeteloʼob kex jach táaj kaʼanaʼan wa jach chiʼichnak yoʼolal baʼax ku yúuchultiʼ (Luc. 22:39-46). Maʼ chʼíik tuukul tiʼ baʼax jeʼel u tsʼaʼabaltiʼeʼ, baʼaxeʼ tiʼ baʼax jeʼel u páajtal u tsʼáaik tiʼ u maasileʼ (Mat. 20:28). Wa k-yaabiltmaj Jéeoba yéetel k-sukuʼunoʼobeʼ yaan k-beetik tuláakal le ku páajtal utiaʼal k-bin tu Ookʼin Janal Yuumtsil bey xan tiʼ u maasil muchʼtáambaloʼoboʼ.

15. ¿Máaxoʼob jach unaj k-ilik k-áantkoʼob?

¹⁵ Toʼoneʼ tiʼ yanoʼon ichil le máaxoʼob jach tu jaajil táan u adorartikoʼob Jéeobaoʼ, le oʼolal k-xupik k-tiempo yéetel kiʼimak óolal utiaʼal  k-invitartik u maasil máakoʼob u adorartoʼob xan Dios. Baʼaleʼ maases k-ilik k-áantik «le sukuʼunoʼob yéetel le kiikoʼob» u xulmaj u meyajtikoʼob Jéeobaoʼ (Gal. 6:10). K-eʼesik k-yaabiltmoʼob kéen k-líiʼs u yóoloʼob utiaʼal ka taalakoʼob teʼ muchʼtáambaloʼoboʼ, maases utiaʼal le Kʼaʼajsajiloʼ. Jeʼex Jéeoba yéetel Jesuseʼ, jach ku kiʼimaktal k-óol kéen k-il u natsʼkubaʼob yiknal Jéeoba, le j-Kanan taman yéetel k-Taata jach u yaabiltmoʼonoʼ (Mat. 18:14).

16. 1) ¿Baʼax unaj k-paklan líiʼsik k-óol k-beete, yéetel bix u yáantkoʼon le muchʼtáambaloʼoboʼ? 2) ¿Baʼaxten maʼalob k-kʼaʼajsik bejlaʼa le baʼax tu yaʼalaj Jesús teʼ Juan 3:16?

¹⁶ Teʼ semanaʼob ku taaloʼ unaj k-ilik k-invitartik le bukaʼaj máakoʼob ku páajtal utiaʼal ka u láakʼintoʼonoʼob teʼ Kʼaʼajsajil kun beetbil tu áakʼabil viernes 19 tiʼ abril tiʼ 2019 (ilawil le cuadro « ¿Yaan wa k-invitartik uláakʼ máakoʼob?»). Tsʼoʼoleʼ tu yáamil le jaʼaboʼ, unaj k-paklan líiʼsik k-óol utiaʼal ka xiʼikoʼon mantatsʼ teʼ muchʼtáambaloʼoboʼ. Táan u bin u náatsʼal u kʼiinil le xuʼulsajiloʼ. Le oʼolal unaj k-bin teʼ muchʼtáambaloʼoboʼ, tumen ku yáantkoʼonoʼob utiaʼal maʼ u xuʼulul k-eʼesik kabal k-óol, maʼ saajkoʼoniʼ yéetel k-eʼesik yaabilaj (1 Tes. 5:8-11). Unaj k-eʼesik tiʼ Jéeoba jach k-tsʼáaik u graciasil tiʼ yoʼolal le yaabilaj ku yeʼesiktoʼonoʼ bey xan le ku yeʼesiktoʼon u Hijooʼ (xok Juan 3:16).