LE TÁAN u kʼuchul le barco de vapor tu jaʼil Belfast Lough tu mesil mayo tiʼ 1910, le u chan múuchʼ máaxoʼob ku viajaroʼoboʼ táan u chaʼantikoʼob le jatsʼuts witsoʼob ku juʼulul tumen le Kʼiin táant u tíipʼiloʼ. Charles Taze Russell, juntúul tiʼ le máaxoʼob ku viajaroʼoboʼ, u cinco u téenel u bin tu islail Irlandaoʼ. Le tuʼux kʼáatmáanoʼ tu yilaj kaʼapʼéel nukuch barcoʼob táan u beetaʼaloʼob: junpʼéeleʼ Titanic, le búul ka máan kʼiinoʼ, le uláakʼoʼ Olympic. * Ka tsʼoʼok u kʼáatmáan teʼ tuʼux ku beetaʼal le barcoʼobaʼ, kʼuch tuʼux ku páaʼtaʼal tumen kex doce u túulal j-Xoknáaloʼob tiʼ le Biblia teʼ muelleoʼ.

Le sukuʼun Russelloʼ tsʼoʼok óoliʼ veinte años káajak u bin yaanal luʼumiloʼob utiaʼal u kʼaʼaytik le maʼalob péektsiloʼ. Le yáax tuʼux binoʼ Irlanda, tu mesil julio tiʼ 1891. Le tiaʼan teʼ barco City of Chicagooʼ, tu yilaj bix u tʼúubul le Kʼiin le táan u náatsʼal le barco tu jáal u jaʼil Queenstownoʼ (bejlaʼeʼ Cóbh). Maʼ xaaneʼ teʼ súutukoʼ kʼaʼajtiʼ baʼax wal tsikbaltaʼantiʼ tumen u taataʼob yoʼolal u kaajaloʼobeʼ. Ka tu xíimbaltoʼob le kaajoʼoboʼ tu tsʼáajoʼob cuenta yaʼab máax u kʼáat u kan u jaajil.

Russelleʼ siete u téenel tu xíimbaltaj Irlanda. Le bix kʼaʼamik le maʼalob péektsil le ka yáax binoʼ áantajnaj utiaʼal u taaktal u yuʼubaʼal u tsoltʼaanoʼob tumen u cientosil máakoʼob, yaan kʼiineʼ u milesil, jeʼex le ka bin tu kaʼatéenoʼ. Tu mesil mayo tiʼ 1903, le u kaʼatéen úuchik u binoʼ, tu máansaj tsoltʼaanoʼob tu kaajil Belfast yéetel Dublín; leloʼobaʼ anunciartaʼab tiʼ yaʼab periodicoʼob. Russelleʼ tu tsikbalteʼ le máaxoʼob tu muchʼubaʼoboʼ «jach tu chʼenxikintoʼob le tsoltʼaan» tuʼux tu tsolaj bix úuchik u yeʼesik u fe Abrahán yéetel le bendicionoʼob ken u kʼam wíinik maʼ kun xáantaloʼ.

Le ka bin Russell tu yóoxtéen Europaeʼ, bin xan tu islail Irlanda, tumen yaʼab máax taak u kaanbaliʼ. Ka kʼuch junpʼéel u jaʼatskabil abril tiʼ 1908, jóokʼ kʼambil teʼ muelle tumen cinco u túulal sukuʼunoʼoboʼ. Tu chíinil kʼiin túuneʼ tu máansaj le tsoltʼaan anunciartaʼanoʼ: «Bix kun xuʼulsbil tiʼ u gobierno Satanás». Bin «kex trescientos máakoʼob uʼuyik». Juntúul máakeʼ tu yaʼalaj maʼ jaaj le baʼaxoʼob ku kaʼansikoʼ, Russell túuneʼ tu tsolajtiʼ yéetel le Biblia utiaʼal u yeʼesik jaajtakoʼ. Tu kaajil Dublineʼ, juntúul máak jach kʼasaʼan, ku kʼaabaʼtik OʼConnor, u secretarioil le Asociación Cristiana de Jóvenes (YMCA, bey kóomkintaʼanil u kʼaabaʼ ich inglés), tu yóotaj u beet u líikʼil kex mil u túulal máakoʼob tu contra le j-Xoknáaloʼob tiʼ le Bibliaoʼ. ¿Baʼax túun úuchi?

Koʼox máansik t-tuukul baʼax úuch teʼ kʼiin jeʼeloʼ. Juntúul máak taak u kanik u maasil tiʼ le Bibliaoʼ bin u yuʼub le tsoltʼaan anunciartaʼab teʼ periódico The Irish Times. Ka kʼucheʼ chuup, istikyaj úuchik u kaxtik tuʼux u kutal. Ka joʼopʼ u jach chʼenxikintik le máax máansik le tsoltʼaanoʼ, juntúul máak sak u tsoʼotsel u pool bey xan u meʼex; boox u nookʼ yéetel maʼatech u xuʼulul u péeksik u kʼab yéetel táan u máan u xíimbal teʼ plataformaoʼ. Ku bin u nupik baʼax ku yaʼalik junpʼéel teksto yéetel uláakʼ teksto, le oʼolal le máakoʼ ku bin u maas naʼatik le baʼax ku yaʼalik le Bibliaoʼ. Kex minaʼan u microfonoeʼ ku yuʼubaʼal baʼax ku yaʼalik ichil tuláakal le najoʼ, le máakoʼob túunoʼ ku búuyul u yuʼuboʼob baʼax ku yaʼalik ichil junpʼéel hora yéetel táanchumuk. Ka tsʼoʼokeʼ, le táan u beetaʼal kʼáatchiʼob tumen  le máakoʼoboʼ, OʼConnor yéetel u amigoʼobeʼ joʼopʼ u beetkoʼob kʼáatchiʼob utiaʼal u yeʼeskoʼob maʼ jaaj baʼax ku kaʼansik le máax máansik le tsoltʼaanoʼ. Baʼaleʼ letiʼeʼ ku núukik jach tubeel yéetel le Biblia le baʼax ku kʼáataʼaltiʼoʼ. Le máaxoʼob muchʼukbaloʼoboʼ ku papaxkʼaboʼob yéetel kiʼimak óolal. Ka jéetsʼ tuláakaleʼ le máak t-aʼalaj tu káajbaloʼ tu natsʼuba u kʼáat uláakʼ baʼaloʼob tiʼ le sukuʼunoʼoboʼ. Yaan máaxoʼob aʼalikeʼ yaʼab máakoʼob kan u jaajil beyoʼ.

Tu mesil mayo tiʼ 1909, le sukuʼun Russelloʼ naʼak teʼ barco Mauretania lukʼ Nueva Yorkoʼ ka bin Irlanda tu kantéen. Teʼ viajeaʼ láakʼintaʼab tumen sukuʼun Huntsinger, letiʼeʼ u yojel taquigrafía. Beyoʼ le táan u binoʼoboʼ jeʼel u páajtal u dictartiktiʼ u xookiloʼob U Pʼíich Tulumil Kanan utiaʼal ka u tsʼíibtoʼ. Le ka kʼuchoʼob Belfastoʼ, Russelleʼ tu máansaj junpʼéel tsoltʼaan tu táan 450 máakoʼob, ichiloʼobeʼ kex 100 u túulal pʼáatoʼob waʼataliliʼ, tumen maʼ anchaj tuʼux u kutaloʼobiʼ.

Le u cinco u téenel ka binoʼ, le t-aʼalaj tu káajbaloʼ, yaʼab xan máaxoʼob kʼam le baʼax tu kaʼansoʼ. Ka tsʼoʼok u máansik le tsoltʼaan tu kaajil Dublinoʼ, sukuʼun Russelleʼ tu núukaj tuláakal le kʼáatchiʼob beetaʼab tiʼ tumen juntúul teólogo jach kʼaj óolaʼan u yéet bin OʼConnor. Le máaxoʼob binoʼoboʼ jach jatsʼuts tu yuʼubiloʼob le baʼax kaʼansaʼaboʼ. Ka sáaschaj tuláakʼ kʼiineʼ Russell yéetel le máaxoʼob láakʼintikoʼ naʼakoʼob teʼ barco bisik correoʼob tu kaajil Liverpooloʼ. Naʼakoʼob teʼ barco Lusitaniaoʼ, ka binoʼob Nueva York. *

Tu añoil 1911, kaʼatéen bin sukuʼun Russell tu islail Irlanda. Teʼ kʼiinoʼob jeʼeloʼ tu máansaj tsoltʼaanoʼob tsʼokaʼaniliʼ u yáax anunciartaʼaloʼobeʼ. Tu mesil abrileʼ 20 u túulal j-Xoknáaloʼob tiʼ le Bibliaoʼ tu kʼamoʼob 2,000 máakoʼob tu kaajil Belfast binoʼob u yuʼuboʼob le tsoltʼaan tu kʼaabaʼtaj «¿Baʼax ku yúuchul tiʼ máak kéen kíimik?». OʼConnoreʼ bin tak Dublín yéetel u nojchil junpʼéel religión, tu kaʼatúulaloʼobeʼ tu beetoʼob yaʼab kʼáatchiʼob. Le máaxoʼob yanoʼoboʼ jatsʼuts úuchik u yuʼubikoʼob u núukaʼal le kʼáatchiʼob yéetel le Bibliaoʼ. Ichil u mesil septiembre yéetel octubreeʼ, Russelleʼ tu xíimbaltaj uláakʼ kaajoʼob, teʼeloʼ yaʼab máakoʼob binoʼob u yuʼuboʼob le baʼax tu kaʼansoʼ. OʼConnor yéetel uláakʼ 100 máakoʼobeʼ binoʼob tu kaʼatéen u beetoʼob u xuʼulul le muchʼtáambal beetaʼab Dublinoʼ, baʼaleʼ le muchʼukbaloʼoboʼ tu tsʼáajubaʼob tu tséel le máax ku kaʼansajoʼ.

Teʼ kʼiinoʼob jeʼeloʼ sukuʼun Russell máansik le tsoltʼaanoʼoboʼ, kex beyoʼ tu yaʼaleʼ «mix máak maas kʼaʼanaʼan utiaʼal u beetik», tumen «le meyajaʼ maʼ utiaʼal wíinikiʼ, baʼaxeʼ utiaʼal Dios». Le muchʼtáambal utiaʼal tuláakal ku beetaʼal teʼ kʼiinoʼobaʼ káaj u beetaʼal yéetel le tsoltʼaanoʼob kʼaʼaytaʼab tiʼ periodicoʼob máansaʼab tumen le sukuʼun Russelloʼ; leloʼobaʼ jach áantajnajoʼob utiaʼal u tsoʼolol le baʼaxoʼob ku kaʼansik le Bibliaoʼ. Bey túunoʼ anchaj múuchʼuliloʼob tiʼ jejeláas kaajoʼob yéetel áantajnaj utiaʼal u kʼaj óoltaʼal u jaajil tu islail Irlanda. (Le baʼaxoʼob k-líiʼsmaj Gran Bretañaoʼ.)