1, 2. 1) ¿Baʼaxten kʼaʼabéet k-antal naatsʼ tiʼ Jéeoba mantatsʼ? 2) ¿Baʼax ken k-il teʼ xookaʼ?

CHÉEN Dios yaan tuláakal páajtalil tiʼ, jach yaan u naʼat yéetel u yaabilaj. Le oʼolal jach maʼalob ka náatsʼkoʼon tu yiknal mantatsʼ (Sal. 96:4-6). Kex beyoʼ jujuntúul máaxoʼob meyajtik Jéeobaeʼ ku xuʼulul u tsʼáaikubaʼob tu tséel.

² Teʼ xookaʼ yaan k-ilik baʼax tu beetaj jujuntúul máaxoʼob ku yaʼalikoʼob tiaʼanoʼob tu tséel Jéeobaeʼ, baʼaleʼ láayliʼ táan kaʼach u beetkoʼob baʼax kʼaaseʼ. Lelaʼ yaan u yáantkoʼon utiaʼal ka chúukpajak k-óol k-meyajt Jéeoba.

3. ¿Baʼaxten tsolnuʼuktaʼab Caín tumen Jéeoba, yéetel baʼax aʼalaʼabtiʼ?

³ Koʼoneʼex ilik baʼax úuch tiʼ Caín. Letiʼeʼ ku yaʼalik kaʼacheʼ Jéeoba ku adorartik, maʼ yaanal diosiʼ. Baʼaleʼ Jéeobaeʼ maʼ tu kʼamaj u adoracioniʼ, tumen tu yilaj yaan baʼax kʼaas tu puksiʼikʼal (1 Juan 3:12). Le oʼolal tu yaʼalajtiʼeʼ wa ku kʼexik bix u tuukul utiaʼal u beetik baʼax maʼalobeʼ jeʼel u kaʼa kʼamkeʼ. Baʼaleʼ tu yaʼalaj xan tiʼeʼ, wa maʼ tu beetkeʼ yaan u lúubul tiʼ kʼeban. Tsʼoʼoleʼ ka tu yaʼalajtiʼ: «Techeʼ jeʼel u páajtal a tʼonaʼankuntik  loʼobaleʼ» (Gén. 4:6, 7). Teʼelaʼ Jéeobaeʼ táan kaʼach u yaʼaliktiʼeʼ, wa ku arrepentir yéetel ku tsʼáaikuba tu tséeleʼ, letiʼeʼ maʼ ken u pʼate.

4. ¿Baʼax tu beetaj Caín le ka anchaj u páajtalil u tsʼáaikuba tu tséel Jéeobaoʼ?

⁴ Caíneʼ chéen jeʼel u kʼaʼamal tumen Dios wa ku kʼexik u tuukuleʼ. Baʼaleʼ maʼ tu beetaj le baʼax tu yaʼalaj Jéeobaoʼ. Baʼaxeʼ tu beetaj le baʼax kʼaas ku tuklik kaʼachoʼ (Sant. 1:14, 15). Maʼ xaaneʼ tu táankelmil Caíneʼ maʼ tu tuklaj wa yaan u kʼuchul u kʼiinil u tsʼáaikuba tu contra Jéeobaiʼ. Baʼaleʼ tu beetaj yéetel tu kíimsaj tak u yíitsʼin.

5. ¿Baʼax jeʼel u beetik k-náachtal tiʼ Jéeobaeʼ?

⁵ Jeʼex Caíneʼ, maʼ xaaneʼ juntúul sukuʼuneʼ ku yaʼalik táan u adorartik Dios, baʼaleʼ táan xan u beetik baʼax kʼaas (Jud. 11). Maʼ xaaneʼ jach ku jóokʼol kʼaʼaytaj yéetel ku bin tiʼ tuláakal le muchʼtáambaloʼoboʼ, baʼaleʼ suuk u náaysik u yóol yéetel baʼaloʼob yaan yil yéetel núupkʼeban, ku tsʼíiboltik ayikʼaliloʼob yéetel ku pʼektik wa máax (1 Juan 2:15-17; 3:15). Tuláakal lelaʼ jeʼel u beetik u kʼebantaleʼ. Maʼ xaaneʼ mix máak u yojel baʼax k-tuklik wa baʼax k-beetik, baʼaleʼ Jéeobaeʼ ku yilik yéetel u yojel wa jach tu jaajil tiaʼanoʼon tu tséeleʼ wa maʼ (xok Jeremías 17:9, 10).

6. ¿Bix u yáantkoʼon Jéeoba k-tsʼáanchaʼat le kʼaasoʼ?

⁶ Kex beyoʼ Jéeobaeʼ maʼatech u jáan tukultik wa tsʼoʼoktoʼon beyoʼ. Wa ku yilik táan k-náachtal tiʼ letiʼeʼ ku yaʼaliktoʼon: «¡Suunakeʼex tiʼ teen, teen xaneʼ bíin suunaken tiʼ teʼex!» (Mal. 3:7). Letiʼeʼ u kʼáat ka náachchajkoʼon tiʼ baʼax kʼaas, maases wa yaan baʼax maʼ maʼalob táan k-ilik k-pʼatkiʼ (Isa. 55:7). Wa k-beetkeʼ, Jéeobaeʼ yaan u yáantkoʼon yéetel yaan u tsʼáaiktoʼon u muukʼil utiaʼal k-tsʼáanchaʼatik le kʼaasoʼ (Gén. 4:7).

7. ¿Baʼax beet u xuʼulul u biskuba Salomón yéetel Jéeoba?

⁷ Le baʼax úuch tiʼ rey Salomonoʼ yaʼab baʼax ku kaʼansiktoʼon. Tu táankelmileʼ tu kʼáataj áantaj tiʼ Jéeoba utiaʼal ka tsʼaʼabak naʼat tiʼ, tsʼoʼoleʼ aʼalaʼabtiʼ ka u beet junpʼéel nojoch templo tu kaajil Jerusalén. Chéen baʼaleʼ Salomoneʼ xuʼul u biskuba yéetel Jéeoba (1 Rey. 3:12; 11:1, 2). U Ley Dioseʼ ku yaʼalik kaʼach tiʼ le reyoʼoboʼ maʼ unaj u tsʼoʼokol u beeloʼob yéetel yaʼab koʼoleloʼob utiaʼal maʼ u náachtaloʼob tiʼiʼ (Deu. 17:17). Baʼaleʼ Salomoneʼ maʼ tu yuʼubaj tʼaaniʼ, tsʼoʼok u beel yéetel 700 koʼoleloʼob, tsʼoʼoleʼ kajlaj yéetel uláakʼ 300 (1 Rey. 11:3). Yaʼab tiʼ le koʼoleloʼobaʼ maʼ israelitaʼobiʼ yéetel ku adorartikoʼob yaanal diosoʼob. Bey túunoʼ Salomoneʼ tsʼoʼok u beel yéetel koʼoleloʼob táanxel luʼumil u taaloʼob, kex le Ley ku yaʼalik maʼ unaj u beetik kaʼachoʼ (Deu. 7:3, 4).

8. ¿Baʼaxoʼob tu beetaj Salomón maʼ utschaj tu tʼaan Jéeobaiʼ?

⁸ Jujunpʼíitileʼ Salomoneʼ xuʼul u yaabiltik u Leyoʼob Dios yéetel tu beetaj baʼaloʼob kʼaastak. Tu beetaj junpʼéel altar utiaʼal u adorartaʼal Astoret yéetel maʼ xaaneʼ tu beetaj uláakʼ junpʼéel utiaʼal u adorartaʼal dios Kemós. Tiʼ ku bin kaʼach adorar yéetel u yatanoʼobiʼ. Le altaroʼobaʼ tu beetaj yóokʼol junpʼéel wits yaan aktáan tiʼ Jerusalén, le tuʼux tu beetaj xan u templo Jéeobaoʼ (1 Rey. 11:5-8; 2 Rey. 23:13). Salomoneʼ tu tusuba, tumen tu tuklaj láayliʼ yaan u seguer u kʼaʼamal tumen Dios yoʼolal le siibaloʼob ku kʼubik kaʼach tiʼ teʼ templooʼ.

9. ¿Baʼax muʼyajiloʼob anchaj úuchik u náachtal Salomón tiʼ Dios?

⁹ Baʼaleʼ Dioseʼ maʼatech u chéen ilik u beetaʼal baʼax kʼaas. Le Bibliaoʼ ku yaʼalik: «Jéeobaeʼ jach pʼuʼuj yéetel Salomón  tumen u puksiʼikʼaleʼ táan kaʼach u bin u náachtal tiʼ Jéeoba [...], le máax tsʼoʼok kaʼatéen u chíikbeskuba tiʼoʼ, le máax tsʼokaʼaniliʼ u yáax aʼaliktiʼ maʼ u bin tu paach uláakʼ diosoʼoboʼ. Chéen baʼaleʼ letiʼeʼ maʼ tu beetaj le baʼax tu yaʼalaj Jéeobaoʼ». Yoʼolal le baʼax tu beetoʼ xuʼul u yáantaʼal yéetel u kʼaʼamal tumen Dios. Tsʼoʼoleʼ le reinooʼ jóokʼ kaʼa jaats tiʼ, bey túunoʼ u paalaloʼobeʼ maʼ reinarnajoʼob yóokʼol tuláakal u kaajil Israeliʼ, tsʼoʼoleʼ xáanchaj táan u muʼyajtikoʼob yaʼab baʼaloʼob (1 Rey. 11:9-13, TNM).

10. ¿Baʼax jeʼel u beetik u xuʼulul k-bisikba yéetel Jéeobaeʼ?

¹⁰ Jeʼex úuchik tiʼ Salomoneʼ, junpʼéel baʼax jeʼel u beetik k-náachtal tiʼ Jéeobaeʼ letiʼe k-bisikba yéetel máaxoʼob maʼ tu beetkoʼob baʼax uts tu tʼaanoʼ. Maʼ xaaneʼ yaan tiʼ letiʼobeʼ sukuʼunoʼob maʼ muʼukʼaʼan u fejoʼobiʼ, k-láakʼtsiloʼob, k-vecinoʼob, k-éet meyajoʼob wa k-éet xokoʼob maʼatech u meyajtikoʼob Jéeoba. Wa le máaxoʼob yéetel k-bisikba maʼatech u meyajtikoʼob Diosoʼ, kéen máanak kʼiineʼ yaan u beetkoʼob u xuʼulul k-bisikba maʼalob yéetel Jéeoba.

11. ¿Baʼax jeʼel u yáantkoʼon k-il wa unaj u xuʼulul k-bisikba yéetel wa máaxeʼ?

¹¹ (Xok 1 Corintoiloʼob 15:33.) U maas yaʼabil máakeʼ ku yeʼesik jatsʼuts modos yéetel maʼ tuláakal le máaxoʼob maʼatech u meyajtikoʼob Dios beetik baʼaloʼob kʼaastakoʼ. ¿Maʼalob wa túun ka k-bisba yéetel máaxoʼob beyoʼ? Unaj k-tuklik wa jeʼel u yáantkoʼonoʼob utiaʼal k-maas bisikba yéetel Jéeobaeʼ. Maʼalob ka k-il baʼax yaan tu puksiʼikʼaloʼob. ¿Chéen wa ku tʼaanoʼob tiʼ túumben nookʼoʼob, náaysaj óolaloʼob, taakʼin, celular wa uláakʼ baʼaloʼob koʼojtak? ¿Uts tu tʼaanoʼob wa u yaʼalikoʼob baʼal tiʼ u maasil wa u tsikbaltikoʼob baʼaloʼob suʼtsiltak chéen utiaʼal ka cheʼejtaʼak? Jesuseʼ tu yaʼalaj: «Tu chiʼ máak ku jóokʼol tuláakal baʼax yaan tu puksiʼikʼal» (Mat. 12:34). Wa k-ilik jeʼel k-náachkuntaʼal tiʼ Jéeoba tumen le máaxoʼob yéetel k-bisikbaoʼ, unaj u xuʼulul k-jach bisikba yéeteloʼob wa k-náachtal junpuliʼ tiʼ letiʼob (Pro. 13:20).

12. 1) ¿Baʼax tu yaʼalaj Jéeoba tiʼ le israelitaʼob le maʼ úuch jóokʼkoʼob Egiptooʼ? 2) ¿Baʼax tu yaʼalaj le israelitaʼob ka tu yaʼalaj Jéeoba u kʼáat ka adorartaʼak chéen letiʼoʼ?

¹² Le baʼax úuch tiʼ le israelitaʼob le maʼ úuch jóokʼkoʼob Egiptooʼ yaʼab baʼax jeʼel u kaʼansiktoʼoneʼ. Le ka kʼuchoʼob tu jáal u witsil Sinaíeʼ, Jéeobaeʼ tu beetaj junpʼéel milagro utiaʼal u yeʼesik tiaʼan tu táanoʼobeʼ: anchaj junpʼéel box múuyal, u kíilbal yéetel u léembal cháak,  joʼopʼ u jóokʼol buutsʼ yéetel u juum u yustaʼal junpʼéel baak (Éxo. 19:16-19). Teʼ kʼiin jeʼeloʼ Jéeobaeʼ tu yaʼalaj tiʼ le israelitaʼob u kʼáat ka adorartaʼak chéen letiʼoʼ. Tsʼoʼoleʼ tu yaʼalajtiʼobeʼ letiʼeʼ ku yeʼesik nojoch utsil tiʼ le máaxoʼob yaabiltmil yéetel ku beetkoʼob baʼax ku yaʼalikoʼ (xok Éxodo 20:1-6). U jaajileʼ táan u yaʼalik kaʼach tiʼobeʼ wa ku tsʼáaikubaʼob tu tséeleʼ, letiʼeʼ maʼ ken u pʼatoʼob. Wa tiaʼanoʼon kaʼach xaneʼ, ¿baʼax jeʼel k-beetik yoʼolal le baʼax tu yaʼalaj Jéeobaoʼ? Maʼ xaaneʼ láayliʼ yaan k-beetik jeʼex le israelitaʼoboʼ. Le Bibliaoʼ ku yaʼalikeʼ letiʼobeʼ «tu núukajoʼob yéetel junpʼéeliliʼ tʼaan: ‹Jeʼel k-beetik tuláakal le baʼax tsʼoʼok u yaʼalik Yuumtsiloʼ›» (Éxo. 24:3). Baʼaleʼ maʼ úuch tiʼ leloʼ, anchaj u yeʼeskoʼob wa chúukaʼan u yóoloʼob.

13. ¿Bix úuchik u yeʼesik le israelitaʼob minaʼan u fejoʼob tiʼ Jéeobaoʼ?

¹³ Le israelitaʼoboʼ sajakchajoʼob ka tu yiloʼob le box múuyaloʼ, u léembal le cháak yéetel u maasil baʼaloʼob eʼes bukaʼaj páajtalil yaan tiʼ Diosoʼ. Le oʼolal tu yaʼaloʼob tiʼ Moisés ka xiʼik tʼaan yéetel Jéeoba (Éxo. 20:18-21). Letiʼ túuneʼ naʼak teʼ tu witsil Sinaíoʼ, xáanchaj tiaʼaniʼ. Tumen minaʼan ichiloʼob le máax nuʼuktikoʼoboʼ, tu tukloʼob tsʼoʼok u xúumpʼattaʼaloʼob teʼ desiertooʼ. Lelaʼ tu yeʼeseʼ chéen yoʼolal Moisés ku tsʼáaik u fejoʼob tiʼ baʼax ku yaʼalik Jéeoba. Le oʼolaleʼ náak u yóoloʼob, ka tu yaʼaloʼob tiʼ Aarón: «Beettoʼon [juntúul dios] utiaʼal u [nuʼukt] k-beel, tumen maʼ k-ojel baʼax tsʼoʼok u yúuchul tiʼ Moisés[,] le máax jóoʼsoʼon Egiptoeʼ» (Éxo. 32:1, 2).

14. 1) ¿Bix úuchik u tuskuba le israelitaʼoboʼ? 2) ¿Baʼax tu tuklaj u beetik Jéeoba?

¹⁴ Le israelitaʼoboʼ u yojloʼob junpʼéel nojoch kʼeban u adorartaʼal yaanal dios (Éxo. 20:3-5). Kex beyoʼ tu adorartoʼob juntúul chan wakax de oro. U yojloʼob maʼ uts tu tʼaan Diosiʼ, baʼaleʼ tu tusubaʼob úuchik u tuklikoʼob láayliʼ u tsʼaamubaʼob tu tséel Jéeoba kex táan u adorartikoʼob yaanal dioseʼ. Aaroneʼ kʼuch tak u yaʼaleʼ táan u beetkoʼob junpʼéel «kʼiinbesajil tiʼ u nojbeʼenil Yuumtsil». Baʼaleʼ Dioseʼ maʼ bey úuchik u yilkiʼ. Letiʼeʼ tu yaʼalaj tiʼ Moiseseʼ le israelitaʼoboʼ tsʼoʼok u kʼastal u tuukuloʼob yéetel bey tsʼoʼok u chʼaʼikoʼob yaanal bejeʼ. Jéeobaeʼ jach pʼuʼuj tu contraʼob, le oʼolal tu tuklaj u xuʼulsiktiʼob (Éxo. 32:5-10).

15, 16. ¿Bix tu yeʼesil Moisés yéetel Aarón tiaʼanoʼob tu tséel Jéeobaeʼ? (Ilawil le dibujo yaan tu káajbal le xookaʼ.)

¹⁵ Tu yoʼolal u chʼaʼ óotsilal Jéeobaeʼ tu chʼaʼtuklaj maʼ u xuʼulsik tuláakal le israelitaʼoboʼ. Tu tsʼáaj u páajtalil u yeʼesik le máaxoʼob chúukaʼan u yóoloʼob u tsʼaamubaʼob tu tséeloʼ (Éxo. 32:14). Ka tu yilaj Moisés táan u yóokʼot, táan u kʼaayoʼob yéetel táan yawat le israelitaʼob tu táan le chan wakax de orooʼ, tu xiixkuntaj. Tsʼoʼoleʼ ka tu yaʼalaj: «Le máaxoʼob yanoʼob tu tséel Yuumtsileʼ u muchʼubaʼob tin wiknal. Tuláakal le levitaʼob[oʼ] tu muchʼubaʼob yéetel» (Éxo. 32:17-20, 26).

¹⁶ Kex Aarón beet le chan wakaxoʼ, arrepentirnaji, ka tu tsʼáajuba tu tséel Jéeoba yéetel u maasil levitaʼoboʼ. Letiʼobeʼ maʼ chéen tu tsʼáajubaʼob tu tséel Diosiʼ, baʼaxeʼ lukʼoʼob ichil u maasil israelitaʼob kʼebanchajoʼoboʼ. Le baʼax tu beetoʼoboʼ jach maʼalob, tumen teʼ kʼiinoʼ kíim u milesil israelitaʼob úuchik u adorartikoʼob le chan wakaxoʼ. Baʼaleʼ le máaxoʼob tu tsʼáajubaʼob tu tséel Jéeobaoʼ aʼalaʼab yaan u bendecirtaʼaloʼob (Éxo. 32:27-29).

17. ¿Baʼax ku kaʼansiktoʼon le baʼax tu yaʼalaj Pablo le ka tʼaanaj tiʼ le chan wakax de orooʼ?

¹⁷ Ka tʼaanaj apóstol Pablo tiʼ le chan  wakax de orooʼ, tu yaʼalaj: «Le baʼaloʼobaʼ úuchoʼob utiaʼal ka kaanbalnakoʼon, utiaʼal maʼ [...] k-adorartik beetbil diosoʼob jeʼex tu beetil jujuntúul tiʼ letiʼobeʼ». Tsʼoʼoleʼ tu yaʼaleʼ le baʼaloʼob tsʼíibtaʼaboʼ beetaʼab «utiaʼal ka k-kanáant maʼ u yúuchultoʼon beyoʼ». Le oʼolal ka tsʼoʼokeʼ tu yaʼalaj: «Le máax ku tuklik waʼalakbal maʼalobeʼ, u kanáant maʼ u lúubul» (1 Cor. 10:6, 7, 11, 12). Jeʼex úuchik u yaʼalik Pablooʼ, tak le máaxoʼob adorartik Dios jeʼel u beetkoʼob baʼax maʼ maʼalobeʼ. Le máaxoʼob ku beetkoʼob baʼax kʼaasoʼ, maʼ xaneʼ ku tuklikoʼobeʼ láayliʼ táan u biskubaʼob yéetel Jéeobaeʼ. Baʼaleʼ kex juntúul máak ku yaʼalik táan u biskuba yéetel Dios wa ku yaʼalik chúukaʼan u yóol tiʼeʼ, maʼ u kʼáat u yaʼal wa jach tu jaajil kʼamaʼan tumen Diosiʼ (1 Cor. 10:1-5).

18. ¿Baʼax jeʼel u beetik k-náachtal tiʼ Jéeobaeʼ, yéetel baʼaxoʼob jeʼel tak k-beetkeʼ?

¹⁸ Jeʼex tsʼoʼok k-ilkoʼ, le israelitaʼoboʼ náak u yóoloʼob ka tu yiloʼob tsʼoʼok u xáantal Moisés tu witsil Sinaí. Bejlaʼa xaneʼ, maʼ xaaneʼ jeʼel u náakal k-óol tumen tsʼoʼok u xáantal maʼ kʼuchuk le xuʼulsajil ku yaʼalik Jéeoba utiaʼal u tsʼáaik le túumben luʼumoʼ. Maʼ xaaneʼ jeʼel k-tuklik yaʼab u bin u kʼuchul u kʼiinil u yúuchloʼobeʼ wa maʼ xaaneʼ jeʼel k-tuklik maʼ kun béeytaloʼobeʼ. Wa maʼ k-kanáantikbaeʼ, le baʼaloʼob beyaʼ jeʼel u beetik k-tsʼáaik táanil le baʼaloʼob ku tsʼáaik le yóokʼol kaaboʼ. Kéen máanak kʼiineʼ jeʼel k-náachtal tiʼ Dioseʼ yéetel jeʼel k-beetik tak baʼaloʼob mix juntéen k-tukultmaj wa jeʼel k-beetik kaʼacheʼ.

19. ¿Baʼax maʼ unaj u tuʼubultoʼoniʼ, yéetel baʼaxten?

¹⁹ Maʼ unaj u tuʼubultoʼoneʼ Jéeobaeʼ u kʼáat ka k-adorart chéen letiʼ yéetel ka k-uʼuy u tʼaan (Éxo. 20:5). Wa maʼ k-beetik baʼax uts tu tʼaan Dioseʼ, u jaajileʼ táan k-beetik baʼax uts tu tʼaan Satanás, lelaʼ jeʼel u beetik u bintoʼon kʼaasileʼ. Le oʼolal Pabloeʼ ku kʼaʼajsiktoʼon: «Maʼ tu páajtal a wukʼikeʼex le baʼax yaan tu copa Jéeoba wa táan a wukʼikeʼex le baʼax yaan tu copa le demonioʼoboʼ; maʼ tu páajtal a jaantkeʼex le baʼax yaan yóokʼol ‹u mesa Jéeoba› wa táan a jaantkeʼex le baʼax yaan yóokʼol u mesa le demonioʼoboʼ» (1 Cor. 10:21).

20. ¿Bix jeʼel u yáantkoʼon Jéeoba kéen k-beet baʼax maʼ maʼalobeʼ?

²⁰ U tsikbalil u kuxtal Caín, Salomón yéetel le israelitaʼoboʼ junpʼéeliliʼ baʼax ku kaʼansiktoʼon. Letiʼobeʼ jeʼel u páajtal kaʼach u arrepentiroʼob utiaʼal u beetkoʼob baʼax maʼalobeʼ (Bax. 3:19). Leloʼ ku yeʼesikeʼ Jéeobaeʼ maʼatech u jáan tuklik wa tsʼoʼok tiʼ máak kéen u beet baʼax maʼ maʼalobiʼ. Kʼaʼajaktoʼoneʼ tu perdonartaj Aarón. Bejlaʼa xaneʼ, Jéeobaeʼ ku tsoliktoʼon u nuʼuk yéetel le baʼaxoʼob ku yaʼalik le Bibliaoʼ, le publicacionoʼoboʼ wa yéetel baʼax ku yaʼalik juntúul sukuʼun. Wa k-beetik le baʼax ku yaʼalaʼaltoʼonoʼ, Jéeobaeʼ yaan u chʼaʼiktoʼon óotsilil.

21. ¿Baʼax kun kʼaʼabéettal k-beetik utiaʼal k-eʼesik chéen Jéeoba k-adorartik?

²¹ Jéeobaeʼ yaan baʼax oʼolal ku yeʼesiktoʼon u nojoch utsil (2 Cor. 6:1). Ku tsʼáaik u páajtalil «k-náachkuntikba tiʼ baʼaloʼob kʼaastak yéetel tiʼ luʼumkabil tsʼíibolaloʼob» (xok Tito 2:11-14). Bejlaʼeʼ yaʼab u téenel kun kʼaʼabéettal k-eʼesik wa chéen Dios k-adorartik. Le oʼolaleʼ unaj k-beetik tuláakal le ku páajtal utiaʼal k-tsʼáaikba tu tséel Jéeobaoʼ, tumen chéen letiʼ k-meyajtik, k-adorartik yéetel k-pʼáatal tu yiknal (Deu. 10:20).