ICHIL le Bibliaoʼ ku chíikpajal baʼaxoʼob tu yaʼalaj máaxoʼob tu yuʼububaʼob «jeʼex toʼoneʼ» (Sant. 5:17). Jeʼex apóstol Pabloeʼ tu yaʼalaj: «Le ken in wóot in beet baʼax maʼalobeʼ, ku kʼatkuba tin táan le baʼax maʼ maʼaloboʼ. [...] ¡Jach óotsilen!» (Rom. 7:21-24). Maʼ xaaneʼ toʼoneʼ bey k-uʼuyikbaoʼ. Kéen k-uʼuy yaan baʼax maʼ tu páajtal k-beetik yoʼolal le kʼebanoʼ, ku líikʼil k-óol kéen k-il le baʼaxoʼob tu yaʼaloʼ.

Baʼaleʼ Pabloeʼ tu yaʼalaj xan bix u yuʼubikuba yoʼolal le u kuxtal Jesús tu kʼuboʼ. Tiʼ Galaciailoʼob 2:20, tu yaʼalaj: «U Paal Diosoʼ [...] tu yaabilten yéetel tu kʼubaj u kuxtal tin woʼolal». Letiʼeʼ jach ku creertik yaabiltaʼan tumen Jesús. ¿K-creertik wa xan toʼon? Maʼ xaaneʼ yaan kʼiineʼ k-tuklik maʼ u yaabiltmoʼoniʼ.

Wa yaachajaʼan k-óol yoʼolal baʼaxoʼob maʼ maʼalobtak k-beetmeʼ, maʼ xaaneʼ jeʼel k-tuklik maʼ yaabiltaʼanoʼon tumen Jéeobaeʼ yéetel maʼ ken u perdonartoʼon. Lelaʼ maas jeʼel u beetik u talamtal k-creertik le u kuxtal Cristo tu kʼuboʼ junpʼéel siibal tu beetaj t-oʼolal. ¿Jach wa tu jaajil u kʼáat Jesús ka k-il t-oʼolal tu kʼubaj u kuxtaloʼ? ¿Baʼax jeʼel u yáantkoʼon utiaʼal k-ilik beyoʼ? Koʼoneʼex ilik u núukil le kaʼapʼéel kʼáatchiʼobaʼ.

Jesuseʼ u kʼáat ka k-il le u kuxtal tu kʼubaj bey junpʼéel siibal ku tsʼáaik tiʼ toʼoneʼ. ¿Bix k-ojéeltik? Koʼox máansik t-tuukul le baʼax ku yaʼalik Lucas 23:39 tak 43. Juntúul máak chʼuykíintaʼan teʼ cheʼ tu tséel Jesusoʼ ku yaʼalikeʼ u siʼipil ku boʼotik. Maʼ xaaneʼ le baʼax tu beetoʼ jach kʼaas, tumen le castigo ku tsʼaʼabaltiʼoʼ chéen tiʼ le máaxoʼob jach kʼasaʼanoʼob ku tsʼaʼabaloʼ. Tumen jach táan u muʼyaj yoʼolal le baʼax ku yúuchultiʼoʼ, tu kʼáat óoltaj tiʼ Jesús: «Kʼaʼajsen ken ookkech ta Reino».

¿Baʼax aʼalaʼab túun tiʼ tumen Jesús? Máans ta tuukul bukaʼaj yajil úuchik u sutik u pool utiaʼal u paktik le máakoʼ. Kex jach yaj baʼax ku yúuchultiʼeʼ, sam cheʼejnaj utiaʼal u yaʼalik tiʼ le máakoʼ: «Tu jaajil kin waʼaliktech bejlaʼeʼ: Yaan a wantal tin wéetel teʼ Paraísooʼ». Jesuseʼ jeʼel u páajtal kaʼach u yaʼalik tiʼ le máakoʼ, u Paal máakeʼ taal «utiaʼal u tsʼáaik u kuxtal bey junpʼéel boʼol utiaʼal u salvartaʼal yaʼab máakoʼobeʼ» (Mat. 20:28). Baʼaleʼ tu yáantaj le máak utiaʼal u yil tak tu yoʼolal letiʼ táan u kʼubik u kuxtaloʼ. Tu yaʼalajtiʼ: «Yaan a wantal tin wéetel». Tsʼoʼoleʼ ka tu yaʼalajtiʼ baʼax utsil ken u kʼam yoʼolal le u kuxtal Jesús tu kʼuboʼ: yaan u páajtal u kuxtal teʼ Paraíso way Luʼumoʼ.

Le kʼasaʼan máakoʼ maʼ anchaj mix u tiempoil u meyajtik Diosiʼ. Baʼaleʼ Jesuseʼ u kʼáat ka naʼataʼak tumen le máakoʼ, tak tu yoʼolal letiʼ tu kʼubaj u kuxtal. Bey túunoʼ, wa Jesús u kʼáat ka naʼataʼak tumen le máak lelaʼ, ¿maʼ wa maas u kʼáat ka naʼataʼak tumen juntúul máax meyajtik Dios yéetel okjaʼanajaʼaniʼ? Le oʼolaleʼ, ¿baʼax jeʼel u yáantkoʼon utiaʼal k-naʼatik le u kuxtal Jesús tu kʼuboʼ jeʼel u taasiktoʼon utsil kex k-beetmaj baʼaloʼob kʼaastak úuchjeakileʼ?

Pabloeʼ tu naʼataj kíim Jesús tu yoʼolal, tumen túuxtaʼab u kʼaʼayt le maʼalob péektsil tiʼ uláakʼ máakoʼoboʼ.  Tu yaʼalaj: «Kin tsʼáaik u diosboʼotikil tiʼ Cristo Jesús k-Yuumtsil, máax tu tsʼáajten páajtalil; tumen tu yilaj chúukaʼan in wóoleʼ tu kʼubéentajten junpʼéel meyaj, kex teen kaʼacheʼ kin tʼaan tu contra Dios, kin chʼaʼpachtik máaxoʼob meyajtik yéetel minaʼan in suʼtal» (1 Tim. 1:12-14). Úuchik u kʼubéentaʼaltiʼ le meyajoʼ le áant u naʼat ku chʼaʼabal óotsilil tiʼ tumen Jesús, yaabiltaʼan yéetel ku confiar tiʼ. Jesuseʼ tsʼoʼok xan u yaʼaliktoʼon ka k-kʼaʼayt u maʼalob péektsilil le Reinooʼ (Mat. 28:19, 20). ¿Máasaʼ lelaʼ ku yáantkoʼon xan k-il kíim Jesús t-oʼolal?

Lelaʼ bey úuchik tiʼ Albert, letiʼeʼ maʼ úuch suunak ichil u kaajal Jéeobaiʼ, xáanchaj óoliʼ treinticuatro años náachchajaʼan. Letiʼeʼ ku yaʼalik: «Maʼ tu tuʼubulten le baʼaxoʼob kʼaastak in beetmoʼ. Baʼaleʼ kéen jóokʼken kʼaʼaytajeʼ kin wuʼuyik Jesús kʼubéentmilten ka in beet, jeʼex kʼubéentaʼabik tiʼ Pablooʼ. Lelaʼ ku yáantken utiaʼal u kiʼimaktal in wóol, utiaʼal in tuukul tiʼ baʼaloʼob maʼalobtak, kin wuʼuyik yaan u biilal in kuxtal yéetel kin tuukul tiʼ le kuxtal minaʼan u xuul kun antal way Luʼumoʼ» (Sal. 51:3).

Allaneʼ jach séeb u baʼateʼel kaʼachi yéetel yaʼab uláakʼ baʼaloʼob kʼaastak tu beetaj táanil tiʼ u káajal u meyajtik Jéeoba. Letiʼeʼ ku yaʼalik: «Láayliʼ kʼajaʼanten le baʼaloʼob kʼaastak tin beetoʼ. Yaan kʼiineʼ jach ku lúubul in wóol. Baʼaleʼ jach kin tsʼáaik u graciasil tiʼ Jéeoba ikil u chaʼik in kʼaʼaytik le maʼalob péektsil tiʼ uláakʼ máakoʼob kex j-kʼebanenoʼ. Kéen in wil bix u kʼaʼamal le maʼalob péektsil tumen le máakoʼoboʼ ku kʼaʼajsikteneʼ Jéeobaeʼ jach uts yéetel jach u yaabiltmen. Letiʼeʼ ku tsʼáaikten u páajtalil in wáantik uláakʼ máakoʼob ku beetkoʼob baʼaloʼob kʼaastak, jeʼex in beetik kaʼachoʼ».

K-táakpajal teʼ kʼaʼaytajoʼ ku yáantkoʼon utiaʼal k-chʼíikil k-beet baʼax maʼalob yéetel utiaʼal k-tuukul tiʼ baʼaloʼob maʼalobtak. Ku yáantkoʼon k-il yaabiltaʼanoʼon tumen Jesús, ku chʼaʼiktoʼon óotsilil yéetel ku confiar tiʼ toʼon.

Maʼ xaaneʼ k-puksiʼikʼaleʼ láayliʼ ku beetik u yaatal k-óol yoʼolal le baʼaloʼob kʼaastak t-beetaj tu yóokʼol kaab Satanasoʼ. ¿Baʼax jeʼel u yáantkoʼon wa bey k-uʼuyikbaoʼ?

Jeaneʼ jach ku yaatal u yóol, tumen tu paalileʼ tu beetaj baʼaloʼob kʼaastak kex táan u meyajtik Jéeoba. Letiʼeʼ ku yaʼalik: «Teneʼ jach ku líiʼsik in wóol in wojéeltik ‹Dioseʼ maas nojoch tiʼ k-puksiʼikʼal›» (1 Juan 3:19, 20). Toʼoneʼ jach ku líikʼil xan k-óol kéen k-ojéelt Jéeoba yéetel Jesuseʼ u yojloʼob chéen kʼeban wíinikoʼon. Kʼaʼajaktoʼoneʼ letiʼe yaabilaj péeksoʼob utiaʼal u boʼotkoʼob u kʼeban le máaxoʼob arrepentirnajaʼanoʼoboʼ (1 Tim. 1:15).

Utiaʼal k-kʼamik u yutsil le boʼol beetaʼaboʼ unaj k-beetik kaʼapʼéel baʼal: yáaxeʼ, unaj k-tuukul tiʼ bix úuchik u tratartaʼal le kʼeban máakoʼob tumen Jesusoʼ, u kaʼapʼéeleʼ, unaj k-beetik tuláakal le ku páajtal utiaʼal k-tsʼoʼokbesik le meyaj u kʼubéentmajtoʼonoʼ. Beyoʼ yaan u béeytal k-aʼalik jeʼex Pabloeʼ: Jesuseʼ «tu yaabilten yéetel tu kʼubaj u kuxtal tin woʼolal».