¿Ta xokaj wa u tsʼook revistailoʼob U Pʼíich Tulumil Kanan? Wa beyoʼ, ilawil wa jeʼel a núukik le kʼáatchiʼobaʼ:

¿Máakalmáak le kanpʼéel baʼax jeʼel u yáantkech kʼaay tubeeloʼ?

Kʼaʼabéet a toj waʼatal yéetel a machik kaʼanal u libroil a kʼaay, a chúukaʼan chʼaʼik a wiikʼ, a japik a chiʼ tubeel yéetel a kʼaay kʼaʼam. Beyoʼ yaan u maas maʼalobtal bix a kʼaay (w17.11, táan juʼun 5).

¿Baʼax k-kanik tiʼ le kaajoʼob tsʼaʼab utiaʼal u taʼakikuba máakoʼ yéetel tiʼ le bix táaxkuntaʼanil u bejiloʼoboʼ?

Yaan kaʼach seis kaajoʼob ichil tuláakal u luʼumil Israel yéetel u bejiloʼobeʼ láaj táaxkuntaʼanoʼob. Beyoʼ séeb jeʼel u kʼuchul máak utiaʼal u taʼakikuba ichiloʼobeʼ (w17.11, táan juʼun 14).

¿Baʼaxten junpʼéel nojoch siibal le u kuxtal Jesús tu kʼuboʼ?

Tumen ku tsʼáaik u páajtalil k-kuxtal utiaʼal minaʼan u xuul bey xan k-jáalkʼabtaʼal tiʼ le kʼeban yéetel tiʼ le kíimiloʼ. Tumen u yaabiltmaj Dios u paalal Adaneʼ, tu tsʼáaj u kuxtal Jesús utiaʼal u jáalkʼabtikoʼob kex kʼebanoʼob (wp17.6, táan juʼun 6 yéetel 7).

¿Baʼaxten k-aʼalik Salmo 118:22, ku tʼaan tiʼ le úuchik u kaʼa kuxkíintaʼal Jesusoʼ?

Jesuseʼ maʼ kʼaʼam bey Mesíasileʼ, le oʼolal kíimsaʼabi. Bey túunoʼ kʼaʼabéet u kaʼa kuxtal utiaʼal u kʼuchul u beetuba «u noj tuunichil le chuunpakʼoʼ» (w17.12, táan juʼun 9 yéetel 10).

Úuchjeakileʼ ¿jach wa kʼaʼabéet u derechoil yáax paalil tiʼ juntúul israelita utiaʼal u taal le Mesías ichil u chʼiʼibaloʼ?

Yaan tiʼ le máaxoʼob táakpajoʼob ichil le chʼiʼibal tuʼux taal Jesusoʼ yáax paaloʼob, baʼaleʼ yanoʼobeʼ maʼatech. Le judíoʼoboʼ bey u creertikoʼob kaʼachoʼ, u yojloʼobeʼ le Cristooʼ bíin taalak tu chʼiʼibal David, u j-tʼuupil u paalal Jesé (w17.12, táan juʼun 14 yéetel 15).

¿Baʼax ku yaʼalik le Biblia unaj u beetaʼal utiaʼal maʼ u jach kʼojaʼantal máakoʼ?

Le Leyoʼ ku yaʼalikeʼ unaj u tsʼaʼabal junpáayil le máaxoʼob yaan junpʼéel pakʼbeʼen kʼojaʼanil tiʼoboʼ, ka u pʼoʼ u kʼab máak kéen u mach juntúul kimen yéetel ka u muk u taʼ máak. Ku yaʼalik xan ka circuncidartaʼak le mejen paalal ocho kʼiinoʼob síijkoʼoboʼ, teʼ kʼiinoʼob beyoʼ séeb u tattal u kʼiʼikʼeloʼob (wp18.1, táan juʼun 7).

¿Baʼaxten unaj u yaabiltikuba le máaxoʼob meyajtik Diosoʼ?

Tumen kʼaʼabéet k-yaabiltik u maasil jeʼex k-yaabiltikbaeʼ (Mar. 12:31). Le íichamtsiloʼob xanoʼ «unaj u yaabiltikoʼob u yatanoʼob jeʼex u yaabiltikoʼob u wíinkliloʼobeʼ» (Efe. 5:28). Baʼaleʼ unaj u kanáantik máak maʼ u píitmáan u yaabiltikuba (w18.01, táan juʼun 23).

¿Baʼax unaj k-beetik utiaʼal k-maas tsʼáaik k-óol k-meyajt Dios?

Unaj k-xokik le Bibliaoʼ, k-tuukul tiʼ le baʼax k-xokikoʼ yéetel k-tsʼáaik ichil k-kuxtal le baʼax k-kanikoʼ. Kʼaʼabéet k-chaʼik u nuʼuktikoʼon le kiliʼich muukʼoʼ yéetel k-kʼamik le áantaj ku tsʼáaiktoʼon u maasiloʼ (w18.02, táan juʼun 26).

¿Baʼaxten maʼ unaj u meyajtoʼon le astrología mix u jóoʼsaʼal k-suerte utiaʼal k-ojéeltik baʼax ku taal u kʼiinoʼ?

Jejeláas baʼax oʼolal, baʼaleʼ u maas kʼaʼanaʼanileʼ tumen ku bin tu contra le baʼax ku yaʼalik le Bibliaoʼ (wp18.2, táan juʼun 4 yéetel 5).

Kéen k-kʼam junpʼéel invitacioneʼ, ¿baʼaxten maʼ unaj k-kʼexikiʼ?

Kéen k-kʼam junpʼéel invitacioneʼ unaj k-ilik k-biniʼ (Sal. 15:4). Maʼ unaj k-kʼexik yéetel junpʼéel k-tuklik maas maʼalobiʼ. Tumen maʼ xaaneʼ le máax invitartoʼonoʼ yaʼab xuup tsʼoʼok u beetik utiaʼal u kʼamkoʼon (w18.03, táan juʼun 18).

¿Baʼax ku kanik le sukuʼunoʼob tiʼ Timoteooʼ?

Timoteoeʼ jach tu jaajil u yóol tu xupuba tu yoʼolal u maasil yéetel tu tsʼáaj táanil u meyajtik Dios. Tu tsʼáaj u yóol u meyajt Jéeoba yéetel tu beetaj le baʼax tu kanoʼ. Tu chaʼaj u nuʼuktaʼal tumen u kiliʼich muukʼ Jéeoba. Maʼ chéen le ancianoʼob unaj u beetkoʼob jeʼex Timoteooʼ, baʼaxeʼ tuláakal le sukuʼunoʼoboʼ (w18.04, táan juʼun 13 yéetel 14).