Junpʼéel maʼalob jooch
JESUSEʼ tu yaʼaleʼ le máaxoʼob tsaypachtikoʼ jach yaʼab jooch ken u beetoʼob teʼ tu tsʼook kʼiinoʼoboʼ (Mat. 9:37; 24:14). Lelaʼ táan u béeytal tiʼ jujunpʼéel kaajoʼob yaan Transcarpatia, tu luʼumil Ucrania. Óoxpʼéel tiʼ le kaajoʼobaʼ yaan 50 múuchʼuliloʼobiʼ yéetel maas tiʼ 5,400 j-kʼaʼaytajoʼobiʼ. * Tiʼ le jaytúul u kajnáaliloʼob le óoxpʼéel kaajoʼobaʼ, tiʼ cada kantúul máakeʼ yaan juntúul u j-jaajkunaj Jéeobaiʼ.
Juntúul sukuʼun ku kʼaabaʼtik Vasileeʼ ku yaʼalik yoʼolal le máakoʼob kajaʼanoʼob teʼeloʼ: «Le máakoʼoboʼ ku respetarkoʼob baʼax ku yaʼalik le Bibliaoʼ, ku yilik u beetkoʼob baʼax maʼalob, maʼalob u biskubaʼob ich familiail yéetel ku yilik u paklan áantkubaʼob. Yaan baʼaxoʼob k-kaʼansikeʼ maʼ bey u creertikoʼobiʼ, chéen baʼaleʼ kéen k-eʼestiʼob yéetel le Bibliaoʼ ku yuʼubikoʼob baʼax ka waʼalik».
Tumen yaʼab sukuʼunoʼob kajaʼanoʼob teʼeloʼ ku pʼáatal maʼ yaʼab tuʼux u kʼaʼaytajoʼobiʼ. Jeʼex tiʼ junpʼéel múuchʼulileʼ, 134 j-kʼaʼaytajoʼob yaniʼ, baʼaleʼ chéen 50 u pʼéelal najoʼob yaan utiaʼal u kʼaʼaytajoʼob. ¿Baʼax túun ku beetkoʼob utiaʼal u kʼaʼaytajoʼob?
Yaʼab sukuʼunoʼobeʼ ku xupkubaʼob utiaʼal u binoʼob kʼaʼaytaj tuʼux maas kʼaʼabéet. Ionash, juntúul sukuʼun yaan 90 años tiʼeʼ, ku yaʼalik: «T-múuchʼulileʼ tiʼ cada kaʼapʼéel najeʼ yaan juntúul j-kʼaʼaytajiʼ. Bejlaʼeʼ way tin kaajal kin kʼaʼaytajeʼ, chéen baʼaleʼ kaʼach maʼ jach kʼojaʼanchajkeneʼ kin bin xan kʼaʼaytaj tiʼ junpʼéel tuʼux maʼatech u jach úuchul kʼaʼaytajiʼ. Lelaʼ 40 leguas (160 kilómetros) náachil tiʼ in kaajal teʼ tuʼux ku tʼaʼanal hungarooʼ». Le sukuʼunoʼoboʼ jach ku xupkubaʼob utiaʼal u binoʼob tiʼ le mejen kaajoʼob beyaʼ. Ionasheʼ ku yaʼalik: «Kaʼacheʼ kin líikʼil láas cuatro jaʼatskab utiaʼal in bin tiʼ tren. Kéen kʼuchkeneʼ kin kʼaʼaytaj tak láas seis u chíinil Kʼiin, teʼ hora ku máan le tren utiaʼal in suut tin kaajaloʼ. Lelaʼ bey in beetik kaʼach kex kaʼatéen wa óoxtéen ichil junpʼéel semanaoʼ». ¿Bix u yuʼubikuba le sukuʼun yoʼolal le baʼax tu beetoʼ? Letiʼeʼ ku yaʼalik: «Jach kiʼimak in wóol, tumen páajchaj in bin kʼaʼaytajiʼ. Tsʼoʼoleʼ tin kaʼansaj u jaajil tiʼ junpʼéel tiʼ le familiaʼob kajaʼanoʼob teʼeloʼ».
Yaan sukuʼunoʼob teʼ múuchʼuliloʼobaʼ maʼ tu páajtal u binoʼob náach utiaʼal u kʼaʼaytajoʼob. Baʼaleʼ tuláakloʼob, tak le tsʼoʼok u chʼíijloʼoboʼ, ku beetkoʼob tuláakal le ku páajtal utiaʼal u kʼaʼaytajoʼob teʼ tuʼux kajaʼanoʼoboʼ. Le oʼolaleʼ tu añoil 2017, táanchumuk tiʼ u kajnáaliloʼob le óoxpʼéel kaajoʼobaʼ binoʼob teʼ Kʼaʼajsajiloʼ. Jeʼex túun k-ilkoʼ, jeʼel tuʼuxak kajaʼanoʼoneʼ jach yaan ‹yaʼab baʼal k-beet tu meeyjil Yuumtsil› (1 Cor. 15:58).
^ xóot’ol 2 Le kaajoʼobaʼ ku kʼaabaʼtikoʼob Hlybokyy Potik, Serednye Vodyane yéetel Nyzhnya Apsha.