BIX JEʼEL U XUʼULUL LE PʼEKTAJILOʼ
4 | Chaʼa u yáantkech Dios
Le Bibliaoʼ ku yaʼalik:
«Le espíritu santooʼ ku beetik u yantal tiʼ máak le modos jeʼelaʼ: yaabilaj, kiʼimak óolal, jeetsʼelil, paciencia, utsil puksiʼikʼal, utsil, fe, maʼ u séeb kʼuuxil máak yéetel u controlarkuba máak» (GÁLATAS 5:22, 23).
¿Baʼax u kʼáat u yaʼale?
Yéetel u yáantaj Dioseʼ jeʼel u xuʼulul k-pʼektik k-éet máakileʼ. Le espíritu santooʼ jeʼel u yáantkoʼon utiaʼal u yantaltoʼon jatsʼuts modoseʼ. Utiaʼal u xuʼulul k-pʼektik k-éet máakileʼ kʼaʼabéet k-chaʼik u yáantkoʼon Dios, chéen t-juunaleʼ maʼ t-páajtal. Wa k-chaʼik u yáantkoʼon Dioseʼ yaan k-aʼalik jeʼex apóstol Pabloeʼ: «Yaanten u muukʼil utiaʼal in beetik tuláakal baʼal, tu yoʼolal le máax tsʼáaikten u páajtalil in beetkoʼ» (Filipenses 4:13). Tsʼoʼoleʼ yaan xan u páajtal k-aʼalik: «Jéeoba kun áantken» (Salmo 121:2).
Ilawil a beetik lelaʼ:
«Kex jach kʼaas in pʼuʼujul kaʼacheʼ Jéeobaeʼ tsʼoʼok u beetken juntúul máak uts u modos» (WALDO).
Kʼáat tiʼ Jéeoba ka u tsʼáatech u espíritu santo utiaʼal u béeytal u yantaltech jatsʼuts modos (Lucas 11:13). Jatsʼuts modos jeʼex le yaabilaj, le jeetsʼelil, le paciencia yéetel u controlarkuba máakoʼ jach ku yáantajoʼob utiaʼal u xuʼulul u pʼektik máak u yéetel máakil. Xakʼalxokt baʼax ku yaʼalik le Biblia yoʼolal le modos tsʼoʼok k-aʼalikoʼ yéetel ilawil a weʼesik ichil a kuxtal. Bisaba xan yéetel le máaxoʼob ku tsʼáaik u yóol u yeʼesoʼob jatsʼuts modosoʼ, tumen letiʼobeʼ jeʼel u yáantkechoʼob a weʼes yaabilajeʼ bey xan a beetik baʼaloʼob maʼalobtak (Hebreos 10:24).
