¿Baʼaxten jach yaan pʼektajil?
¿Baʼaxten maʼ tu xuʼulul u pʼektikuba le máakoʼob way yóokʼol kaabeʼ? Utiaʼal k-naʼatikeʼ koʼoneʼex ilik baʼax le pʼektajiloʼ, bix u páakʼal tiʼ máak yéetel bix u kʼiʼitpajal tuláakal tuʼux.
¿Baʼax le pʼektajiloʼ?
Letiʼe baʼax péeksik máak u taas mix baʼalil u yéet máakiloʼ wa u pʼáatal mantatsʼ pʼujaʼan tu yéetel.
¿BIX U PÁAKʼAL TIʼ MÁAK?
Le máakoʼoboʼ yaʼab baʼax oʼolal ku káajal u pʼektikoʼob u yéet máakiloʼob. U suukileʼ juntúul máakeʼ ku káajal u pʼektik u yéet máakil yoʼolal bixiʼ, maʼ yoʼolal baʼax ku beetkiʼ. Maʼ xaaneʼ ku tuklikeʼ kʼasaʼan, jeʼel u beetik loobeʼ yéetel mix bikʼin ken u kʼex u kuxtal. Wa maʼ xaaneʼ ku tuklikeʼ mix baʼal tu tséel letiʼ yéetel chéen problemas ku taasik. Yanoʼob xaneʼ ku káajal u pʼektikoʼob u yéet máakiloʼob tumen beetaʼan loob tiʼ letiʼob wa táan u muʼyajoʼob yoʼolal uláakʼ wa baʼax.
¿BIX U KʼIʼITPAJAL TULÁAKAL TUʼUX?
Yaan kʼiineʼ le máakoʼoboʼ ku pʼektikoʼob tak máax maʼ u kʼaj óoloʼobiʼ. ¿Baʼaxten ku yúuchul leloʼ? Tumen maʼ xaaneʼ sin ke u tsʼáaikoʼob cuentaeʼ ku káajal u tuukuloʼob jeʼex u tuukul juntúul máak ku respetarkoʼob yéetel u yaabiltmoʼobeʼ.
Le kéen k-naʼat baʼaxten séeb u kʼiʼitpajal le pʼektajiloʼ k-naʼatik baʼaxten yaʼab máakeʼ u pʼekmaj u yéet máakil. Utiaʼal u xuʼulul u pʼektikuba máakeʼ kʼaʼabéet k-ilik bix káajik leloʼ. Le Bibliaoʼ ku tsolik.
LE BIBLIAOʼ KU TSOLIK BIX KÁAJIK LE PʼEKTAJILOʼ
MAʼ LETIʼE MÁAKOʼOB KÁAJS LE PʼEKTAJILOʼ. Le pʼektajiloʼ káaj teʼ kaʼanoʼ. Juntúul ángeleʼ líikʼ tu contra Dioseʼ ka kʼuch kʼaj óoltbil bey Satanás, le Kʼaasilbaʼaloʼ. Desde tu káajbaleʼ tu beetuba j-kiimsaj wíinik. Letiʼeʼ «chéen tuus ku jóokʼol tu chiʼ, letiʼ u taatail le tuusoʼ», le oʼolal uts tu tʼaan u pʼektikuba le máakoʼoboʼ yéetel u beetkoʼob loob (Juan 8:44; 1 Juan 3:11, 12). Le Bibliaoʼ ku yaʼalikeʼ le Kʼaasilbaʼaloʼ jach kʼasaʼan, jach tsʼíik yéetel ku beetik loob (Job 2:7; Apocalipsis 12:9, 12, 17).
LE MÁAKOʼOBOʼ SÉEB U KÁAJAL U PʼEKTIKOʼOB U YÉET MÁAKILOʼOB. Adán, le yáax máak kajlaj way Luʼumeʼ, tu beetaj jeʼex le Kʼaasilbaʼaloʼ, le oʼolal toʼoneʼ k-heredarmaj le kʼebanoʼ yéetel k-beetik baʼaloʼob maʼ maʼalobtakiʼ (Romanos 5:12). Caín, u yáax paal Adáneʼ, tu pʼektaj Abel, u yíitsʼineʼ, ka tu kíimsaj (1 Juan 3:12). U jaajileʼ wíinikeʼ ku yeʼesik yaabilaj yéetel ku chʼaʼik óotsilil, chéen baʼaleʼ como u kuchmaj le kʼebanoʼ séebaʼan u yantaltiʼ modosoʼob ku péeksik u pʼekt u yéet máakil, jeʼex le u kaxtik chéen u yutsiloʼ, u tsʼíiboltik le baʼax yaan tiʼ u maasiloʼ yéetel le u kaʼantal u yichoʼ (2 Timoteo 3:1-5).
LE MÁAXOʼOB JELAʼAN U YILKOʼOB U MAASILOʼ SÉEB U PʼEKTIKOʼOB MÁAK. Le bix u tuukul le máakoʼob way yóokʼol kaabeʼ bey xan le baʼaxoʼob ku beetkoʼoboʼ ku péeksik máak u pʼekt u yéet máakil. «U túulisil yóokʼol kaabeʼ tiaʼan yáanal u páajtalil le Kʼaasilbaʼaloʼ», le oʼolal yaan horaeʼ jelaʼan u yilaʼal máak, ku tratartaʼal kʼaasil, ku yaʼalaʼal baʼal tiʼ wa ku beetaʼal loob tiʼ (1 Juan 5:19).
Le Bibliaoʼ maʼ chéen ku yaʼaliktoʼon tuʼux u taal le pʼektajiloʼ, baʼaxeʼ ku tsoliktoʼon bix jeʼel u xuʼululeʼ.
