Dioseʼ ku jach ilik baʼax yaan tu tuukul máak (Jeremías 17:10). U jaajileʼ maʼalob u kanáantik máak baʼax ku yaʼalik yéetel baʼax ku beetik, chéen baʼaleʼ maʼ suficiente yéetel leloʼ. Le u pʼektik máak u maasiloʼ ku káajal desde tu tuukul yéetel tu puksiʼikʼal, le oʼolaleʼ wa k-tsʼáaik cuenta yaan baʼax jeʼel u beetik k-pʼektik u maasileʼ unaj k-luʼsik tu séebaʼanil t-tuukul yéetel t-puksiʼikʼal. Chéen jaʼaliʼ bey jeʼel u páajtal u kʼexik u kuxtal máakoʼ bey xan u xuʼulul u pʼektik u maasil.

Jach ilawil baʼax ka tuklik yoʼolal u maasil, maases yoʼolal le máaxoʼob yaanal u razaʼoboʼ bey xan yoʼolal le yaanal luʼumil u taaloʼoboʼ. Tukle: «¿Bix in wilkoʼob? ¿Kin jáan juzgarkoʼob wa yoʼolal baʼax ku yaʼalik u maasil wa kin wilik in kʼaj óoltikoʼob?». Maʼ a xokik yéetel maʼ a chaʼantik mix baʼal jeʼel u beetik a pʼektik a wéet máakileʼ.

U jaajileʼ maʼ chéen chʼaʼabil u tsʼáaik cuenta máak baʼax yaan tu tuukul yéetel tu puksiʼikʼaliʼ. Chéen baʼaleʼ le Bibliaoʼ jach jeʼel u yáantkoʼoneʼ tumen «jeʼel u páajtal u xakʼaltik baʼaxoʼob yaan tu tuukul yéetel tu puksiʼikʼal máakeʼ» (Hebreos 4:12). Maʼalob ka a ket le baʼax ku yaʼalik le Biblia yéetel le bix a tuukuloʼ. Wa ka wilik maʼ igualeʼ unaj a wilik u káajal a tuukul jeʼex u kaʼansik le Bibliaoʼ, tumen jach yaan u páajtalileʼ jeʼel u luʼsik t-tuukul yéetel t-puksiʼikʼal baʼaloʼob maʼ maʼalobtak jeʼex le pʼektajiloʼ (2 Corintios 10:4, 5).