1. ¿Baʼaxoʼob tu aktáantaj apóstol Juan tu jóokʼbal le yáax siglooʼ?

TU JÓOKʼBAL le yáax siglooʼ, apóstol Juaneʼ táan kaʼach u aktáantik talamiloʼob. Tsʼoʼok u yantal u jaʼabil, kʼalaʼan tu islail Patmos yéetel maʼ xaaneʼ, letiʼe u tsʼook apóstol kuxaʼanoʼ (Apo. 1:9). Letiʼeʼ u yojel le máaxoʼob pʼekmil le u jaajiloʼ táan u kaʼanskoʼob tuusoʼob teʼ múuchʼuliloʼoboʼ yéetel táan u beetkoʼob u jatskuba le sukuʼunoʼoboʼ. Le máaxoʼob tsaypachtik Cristooʼ bey jach taʼaytak u xuʼulsaʼaltiʼobeʼ (Jud. 4; Apo. 2:15, 20; 3:1, 17).

2. Jeʼex u yaʼalik Apocalipsis 7:9 tak 14, ¿baʼax jatsʼuts náay tsʼaʼab u yil Juan? (Ilawil le dibujo yaan tu yáax táan juʼunil le revistaaʼ).

² Teʼ kʼiinoʼob jeʼeloʼ Juaneʼ tu náaytaj junpʼéel jatsʼuts baʼal. Tu yilaj kantúul angeloʼob aʼalaʼabtiʼob ka u kʼatoʼob u beel le kʼaʼamkach iikʼoʼob taasik le nojoch muʼyajil utiaʼal ka láaj sellartaʼak u palitsiloʼob Diosoʼ (Apo. 7:1-3). Le máaxoʼob kun sellartbiloʼoboʼ letiʼe 144,000 sukuʼunoʼob kun reinaroʼob yéetel Jesús teʼ kaʼanoʼ (Luc. 12:32; Apo. 7:4). Ka tsʼoʼokeʼ Juaneʼ tu chʼaʼchiʼitaj uláakʼ junjaats máakoʼob, baʼaleʼ jach táaj yaʼaboʼob, le oʼolal tu yaʼaleʼ «¡Ileʼex!». Lelaʼ ku yeʼesikeʼ maʼ xaaneʼ jaʼakʼ u yóol yoʼolal le baʼax tu yiloʼ. ¿Baʼax túun tu yilaj? Tu yilaj «junmúuchʼ yaʼabkach máakoʼob mix máak ku páajtal u xokik jaytúuloʼob, taaljaʼanoʼob tiʼ tuláakal luʼumoʼob, chʼiʼibaloʼob, kaajoʼob yéetel tiʼ jejeláas tʼaanoʼob, waʼalakbaloʼob tu táan le trono yéetel tu táan le Tamanoʼ» (xok Apocalipsis 7:9-14). Letiʼeʼ jach kiʼimakchaj wal u yóol ka tu yilaj yaan u kʼuchul u kʼiinil u yaʼabtal le máaxoʼob kun adorartik Jéeobaoʼ.

3. 1) ¿Baʼaxten jach ku muʼukʼaʼankúuntik k-fe le baʼax tu yilaj Juanoʼ? 2) ¿Baʼax ken k-il teʼ xookaʼ?

³ Le baʼax tu yilaj Juanoʼ tu muʼukʼaʼankúuntaj u fe. Baʼaleʼ jach ku muʼukʼaʼankúuntik xan k-fe, tumen le baʼax tu yiloʼ táan u  béeytal teʼ kʼiinoʼobaʼ. Tsʼoʼok k-ilik bix u yokol u millonesil máakoʼob ichil u kaajal Dios. Letiʼobeʼ táan u páaʼtkoʼob u salvartikubaʼob teʼ nojoch muʼyajil utiaʼal u kuxtaloʼob mantatsʼ way Luʼumeʼ. Teʼ xookaʼ yaan k-ilik bix úuchik u yáantik Jéeoba u kaajal walajki ochenta años utiaʼal u naʼatik máaxoʼob táakaʼanoʼob ichil le yaʼabkach máakoʼoboʼ. Yaan k-ilik xan kaʼapʼéel baʼal: 1) jaytúuloʼob yéetel 2) tuʼux u taaloʼob. Lelaʼ yaan u muʼukʼaʼankúuntik u fe tuláakal le máaxoʼob táakaʼanoʼob ichiloʼ.

4. ¿Baʼax maʼ tu naʼatik u maasil religionoʼoboʼ, yéetel baʼax ku creertik le j-Xoknáaloʼob tiʼ le Bibliaoʼ?

⁴ U maasil religionoʼoboʼ maʼatech u kaʼanskoʼob wa le Bibliaoʼ ku yaʼalikeʼ le máakoʼob uʼuyik tʼaanoʼ yaan u kajtaloʼob utiaʼal mantatsʼ way Luʼumeʼ (2 Cor. 4:3, 4). Óoliʼ tuláakal le religionoʼoboʼ ku kaʼanskoʼobeʼ le utsoʼoboʼ ku binoʼob kaʼan kéen kíimkoʼob. Baʼaleʼ tu jóokʼbal le siglo diecinueveoʼ, le j-Xoknáaloʼob tiʼ le Biblia jóoʼsik le revista ku kʼaabaʼtik U Pʼíich Tulumil Kanan bejlaʼaʼ yaanal baʼax ku creertikoʼob. Letiʼobeʼ ku naʼatkoʼobeʼ Dioseʼ yaan u sutik paraísoil le Luʼumaʼ yéetel u millonesil máakoʼob kun pʼáatloʼob kajtal way Luʼumeʼ, maʼ teʼ kaʼanoʼ. Kex beyoʼ xáanchaj maʼ tu naʼatkoʼob jach máaxoʼob le ku yaʼalik le Bibliaoʼ (Mat. 6:10).

5. ¿Baʼax ku creertik kaʼach le j-Xoknáaloʼob tiʼ le Biblia yoʼolal le 144,000?

⁵ Le j-Xoknáaloʼob tiʼ le Bibliaoʼ ku naʼatkoʼob xaneʼ le Kiliʼich Tsʼíiboʼoboʼ ku yaʼalikeʼ yaan máaxoʼob «maʼanoʼob tiʼ le Luʼum» utiaʼal ka gobernarnakoʼob yéetel Jesús teʼ kaʼanoʼ (Apo. 14:3). Le u jaats máakoʼobaʼ 144,000 u túulaloʼob u kʼubmaj u kuxtaloʼob tiʼ Dios yéetel tu meyajtoʼob yéetel chúukaʼan óolal way Luʼumeʼ. Baʼaleʼ ¿máaxoʼob táakaʼanoʼob ichil le yaʼabkach máakoʼoboʼ?

6. ¿Baʼax ku creertik kaʼach le j-Xoknáaloʼob tiʼ le Biblia yoʼolal le yaʼabkach máakoʼoboʼ?

⁶ Juaneʼ tu yilaj junjaats máakoʼob «waʼalakbaloʼob tu táan le trono yéetel tu táan le Tamanoʼ» (Apo. 7:9). Yoʼolal le baʼax ku yaʼalik le tekstooʼ, le j-Xoknáaloʼob tiʼ le Bibliaoʼ tu naʼatoʼobeʼ le yaʼabkach máakoʼoboʼ yaan u kajtaloʼob teʼ kaʼan jeʼex le 144,000. Baʼaleʼ wa tu kaʼa jaatsil kun kajtaloʼob teʼ kaʼanoʼ, ¿máakalmáak túun u jelaʼaniloʼob? Le j-Xoknáaloʼob tiʼ le Bibliaoʼ tu tukloʼobeʼ le máaxoʼob táakaʼanoʼob ichil le yaʼabkach máakoʼoboʼ maʼ jach chúukpaj u yóol u meyajtoʼob Dios way Luʼumeʼ. Kex tu beetoʼob baʼaloʼob maʼalobtakeʼ, maʼ xaaneʼ yaan tiʼ letiʼobeʼ seguernaj u táakpajloʼob ichil le religionoʼob maʼatech u kaʼanskoʼob u jaajiloʼ. Bey túunoʼ le j-Xoknáaloʼob tiʼ le Bibliaoʼ tu yaʼaloʼobeʼ le yaʼabkach máakoʼoboʼ maʼ jach chúukpaj u yóoloʼobiʼ, le oʼolal maʼ kun gobernaroʼob yéetel Jesús. Tumen maʼ tu jach yaabiltoʼob Dioseʼ chéen aktáan tiʼ u trono Dios kun antaloʼob, baʼaleʼ maʼ kun kutaloʼob tiʼ tronoʼob.

7. 1) ¿Máaxoʼob ku tuklik le j-Xoknáaloʼob tiʼ le Biblia kun pʼáatloʼob kuxtal way Luʼum tu yáamil le Mil Añosoʼ? 2) ¿Baʼax tu tukloʼob kaʼach yoʼolal le máaxoʼob chúukpaj u yóoloʼob u meyajtoʼob Jéeoba úuchjeakiloʼ?

⁷ ¿Máaxoʼob túun kun kajtaloʼob way Luʼumeʼ? Le j-xoknáaloʼob tiʼ le Bibliaoʼ tu tukloʼob kaʼacheʼ kéen láaj xiʼik kaʼan le 144,000 yéetel le yaʼabkach máakoʼoboʼ, yaan u yantal u páajtalil u kuxtal way Luʼum u millonesil máakoʼobeʼ. Letiʼobeʼ yaan u kʼamkoʼob le bendicionoʼob kun ilbil ichil le Mil Años kun Reinar Cristooʼ. Ku tuklikoʼob kaʼacheʼ le máakoʼobaʼ maʼatech u meyajtikoʼob Jéeoba táanil tiʼ u káajal u reinar Cristo, baʼaxeʼ yaan u kaʼansaʼaltiʼob baʼax uts tu tʼaan Dios tu yáamil le Mil Añosoʼ. Kéen tsʼoʼokok le Mil Añosoʼ, le máaxoʼob kun beetik baʼax uts tu tʼaan Diosoʼ yaan u kuxtaloʼob utiaʼal mantatsʼ way Luʼumeʼ, baʼaleʼ le máaxoʼob maʼ tu yuʼuboʼob tʼaanoʼ yaan u xuʼulsaʼaltiʼob.  Le j-Xoknáaloʼob tiʼ le Bibliaoʼ ku tuklikoʼob kaʼacheʼ le máaxoʼob ken u beet u principeiloʼob tu yáamil le Mil Años way Luʼumoʼ, maʼ xaaneʼ yaan u binoʼob kaʼan kéen tsʼoʼokok. Ichiloʼobeʼ táakaʼan jujuntúul tiʼ le máaxoʼob chúukpaj u yóol u meyajtoʼob Jéeoba táanil tiʼ u taal Jesús way Luʼumeʼ (Sal. 45:16).

8. ¿Máakalmáak le óoxjaats máakoʼob ku tuklaʼal kaʼach tumen le j-Xoknáaloʼob tiʼ le Biblia kun antaloʼ?

⁸ Bey túunoʼ le j-Xoknáaloʼob tiʼ le Bibliaoʼ ku tuklikoʼob kaʼacheʼ yaan u yantal óoxjaats máakoʼob: 1) le 144,000 kun gobernaroʼob yéetel Jesús teʼ kaʼanoʼ, 2) le yaʼabkach máakoʼob maʼ jach chúukpaj u yóoloʼob kun antaloʼob aktáan tiʼ le tronooʼ yéetel aktáan tiʼ le Taman teʼ kaʼanoʼ, yéetel 3) le u millonesil máakoʼob kun kaʼansbiltiʼob baʼax uts tu tʼaan Jéeoba tu yáamil le Mil Años kun Reinar Cristooʼ. * Chéen baʼaleʼ ka kʼuch u kʼiinileʼ, Jéeobaeʼ tu yáantaj le máaxoʼob meyajtik utiaʼal ka u maas naʼatoʼob lelaʼ (Pro. 4:18).

9. 1) ¿Bix u yantal le yaʼabkach máakoʼob «tu táan le trono yéetel tu táan le Taman» wa tiaʼanoʼob way Luʼumeʼ? 2) ¿Baʼaxten maas maʼalob bix úuchik u jel tsoʼolol Apocalipsis 7:9?

⁹ Tu añoil 1935, u testigoʼob Jéeobaeʼ tu naʼatoʼob jach máaxoʼob táakaʼanoʼob ichil le yaʼabkach máakoʼob ilaʼab tumen Juan teʼ náayoʼ. Tu yiloʼobeʼ maʼ tsaaj ka xiʼikoʼob kaʼan utiaʼal u yantaloʼob «tu táan le trono yéetel tu táan le Tamanoʼ», tsʼoʼoleʼ tu naʼatoʼobeʼ le tʼaanoʼobaʼ yaanal bix unaj u naʼataʼal. Kex le yaʼabkach máakoʼob tiaʼanoʼob way Luʼumeʼ ku yantaloʼob «tu táan le trono» wa ku yilkoʼob tiʼ Jéeoba yaan u derechoil u gobernar yóokʼol tuláakal baʼal yéetel ku tsʼáaikubaʼob yáanal u páajtalil (Isa. 66:1). Ku yantaloʼob xan «tu táan le Taman» wa ku tsʼáaik u fejoʼob tiʼ le u kuxtal Jesús tu kʼuboʼ. Mateo 25:31 yéetel 32, ku yaʼalik junpʼéel baʼal chíikaʼan tiʼ lelaʼ. Ku yaʼalikeʼ «tuláakal kaajoʼob», tak le kʼasaʼan máakoʼoboʼ, «yaan u muchʼkíintaʼaloʼob tu táan» Jesús yéetel tu táan u kiʼichkelem trono. Le kaajoʼobaʼ way Luʼum yanoʼobeʼ, maʼ teʼ kaʼanoʼ. Le baʼax naʼataʼab tu añoil 1935, maas maʼalob. Tsolaʼab baʼaxten le Bibliaoʼ maʼatech u yaʼalik wa le yaʼabkach máakoʼoboʼ yaan u binoʼob teʼ kaʼanoʼ. Chéen ku yaʼalik yaan u bin kaʼan le 144,000 kun «reinaroʼob tu yóokʼol le Luʼum» yéetel Jesusoʼ (Apo. 5:10).

10. ¿Baʼaxten le yaʼabkach máakoʼoboʼ unaj u kʼaj óoltikoʼob baʼax uts tu tʼaan Jéeoba táanil tiʼ le Mil Añosoʼ?

¹⁰ Desde tu añoil 1935, u testigoʼob Jéeobaeʼ tu naʼatoʼobeʼ le yaʼabkach máakoʼob tu yilaj Juanoʼ letiʼe máaxoʼob kun chúukpajal u yóol u meyajtoʼob Dios kun pʼáatloʼob kuxtal utiaʼal mantatsʼ way Luʼumeʼ. Utiaʼal u salvartikubaʼob tiʼ le nojoch muʼyajil yéetel ‹utiaʼal ka púutsʼkoʼob tiʼ tuláakal le baʼaxoʼob aʼalaʼan kun úuchloʼ›, kʼaʼabéet u kʼaj óoltikoʼob baʼax uts tu tʼaan Jéeoba yéetel u yeʼeskoʼob jach yaan u fejoʼob táanil tiʼ u káajal le Mil Años kun Reinar Cristooʼ (Luc. 21:34-36).

11. ¿Baʼaxten ku tuklik kaʼach le j-Xoknáaloʼob tiʼ le Biblia yaan máaxoʼob kun binoʼob kaʼan kéen tsʼoʼokok le Mil Añosoʼ?

¹¹ Jeʼex t-ilaj teʼ xóotʼol 7, yaan tiʼ le j-Xoknáaloʼob tiʼ le Bibliaoʼ ku tuklikoʼob kaʼacheʼ yaan tiʼ le máaxoʼob kun chúukpajal u yóoloʼob u meyajtoʼob Diosoʼ yaan u binoʼob kaʼan kéen tsʼoʼokok le Mil Añosoʼ. ¿Baʼaxten bey úuchik u tuklikoʼoboʼ? Lelaʼ tsoʼol teʼ revista k-kʼaj óol bejlaʼa U Pʼíich Tulumil Kanan 15 tiʼ febrero tiʼ 1913. Le revistaoʼ tu yaʼaleʼ wa le máaxoʼob maʼ jach chúukpaj u yóoloʼob yaan u binoʼob kaʼanoʼ, ¿baʼaxten túun le máaxoʼob chúukpaj u yóol u meyajtoʼob Dios úuchjeakiloʼ chéen way Luʼum kun pʼáatloʼob kajtaleʼ? Lelaʼ ku tuklaʼal kaʼach yoʼolal kaʼapʼéel baʼal. Yáaxeʼ, le yaʼabkach máakoʼoboʼ yaan u binoʼob kaʼan. U kaʼapʼéeleʼ, le  yaʼabkach máakoʼoboʼ letiʼe máaxoʼob maʼ jach chúukpaj u yóoloʼoboʼ.

12, 13. ¿Baʼax ku naʼatik le sukuʼunoʼob yéeyaʼanoʼob utiaʼal u binoʼob kaʼan bey xan le yaʼabkach máakoʼob yoʼolal le siibal ken u kʼamoʼoboʼ?

¹² Baʼaleʼ jeʼex tsʼoʼok k-ilkoʼ, desde tu añoil 1935, toʼoneʼ k-naʼatikeʼ le máaxoʼob ken u salvartubaʼob tiʼ le Armagedonoʼ letiʼob le yaʼabkach máakoʼob tu yilaj Juanoʼ. Le máaxoʼob kun «jóokʼloʼob tiʼ le nojoch yaayaj óolaloʼ» way Luʼum yanoʼobeʼ yéetel yaan u kʼaʼam aʼalikoʼob: «K-salvacioneʼ tiʼ Dios u taal, le máax kulukbal teʼ tronooʼ, bey xan tiʼ le Tamanoʼ» (Apo. 7:10, 14). Tsʼoʼoleʼ le Bibliaoʼ ku yaʼalikeʼ le máaxoʼob kun binoʼob kaʼanoʼ yaan u kʼamkoʼob «junpʼéel baʼax maas maʼalob» tiʼ le ken u kʼam le máaxoʼob chúukpaj u yóoloʼob úuchjeakiloʼ (Heb. 11:40). Le túumben baʼax naʼataʼabaʼ tu péeksaj le sukuʼunoʼob utiaʼal u tsʼáaik u yóol u invitartoʼob yéetel kiʼimak óolal u maasil máakoʼob u meyajtoʼob Jéeoba utiaʼal ka kuxlakoʼob utiaʼal minaʼan u xuul way Luʼumeʼ.

¹³ Le jatsʼuts baʼax ku páaʼtik le yaʼabkach máakoʼoboʼ ku beetik u kiʼimaktal u yóoloʼob. Ku naʼatkoʼobeʼ Jéeoba yéeyik máaxoʼob kun binoʼob kaʼan yéetel máaxoʼob kun pʼáatloʼob way Luʼumeʼ. Le yéeyaʼanoʼob utiaʼal u binoʼob kaʼan bey xan le yaʼabkach máakoʼob kun pʼáatloʼob way Luʼumoʼ ku naʼatkoʼobeʼ, chéen yoʼolal u nojoch utsil Jéeobaeʼ yaan u tsʼaʼabaltiʼob le siibal tu yoʼolal «le boʼol tu beetaj Cristo Jesusoʼ» (Rom. 3:24).

14. ¿Baʼax joʼopʼ u tuklik le sukuʼunoʼob yoʼolal le yaʼabkach máakoʼob tu añoil 1935?

¹⁴ Le baʼax tsoʼol yoʼolal le yaʼabkach máakoʼob tu añoil 1935, tu beetaj u tuklaʼal tumen yaʼab sukuʼunoʼob bix kun yaʼabtal le máaxoʼob kun kuxtaloʼob way Luʼumoʼ. Ronald Parkin, yaan 12 años tiʼ ka tsoʼol máaxoʼob le yaʼabkach máakoʼoboʼ, tu yaʼalaj: «Teʼ kʼiinoʼob jeʼeloʼ chéen 56 mil j-kʼaʼaytajoʼob yaan tiʼ tuláakal yóokʼol kaab, maʼ xaaneʼ u maas yaʼabileʼ yéeyaʼanoʼob utiaʼal u binoʼob kaʼan. Bey túunoʼ le yaʼabkach máakoʼoboʼ bey maʼ jach yaʼaboʼobeʼ».

15. ¿Bix úuchik u bin u yaʼabtal le yaʼabkach máakoʼoboʼ?

¹⁵ Baʼaleʼ teʼ jaʼaboʼob seguernajoʼ túuxtaʼab yaʼab misioneroʼob tiʼ jejeláas luʼumiloʼob, bey túunoʼ joʼopʼ u yaʼabtal le máaxoʼob meyajtik Jéeobaoʼ. Tu añoil 1968, káaj u tsʼaʼabal xook yéetel le libro La verdad que lleva a vida eterna. Tumen séeb u naʼataʼal le baʼaxoʼob ku kaʼansikoʼ, tu yáantaj yaʼabkach máakoʼob u kʼamoʼob le maʼalob péektsiloʼ. Kanpʼéel jaʼab káajak u tsʼaʼabal xook yéetel le librooʼ okjaʼanaj maas tiʼ medio millón sukuʼunoʼob. Tsʼoʼoleʼ okjaʼanaj uláakʼ u millonesil le ka xuʼul u jach kʼaʼamal le baʼaxoʼob ku kaʼansik le Iglesia católica tu  luʼumiloʼob América Latinaoʼ bey xan tiʼ uláakʼ luʼumiloʼob yéetel le ka chaʼab u yúuchul kʼaʼaytaj tu luʼumiloʼob Europa oriental bey xan jujunpʼéel tuʼuxoʼob tiʼ u luʼumil África (Isa. 60:22). Teʼ tu tsʼook jaʼaboʼobaʼ, u kaajal Jéeobaeʼ tsʼoʼok u jóoʼsik yaʼabkach nuʼukuloʼob utiaʼal u yáantik le máakoʼob u kʼaj óoltoʼob le Bibliaoʼ. Bey túunoʼ bejlaʼeʼ táan u muʼuchʼul le yaʼabkach máakoʼoboʼ, tsʼoʼok u chukik maas tiʼ ocho millones.

16. ¿Tuʼux u taal le yaʼabkach máakoʼoboʼ?

¹⁶ Teʼ náay tu yilaj Juanoʼ le yaʼabkach máakoʼoboʼ «taaljaʼanoʼob tiʼ tuláakal luʼumoʼob, chʼiʼibaloʼob, kaajoʼob yéetel tiʼ jejeláas tʼaanoʼob». Profeta Zacaríaseʼ u yaʼalmiliʼ xan bey kun úuchloʼ. Tu yaʼalaj: «Tiʼ le kʼiinoʼob túunoʼ diez j-táanxel luʼumiloʼobeʼ bíin u cháachoʼob juntúul judío tu nookʼ utiaʼal ka u yaʼaloʼobtiʼ: Toʼoneʼ k-kʼáat bin ta wéeteleʼex tumen tsʼoʼok k-uʼuyik tiʼ yaan [Dios] ta wéeteleʼexeʼ» (Zac. 8:23).

17. ¿Baʼax táan u beetaʼal utiaʼal u yáantaʼal le yaʼabkach máakoʼob ku taaloʼob tiʼ jejeláas luʼumiloʼoboʼ?

¹⁷ Toʼoneʼ k-ojleʼ utiaʼal ka muʼuchʼuk le máakoʼob ich jejeláas idiomaʼoboʼ kʼaʼabéet xan u kʼaʼaytaʼal le maʼalob péektsil ich jejeláas idiomaʼoboʼ. Le oʼolal tsʼoʼok maas tiʼ ciento treinta años joʼopʼok u traducirtaʼal le publicacionoʼob  yaantoʼonoʼ. Teʼ kʼiinoʼobaʼ ku beetaʼal junpʼéel nojoch meyaj utiaʼal u traducirtaʼal ich yaʼab idiomaʼob le publicacionoʼoboʼ. Bey túunoʼ chíikaʼan u yilaʼal Jéeobaeʼ táan u beetik junpʼéel milagro teʼ kʼiinoʼobaʼ: táan u muchʼik le yaʼabkach máakoʼob ku taaloʼob tiʼ tuláakal luʼumiloʼoboʼ. Tumen táan u jóoʼsaʼal ich yaʼab idiomaʼob le jejeláas publicacionoʼoboʼ, kex jejeláas tuʼux u taaloʼobeʼ ku múuchʼ adorartikoʼob Jéeoba. Tsʼoʼoleʼ kʼaj óolaʼanoʼob yoʼolal bix u kʼaʼaytajoʼob yéetel kiʼimak óolal bey xan yoʼolal bix u yaabiltmilubaʼob. ¿Máasaʼ tuláakal lelaʼ jach ku muʼukʼaʼankúuntik k-fe? (Mat. 24:14; Juan 13:35).

18. 1) Jeʼex u yaʼalik Isaías 46:10 yéetel 11, ¿baʼaxten maʼ tu jaʼakʼal k-óol kéen k-il bix u béeykuntik Jéeoba le baʼax u yaʼalmaj yoʼolal le yaʼabkach máakoʼoboʼ? 2) ¿Baʼaxten maʼatech u yaatal u yóol le máaxoʼob táan u páaʼtik u kuxtaloʼob way Luʼumoʼ?

¹⁸ Jach yaan baʼax oʼolal u taasiktoʼon kiʼimak óolal le baʼax tu yilaj Juanoʼ. Jéeobaeʼ jach tsʼoʼok u béeykuntik jeʼel bix tu yaʼaliloʼ (xok Isaías 46:10, 11). Le yaʼabkach máakoʼoboʼ kiʼimak u yóoloʼob yoʼolal le jatsʼuts esperanza ku tsʼáaik Dios tiʼ letiʼoboʼ. Maʼatech u yaatal u yóoloʼob tumen maʼ yéeyaʼanoʼob utiaʼal u binoʼob meyaj yéetel Jesús teʼ kaʼanoʼ. Le Bibliaoʼ ku tʼaan tiʼ xiiboʼob yéetel koʼoleloʼob nuʼuktaʼaboʼob yéetel kiliʼich muukʼ, baʼaleʼ maʼ táakaʼanoʼob ichil le 144,000, jeʼex Juan Bautista yéetel David (Mat. 11:11; Bax. 2:34). Letiʼob bey xan uláakʼ yaʼabkach máakoʼobeʼ yaan u kaʼa kuxtaloʼob teʼ Paraíso way Luʼumoʼ. Letiʼob yéetel le yaʼabkach máakoʼoboʼ yaan u yantal u páajtalil u yeʼesik u yaabilajoʼob tiʼ Jéeoba yéetel ku kʼamkoʼob chéen tiʼ letiʼ yaan u derechoil u gobernar.

19. ¿Baʼax ken k-beet wa k-naʼatik baʼax u kʼáat u yaʼal le náay tu yilaj Juanoʼ?

¹⁹ Mix juntéen yanak le bukaʼaj máakoʼob adorartik Jéeoba ku taaloʼob tiʼ tuláakal kaajoʼoboʼ. Kex wa yéeyaʼanoʼon utiaʼal k-bin kaʼan bey xan wa utiaʼal k-pʼáatal kuxtal way Luʼumeʼ, unaj k-ilik k-áantik le jaytúul máakoʼob ku páajtal utiaʼal ka táakpajkoʼob ichil le yaʼabkach máakoʼob chíikbesik le «uláakʼ tamanoʼob[oʼ]» (Juan 10:16). Maʼ kun xáantaleʼ Jéeobaeʼ yaan u taasik le nojoch muʼyajil kun xuʼulsik tuláakal le gobiernoʼob yéetel le religionoʼob ku beetkoʼob u muʼyaj wíinikoʼ. Tuláakal le máaxoʼob yanoʼob ichil le yaʼabkach máakoʼoboʼ yaan u yantaltiʼob u jatsʼuts páajtalil u meyajtikoʼob Jéeoba utiaʼal minaʼan u xuul way Luʼumeʼ (Apo. 7:14).