1, 2. 1) ¿Bix u tuʼusul le máakoʼob tumen Satanasoʼ? 2) ¿Baʼax ken k-il teʼ xookaʼ?

SATANÁS, «u taatail le tuusoʼ», desde tu káajbal joʼopʼ u tusik máak (Juan 8:44). Ichil le baʼaxoʼob maʼ jaajtak ku yaʼalikoʼ táakaʼan le u kaʼansaʼal yaan baʼax ku pʼáatal kuxaʼanil tiʼ máak kéen tsʼoʼokok u kíimiloʼ. Lelaʼ tsʼoʼok u beetik u creertaʼal yéetel u beetaʼal yaʼab baʼaloʼob yoʼolal le kimenoʼoboʼ. Le oʼolaleʼ kéen kíimik u láakʼtsil wa máax wa juntúul máak tiʼ junpʼéel kaajeʼ, jujuntúul sukuʼunoʼobeʼ ku kʼaʼabéettal u baʼateloʼob «tu yoʼolal le fe» yaantiʼoboʼ (Jud. 3).

² ¿Baʼax jeʼel u yáantkoʼon utiaʼal k-eʼesik k-creertik u jaajil yoʼolal le kíimil wa ku sen aʼalaʼaltoʼon ka táakpajkoʼon tiʼ junpʼéel kʼiinbesaj maʼ uts tu tʼaan Diosoʼ? (Efe. 6:11). ¿Bix jeʼel k-áantik juntúul sukuʼun wa ku joʼopʼol u yaʼalaʼaltiʼ ka táakpajak tiʼ junpʼéel kʼiinbesaj beyoʼ? Teʼ xookaʼ yaan k-xakʼaltik baʼax uts tu tʼaan Jéeoba ka k-beete. Baʼaleʼ táanileʼ koʼoneʼex ilik baʼax ku yaʼalik le Biblia yoʼolal le kíimiloʼ.

3. ¿Baʼax talamil tu taasaj le yáax tuus beetaʼaboʼ?

³ Dioseʼ maʼ u kʼáat kaʼach ka kíimik máakiʼ, baʼaxeʼ ka kuxlak utiaʼal minaʼan u xuul. Baʼaleʼ Adán yéetel Evaeʼ kʼaʼabéet kaʼach u yuʼubikoʼob u tʼaan Jéeoba, letiʼeʼ tu yaʼalajtiʼob: «Maʼ a jaantik u yich u cheʼil u kʼaj óolalil uts yéetel kʼaas. Tumen u kʼiinil bíin a jaanteʼ [yaan] a kíimil» (Gén. 2:16, 17). Baʼaleʼ Satanaseʼ meyajnajtiʼ juntúul kaan utiaʼal u yaʼalik tiʼ Eva: «Maʼ jaajiʼ. Maʼ ta kíimleʼex». Letiʼeʼ tu creertaj, ka tu jaantaj u yich le cheʼoʼ. Tsʼoʼoleʼ jaantaʼab xan tumen Adán (Gén. 3:4, 6). Bey úuchik  u yantal le kʼeban yéetel le kíimiloʼ (Rom. 5:12).

4, 5. ¿Baʼaxten yaʼab máakoʼob creertik le baʼaxoʼob maʼ jaajtak ku yaʼalik Satanasoʼ?

⁴ Jach jeʼex aʼalaʼabik tumen Diosoʼ, Adán yéetel Evaeʼ kíimoʼob. Baʼaleʼ Satanaseʼ maʼ xuʼul u tusik máak yoʼolal le kíimiloʼ. Letiʼeʼ joʼopʼ u yaʼalik uláakʼ baʼaloʼob maʼ jaajtakiʼ, jeʼex kéen kíimik máakeʼ ku jóokʼol u pixan utiaʼal u bin kuxtal táanxel tuʼux. Lelaʼ jejeláas bix u kaʼansaʼal, le oʼolal tsʼoʼok u tusik yaʼab máakoʼob tak teʼ kʼiinoʼobaʼ (1 Tim. 4:1).

⁵ ¿Baʼaxten yaʼab máakoʼob creertik le baʼaxoʼob maʼ jaajtak ku yaʼalik Satanasoʼ? Letiʼeʼ u yojel jach ku yaatal u yóol máak kéen kíimik u láakʼtsil, le oʼolal ku meyajtiʼ utiaʼal u tuskoʼob. Toʼoneʼ beetaʼanoʼon utiaʼal ka kuxlakoʼon utiaʼal minaʼan u xuul, le oʼolal maʼatech u taaktal k-kíimil (Ecl. 3:11). K-ilik le kíimil bey juntúul enemigooʼ (1 Cor. 15:26).

6, 7. 1) ¿Tsʼoʼok wa u páajtal u taʼakik Satanás u jaajil yoʼolal le kíimiloʼ? Tsole. 2) ¿Bix u yáantkoʼon le baʼax ku kaʼansik le Biblia utiaʼal maʼ k-sajaktal tiʼ le kíimiloʼ?

⁶ Kex yaʼab baʼaxoʼob tsʼoʼok u beetik Satanaseʼ, maʼ páajchajak u taʼakik u jaajil yoʼolal le kíimiloʼ. Bejlaʼeʼ yaʼab máakoʼob u yojloʼob yéetel ku kaʼanskoʼob le baʼax ku yaʼalik le Biblia yoʼolal le kíimiloʼ bey xan bix kun kaʼa kuxkíintbil le kimenoʼoboʼ (Ecl. 9:5, 10; Bax. 24:15). Le kaʼansajoʼobaʼ ku líiʼskoʼob k-óol yéetel ku yáantkoʼon utiaʼal maʼ k-sajaktal tiʼ le kíimiloʼ. Toʼoneʼ maʼ saajkoʼon u beetaʼaltoʼon wa baʼax kʼaas tumen le kimenoʼoboʼ mix ka úuchuk baʼax kʼaas tiʼ letiʼobiʼ. K-ojel maʼ kuxaʼanoʼobiʼ, le oʼolal maʼ tu páajtal u beetkoʼob mix baʼal kʼaas tiʼ mix máak. Chéen bey táan u weenloʼobeʼ (Juan 11:11-14). Tsʼoʼoleʼ k-ojel maʼ tu yojéeltikoʼob u máan le kʼiinoʼoboʼ. Le oʼolal kéen kaʼa kuxlak, tak le máaxoʼob tsʼoʼok u yúuchtal kíimkoʼoboʼ, yaan u yilkoʼob bey chéen junsúutuk kíimoʼobeʼ, bey chéen ka u mutsʼ u yichoʼob yéetel ka u jáan pʼiloʼob tu kaʼatéeneʼ.

⁷ ¿Máasaʼ le baʼax ku yaʼalik le Biblia yoʼolal le bix yanil le kimenoʼoboʼ maʼ talam u naʼataʼaliʼ? Baʼaleʼ le baʼaxoʼob ku yaʼalik Satanás yoʼolal le kíimiloʼ talam u naʼataʼal. Letiʼeʼ maʼ chéen ku tusik le máakoʼoboʼ, baʼaxeʼ ku yaʼalik baʼaloʼob maʼ jaajtak tu contra Jéeobaiʼ. Koʼoneʼex ilik óoxpʼéel baʼax ku beetik le tuusoʼob ku yaʼalik Satanasoʼ. Yáaxeʼ, ku tʼaan kʼaas tu contra u kʼaabaʼ Dios. U kaʼapʼéeleʼ, ku beetik u tuklaʼal maʼ kʼaʼabéet kaʼach u tsʼáaik u kuxtal Cristo tu yoʼolal wíinikiʼ. U yóoxpʼéeleʼ, tsʼoʼok u beetik u maas yantal muʼyajil way Luʼumeʼ.

8. Jeʼex u yaʼalik Jeremías 19:5, ¿baʼaxten ku beetik u yúuchul tʼaan kʼaas tiʼ Jéeoba le baʼax ku yaʼalik Satanás yoʼolal le kimenoʼoboʼ?

⁸ Le baʼaloʼob maʼ jaajtak ku yaʼalik Satanás tu yoʼolal le kimenoʼoboʼ ku beetik u yúuchul tʼaan kʼaas tu kʼaabaʼ Dios. Junpʼéel tiʼ le baʼaloʼob maʼ jaajtak ku kaʼansaʼaloʼ letiʼe u yaʼalaʼal ku beetaʼal u muʼyaj le kimenoʼob teʼ infiernooʼ. ¿Baʼaxten ku beetik u yúuchul tʼaan kʼaas tiʼ Jéeoba lelaʼ? Tumen ku beetik u tuklaʼal Jéeoba, u Diosil yaabilajeʼ, kʼasaʼan jeʼex Satanaseʼ (1 Juan 4:8). ¿Bix k-uʼuyikba kéen k-uʼuy u yaʼalaʼal lelaʼ? ¿Bix u yuʼubikuba xan Jéeoba? Maʼ u tuʼubultoʼoneʼ letiʼeʼ u pʼekmaj u beetaʼal u muʼyaj máak (xok Jeremías 19:5).

9. ¿Baʼax ku beetik u tuklaʼal Satanás yoʼolal u kuxtal Cristo tu kʼubaj ku chʼaʼchiʼitaʼal teʼ Juan 3:16 yéetel 15:13?

⁹ Le baʼaloʼob maʼ jaajtak ku yaʼalik Satanás yoʼolal le kimenoʼoboʼ ku beetik u tuklaʼal maʼ kʼaʼabéet kaʼach u tsʼáaik u kuxtal Cristo tu yoʼolal wíinikiʼ (Mat. 20:28). Uláakʼ baʼal maʼ jaaj ku yaʼalik le Kʼaasilbaʼaloʼ letiʼe ku pʼáatal kuxaʼanil le pixan kéen kíimik máakoʼ. Wa beyoʼ, tuláakal máak jeʼel u kuxtal utiaʼal minaʼan u xuuleʼ. Bey túunoʼ Cristoeʼ maʼ tsaaj kaʼach u kʼubik u kuxtal t-oʼolal utiaʼal ka yanaktoʼon kuxtal minaʼan u xuuliʼ. Kʼaʼajaktoʼoneʼ le úuchik u kʼubik u kuxtaloʼ tu yeʼesaj jach u yaabiltmaj wíinik (xok Juan 3:16; 15:13). ¿Bix wal u yuʼubikuba Jéeoba yéetel u Hijo yoʼolal le tuusoʼob ku mixbaʼalkúuntik le siibal tu beetoʼoboʼ?

10. ¿Bix u beetaʼal u maas muʼyaj le máakoʼob yoʼolal le baʼaxoʼob ku yaʼalik Satanasoʼ?

¹⁰ Le baʼaxoʼob ku yaʼalik Satanasoʼ tsʼoʼok u beetik u maas yantal muʼyajil way Luʼumeʼ. Le taatatsiloʼob ku kíimil u paalaloʼoboʼ maʼ xaaneʼ ku yaʼalaʼaltiʼob Dios bis teʼ kaʼanoʼ tumen kʼaʼabéet uláakʼ juntúul chan ángel tiʼ. ¿Máasaʼ lelaʼ chéen ku beetik u maas yaatal u yóoloʼob? U kaʼansajil xan le infiernooʼ tsʼoʼok u meyaj utiaʼal u castigartaʼal máak, jeʼex u tóokaʼal le máaxoʼob ku binoʼob tu contra le baʼaxoʼob ku kaʼansik le Iglesiaoʼ. Junpʼéel libroeʼ ku yaʼalikeʼ le máaxoʼob castigart u maasil beyoʼ ku yaʼalikoʼobeʼ chéen táan u yeʼeskoʼobtiʼ «junpʼíit tiʼ le baʼax ken u muʼyajt» teʼ infierno wa maʼ tu kʼexik u tuukul táanil tiʼ u kíimiloʼ. Tsʼoʼoleʼ yaan tuʼuxeʼ le máakoʼoboʼ ku adorartikoʼob u láakʼtsiloʼob tsʼoʼok u kíimloʼob utiaʼal u yeʼeskoʼob tsiikil tiʼob wa utiaʼal ka kanáantaʼakoʼob. Yanoʼob xaneʼ ku yetsʼkúuntkoʼob janal yóoʼ mesa utiaʼal maʼ u beetaʼal loob tiʼob. Le baʼaloʼob maʼ jaajtak ku kaʼansaʼaloʼ maʼ tu líiʼsik u yóol máak, baʼaxeʼ ku beetik u maas yaatal u yóoloʼob yéetel u sajaktaloʼob.

11. ¿Baʼaxoʼob jeʼel u sen aʼalaʼaltoʼon tumen k-láakʼtsiloʼob wa k-amigoʼob utiaʼal k-táakpajal tiʼ le baʼaxoʼob ku creertikoʼoboʼ?

¹¹ K-yaabilaj tiʼ Dios yéetel tiʼ le baʼax ku yaʼalik le Bibliaoʼ, jeʼel u yáantkoʼon utiaʼal k-beetik baʼax uts tu tʼaan Jéeoba kex ka sen aʼalaʼaktoʼon tumen k-láakʼtsiloʼob wa k-amigoʼob ka táakpajkoʼon tiʼ baʼaloʼob suuk u beetaʼal yoʼolal le kimenoʼoboʼ. Maʼ xaaneʼ jeʼel u yaʼalikoʼobtoʼon maʼ k-yaabiltmaj le máax kíim utiaʼal u yilkoʼob ka táakpajkoʼonoʼ. Wa maʼ xaaneʼ jeʼel u joʼopʼol u yaʼalikoʼobeʼ, tumen maʼ k-beetik le baʼax ku yaʼalikoʼoboʼ yaan u beetaʼal loob tiʼ wa máax tumen le kimenoʼ. ¿Bix jeʼel k-eʼesik yéetel le Biblia maʼ jaaj le baʼaxoʼob ku yaʼalikoʼoboʼ? Koʼoneʼex ilik jujunpʼéel baʼaxoʼob ku yaʼalik le Bibliaoʼ yéetel bix jeʼel k-tsʼáaik ichil k-kuxtaleʼ.

12. ¿Baʼaxoʼob ku creertaʼal yoʼolal le kimenoʼob ku bin tu contra le baʼax ku kaʼansik le Bibliaoʼ?

¹² Unaj k-ilik maʼ k-táakpajal tiʼ le baʼaloʼob suuk u beetaʼal ku bin tu contra le baʼax ku yaʼalik le Bibliaoʼ (2 Cor. 6:17). Tiʼ junpʼéel luʼumil yaan teʼ Caribeoʼ, yaʼab máaxoʼob creertikeʼ kéen kíimik máakeʼ ku pʼáatal u pixan utiaʼal u  sutik u jeel le baʼax kʼaas beetaʼabtiʼoʼ. Junpʼéel libroeʼ ku yaʼalikeʼ le pixanoʼ jeʼel tak «u beetik u yúuchul junpʼéel nojoch loobil tiʼ junpʼéel kaajeʼ». Tiʼ jujunpʼéel u luʼumiloʼob Áfricaeʼ, kéen kíimik wa máaxeʼ, ku piʼixil le néenoʼob yanoʼob ichil u yotochoʼ yéetel ku tsʼaʼabal kúulpachil u fotoʼoboʼ. ¿Baʼaxten? Tumen ku yaʼalikoʼobeʼ le kimenoʼ maʼ unaj u paktikubaiʼ. Le máaxoʼob meyajtik Jéeobaoʼ maʼatech u creertikoʼob mix junpʼéel tiʼ le tuusoʼob ku yaʼalik Satanás yoʼolal le kíimiloʼ (1 Cor. 10:21, 22).

13. Jeʼex u yaʼalik Santiago 1:5, ¿baʼax unaj k-beetik wa maʼ k-jach ojel bix u yilik Jéeoba junpʼéel baʼax suuk u beetaʼaliʼ?

¹³ Wa maʼ k-jach ojel wa maʼ maʼalob u yilik Jéeoba junpʼéel baʼax suuk u beetaʼaleʼ, unaj k-kʼáatiktiʼ tu jaajil k-óol ka u yáantoʼon k-naʼate (xok Santiago 1:5). Tsʼoʼoleʼ unaj k-xakʼalxoktik le baʼaxoʼob ku yaʼalik le publicacionoʼob tu yoʼolaloʼ. Wa láayliʼ maʼ t-jach naʼatikeʼ, jeʼel u páajtal k-kʼáatik tiʼ le ancianoʼoboʼ. Kex maʼ ken u yaʼaloʼobtoʼon baʼax unaj k-beetkeʼ, jeʼel u yáantkoʼonoʼob k-il baʼax ku yaʼalik le Biblia yoʼolal leloʼ, jeʼex le baʼax ku yaʼalik le xookaʼ. Lelaʼ jeʼel u yáantkoʼon utiaʼal ka ‹yiijchajak k-tuukul› yéetel utiaʼal ‹k-kʼaj óoltik baʼax maʼalob bey xan baʼax maʼ maʼalobiʼ› (Heb. 5:14).

14. ¿Bix jeʼel k-kanáantik maʼ k-beetik u tʼóochpajal u maasileʼ?

¹⁴ «Beeteʼex tuláakal baʼal utiaʼal u nojbeʼenil Dios. Kanáanteʼex maʼ a beetkeʼex u tʼóochpajal» mix máak (1 Cor. 10:31, 32). Kéen k-chʼaʼtukult wa yaan k-táakpajal tiʼ junpʼéel baʼax suuk u beetaʼal bey xan wa maʼeʼ, unaj k-chʼaʼik en cuentail baʼax ku tuklik u maasil, maases le sukuʼunoʼoboʼ. Tumen maʼ k-kʼáat k-beet u tʼóochpajal mix máakiʼ (Mar. 9:42). Tsʼoʼoleʼ maʼ k-kʼáat ka kʼuuxilnak t-éetel le máaxoʼob maʼatech u meyajtikoʼob Jéeobaoʼ. Le yaabilajoʼ yaan u péeksikoʼon k-eʼes tsiikil tiʼob, beyoʼ k-tsʼáaik nojbeʼenil tiʼ Jéeoba. Yaan k-kanáantik maʼ k-baʼateltʼaan tu yéeteloʼob mix k-pʼaʼastikoʼob yoʼolal le baʼaxoʼob suuk u beetkoʼoboʼ. Maʼ u tuʼubultoʼon le utsiloʼob ku taasik u yeʼesaʼal yaabilajoʼ. Wa k-eʼesik tsiikil kéen tʼaanakoʼon tu yéeteloʼobeʼ, maʼ xaaneʼ jeʼel tak u kʼexik u tuukul le máaxoʼob pʼektikoʼon yoʼolal le baʼaxoʼob k-creertikoʼ.

15, 16. 1) ¿Baʼaxten unaj k-aʼalik tiʼ u maasil baʼaxoʼob k-creertik? Tʼaanen tiʼ junpʼéel baʼax uchaʼan. 2) ¿Baʼax ku kaʼansiktoʼon le baʼax tu yaʼalaj Pablo teʼ Romailoʼob 1:16?

¹⁵ Unaj k-aʼalik tiʼ k-láakʼtsiloʼob yéetel tiʼ k-vecinoʼob toʼoneʼ u j-jaajkunajoʼon Jéeoba (Isa. 43:10). Wa k-aʼaliktiʼobeʼ, maas maʼ talam  jeʼel k-tsoliktiʼob baʼaxten maʼ k-táakpajal tiʼ le baʼaxoʼob suukaʼan u beetkoʼob kéen kíimik máakoʼ. Francisco, kajaʼan Mozambiqueeʼ ku yaʼalik: «Ka joʼopʼ k-meyajtik Jéeobaeʼ, teen yéetel Carolina, in wataneʼ, t-aʼalaj tiʼ k-láakʼtsiloʼob yaan u xuʼulul k-adorartik le kimenoʼoboʼ. Baʼaleʼ jach talamchajtoʼon le ka kíim u kiik Carolinaoʼ. Teʼ tuʼux kajaʼanoʼonoʼ, suukaʼan u yisíinsaʼal le kimenoʼ. Kéen tsʼoʼokkeʼ, juntúul u láakʼtsileʼ unaj u wenel óoxpʼéel áakʼab teʼ tuʼux ku weʼekel le jaʼ úuchik u yisíinsaʼaloʼ. Le máakoʼoboʼ ku yaʼalikoʼobeʼ beyoʼ ku beetaʼal u xuʼulul u kʼuuxil u pixan le kimenoʼ. U maasil u láakʼtsiloʼob Carolinaeʼ joʼopʼ u yaʼalikoʼobtiʼ ka pʼáatak wenel teʼ tuʼux weʼek le jaʼoʼ».

¹⁶ ¿Baʼax túun tu beetaj Francisco yéetel u yatan? Letiʼeʼ ku yaʼalik: «Toʼoneʼ k-yaabiltmaj Jéeoba yéetel k-kʼáat k-beet baʼax uts tu tʼaan, le oʼolal maʼ t-óotaj k-beet le baʼax ku yaʼalikoʼoboʼ. U láakʼtsiloʼob Carolinaeʼ jach kʼuuxilnajoʼob. Tu yaʼaloʼobeʼ maʼatech k-eʼesik tsiikil tiʼ le kimenoʼ yéetel tu yaʼaloʼob mix bikʼin ken u kaʼa xíimbaltoʼonoʼob mix ken u yáantoʼonoʼob kéen kʼaʼabéetchajak. Toʼoneʼ k-aʼalmajtiʼob baʼaxoʼob k-creertik, le oʼolal teʼ kʼiinoʼob jeʼeloʼ maʼ t-aʼalajtiʼob mix baʼaliʼ. Yaan tiʼ letiʼobeʼ tu yaʼaloʼob maʼ jelaʼan baʼax k-aʼalikiʼ tumen k-yáax aʼalmajtiʼob maʼ ken táakpajal tiʼ le baʼaloʼob beyoʼ. Ka máan kʼiineʼ u láakʼtsiloʼob Carolinaeʼ xuʼul u kʼuuxiloʼob yéetel joʼopʼ u kaʼa biskubaʼob t-éetel. Yaan tak tiʼ letiʼobeʼ tsʼoʼok u bin u xíimbaltoʼonoʼob utiaʼal u kʼáatkoʼobtoʼon publicacionoʼob». Le oʼolaleʼ maʼ unaj k-sajaktal k-aʼal u jaajil yoʼolal le kíimiloʼ (xok Romailoʼob 1:16).

17. ¿Baʼax unaj k-beetik kéen kíimik juntúul u láakʼtsil juntúul sukuʼun?

¹⁷ Kéen kíimik juntúul u láakʼtsil juntúul sukuʼuneʼ, kʼaʼabéet k-eʼesiktiʼ jach tu jaajil k-bisikba tu yéetel (Pro. 17:17). ¿Bix jeʼel k-beetik, maases wa táan u sen aʼalaʼal tiʼ le sukuʼun ka táakpajak tiʼ baʼaloʼob suuk u beetaʼal ku bin tu contra le Bibliaoʼ? Koʼoneʼex ilik kaʼapʼéel baʼax ku yaʼalik le Biblia unaj k-beetkoʼ.

18. 1) ¿Baʼaxten «káaj u yáalal u jaʼil u yich» Jesús? 2) ¿Baʼax k-kanik tiʼ le baʼax tu beetaj Jesusoʼ?

¹⁸ «Okʼolneneʼex yéetel le máaxoʼob ku yokʼoloʼoboʼ»  (Rom. 12:15). Maʼ xaaneʼ maʼ t-kaxtik baʼax jeʼel k-aʼalik tiʼ juntúul máax yaachajaʼan u yóoleʼ. Baʼaleʼ kʼaʼajaktoʼoneʼ wa k-okʼol tu yéeteleʼ maas ku líikʼil u yóol ke ka k-aʼal wa baʼax tiʼ. Ka kíim Lázaroeʼ, oʼtaʼab tumen María, Marta yéetel u maasil u amigoʼob. Ka kʼuch Jesús kanpʼéel kʼiin kíimik Lázaroeʼ «káaj u yáalal u jaʼil u yich» xan, kex u yojel yaan u kaʼa kuxkíintik (Juan 11:17, 33-35). Le úuchik u yokʼoloʼ tu yeʼesaj bix u yuʼubikuba Jéeoba ka kíim Lázaro. Tu yeʼesaj xaneʼ, Jesuseʼ jach u yaabiltmaj u láakʼtsiloʼob Lázaro, leloʼ jach tu líiʼsaj u yóol María yéetel Marta. Kéen u yil xan le sukuʼunoʼob jach tu jaajil k-yaabiltmoʼob yéetel k-naʼatik bix u yuʼubikubaʼoboʼ ku líikʼil xan u yóoloʼob, tumen ku yilkoʼob maʼ pʼataʼanoʼob chéen tu juunaloʼobiʼ.

19. ¿Bix u yáantkoʼon Eclesiastés 3:7 utiaʼal k-líiʼsik u yóol juntúul sukuʼuneʼ?

¹⁹ «Yaan junsúutuk utiaʼal mak chiʼ, yaan junsúutuk utiaʼal tʼaan» (Ecl. 3:7). Uláakʼ bix jeʼel k-líiʼsik u yóol juntúul sukuʼuneʼ letiʼe ka k-chʼenxikint baʼax ku yaʼalikoʼ. Unaj k-uʼuyik baʼax ku yaʼalik, maʼ unaj k-tsʼíikil wa ku yaʼalik baʼax maʼ jach maʼalobiʼ (Job 6:2, 3). Maʼ xaaneʼ jach chiʼichnak yoʼolal baʼax ku yaʼalaʼaltiʼ unaj u beetik tumen u láakʼtsiloʼob maʼatech u meyajtikoʼob Jéeoba. Le oʼolal maʼalob ka orarnakoʼon tu yéetel utiaʼal k-kʼáatik tiʼ Jéeoba ka u tsʼáa muukʼ yéetel naʼatil tiʼ (Sal. 65:2). Wa ku páajtaleʼ maʼalob ka k-xok le Biblia wa junpʼéel baʼax ku taasik junpʼéel publicación, jeʼex u tsikbalil u kuxtal juntúul sukuʼun jeʼel u líiʼsik u yóoleʼ.

20. ¿Baʼax ken k-il tuláakʼ xookoʼ?

²⁰ Jach kiʼimak k-óol tumen k-ojel u jaajil yoʼolal le kíimiloʼ bey xan tiʼ le jatsʼuts kuxtal ku páaʼtik le máaxoʼob «yanoʼob ichil le muknaloʼoboʼ» (Juan 5:28, 29). Le baʼaxoʼob k-beetik yéetel k-aʼalikoʼ jeʼel u meyaj utiaʼal k-kaʼansik u jaajil yoʼolal le kimenoʼob, jeʼex u yaʼalik le Bibliaoʼ. Teʼ tuláakʼ xookoʼ yaan k-ilik uláakʼ baʼax ku meyaj tiʼ Satanás utiaʼal u tusik máak: letiʼe j-meeniloʼ. Yaan k-ilik baʼaxten unaj k-náachkuntikba tiʼ tuláakal le baʼaxoʼob táakaʼanoʼob ichiloʼ.