XOOK 14
¿Táan wa k-tsʼoʼokbesik le meyaj kʼubéentaʼantoʼonoʼ?
«Maʼ u xuʼulul a kʼaʼaytik le maʼalob péektsiloʼ, yéetel tsʼoʼokbes tubeel le meyaj tsʼaʼantechoʼ» (2 TIM. 4:5).
KʼAAY 57 Bis u Tʼaan Jéeoba tiʼ tuláakal máak
TIʼ BAʼAX KUN TʼAAN *
Ka tsʼoʼok u kaʼa kuxtal Jesuseʼ tu muchʼuba yéetel u disipuloʼobeʼ ka tu yaʼalajtiʼob ka u kaʼansoʼob u maasil. (Ilawil le xóotʼol 1).
1. ¿Baʼax jach k-kʼáat k-beete, yéetel baʼaxten? (Ilawil le dibujo yaan tu yáax táan juʼunil le revistaaʼ).
JESUCRISTOEʼ tu yaʼalaj tiʼ u disipuloʼob: «Xeeneʼex tu yiknal u máakiloʼob tuláakal kaajoʼobeʼ ka a beeteʼexoʼob disipuloʼob» (Mat. 28:19). Toʼoneʼ k-kʼáat k-il bix jeʼel k-tsʼoʼokbesik tubeel le meyaj kʼubéentaʼantoʼonoʼ (2 Tim. 4:5). Tumen letiʼe meyaj maas kʼaʼanaʼan u beetaʼal tu séebaʼaniloʼ. Chéen baʼaleʼ yaan kʼiineʼ jeʼel u talamtal k-beetik jach jeʼel bix k-kʼáateʼ.
2. ¿Baʼaxoʼob jeʼel u talamkúuntik k-tsʼoʼokbesik tubeel le meyaj kʼubéentaʼantoʼonoʼ?
2 Yaan uláakʼ baʼaloʼob kʼaʼabéet k-beetkeʼ jach ku bisiktoʼon yaʼab tiempo yéetel ku beetik k-kaʼanal. Maʼ xaaneʼ unaj k-meyaj bul kʼiin utiaʼal k-tsʼáaik baʼaxoʼob kʼaʼabéet ichil k-otoch. Maʼ xaan xaneʼ kʼojaʼanoʼon wa kʼaʼabéet k-kanáantik juntúul k-láakʼtsil kʼojaʼan, k-deprimir wa tsʼoʼok u yantal k-jaʼabil. ¿Bix jeʼel k-aktáantikoʼob yéetel k-tsʼoʼokbesik tubeel le meyaj kʼubéentaʼantoʼonoʼ?
3. ¿Baʼax k-kanik tiʼ le baʼax tu yaʼalaj Jesús teʼ Mateo 13:23?
3 Maʼ unaj u lúubul k-óol wa maʼ tu páajtal k-jach táakpajal teʼ kʼaʼaytaj yoʼolal le baʼaxoʼob k-aktáantikoʼ. Jesuseʼ u yojel maʼ tu páajtal k-beetik le bukaʼaj ku beetik u maasil sukuʼunoʼoboʼ (xok Mateo 13:23). Jéeobaeʼ ku kiʼimaktal u yóol yoʼolal le meyaj k-beetik tu jaajil k-óol ichil u kaajaloʼ (Heb. 6:10-12). Kex beyoʼ yaan hora jeʼel k-tuklikeʼ jeʼel u páajtal k-beetik u maasil utiaʼal k-meyajtikeʼ. Teʼ xookaʼ yaan k-ilik baʼax jeʼel u páajtal k-beetik utiaʼal k-tsʼáaik táanil le kʼaʼaytaj ichil k-kuxtaloʼ, ka kuxlakoʼon chéen yéetel junpʼíit baʼal, ka k-maʼalobkíint bix k-kʼaʼaytaj yéetel bix k-kaʼansaj. Baʼaleʼ táanileʼ koʼoneʼex ilik baʼax u kʼáat u yaʼal k-tsʼoʼokbesik tubeel le meyaj kʼubéentaʼantoʼonoʼ.
4. ¿Baʼax u kʼáat u yaʼal k-tsʼoʼokbesik tubeel le meyaj u kʼubéentmajtoʼon Diosoʼ?
4 U tsʼoʼokbesik máak tubeel le meyaj u kʼubéentmaj Diosoʼ u kʼáat yaʼaleʼ u beetik tuláakal le ku páajtal utiaʼal u táakpajal teʼ kʼaʼaytajoʼ yéetel u kaʼansik u maasil. Jéeobaeʼ maʼ chéen ku yilik bukaʼaj tiempo k-máansik teʼ kʼaʼaytajoʼ, baʼaxeʼ ku beetik u cuentail baʼax péeksikoʼon k-beete. Wa k-yaabiltmaj letiʼ bey xan k-éet máakileʼ, leloʼ yaan u péeksikoʼon k-tsʼáa k-óol táakpajal teʼ meyaj u kʼubéentmajtoʼonoʼ * (Mar. 12:30, 31; Col. 3:23). Utiaʼal lelaʼ yaan k-xupik k-muukʼ utiaʼal k-beetik. Wa k-naʼatik jach kʼaʼabéet u kʼaʼaytaʼal le maʼalob péektsiloʼ, yaan k-ilik k-kʼaʼaytik tiʼ le jaytúul máakoʼob ku béeytaleʼ.
5, 6. ¿Baʼax unaj u beetik máak utiaʼal u tsʼáaik táanil u meyajtik Dios kex maʼ yaʼab tiempo yaantiʼiʼ? Kete.
5 Tuukulnakoʼon tiʼ juntúul xiʼipal jach uts tu yich u paxik guitarra, chéen pʼel u yantal u tiempoil tiʼeʼ ku paxik. Kéen máanak kʼiineʼ ku boʼotaʼal utiaʼal ka xiʼik paax tu jóokʼbal semana tuʼux ku koʼonol café. Baʼaleʼ tumen maʼ yaʼab ku náajaltikeʼ, ku joʼopʼol u meyaj xan tiʼ junpʼéel tienda utiaʼal lunes tak viernes. Kex maas yaʼab tiempo ku máansik teʼ tiendaoʼ, le baʼax maas uts tu yichoʼ u paax. U kʼáat u maas kan paax utiaʼal u meyaj chéen tiʼ leloʼ. Le oʼolal ku paxik u guitarra cada ken yanak u súutukil u beetik.
6 Maʼ xaaneʼ, toʼon xaneʼ maʼ tu páajtal k-táakpajal teʼ kʼaʼaytaj le bukaʼaj tiempo k-kʼáatoʼ. Baʼaleʼ letiʼe baʼax maas uts t-ich k-beetkoʼ. K-ilik bix jeʼel k-áantik le máakoʼob u naʼatoʼob tubeel u maʼalob péektsilil le Reinooʼ. Baʼaleʼ tumen yaʼab baʼaxoʼob yaan k-beeteʼ, maʼ xaaneʼ ku joʼopʼol k-tuklik bix jeʼel u páajtal k-maas tsʼáaik táanil le kʼaʼaytaj ichil k-kuxtaloʼ.
BIX JEʼEL K-TSʼÁAIK TÁANIL K-MEYAJTIK DIOSEʼ
7, 8. ¿Bix jeʼel k-tsʼáaik k-óol k-meyajt Dios jeʼex beetaʼabik tumen Jesuseʼ?
7 Le bix úuchik u tsʼáaik u yóol Jesús u meyajt Diosoʼ ku yeʼesik baʼax unaj k-beetik xan. Le baʼax maas kʼaʼanaʼan úuchik u yilkoʼ letiʼe u kʼaʼaytik u Reino Diosoʼ (Juan 4:34, 35). Tu xíimbaltaj yaʼab kilómetros utiaʼal u kʼaʼaytik le maʼalob péektsil tiʼ le jaytúul máakoʼob páajchajeʼ. Tu yilaj u kʼaʼaytik le maʼalob péektsil tiʼ le máakoʼob tu yotochoʼoboʼ bey xan tuʼux yaʼab u máan máak. Tu tsʼáaj táanil u meyajtik Dios ichil u kuxtal.
8 Toʼoneʼ jeʼel u páajtal k-beetik jeʼex Cristo le kéen k-kaxt bix jeʼel k-kʼaʼaytik u maʼalob péektsilil le Reino tuláakal súutukiloʼ. K-ilik k-beetik kex yaan kʼiin kaʼanaʼanoʼon (Mar. 6:31-34; 1 Ped. 2:21). Maʼ xaaneʼ yaan máaxoʼob ichil le múuchʼulil jeʼel u páajtal u beetik u precursor especialil, regularil wa auxiliaril. Yanoʼob xaneʼ tsʼoʼok u kankoʼob uláakʼ idioma wa tsʼoʼok u binoʼob áantaj tuʼux maas kʼaʼabéet j-kʼaʼaytajoʼob. Tsʼoʼoleʼ yaʼab uláakʼ sukuʼunoʼobeʼ chéen j-kʼaʼaytajoʼob, kex beyoʼ ku beetkoʼob tuláakal le ku páajtal utiaʼal u táakpajloʼob teʼ kʼaʼaytajoʼ. Maʼ unaj u tuʼubultoʼoneʼ Jéeobaeʼ maʼatech u yaʼaliktoʼon ka k-beet u maasil wa maʼ tu páajtal k-beetik. U kʼáat ka táakpajkoʼon yéetel kiʼimak óolal k-kʼaʼayt «u maʼalob péektsilil le Dios kiʼimak u yóoloʼ» (1 Tim. 1:11; Deu. 30:11).
9. 1) ¿Bix úuchik u tsʼáaik táanil ichil u kuxtal Pablo le kʼaʼaytaj kex kʼaʼabéetchaj u meyajoʼ? 2) Jeʼex u yeʼesik Baʼaxoʼob 28:16, 30 yéetel 31, ¿bix u yilaʼal kaʼach le kʼaʼaytaj tumen Pablooʼ?
9 Uláakʼ máax jach tu tsʼáaj u yóol u meyajt Dioseʼ apóstol Pablo. Le tiaʼan tu kaajil Corinto teʼ tu kaʼapʼéel viajeil u kʼaʼaytajoʼ, kʼaʼabéetchaj u meyaj utiaʼal u náajaltik taakʼin. Baʼaleʼ maʼ tu tsʼáaj táanil chéen u chuyik pasel nookʼoʼobiʼ. Baʼaxeʼ meyajnaj utiaʼal u kaxtik baʼaxoʼob kʼaʼabéettiʼ utiaʼal u maas kʼaʼaytik le maʼalob péektsil tiʼ le corintoiloʼoboʼ, maʼ tu páaʼtaj ka tsʼaʼabak baʼaxoʼob kʼaʼabéettiʼiʼ (2 Cor. 11:7). Kex kʼaʼabéetchaj u meyajeʼ, maʼ xuʼul u tsʼáaik táanil u meyajtik Diosiʼ, le oʼolal kʼaʼaytajnaj teʼ kaaj tuláakal sabadoʼoboʼ. Ka tu yilaj ku béeytaleʼ, tu maas tsʼáaj u yóol u kʼaʼayt le maʼalob péektsiloʼ. Letiʼeʼ tu tsʼáaj «u yóol u kʼaʼayt u tʼaan Dios, táan u yeʼesik yéetel táan u jaajkúuntik tiʼ le judíoʼoboʼ, Jesuseʼ letiʼ le Cristooʼ» (Bax. 18:3-5; 2 Cor. 11:9). Ka máan kʼiineʼ, kʼaʼal ichil u yotoch tu kaajil Roma kaʼapʼéel jaʼab, teʼeloʼ kʼaʼaytajnaj tiʼ le máaxoʼob xíimbaltikoʼ yéetel tu tsʼíibtaj cartaʼob (xok Baʼaxoʼob 28:16, 30, 31). U chʼaʼtukultmaj u tsʼáaik táanil ichil u kuxtal u meyajtik Dios. Tu yaʼalaj: «Tumen kʼubéentaʼantoʼon le meyaj[aʼ] [...], maʼ t-chaʼik u lúubul k-óol» (2 Cor. 4:1). Jeʼex Pabloeʼ, jeʼel u páajtal k-tsʼáaik táanil ichil k-kuxtal k-kʼaʼaytik u maʼalob péektsilil le Reino kex ku kʼaʼabéettal k-meyajoʼ.
Jejeláas baʼax jeʼel u páajtal k-beetik utiaʼal k-tsʼoʼokbesik tubeel le meyaj kʼubéentaʼantoʼonoʼ. (Ilawil le xóotʼol 10 yéetel 11).
10, 11. ¿Bix jeʼel k-tsʼoʼokbesik le meyaj u kʼubéentmajtoʼon Dios kéen kʼojaʼanchajkoʼonoʼ?
10 ¿Baʼax unaj k-beetik wa tsʼoʼok u yantal k-jaʼabil bey xan wa kʼojaʼanoʼon, le oʼolal maʼ tu páajtal k-jach táakpajal teʼ kʼaʼaytajoʼ? Wa beyoʼ jeʼel u páajtal k-táakpajal teʼ kʼaʼaytaj uláakʼ bixoʼ. Le sukuʼunoʼob teʼ yáax siglooʼ kʼaʼaytajnajoʼob tiʼ le máakoʼob jeʼel tuʼuxak ka u yiloʼobeʼ. Kʼaʼaytajnajoʼob joonaj joonajil, tuʼux yaʼab u máan máak bey xan kex maʼ le jokʼaʼan u beetoʼobiʼ (Bax. 17:17; 20:20). ¿Kux túun wa maʼ tu béeytal k-sen xíimbal? Wa beyoʼ jeʼel u páajtal k-kutal tuʼux yaʼab u máan máak utiaʼal ka tʼaanakoʼon tu yéeteloʼobeʼ. Jeʼel xan u páajtal k-kʼaʼaytaj tiʼ teléfono, tiʼ carta yéetel kex maʼ le jokʼaʼanoʼon k-beetiʼ. Yaʼab sukuʼunoʼob jach talam yaniloʼobeʼ ku kiʼimaktal u yóoloʼob ikil u táakpajloʼob teʼ kʼaʼaytajoʼ.
11 Bey túunoʼ jeʼel u páajtal k-tsʼoʼokbesik le meyaj u kʼubéentmajtoʼon Dios kex kʼojaʼanoʼonoʼ. Tuukulnakoʼon tu kaʼatéen tiʼ apóstol Pablo. Letiʼeʼ tu yaʼalaj: «Yaanten u muukʼil utiaʼal in beetik tuláakal baʼal, tu yoʼolal le Máax tsʼáaikten u páajtalil in beetkoʼ» (Fili. 4:13). Le ka kʼojaʼanchaj le táan u beetik junpʼéel viajeoʼ, jach kʼaʼabéetchaj le muukʼ tiʼoʼ. Letiʼeʼ tu yaʼalaj tiʼ le galaciailoʼoboʼ: «Yoʼolal junpʼéel kʼojaʼanil tin muʼyajteʼ yanchajten u páajtalil in yáax kʼaʼaytikteʼex le maʼalob péektsiloʼ» (Gal. 4:13). Bey túun xanoʼ, kéen kʼojaʼanchajkoʼoneʼ jeʼel u tsʼáaik tuʼux k-kʼaʼaytik u maʼalob péektsilil le Reino tiʼ le doctoroʼoboʼ, le enfermeroʼob yéetel uláakʼ máaxoʼob ku meyajoʼob teʼ hospitaloʼ. Yaʼab tiʼ letiʼobeʼ maʼ kulaʼanoʼob kéen máankoʼon tu yotochoʼobiʼ.
BIX JEʼEL K-KUXTAL CHÉEN YÉETEL JUNPʼÍIT BAʼALEʼ
12. ¿Baʼax u kʼáat u yaʼal k-paakat «junpʼéeliliʼ tuʼux»?
12 Jesuseʼ tu yaʼalaj: «Le ichoʼ letiʼe baʼax sáasilkuntik le wíinkliloʼ, le oʼolaleʼ wa sáasil a wicheʼ [wa ku paakat junpʼéeliliʼ tuʼux, jeʼex u yaʼalik le tsolajiloʼ] tuláakal a wíinklil kun sáasiltal» (Mat. 6:22). ¿Baʼax u kʼáat u yaʼal le tʼaanoʼobaʼ? U kʼáat u yaʼaleʼ unaj k-kuxtal chéen yéetel junpʼíit baʼal, wa k-chʼikik k-paakat chéen junpʼéeliliʼ tuʼux yéetel maʼ k-chaʼik u náaysaʼal k-óol yéetel yaanal baʼal. Jesuseʼ bey tu beetiloʼ, letiʼeʼ tu tsʼáaj táanil ichil u kuxtal u meyajtik Dios yéetel tu kaʼansaj u disipuloʼob u tsʼáaʼob táanil u meyajtikoʼob Jéeoba bey xan le Reinooʼ. Toʼoneʼ k-beetik jeʼex Jesús kéen k-tsʼoʼokbes le meyaj kʼubéentaʼantoʼonoʼ bey xan kéen k-kaxt «táanil u Reino Dios yéetel u justicia» (Mat. 6:33).
13. ¿Baʼax jeʼel u yáantkoʼon utiaʼal k-tsʼoʼokbesik le meyaj kʼubéentaʼantoʼonoʼ?
13 Junpʼéel baʼax jeʼel u yáantkoʼon paakat «junpʼéeliliʼ tuʼux» utiaʼal k-tsʼoʼokbesik le meyaj kʼubéentaʼantoʼonoʼ, letiʼe ka kuxlakoʼon chéen yéetel junpʼíit baʼaloʼ, beyoʼ yaan u maas yantaltoʼon tiempo utiaʼal k-áantik u maasil u kʼaj óoltoʼob yéetel u yaabiltoʼob Jéeoba. * ¿Jeʼel wa u páajtal k-kʼexik u kʼiinil k-meyaj utiaʼal k-jóokʼol kʼaʼaytaj tak ich semanaeʼ? ¿Jeʼel wa u páajtal u jáawal k-máansik yaʼab tiempo tiʼ náaysaj óoloʼobeʼ?
14. ¿Baʼax tu beetaj juntúul sukuʼun yéetel u yatan utiaʼal u maas táakpajloʼob teʼ kʼaʼaytajoʼ?
14 Koʼoneʼex ilik baʼax tu beetaj Elías yéetel u yatan, letiʼeʼ ku beetik u ancianoil. Elíaseʼ ku yaʼalik: «Maʼ tu páajtal k-beetik k-precursoril, baʼaleʼ yaan baʼaxoʼob jeʼel u páajtal k-beetik utiaʼal k-maas táakpajal teʼ kʼaʼaytajoʼ. Jeʼex k-kanáantik maʼ k-sen xuup, maʼ k-sen máansik tiempo tiʼ náaysaj óolaloʼob yéetel t-kʼáataj tiʼ k-patrón ka u kʼex u kʼiinil k-meyaj. Úuchik k-beetik beyoʼ páajchaj k-jóokʼol kʼaʼaytaj tu chíinil kʼiin, t-kaxtaj uláakʼ j-xoknáaloʼob yéetel páajchaj k-jóokʼol kʼaʼaytaj tu yáam semana kaʼatéen cada mes. Jach kiʼimakchaj k-óol».
BIX JEʼEL K-MAAS MAʼALOBKÍINTIK BIX K-KAʼANSAJEʼ
K-beetik le baʼax k-kanik teʼ muchʼtáambal ku beetaʼal yáam semanaoʼ ku yáantkoʼon utiaʼal k-maas maʼalobkíintik bix k-kʼaʼaytajoʼ. (Ilawil le xóotʼol 15 yéetel 16). *
15, 16. Jeʼex u yaʼalik Yáax tiʼ Timoteo 4:13 yéetel 15, ¿bix jeʼel k-maas maʼalobkíintik k-kʼaʼaytaj yéetel k-kaʼansajeʼ? (Ilawil xan le cuadro « Baʼaxoʼob jeʼel u yáantkoʼon utiaʼal k-tsʼoʼokbesik tubeel le meyaj kʼubéentaʼantoʼonoʼ»).
15 Uláakʼ bix jeʼel k-tsʼoʼokbesik tubeel le meyaj kʼubéentaʼantoʼonoʼ letiʼe kéen k-maas maʼalobkíint bix k-kaʼansajoʼ. Jujuntúul máaxoʼob ku beetkoʼob wa baʼax meyajileʼ ku yaʼalaʼaltiʼob ka u maas maʼalobkíintoʼob bix u meyajoʼob. Bey túunoʼ, toʼon xaneʼ unaj k-ilik k-maas maʼalobkíintik bix k-kaʼansaj (Pro. 1:5; xok 1 Timoteo 4:13, 15).
16 ¿Bix jeʼel u páajtal k-beetkeʼ? Unaj k-chʼenxikintik baʼax ku kaʼansaʼaltoʼon láalaj semana teʼ muchʼtáambal Kuxtal yéetel Meyaj jeʼex Cristooʼ. Teʼeloʼ ku yeʼesaʼaltoʼon bix jeʼel k-maas maʼalobkíintik k-kʼaʼaytajeʼ. Jeʼex kéen tsʼaʼabak wa baʼax tsolnuʼukil tiʼ le máaxoʼob ku táakpajloʼob tumen le sukuʼun nuʼuktik le muchʼtáambaloʼ, unaj k-chʼenxikintik baʼax ku yaʼalik utiaʼal k-ilik baʼax jeʼel u yáantkoʼon utiaʼal k-maas maʼalobkíintik k-kaʼansajoʼ. Bey túunoʼ kéen tsikbalnakoʼon yéetel wa máaxeʼ jeʼel u páajtal k-beetik le baʼax t-uʼuyoʼ. Uláakʼ baʼax jeʼel u páajtal k-beetkeʼ letiʼe k-aʼalik tiʼ le sukuʼun nuʼuktik le grupo tuʼux k-kʼaʼaytaj ka u yáantoʼonoʼ wa ka jóokʼok kʼaʼaytaj t-éetel. Jeʼel xan u páajtal k-aʼalik tiʼ le sukuʼunoʼob úuch joʼopʼok u kʼaʼaytajoʼob ka u yáantoʼonoʼ, tiʼ juntúul precursor wa tiʼ le superintendente tiʼ circuitooʼ. Leloʼ yaan u yáantkoʼon utiaʼal u meyajtoʼon maas maʼalob le nuʼukuloʼob tsʼaʼantoʼon utiaʼal k-kaʼansajoʼ. Beyoʼ yaan u maas kiʼimaktal k-óol kéen jóokʼkoʼon kʼaʼaytaj bey xan kéen k-tsʼáa xook tiʼ wa máax.
17. ¿Bix ken k-uʼuyba kéen k-tsʼoʼokbes tubeel le meyaj kʼubéentaʼantoʼonoʼ?
17 Jach kiʼimak k-óol tumen Jéeobaeʼ ku chaʼik k-múul meyaj tu yéetel (1 Cor. 3:9). Kéen k-il «máakalmáak le baʼaloʼob maas kʼaʼanaʼantak» yéetel kéen k-tsʼoʼokbes le meyaj kʼubéentaʼantoʼonoʼ k-meyajtik Jéeoba yéetel «kiʼimak óolal» (Fili. 1:10; Sal. 100:2). Toʼoneʼ k-ojleʼ Dioseʼ yaan u yáantkoʼon utiaʼal k-tsʼoʼokbesik le meyaj u kʼubéentmajtoʼon kex jeʼel baʼalak talamil ka k-aktáanteʼ (2 Cor. 4:1, 7; 6:4). Kex maʼ tu páajtal k-jach táakpajal teʼ kʼaʼaytaj yoʼolal wa baʼax k-aktáantikeʼ, wa k-meyajtik Dios yéetel u jaajil k-óoleʼ yaan u kiʼimaktal k-óol (Gal. 6:4). Kéen k-tsʼoʼokbes tubeel le meyaj kʼubéentaʼantoʼonoʼ k-eʼesik k-yaabiltmaj Jéeoba bey xan k-éet máakil. Le Bibliaoʼ ku yaʼalik baʼax utsil jeʼel k-kʼamik wa k-beetkeʼ: «Tumen beyoʼ yaan a salvartikaba teech bey xan le máaxoʼob chʼenxikintkechoʼ» (1 Tim. 4:16).
KʼAAY 58 K-kaxtik máax u kʼáat u jeetsʼelil Dios
^ xóot’ol 5 Jesuseʼ tu yaʼalaj unaj k-kʼaʼaytik u maʼalob péektsilil le Reinooʼ yéetel k-kaʼansik uláakʼ máakoʼob. Teʼ xookaʼ yaan k-ilik bix jeʼel k-beetik tubeel kex talam le kʼiinoʼob kuxlikoʼonaʼ. Yaan k-ilik xan bix jeʼel k-maʼalobkíintik k-kaʼansajeʼ yéetel bix jeʼel u maas jatsʼutstal k-ilik k-beetkeʼ.
^ xóot’ol 4 BAʼAX KU TSOʼOLOL: Kéen tʼaanakoʼon tiʼ le meyaj u kʼubéentmajtoʼon Diosoʼ táakaʼan le kʼaʼaytajoʼ, k-kaʼansik uláakʼ máakoʼob, u líiʼsaʼal yéetel u yutskíintaʼal le najoʼob tuʼux k-adorartik Diosoʼ yéetel u yáantaʼal le máaxoʼob ku muʼyajoʼob tuʼux ku yúuchul loobiloʼoboʼ (Bax. 11:29; 2 Cor. 5:18, 19).
^ xóot’ol 13 Ilawil le siete baʼaxoʼob jeʼel u yáantkech teʼ cuadro «Bix jeʼel a kuxtal chéen yéetel baʼax kʼaʼabéettecheʼ», jóokʼ tiʼ U Pʼíich Tulumil Kanan tiʼ julio tiʼ 2016, táan juʼun 10.
^ xóot’ol 62 FOTOʼOB: Juntúul kiikeʼ táan u yeʼesik bix u kaʼa xíimbaltaʼal máak tiʼ le muchʼtáambal ku beetaʼal yáam semanaoʼ. Tsʼoʼoleʼ ku tsʼíibtik teʼ folleto Kaʼansaj le tsolnuʼukoʼob ku tsʼaʼabaltiʼ tumen le sukuʼun nuʼuktik le muchʼtáambaloʼ. Kéen jóokʼok kʼaʼaytaj tu tsʼoʼokbal semanaeʼ ku yilik u meyajtiʼ le baʼax tu kanoʼ.
