1. ¿Baʼaxten Jesúseʼ tu kʼáataj tiʼ Jéeoba ka kanáantaʼak u discípuloʼob?

LE ÁAKʼAB ka maʼach Jesús utiaʼal kíimsbiloʼ táan kaʼach u tuukul tiʼ le bukaʼaj baʼaloʼob ken u muʼyajt u discípuloʼoboʼ. Jesúseʼ jach u yaabiltmaj kaʼach u discípuloʼob le oʼolal tu kʼáataj tiʼ u Taata ka kanáantaʼakoʼob tiʼ le Kʼaasilbaʼaloʼ (Juan 17:14, 15). Jesúseʼ u yojleʼ le kéen suunak teʼ kaʼanoʼ Satanáseʼ yaan u yilik u tsʼáaikuba tu contra tuláakal le máaxoʼob u kʼáat u meyajtoʼob Jéeobaoʼ. Le oʼolal kʼaʼabéet u kanáantaʼaloʼob tumen Jéeoba.

2. ¿Baʼaxten k-ojel Jéeobaeʼ yaan u núukik k-oraciónoʼob?

² Jéeobaeʼ jach u yaabiltmaj u Hijo le oʼolal tu beetaj le baʼax kʼáataʼabtiʼoʼ. Wa k-beetik baʼax ku yaʼalik Jéeobaeʼ yaan u yaabiltikoʼon, yéetel wa k-kʼáatiktiʼ ka u yáantoʼon yéetel ka u kanáantoʼoneʼ yaan xan u beetik. Letiʼeʼ bey juntúul taatatsil u yaabiltmaj u paalaleʼ. Wa Jéeoba maʼ tu kanáantik le máaxoʼob meyajtikoʼ jeʼel u yúuchul tʼaan kʼaas tu yoʼolaleʼ.

3. ¿Baʼaxten kʼaʼabéet u kanáantkoʼon Jéeoba?

³ Teʼ kʼiinoʼobaʼ maas kʼaʼabéettoʼon u yáantaj Jéeoba tumen u Kʼaasilbaʼaleʼ tsʼoʼok u jóoʼsaʼal teʼ kaʼanoʼ yéetel «jach pʼujaʼan» (Apo. 12:12). Tsʼoʼok u yoksik tu tuukul yaʼab máakoʼobeʼ kéen u chʼaʼpachtoʼonoʼobeʼ táan u beetkoʼob «junpʼéel baʼax maʼalob tu táan Dios» (Juan 16:2). Uláakʼ máakoʼob maʼ tu meyajtikoʼob Dioseʼ ku chʼaʼpachtikoʼonoʼob xan tumen maʼ t-beetik le baʼaxoʼob ku beetkoʼoboʼ. Kex beyoʼ toʼoneʼ maʼ saajkoʼoniʼ tumen k-ojel jach jaaj le baʼax ku yaʼalik le Bibliaaʼ: «Yuumtsileʼ ku béeykuntik baʼax ku yaʼalik, yaan u muʼukʼaʼankúuntik a wóoleʼex yéetel yaan u kanáantkeʼex tiʼ le Kʼaasilbaʼaloʼ» (2 Tes. 3:3). Beoraaʼ koʼox ilik kaʼapʼéel bix u kanáantkoʼon Jéeoba.

4. Jeʼex u yaʼalik Efesios 6:13-17, ¿baʼax u tsʼaamaj Jéeoba utiaʼal u kanáantkoʼon?

⁴ Jéeobaeʼ u tsʼaamajtoʼon u nuʼukuliloʼob baʼateʼel utiaʼal k-kanáantikba tiʼ le Kʼaasilbaʼaloʼ (xok Efesios 6:13-17). Le nuʼukuloʼobaʼ jach maʼalobtak, chéen baʼaleʼ utiaʼal ka u kanáantoʼon tubeeleʼ kʼaʼabéet u meyajtoʼon tuláakal le nuʼukuloʼobaʼ. Beora túunaʼ koʼox ilik máakalmáakoʼobiʼ yéetel bix jeʼel u meyajtoʼoneʼ.

5. ¿Baʼax le kʼaxnakʼoʼ yéetel baʼaxten unaj k-tsʼáaik?

⁵ Le kʼaxnakʼ wa le cinturón unaj k-tsʼáaikoʼ letiʼe baʼaloʼob jaajtak ku kaʼansik le Bibliaoʼ. ¿Baʼaxten unaj k-tsʼáaik le kʼaxnakʼaʼ? Tumen u Kʼaasilbaʼaleʼ «u taatail le tuusoʼ» (Juan 8:44). Letiʼeʼ tsʼoʼok u máan u milesil años joʼopʼok u tuus yéetel jach yaʼab máakoʼob tsʼoʼok u tusik (Apo. 12:9). Chéen baʼaleʼ le baʼaxoʼob ku kaʼansik le Bibliaoʼ ku kanáantkoʼon utiaʼal maʼ k-tuʼusul. ¿Bix jeʼel k-tsʼáaik le kʼaxnakʼaʼ? K-beetik le kéen k-kan u jaajil tu yoʼolal Jéeoba, le kéen k-adorart yéetel «le u jaajil ku taal tiʼ letiʼoʼ» bey xan le kéen «k-beet tuláakal baʼal tu nuʼuk» (Juan 4:24; Efe. 4:25; Heb. 13:18).

6. ¿Baʼax le corazaoʼ yéetel baʼaxten unaj k-tsʼáaik?

⁶ Le corazaoʼ letiʼe maʼalob tsolnuʼukoʼob yéetel leyoʼob u tsʼaamaj Jéeobaoʼ. ¿Baʼaxten unaj k-tsʼáaik le corazaoʼ? Tumen jeʼex junpʼéel coraza ku kanáantik u puksiʼikʼal juntúul soldadoeʼ le leyoʼob yéetel le tsolnuʼukoʼob ku tsʼáaiktoʼon Diosoʼ ku kanáantkoʼon utiaʼal maʼ u kʼaskúuntaʼal k-puksiʼikʼal tumen le kʼasaʼan yóokʼol kaabaʼ (Pro. 4:23). Jéeobaeʼ ku yaʼaliktoʼon ka k-yaabilte yéetel ka k-adorart yéetel tuláakal k-puksiʼikʼal (Mat. 22:36, 37). Chéen baʼaleʼ u Kʼaasilbaʼaleʼ maʼ u kʼáat ka k-adorart Jéeoba yéetel tuláakal k-puksiʼikʼaliʼ le oʼolaleʼ ku yilik ka k-yaabilt le baʼax ku tsʼáaik le yóokʼol kaabaʼ utiaʼal beyoʼ ka k-beet baʼaloʼob pʼektaʼan tumen Dios (Sant. 4:4; Juan 2:15, 16). Tsʼoʼoleʼ wa ku yilik maʼ tu tsaʼayal yéetel junpʼéel baʼaleʼ ku kaxtik yaanal baʼal u beet utiaʼal k-lúubul tiʼ baʼax kʼaas.

7. ¿Bix jeʼel k-tsʼáaik le corazaoʼ?

⁷ ¿Bix jeʼel k-tsʼáaik le corazaoʼ? K-beetik le kéen kuxlakoʼon jeʼex u yaʼalik Jéeobaoʼ bey xan le kéen k-pʼekt le baʼax kʼaasoʼ (Sal. 97:10). Yaan máaxoʼob creerkeʼ u leyoʼob Jéeobaeʼ maʼ tu chaʼikoʼob k-beetik mix baʼal. Wa ku xuʼulul k-beetik le baʼax ku yaʼaliktoʼon Jéeoba teʼ Bibliaoʼ beyoʼon juntúul soldado ku luʼsik u coraza le táan le baʼateloʼ chéen tumen ku tuklik jach aal. ¿Máasaʼ wa ka u beet juntúul soldado le jeʼelaʼ jach minaʼan u naʼat? Le máaxoʼob u yaabiltmoʼob Jéeobaoʼ ku yilik u beetkoʼob le baʼaxoʼob ku yaʼalikoʼ. Maʼ tu yilkoʼob bey junpʼéel kuucheʼ tumen u yojloʼob utiaʼal u yutsiloʼob (1 Juan 5:3).

8. ¿Baʼax u kʼáat u yaʼal k-tsʼaamaj k-xaanaboʼob yéetel listoʼon utiaʼal k-tsikbaltik le maʼalob baʼaloʼob yaan yil yéetel le jeetsʼeliloʼ?

⁸ Pabloeʼ tu yaʼalaj xaneʼ kʼaʼabéet k-tsʼáaik xanaboʼob yéetel kʼaʼabéet listoʼon utiaʼal k-tsikbaltik le maʼalob baʼaloʼob yaan yil yéetel le jeetsʼeliloʼ. Leloʼ u kʼáat u yaʼaleʼ kʼaʼabéet listoʼon utiaʼal k-tsikbaltik u Reino Dios tiʼ uláakʼ máakoʼob. Kéen k-tsikbalt tiʼ u maasil le baʼax ku yaʼalik le Bibliaoʼ ku maas nojochtal k-fe. Tiʼ tuláakal yóokʼol kaabeʼ le sukuʼunoʼoboʼ jach táan u yilkoʼob u tsikbaltikoʼob u Reino Dios tiʼ tuláakal máak. Ku tsikbaltikoʼob tiʼ u yéet meyajoʼob, tiʼ u yéet xookoʼob, teʼ tuʼux ku yúuchul maanoʼ, joonaj joonajil, kéen xiʼikoʼob maan, tiʼ u láakʼtsiloʼob maʼ Testigoʼobiʼ yéetel tiʼ le máaxoʼob u kʼaj óoloʼoboʼ. Kex maʼ tu páajtal u jóokʼloʼob tu yotochoʼobeʼ ku kaxtikoʼob bix jeʼel u páajtal u kʼaʼaytajoʼobeʼ. Wa ku xuʼulul k-tsikbaltik u Tʼaan Dios tumen saajkoʼoneʼ jeʼel u yúuchultoʼon le baʼax ku yúuchul tiʼ juntúul soldado ku pitik u xaanab le táan u baʼateloʼ. Jeʼel u séeb xóotol u yookeʼ, istikyaj ken u kanáantiluba yéetel maʼ kun páajtal u séeb beetik le baʼax kun aʼalbiltiʼ tumen le comandanteoʼ.

9. ¿Baʼaxten unaj u yantaltoʼon u nojoch escudoil le fejoʼ?

 ⁹ U nojoch escudoil le fejoʼ letiʼe fe yaantoʼon tiʼ Jéeobaoʼ. Toʼoneʼ k-creertik letiʼeʼ jach yaan u cumplirtik le baʼaxoʼob u prometermoʼ. Le fejaʼ le kun áantkoʼon utiaʼal k-tupik «u tʼabaʼan flechaʼob le Kʼaasilbaʼaloʼ». ¿Baʼaxten mantatsʼ unaj u yantaltoʼon le escudoaʼ? Tumen yaan u yáantkoʼon utiaʼal k-kanáantikba tiʼ le baʼaloʼob maʼ jaajtak ku kaʼansik le apóstataʼoboʼ yéetel yaan xan u yáantkoʼon utiaʼal maʼ u lúubul k-óol le kéen burlartaʼakoʼon wa kéen aʼalaʼaktoʼon baʼal tumen u maasil. Wa maʼ nojoch k-fe tiʼ Dioseʼ séeb ken k-lúubul kéen túulchʼintaʼakoʼon k-beet baʼax maʼ maʼalobiʼ. Kéen k-defendert le baʼaxoʼob k-creertik teʼ tuʼux k-meyaj wa teʼ tuʼux k-xookoʼ k-eʼesik táan u meyajtoʼon u escudoil le fe utiaʼal k-kanáantikbaoʼ (1 Ped. 3:15). Uláakʼ bix u kanáantkoʼon u escudoil le fejoʼ letiʼe kéen k-rechazart junpʼéel meyaj maʼalob u boʼolil pero jeʼel u beetik u jáawal k-tsʼáaik k-óol k-meyajt Jéeobaeʼ (Heb. 13:5, 6). Tsʼoʼoleʼ wa maʼ tu xuʼulul k-meyajtik Dios kéen yanaktoʼon wa baʼax pruebaileʼ, u kʼáat u yaʼaleʼ táan xan u kanáantkoʼon le fe yaantoʼonoʼ (1 Tes. 2:2).

10. ¿Baʼax u cascoil le salvaciónoʼ yéetel baʼaxten unaj k-tsʼáaik?

¹⁰ U cascoil le salvaciónoʼ letiʼe esperanza ku tsʼáaiktoʼon Jéeobaoʼ. Le esperanzaaʼ ku yáantkoʼon  k-creerteʼ Jéeobaeʼ yaan u boʼotik tuláakal le máaxoʼob beetik le baʼax u kʼáatoʼ. Tsʼoʼoleʼ ku yáantkoʼon k-creert xaneʼ kex ka kíimkoʼoneʼ letiʼeʼ jeʼel u páajtal u kaʼa kuxkíintikoʼoneʼ (1 Tes. 5:8; 1 Tim. 4:10; Tito 1:1, 2). Jeʼex junpʼéel casco ku kanáantik u pool juntúul soldadoeʼ le esperanza xanoʼ ku kanáantkoʼon wa ku yáantkoʼon utiaʼal ka tuukulnakoʼon maʼalob. ¿Bix u beetik? Ku yáantkoʼon utiaʼal maʼ k-chʼíikil tuukul tiʼ le problemasoʼ, baʼaxeʼ ka k-chʼik k-tuukul tiʼ le jatsʼuts baʼaloʼob u prometermajtoʼon Diosoʼ. ¿Bix u tsʼáaik máak le cascoaʼ? Letiʼe kéen tuukulnak máak jeʼex u beetik Jéeobaoʼ. Toʼoneʼ maʼatech k-kʼubik k-óol tiʼ le ayikʼaliloʼob ku xuʼululoʼoboʼ, baʼaxeʼ k-kʼubik k-óol tiʼ Dios (Sal. 26:2; 104:34; 1 Tim. 6:17).

11. ¿Baʼax u espadail le espíritu santooʼ yéetel baʼax ku beetik?

¹¹ U espadail le espíritu santooʼ letiʼe Bibliaoʼ. Le Bibliaoʼ ku yeʼesik máakalmáak le baʼaloʼob maʼ jaajtak ku kaʼansaʼaloʼ. Ku yáantik máak utiaʼal ka u kan u jaajil bey xan utiaʼal ka u pʼat le baʼaloʼob maʼ maʼalobtak ku beetkoʼ (2 Cor. 10:4, 5; 2 Tim. 3:16, 17; Heb. 4:12). Utiaʼal u meyajtoʼon tubeel le Bibliaoʼ kʼaʼabéet k-xakʼaltik tubeel. U kaajal Dioseʼ ku kaʼanskoʼon xan utiaʼal ka meyajnaktoʼon maʼalob (2 Tim. 2:15). Chéen baʼaleʼ yaan uláakʼ baʼax u tsʼaamaj Dios utiaʼal u kanáantkoʼon. Koʼox ilik baʼaxiʼ.

12. ¿Bix uláakʼ u yáantkoʼon Jéeoba yéetel baʼaxten jach kʼaʼabéet u yáantkoʼon?

¹² Juntúul maʼalob soldadoeʼ u yojel maʼ tu páajtal u ganartik le baʼateʼel tu juunaloʼ, kʼaʼabéet u yáantaʼal tumen u yéet soldadoiloʼob. Toʼon xaneʼ t-juunaleʼ maʼ tu páajtal k-ganartik le baʼateʼel yaantoʼon tu contra Satanás yéetel le máaxoʼob apoyarkoʼ. Kʼaʼabéet k-áantaʼal tumen k-sukuʼunoʼob. Jéeobaeʼ u tsʼaamaj sukuʼunoʼob yéetel kiikoʼob utiaʼal u yáantkoʼonoʼob (1 Ped. 2:17).

13. Jeʼex u yeʼesik Hebreos 10:24, 25, ¿bix u yáantkoʼon le muchʼtáambaloʼoboʼ?

¹³ Utiaʼal k-áantaʼal tumen le sukuʼunoʼoboʼ kʼaʼabéet k-bin teʼ muchʼtáambaloʼoboʼ (xok Hebreos 10:24, 25). U jaajileʼ tuláakloʼon yaan kʼiin ku lúubul k-óol. Chéen baʼaleʼ teʼ muchʼtáambaloʼoboʼ ku líiʼsaʼal k-óol. Le comentario ku tsʼáaik le sukuʼunoʼob yéetel le discursoʼob ku máanskoʼoboʼ ku yáantkoʼon utiaʼal ka seguernak k-meyajtik Jéeoba Dios. Tsʼoʼoleʼ le baʼax ku yaʼalikoʼobtoʼon kéen tsikbalnakoʼon tu yéeteloʼoboʼ ku tsʼáaiktoʼon muukʼ (1 Tes. 5:14). Teʼ muchʼtáambaloʼoboʼ ku páajtal xan k-áantik u maasil, leloʼ ku beetik xan u kiʼimaktal k-óol (Hech. 20:35; Rom. 1:11, 12). Tsʼoʼoleʼ teʼ muchʼtáambaloʼoboʼ ku kaʼansaʼaltoʼon xan bix jeʼel k-maas maʼalobkíintik bix k-kaʼansaj yéetel k-kʼaʼaytajeʼ. Ku yeʼesaʼaltoʼon bix unaj u meyajtoʼon le videoʼob yéetel le publicaciónoʼob yaantoʼonoʼ. Le oʼolaleʼ unaj k-preparartikba yéetel le muchʼtáambaloʼoboʼ, unaj k-chʼenxikintik le baʼax ku yaʼalaʼaloʼ yéetel unaj k-beetik le baʼax ku kaʼansaʼaltoʼonoʼ. Wa k-beetik tuláakal lelaʼ yaan k-preparartikba utiaʼal le baʼateʼel yaantoʼonoʼ yéetel yaan k-beetikba juntúul u maʼalob soldado Jesucristo (2 Tim. 2:3).

14. ¿Bix uláakʼ u yáantkoʼon Jéeoba?

¹⁴ Toʼoneʼ k-áantaʼal xan tumen u millonesil ángeloʼob jach táaj yaan u poderoʼob. Wa juntúul ángel jach táaj yaʼab baʼal ku páajtal u beetkeʼ, ¿kux túun u millonesil ángeloʼob? (Isa. 37:36). Mix juntúul wíinik yéetel mix juntúul demonio jeʼel u páajtal yéetel u ángeloʼob Jéeobaeʼ. Juntéenjeakeʼ tiʼ junpʼéel asambleaeʼ aʼalaʼabeʼ kex t-juunal táan k-meyajtik Jéeobaeʼ letiʼeʼ mantatsʼ tiaʼan t-éeteleʼ le oʼolal maʼ unaj k-uʼuyik t-juunal yanoʼoniʼ (Jue. 6:16). Le jeʼeloʼ maʼ unaj u tuʼubultoʼoniʼ. Unaj k-kʼaʼajsik kéen k-uʼuy lubaʼan k-óol yoʼolal baʼax aʼalaʼabtoʼon wa yoʼolal baʼax beetaʼabtoʼon tumen k-éet meyaj wa k-éet xook wa tumen juntúul k-láakʼtsil maʼ  Testigoiʼ. Kʼaʼajaktoʼoneʼ maʼ t-juunal yanoʼoniʼ wa k-beetik baʼax ku yaʼaliktoʼon Jéeobaeʼ seguro yaan u yáantkoʼon.

15. Jeʼex u yeʼesik Isaías 54:15, 17, ¿baʼaxten mix máak jeʼel u beetik u xuʼulul u alabartaʼal Jéeoba tumen u kaajaleʼ?

¹⁵ Le kʼasaʼan yóokʼol kaab tiaʼan tu kʼab Satanásaʼ jach u pʼekmoʼon tumen maʼatech k-oksikba tiʼ u baʼalubaʼob yéetel maʼ t-táakpajal teʼ guerraʼoboʼ. U pʼekmoʼon tumen k-tsʼáaik ojéeltbil u kʼaabaʼ Dios, k-aʼalik chéen u Reino ken u taas jeetsʼelil yéetel k-beetik le baʼax ku yaʼaliktoʼon Diosoʼ. Tsʼoʼoleʼ k-aʼalikeʼ le máax gobernartik le yóokʼol kaabaʼ chéen tuus ku beetik yéetel taak u kíimskoʼon (Juan 8:44). Tsʼoʼoleʼ u pʼekmoʼon xan tumen k-aʼalik de ke maʼ kun xáantaleʼ yaan u xuʼulsaʼal tiʼ Satanás yéetel tiʼ le máaxoʼob apoyarkoʼ. Kex beyoʼ letiʼobeʼ maʼ kun béeytal u makikoʼob k-chiʼ tumen toʼoneʼ yaan u seguer k-alabartik Jéeoba jeʼel bixakeʼ. Kex le Kʼaasilbaʼal jach yaan u poderoʼ maʼ ken u beet u xuʼulul k-tsikbaltik tiʼ tuláakal yóokʼol kaab u Reino Dios, leloʼ ku béeytal k-beetik chéen tumen táan k-áantaʼal tumen Jéeoba (xok Isaías 54:15, 17).

16. Maʼ kun xáantaleʼ, ¿bix ken u salvartil Jéeoba u kaajal?

¹⁶ Maʼ kun xáantaleʼ teʼ nojoch muʼyajil kun antaloʼ Jéeobaeʼ yaan xan u salvarkoʼon. Kaʼapʼéel bix ken u beetil. Yáaxeʼ yaan u salvarkoʼon kéen u beet u xuʼulsaʼal tiʼ le religiónoʼob maʼatech u kaʼanskoʼob u jaajiloʼ, lelaʼ yaan u beetaʼal tumen le gobiernoʼoboʼ (Apo. 17:16-18; 18:2, 4). Tsʼoʼoleʼ yaan xan u salvarkoʼon kéen u xuʼuls le u yalab tiʼ u kʼasaʼan yóokʼol kaab Satanásoʼ (Apo. 7:9, 10; 16:14, 16).

17. ¿Baʼaxten unaj k-pʼáatal naatsʼ tiʼ Jéeoba?

¹⁷ Wa k-antal naatsʼ tiʼ Jéeobaeʼ letiʼeʼ yaan u yáantkoʼon baʼateʼel tu contra u Kʼaasilbaʼal. Tsʼoʼoleʼ maʼ yaʼab u bin utiaʼal u xuʼulsaʼal tiʼ le Kʼaasilbaʼaloʼ (Rom. 16:20). Le oʼolaleʼ jeʼex tsʼoʼok k-ilkoʼ unaj u meyajtoʼon mantatsʼ le u nuʼukuliloʼob baʼateʼel u tsʼaamajtoʼon Jéeobaoʼ. Tsʼoʼoleʼ kʼaʼajaktoʼoneʼ maʼ t-juunal yanoʼoniʼ, Jéeobaeʼ u tsʼaamaj le sukuʼunoʼob yéetel le kiikoʼob utiaʼal u yáantkoʼonoʼoboʼ. Maʼ u tuʼubul xan toʼoneʼ wa k-beetik baʼax ku yaʼaliktoʼon Jéeobaeʼ letiʼeʼ yaan u yáantkoʼon. Wa k-beetik le baʼax tsʼoʼok k-kanikaʼ Jéeoba, le k-Taata yaan teʼ kaʼanoʼ, yaan u tsʼáaiktoʼon muukʼ yéetel yaan u kanáantkoʼon (Isa. 41:10).