1. Jeʼex u yaʼalik Mateo 24:9, ¿baʼax k-ojel yaan u yúuchul?

JÉEOBAEʼ tu beetoʼon utiaʼal k-yaabiltik u maasil bey xan ka yaabiltaʼakoʼon. Le oʼolal wa yaan máax ku pʼektikoʼoneʼ jach ku yaatal k-óol. Bey tu yuʼubiluba Georgina, juntúul kiik kajaʼan Europa. Letiʼeʼ ku yaʼalik: «Catorce años yaanten ka káaj in meyajtik Jéeoba, chéen baʼaleʼ in maamaeʼ jach tu pʼekten, leloʼ tu beetaj u yaatal in wóol bey xan in tuklik maʼ u yaabiltmeniʼ. Hasta joʼopʼ in tuklik maʼ maʼalob le baʼax kin beetkoʼ». * Sukuʼun Danilo xaneʼ ku yaʼalik: «Juntéeneʼ le soldadoʼoboʼ tu jatsʼenoʼob, tu pochʼenoʼob ka tu yaʼaloʼobten yaan u kíimskenoʼob tumen u testigoen Jéeoba. Tin wuʼuyaj tu sajakkúuntenoʼob yéetel tu mixbaʼalkúuntenoʼob». Kex ku yaatal k-óol kéen pʼektaʼakoʼoneʼ k-ojel yaniliʼ u yúuchleʼ tumen bey tu yaʼalil Jesúsoʼ (xok Mateo 24:9).

2, 3. ¿Baʼaxten k-pʼektaʼal tumen le máakoʼoboʼ?

² U máakiloʼob le yóokʼol kaabaʼ u pʼekmoʼon jeʼex tu pʼektiloʼob Jesúseʼ tumen toʼoneʼ maʼ yóokʼol kaabiloʼoniʼ (Juan 15:17-19). Le oʼolaleʼ kex k-respetartik le gobiernoʼoboʼ maʼatech k-táakpajal tiʼ política, maʼatech k-saludartik le banderaoʼ mix tech k-kʼayik le himno nacionaloʼ. Toʼoneʼ k-adorartik chéen Jéeoba yéetel k-defendertik le derecho yaantiʼ utiaʼal u gobernaroʼ. Chéen baʼaleʼ Satanás yéetel tuláakal le máaxoʼob yanoʼob tu favoroʼ ku yaʼalikoʼobeʼ minaʼan derecho tiʼ Dios utiaʼal u gobernarkoʼon (Gén. 3:1-5, 15). Toʼoneʼ k-tsikbaltik tiʼ le máakoʼob chéen u Reino Dios kun utskíintik tuláakal le problemas yaan teʼ kʼiinoʼobaʼ yéetel maʼ kun xáantaleʼ yaan u xuʼulsik tiʼ tuláakal le máaxoʼob ku tsʼáaikubaʼob tu contraoʼ (Dan. 2:44; Apo. 19:19-21). Le jatsʼuts baʼaloʼob k-tsikbaltikaʼ ku beetik u kiʼimaktal u yóol le máaxoʼob utsoʼoboʼ, pero le máaxoʼob kʼasaʼanoʼoboʼ u pʼeek u yuʼubikoʼob (Sal. 37:10, 11).

 ³ Le yóokʼol kaabaʼ ku pʼektikoʼon xan tumen toʼoneʼ k-kuxtal jeʼex u yaʼaliktoʼon Jéeobaoʼ, pero letiʼobeʼ yaanal baʼax ku beetkoʼob. Teʼ kʼiinoʼobaʼ letiʼobeʼ ku beetkoʼob le baʼaloʼob kʼaastak ku beetaʼal kaʼach Sodoma yéetel Gomorraoʼ, chéen baʼaleʼ Dioseʼ tu xuʼulsaj tiʼ le kaʼapʼéel kaajoʼobaʼ (Jud. 7). Yaʼab máakoʼobeʼ ku burlarkoʼonoʼob tumen k-beetik baʼax ku yaʼalik le Bibliaoʼ yéetel tumen k-aʼalik maʼ maʼalob le baʼax ku beetkoʼoboʼ (1 Ped. 4:3, 4).

4. ¿Baʼax jeʼel u yáantkoʼon utiaʼal maʼ u lúubul k-óol kéen pʼektaʼakoʼoneʼ?

⁴ ¿Baʼax jeʼel u yáantkoʼon utiaʼal maʼ u lúubul k-óol kex ka pʼektaʼakoʼon yéetel kex ka aʼalaʼaktoʼon baʼaleʼ? Letiʼe k-eʼesik yaan k-fe tiʼ Jéeobaoʼ yéetel k-creertik de ke yaan u yáantkoʼon. Le fejoʼ bey junpʼéel escudoeʼ, wa yaan k-fejeʼ yaan u béeytal k-tupik «tuláakal u tʼabaʼan flechaʼob le Kʼaasilbaʼaloʼ» (Efe. 6:16). Uláakʼ baʼax kʼaʼabéettoʼoneʼ letiʼe yaabilajoʼ. ¿Baʼaxten kʼaʼabéettoʼon? Tumen máax yaan u yaabilajeʼ «maʼ tu séeb kʼuuxil» yéetel ku aguantartik tuláakal le baʼaxoʼob ku yúuchultiʼoʼ (1 Cor. 13: 4-7, 13). Wa k-yaabiltmaj Jéeoba, le sukuʼunoʼob yéetel le máaxoʼob pʼekmiloʼonoʼ yaan u béeytal k-aguantartik le baʼaxoʼob ku yúuchultoʼonoʼ. Koʼox ilik bix jeʼel u páajtal k-beetkeʼ.

5. ¿Baʼax páajchaj u beetik Jesús tumen u yaabiltmaj Jéeoba?

⁵ Le áakʼab ka maʼach Jesús tumen le máaxoʼob pʼekmil utiaʼal u kíimsaʼaloʼ, letiʼeʼ tu yaʼalaj tiʼ u apóstoloʼob: «Utiaʼal ka u yojéelt le yóokʼol kaab in yaabiltmaj le Taataoʼ kin beetik le baʼax tsʼoʼok u yaʼalikten le Taata ka in beetoʼ» (Juan 14:31). Tumen Jesús u yaabiltmaj kaʼach Jéeobaeʼ béeychaj u aguantartik le pruebaʼob tu máansoʼ. Wa k-yaabiltmaj xan Jéeobaeʼ yaan u béeytal k-aguantartik le baʼaxoʼob ku beetaʼaltoʼonoʼ.

6. Jeʼex u yaʼalik Romanos 5:3-5, ¿bix k-uʼuyikba kéen pʼektaʼakoʼon tumen le yóokʼol kaabaʼ?

⁶ Le máaxoʼob meyajtik Jéeobaoʼ tumen u yaabiltmoʼobeʼ tsʼoʼok u béeytal u aguantarkoʼob le baʼaxoʼob ku beetaʼaltiʼoboʼ, bey úuchik tu kʼiinil le apóstoloʼoboʼ. Juntéeneʼ le Sanedrínoʼ tu yaʼalaj tiʼ le apóstoloʼob ka xuʼuluk u predicaroʼoboʼ. Chéen baʼaleʼ le apóstoloʼoboʼ tumen u yaabiltmoʼob Dioseʼ maʼ tu beetoʼobiʼ, baʼaxeʼ tu yaʼaloʼob: «Unaj k-uʼuyik u tʼaan Dios, maʼ u tʼaan chéen máakoʼobiʼ» (Hech. 5:29; 1 Juan 5:3). Teʼ kʼiinoʼob xanaʼ le sukuʼunoʼob táan u chʼaʼpachtaʼaloʼoboʼ tumen u yaabiltmoʼob Jéeobaeʼ kex ka maltratartaʼakoʼob tumen le gobiernoʼoboʼ ku béeytal u aguantarkoʼob. Kex k-pʼektaʼal tumen le yóokʼol kaabaʼ maʼ tu jach lúubul k-óol baʼaxeʼ ku kiʼimaktal k-óol (Hech. 5:41; xok Romanos 5:3-5).

7. ¿Baʼax unaj k-beetik wa k-pʼektaʼal tumen k-láakʼtsiloʼob?

⁷ Maʼ xaaneʼ junpʼéel tiʼ le baʼaxoʼob maas yaj ku aktáantik le máaxoʼob meyajtik Jéeobaoʼ letiʼe u pʼektaʼaloʼob tumen u láakʼtsiloʼoboʼ. Yaan tiʼ k-láakʼtsiloʼobeʼ le kéen u yojéeltoʼob tsʼoʼok u káajal k-meyajtik Jéeobaeʼ maʼ xaaneʼ ku tuklikoʼobeʼ tsʼoʼok k-tuʼusul wa hasta ku yaʼalikoʼobeʼ tsʼoʼok u chokotal k-pool (ket yéetel Marcos 3:21). Hasta yaan tiʼ letiʼobeʼ jeʼel u jatsʼkoʼonoʼobeʼ. Wa ku yúuchul le baʼaloʼobaʼ maʼ unaj u sajakkúuntkoʼoniʼ tumen Jesúseʼ tu yaʼaleʼ «tu yotoch máakeʼ tiʼ kun antal u enemigoʼobiʼ» (Mat. 10:36). Chéen baʼaleʼ kex ka pʼektaʼakoʼon tumen k-láakʼtsiloʼobeʼ toʼoneʼ maʼ t-pʼektikoʼob, baʼaxeʼ k-yaabiltikoʼob. Toʼoneʼ k-yaabiltikoʼob tumen k-yaabiltmaj Jéeoba (Mat. 22:37-39). Mantatsʼ ken k-beet baʼax u kʼáat Jéeoba, mix juntéen ken k-beet junpʼéel baʼal chéen utiaʼal k-lúubul utsil tiʼ wa máax.

8, 9. ¿Baʼax áant Georgina utiaʼal u aguantartik tuláakal le baʼaxoʼob beetaʼabtiʼoʼ?

⁸ Georgina, le t-chʼaʼchiʼitaj teʼ yáax párrafooʼ, kex pʼektaʼab tumen u maamaeʼ maʼ xuʼul u tsʼáaik u yóol kaanbaliʼ. Letiʼeʼ ku yaʼalik: «Tu kaʼatúulaloʼon káaj k-xokik le Bibliaoʼ. Ka máan seis meseseʼ taakchaj in bin muchʼtáambal pero letiʼeʼ maʼ tu chaʼajteniʼ. Ka túun tin tsʼáaj cuentaeʼ ku  tsikbal yéetel le apóstataʼoboʼ, tuláakal le baʼax ku yaʼalaʼaltiʼoʼ ku yaʼalikten utiaʼal u desanimarken. Tsʼoʼoleʼ ku pochʼken, ku kóokolik u tsoʼotsel in pool, ku bitsʼik in kaal, yéetel ku pulik basura le publicaciónoʼob ku meyajten utiaʼal in xookoʼ. Quince años yaanten le ka okjaʼanajenoʼ. Utiaʼal u xuʼulul in meyajtik Jéeobaeʼ tu bisen le tuʼux ku kʼaʼalal le paalaloʼob jach tercoʼoboʼ. Le paalaloʼob yanoʼob teʼeloʼ ku drogarkubaʼob yéetel ku beetkoʼob uláakʼ baʼaloʼob kʼaastak. U jaajileʼ jach yaachaj in wóol in wilik tuláakal le baʼax tu beetajten in maamaoʼ tumen kin tuklikeʼ letiʼe máax maas unaj u yeʼesikten yaabilajoʼ».

⁹ Beoraaʼ koʼox ilik baʼax áant Georgina utiaʼal u aguantartik le baʼaxoʼob beetaʼabtiʼoʼ, letiʼeʼ ku yaʼalik: «Le día ka tu yaʼalajten in maama ka xuʼuluk in meyajtik Jéeobaoʼ letiʼe día xan ka tin láaj tsʼoʼoksaj in xokik tu chúukaʼanil le Bibliaoʼ. Tin tsʼáaj cuenta tsʼoʼok in kaxtik u jaajil, leloʼ tu beetaj in wuʼuyikinba jach naatsʼ yanilen tiʼ Jéeoba. Suuk in orar tiʼ Jéeoba yéetel tin tsʼáaj cuenta jach ku chʼenxikintiken. Juntéeneʼ juntúul kiikeʼ tu invitarten utiaʼal ka xiʼiken tu yotoch utiaʼal ka k-múul xok le Bibliaoʼ. Tsʼoʼoleʼ le tiempo kʼalaʼanenoʼ le sukuʼunoʼoboʼ jach tu yáantenoʼob utiaʼal u muʼukʼaʼantal in fe. Tumen jach tu yaabiltenoʼobeʼ tu beetoʼob in wuʼuyik parteen tiʼ u familiaʼob. Tin tsʼáaj cuentaeʼ Jéeobaeʼ jach yaan u poder, mix máak jeʼel u béeytal tu yéeteleʼ».

10. ¿Baʼax k-ojel ken u beet Jéeoba?

¹⁰ Apóstol Pabloeʼ tu yaʼaleʼ mix baʼal «jeʼel u náachkuntkoʼon tiʼ u yaabilaj Dios ku yeʼesaʼal tumen Cristo Jesús, k-Yuumtsiloʼ» (Rom. 8:38, 39). Jéeobaeʼ maʼ ten u pʼatoʼon kéen sufrirnakoʼon. Kex yaj baʼax ku yúuchultoʼoneʼ k-ojel maʼ ten u pʼatoʼon Jéeoba. Letiʼeʼ yaan u líiʼsik k-óol yéetel yaan u tsʼáaiktoʼon muukʼ utiaʼal k-aguantartik le baʼax ku yúuchultoʼonoʼ. Tsʼoʼoleʼ le baʼax úuch tiʼ Georginaoʼ ku yeʼesik xan toʼoneʼ Jéeobaeʼ yaan u péeksik le sukuʼunoʼob utiaʼal ka u yáantoʼonoʼoboʼ.

11. ¿Baʼax kun úuchul kaʼach wa le discípuloʼoboʼ ku beetkoʼob le baʼax tu yaʼalaj Jesús tiʼ Juan 15:12, 13? Tsikbalt junpʼéel baʼax úuchi.

¹¹ Le áakʼab ka maʼach Jesús utiaʼal u kíimsaʼaloʼ tu yaʼalaj tiʼ u discípuloʼob ka u paklan yaabiltubaʼob (xok Juan 15:12, 13). Jesúseʼ u yojleʼ wa ku yaabiltikubaʼobeʼ yaan u seguer u múul meyajoʼob yéetel maʼ tun lúubul u yóoloʼob kex ka pʼektaʼakoʼob. Koʼox ilik baʼax úuch teʼ yáax siglo le ka káaj u formar le múuchʼulil tu kaajil Tesalónicaoʼ. Le sukuʼunoʼoboʼ chʼaʼpachtaʼaboʼob, kex beyoʼ tu yeʼesoʼob u yaabiltmubaʼob yéetel tu aguantartoʼob tuláakal le baʼax beetaʼabtiʼoboʼ (1 Tes. 1:3, 6, 7). Le apóstol Pablooʼ tu yaʼalajtiʼobeʼ  ka maas nojochchajak u yaabilajoʼob (1 Tes. 4:9, 10). Le yaabilaj ku yuʼubikoʼob tu yoʼolal le sukuʼunoʼoboʼ le kun péeksikoʼob utiaʼal u líiʼskoʼob u yóol le máaxoʼob tu muʼyajoʼoboʼ yéetel utiaʼal u yáantkoʼob le máaxoʼob minaʼan u muukʼoʼoboʼ (1 Tes. 5:14). Letiʼobeʼ tu beetoʼob le baʼax aʼalaʼabtiʼob tumen Pablooʼ, le oʼolal le ka tu túuxtajtiʼob uláakʼ cartaeʼ tu yaʼalajtiʼob: «Le yaabilaj ka wuʼuyikeʼex cada juntúul tiʼ teʼex ta baatsileʼexoʼ táan xan u bin u maas nojochtal» (2 Tes. 1:3-5). Jeʼex k-ilkoʼ le yaabilajoʼ letiʼe baʼax áantoʼob utiaʼal u aguantarkoʼob tuláakal le baʼaxoʼob úuchtiʼoboʼ.

12. ¿Bix tu yeʼesil le sukuʼunoʼob u yaabiltmubaʼoboʼ?

¹² Koʼox ilik baʼax úuch tiʼ sukuʼun Danilo yéetel tiʼ u yatan. Le sukuʼunaʼ letiʼe tsʼoʼok k-yáax chʼaʼchiʼitik teʼ párrafo 1. Teʼ tuʼux kajaʼanoʼoboʼ yanchaj junpʼéel guerraiʼ kex beyoʼ letiʼobeʼ maʼ xuʼul u binoʼob muchʼtáambaliʼ, seguernaj u kʼaʼaytajoʼob yéetel tu tsʼáajoʼob le junpʼíit janal yaantiʼob tiʼ uláakʼ sukuʼunoʼoboʼ. Juntéeneʼ kʼuch junjaats soldadoʼob tu yotochoʼob, u kuchmaj u tsʼoonoʼob. Daniloeʼ ku yaʼalik baʼax úuchi: «Tu yaʼaloʼobten ka xuʼuluk in meyajtik Jéeoba. Como tin waʼalajtiʼob maʼ ten in beeteʼ tu jatsʼenoʼob yéetel tu tsʼáajoʼob le tsʼoon tu tojil in pooloʼ ka tu yaʼaloʼobten yaan u kíimskenoʼob. Chéen baʼaleʼ le ka tu wakʼoʼob le tsʼoonoʼ máan tu yóokʼol in pool le balaoʼ. Le táan u binoʼoboʼ tu yaʼaloʼobten yaan u suutoʼob yéetel yaan u violarkoʼob in watan. Le ka tu yojéeltaj le sukuʼunoʼob le baʼax úuchtoʼonoʼ tu séebaʼanil tu túuxtoʼonoʼob tiʼ uláakʼ kaaj, tiʼ tren viajarnajoʼon. Maʼ ten in tuʼubs bix úuchik u yeʼeskoʼobtoʼon yaabilaj le sukuʼunoʼoboʼ. Le ka kʼuchoʼon teʼ tuʼux túuxtaʼaboʼonoʼ le sukuʼunoʼoboʼ tu tsʼáajoʼobtoʼon janal, tu yáantenoʼob in kaxt meyaj bey xan junpʼéel naj utiaʼal k-antal. Como yaan tuʼux k-kajtaleʼ béeychaj k-kʼamik uláakʼ sukuʼunoʼob táan u púutsʼloʼob xan kaʼach tiʼ le guerraoʼ». Le baʼax úuchaʼ ku yeʼesikeʼ wa u yaabiltmuba le sukuʼunoʼoboʼ jeʼel u yáantaj utiaʼal ka u aguantart máak le baʼax ku beetaʼaltiʼoʼ.

13. ¿Bix u yáantkoʼon le espíritu santo kéen pʼektaʼakoʼon tumen u maasiloʼ?

¹³ Jesúseʼ tu yaʼaleʼ unaj k-yaabiltik le máaxoʼob pʼekmiloʼonoʼ (Mat. 5:44, 45). Kex maʼ chéen chʼaʼabileʼ jeʼel u páajtal k-beetik yéetel u yáantaj le espíritu santooʼ. Lelaʼ yaan u yáantkoʼon k-eʼes yaabilaj, paciencia, utsil puksiʼikʼal, maʼ k-séeb kʼuuxil yéetel k-controlartikba (Gál. 5:22, 23). Yaʼab máaxoʼob pʼekmiloʼon kaʼacheʼ tsʼoʼok u xuʼulul u beetkoʼob tumen eʼesaʼabtiʼob  jatsʼuts modos tumen u yatan, u yíicham, juntúul u hijo wa juntúul u vecino. Yéetel yaʼab tiʼ letiʼobeʼ tsʼoʼok tak u káajal u meyajtikoʼob Jéeoba. Le oʼolaleʼ wa difícil a wilik a yaabiltik juntúul máax u pʼeek a meyajtik Dioseʼ kʼáat tiʼ Jéeoba ka u yáantech yéetel u espíritu santo (Luc. 11:13). Toʼoneʼ k-ojleʼ maas maʼalob ka k-beet mantatsʼ tuláakal baʼal jeʼex u yaʼaliktoʼon Jéeobaeʼ (Pro. 3:5-7).

14, 15. ¿Bix áantaʼabik Yasmín tumen le baʼax ku yaʼalik Romanos 12:17-21?

¹⁴ Koʼox ilik baʼax úuch tiʼ Yasmín. Le ka tsʼoʼok u yokjaʼeʼ u yíichameʼ tu tuklaj tsʼoʼok u tuʼusul u yatan tumen le Testigoʼoboʼ. Le oʼolal tu yilaj baʼax jeʼel u páajtal u beetik utiaʼal ka xuʼuluk u meyajtik Jéeobaeʼ. Letiʼeʼ joʼopʼ u sen poʼopochʼik Yasmín. Tsʼoʼoleʼ tu yaʼalaj tak tiʼ u láakʼtsiloʼob bey xan tiʼ juntúul sacerdote yéetel tiʼ juntúul j-meeneʼ ka u yaʼaloʼobtiʼ ka xuʼuluk u meyajtik Dios tumen táan u jatsik u familia. Hasta juntéenjeakeʼ u yíichamoʼ bin teʼ tuʼux táan u beetaʼal le muchʼtáambaloʼ ka joʼopʼ u yawtik baʼaloʼob tiʼ le sukuʼunoʼoboʼ. Yasmíneʼ jach yaʼab u yoʼtik le baʼax ku beetaʼaltiʼoʼ.

¹⁵ Le kéen xiʼik Yasmín teʼ muchʼtáambaloʼoboʼ jach ku líiʼsaʼal u yóol tumen le sukuʼunoʼoboʼ. Aʼalaʼabtiʼ xan tumen le ancianoʼob ka u beet le baʼax ku yaʼalik Romanos 12:17-21 (xoke). Yasmíneʼ ku yaʼalik: «Difícilchajten in beetik le baʼax ku yaʼalik le Bibliaoʼ pero tin kʼáataj tiʼ Jéeoba ka u yáanten, yéetel tin tsʼáaj in wóol in beete. Le oʼolaleʼ kex tu yóoliliʼ in wíicham ku suciartik le pisooʼ teneʼ chéen kin wilik in choʼik, le kéen u pochʼeneʼ kin wilik in tʼanik yéetel yaabilaj yéetel le kéen kʼojaʼanchajkeʼ kin wilik in kanáantik».

16, 17. ¿Baʼax k-kanik tiʼ le baʼax úuch tiʼ Yasmíno?

¹⁶ Yasmíneʼ ku yaʼalik baʼax úuch ikil tu yeʼesil yaabilaj tiʼ u yíicham: «Káaj u maas confiarten tumen tu yilaj maʼatech in tuus. Bejlaʼeʼ ku yóotik tsikbal tiʼ religión tin wéetel, tsʼoʼoleʼ ku tratarken maas chan maʼalob. Hasta ku yaʼalikten ka xiʼiken teʼ muchʼtáambaloʼoboʼ. Bejlaʼeʼ maas maʼalob k-bisikba yéetel yaan jeetsʼelil ichil in familia. Kin tsʼíiboltik ka kʼuchuk u kʼiinil in múul meyajtik Jéeoba tu yéetel».

¹⁷ Le baʼax tu beetaj Yasmínoʼ ku yeʼesikeʼ juntúul máax yaan u yaabilajeʼ «tuláakal baʼal ku páaʼtik» yéetel «tuláakal baʼal ku chúukpajal u yóol u muʼyajte» (1 Cor. 13:4, 7). U jaajileʼ ku yaatal k-óol kéen pʼektaʼakoʼon. Pero wa k-eʼesik yaabilajeʼ leloʼ yaan u yáantaj utiaʼal u kʼexik u tuukul le máaxoʼob pʼektikoʼonoʼ. Tsʼoʼoleʼ kéen k-eʼes yaabilajeʼ k-beetik u kiʼimaktal u yóol Jéeoba. Kex maʼ u xuʼulul k-pʼektaʼaleʼ láayliʼ jeʼel u seguer k-uʼuyik kiʼimak óolaleʼ. Koʼox ilik baʼax jeʼel u yáantkoʼoneʼ.

18. ¿Baʼaxten jeʼel u páajtal u kiʼimaktal k-óol kex ka pʼektaʼakoʼoneʼ?

¹⁸ Jesúseʼ tu yaʼalaj: «Kiʼimakchajak a wóoleʼex kéen pʼektaʼakeʼex tumen le máakoʼob[oʼ]» (Luc. 6:22). U jaajileʼ mix máak u kʼáat ka pʼektaʼak wa ka chʼaʼpachtaʼak ikil u meyajtik Dios. ¿Baʼaxten túun unaj u kiʼimaktal k-óol le kéen pʼektaʼakoʼonoʼ? Yáaxeʼ tumen le kéen k-aguantart le baʼax ku beetaʼaltoʼonoʼ k-lúubul utsil tiʼ Dios (1 Ped. 4:13, 14). U kaʼapʼéeleʼ tumen leloʼ ku beetik u maas muʼukʼaʼantal k-fe tiʼ Dios (1 Ped. 1:7). Yéetel u tsʼookeʼ tumen yaan u siʼibiltoʼon kuxtal minaʼan u xuul (Rom. 2:6, 7).

19. ¿Baʼaxten le apóstoloʼoboʼ kiʼimakchaj u yóoloʼob kex jaʼajatsʼaʼaboʼob?

¹⁹ Le maʼ úuch ka kuxkíintaʼak Jesúsoʼ le apóstoloʼoboʼ kiʼimakchaj u yóoloʼob kex chʼaʼpachtaʼaboʼob. Kex jaʼajatsʼaʼaboʼob yéetel aʼalaʼabtiʼob ka xuʼuluk u tʼaanoʼob tu yoʼolal u kʼaabaʼ Jesúseʼ «letiʼobeʼ jach kiʼimak u yóoloʼob, tumen Dioseʼ tu chaʼaj u beetaʼal u muʼyajoʼob yoʼolal u kʼaabaʼ Jesús» (Hech. 5:40-42). Le yaabilaj ku yuʼubikoʼob tu yoʼolal Jesúsoʼ maas nojoch tiʼ le saajkil ku chʼaʼikoʼob tiʼ le máaxoʼob pʼekmiloʼoboʼ. Tu yeʼesoʼob u yaabiltmoʼob tumen maʼ xuʼul u kaʼanskoʼob yéetel u tsikbaltikoʼob le maʼalob baʼaloʼob ken u beet u Reino Diosoʼ. Teʼ kʼiinoʼobaʼ yaʼab sukuʼunoʼobeʼ kex yaan baʼax ku muʼyajtikoʼobeʼ láayliʼ chúukaʼan u yóoloʼob u meyajtoʼob Jéeoba yéetel kiʼimak óolaleʼ. Letiʼobeʼ yojloʼob de ke Jéeobaeʼ maʼ ken u tuʼubs le baʼaxoʼob ku beetkoʼoboʼ mix le yaabilaj ku yeʼeskoʼob tu yoʼolal u kʼaabaʼoʼ (Heb. 6:10).

20. ¿Baʼax ken k-il teʼ tuláakʼ xookoʼ?

²⁰ Mientras maʼ xuʼulsaʼak tiʼ le kʼasaʼan yóokʼol kaabaʼ yaan u seguer k-aguantartik k-pʼektaʼal (Juan 15:19). Chéen baʼaleʼ maʼ unaj k-sajaktaliʼ. Tumen jeʼex ken k-il teʼ tuláakʼ xookoʼ Jéeobaeʼ yaan u kanáantkoʼon yéetel yaan u yáantkoʼon utiaʼal u seguer k-meyajtik (2 Tes. 3:3). Bey túunoʼ unaj u seguer k-yaabiltik Jéeoba, le sukuʼunoʼoboʼ bey xan le máaxoʼob pʼekmiloʼonoʼ. Wa k-beetik beyoʼ yaan u béeytal k-múul meyajtik Dios, yaan u muʼukʼaʼantal k-fe yéetel yaan k-beetik u alabartaʼal u kʼaabaʼ Jéeoba. Tsʼoʼoleʼ yaan u páajtal k-áantik le máaxoʼob pʼekmiloʼon utiaʼal ka u kʼex u tuukuloʼoboʼ.