1, 2. ¿Baʼaxten u ejemplo apóstol Pabloeʼ jeʼel u yáantik le ancianoʼob teʼ kʼiinoʼobaʼ?

 LE APÓSTOL Pablooʼ u yaabiltmaj kaʼach le sukuʼunoʼoboʼ yéetel ku xupkuba tu yoʼolaloʼob (Hech. 20:31). Le oʼolal jach yaabiltaʼabi. Juntéenjeakileʼ ka tu yojéeltaj u ancianoiloʼob Éfeso maʼ kun suut u kaʼa iloʼob Pabloeʼ «joʼopʼ u sen okʼoloʼob» (Hech. 20:37). Teʼ kʼiinoʼobaʼ le ancianoʼoboʼ jach u yaabiltmoʼob le sukuʼunoʼoboʼ le oʼolal ku xupkubaʼob xan tu yoʼolaloʼob (Fili. 2:16, 17). Chéen baʼaleʼ yaan kʼiineʼ yaan baʼax xan ku aktáantik le ancianoʼoboʼ. ¿Baʼax jeʼel u yáantkoʼob kéen u aktáantoʼob wa baʼaxeʼ?

² U jaajileʼ le ancianoʼoboʼ yaʼab baʼax yaan u beetoʼob, chéen baʼaleʼ maʼalob ka u yil u seguerkoʼob u ejemplo Pablo (1 Cor. 11:1). Letiʼeʼ juntúul j-kʼeban máak jeʼex toʼoneʼ yéetel yaan kʼiineʼ tu yuʼubaj maʼ chéen chʼaʼabil xan u beetik baʼax maʼalobiʼ (Rom. 7:18-20). Kex beyoʼ maʼ lúub u yóoliʼ baʼaxeʼ mantatsʼ kiʼimak u yóol kaʼachi. Bejlaʼa xaneʼ wa le ancianoʼob ku yilik u seguerkoʼob u ejemplo apóstol Pablooʼ yaan u páajtal u meyajtikoʼob Jéeoba yéetel kiʼimak óolal kex jeʼel baʼaxak ka u aktáantoʼobeʼ. Koʼoneʼex ilik bix jeʼel u páajtal u beetkoʼobeʼ.

3. ¿Tiʼ baʼax ken k-tʼaan teʼ xookaʼ, yéetel baʼax ken k-ile?

³ Teʼ xookaʼ yaan k-tʼaan tiʼ kanpʼéel baʼaloʼob ku aktáantik le ancianoʼoboʼ: 1) u yilik u jóokʼloʼob kʼaʼaytaj kex yaʼab baʼaloʼob yaan u beetoʼob, 2) u jóoʼskoʼob tiempo utiaʼal u yáantkoʼob le sukuʼunoʼoboʼ, 3) le baʼaxoʼob ku yúuchultiʼob tumen j-kʼeban máakoʼoboʼ yéetel 4) u múul meyajoʼob yéetel j-kʼeban máakoʼob. Yaan xan k-ilik bix tu aktáantil Pablo le baʼaxoʼob tsʼoʼok k-aʼalikoʼ yéetel bix u ejemploeʼ jeʼel u yáantik le ancianoʼob teʼ kʼiinoʼobaʼ.

4. ¿Baʼaxten yaan kʼiineʼ maʼ chéen chʼaʼabil u yilik le ancianoʼob u táakpajloʼob teʼ kʼaʼaytajoʼ?

⁴ Baʼaxten maʼ chéen chʼaʼabiliʼ. Tumen kex ku yilik u táakpajal le ancianoʼob teʼ kʼaʼaytajoʼ yaʼab uláakʼ baʼaloʼob yaan u beetoʼob. Yaan kʼiineʼ ku tocar u nuʼuktikoʼob le muchʼtáambal ku beetaʼal ich semanaoʼ wa ku tocar u nuʼuktikoʼob U xookil le Biblia teʼ múuchʼuliloʼ. Yaan hora xaneʼ ku máanskoʼob discursoʼob wa uláakʼ asignaciónoʼob. Ku jóoʼskoʼob xan yaʼab tiempo utiaʼal u kaʼanskoʼob le siervo ministerialoʼoboʼ yéetel utiaʼal u yáantkoʼob le sukuʼunoʼoboʼ (1 Ped. 5:2). Tsʼoʼoleʼ yaan jujuntúul ancianoʼobeʼ ku yáantajoʼob utiaʼal u beetaʼal le jejeláas lugaroʼob tuʼux k-adorartik Jéeobaoʼ yéetel utiaʼal u tsʼaʼabal mantenimiento tiʼob. Chéen baʼaleʼ jeʼex u maasil sukuʼunoʼobeʼ le baʼax maas importante u yilkoʼoboʼ letiʼe u táakpajloʼob teʼ kʼaʼaytajoʼ (Mat. 28:19, 20).

5. ¿Bix tu tsʼáajil Pablo junpʼéel maʼalob ejemplo teʼ kʼaʼaytajoʼ?

⁵ U ejemplo Pablo. Filipenses 1:10, ku yaʼalik baʼax oʼolal jach maʼalob u kʼaʼaytaj kaʼach Pablo. Letiʼeʼ tu yaʼalaj: «Jach [ileʼex] máakalmáak le baʼaloʼob maas kʼaʼanaʼantakoʼ». Letiʼeʼ bey tu beetiloʼ. Le ka aʼalaʼabtiʼ baʼax unaj u beetkeʼ jach tu tsʼáaj u yóol u beet ichil yaʼab años. Letiʼeʼ kʼaʼaytajnaj tuʼux yaan yaʼab máakoʼob «bey xan joonaj joonajil» (Hech. 20:20). Maʼatech u kʼaʼaytaj kaʼach chéen tiʼ junpʼéeliliʼ hora wa chéen tiʼ junpʼéeliliʼ kʼiin tiʼ le semanaoʼ. Juntéenjeakileʼ mientras táan u páaʼtik le sukuʼunoʼob tu kaajil Atenasoʼ joʼopʼ u kʼaʼaytaj tiʼ junjaats máakoʼob. ¿Baʼax utsil tu taasaj leloʼ? Jujuntúul tiʼ le máakoʼoboʼ tu beetubaʼob u discípuloʼob Cristo (Hech. 17:16, 17, 34). Tsʼoʼoleʼ tak teʼ kʼiinoʼob maʼ tu chaʼabal u jóokʼol tu yotochoʼ kʼaʼaytajnaj tiʼ le máakoʼob bin xíimbaltikoʼ (Hech. 28:16-24; Fili. 1:13, 14).

6. ¿Bix tu kaʼansil Pablo uláakʼ sukuʼunoʼob?

⁶ Pabloeʼ ku aprovechartik kaʼach le tiempo yaantiʼoʼ. Suuk kaʼach u invitartik uláakʼ sukuʼunoʼob utiaʼal u kʼaʼaytajoʼob tu yéetel. Le yáax juntéen ka bin kʼaʼaytaj bey misioneroiloʼ tu invitartaj Juan Marcos, yéetel le u kaʼatéen ka binoʼ tu invitartaj Timoteo (Hech. 12:25; 16:1-4). Letiʼeʼ tu tsʼáaj u yóol u kaʼanstiʼob bix jeʼel u káajsikoʼob múuchʼuliloʼobeʼ, bix jeʼel u kanáantkoʼob le sukuʼunoʼoboʼ yéetel bix jeʼel u kaʼansajoʼob maʼalobeʼ (1 Cor. 4:17).

7. ¿Bix jeʼel u beetik le ancianoʼob le baʼax tu yaʼalaj Pablo tiʼ Efesios 6:14, 15?

⁷ Baʼax ku kaʼansiktoʼon. Le ancianoʼoboʼ utiaʼal u beetkoʼob jeʼex Pabloeʼ unaj u yilik u kʼaʼaytajoʼob tiʼ jeʼel baʼaxak súutukileʼ maʼ chéen joonaj joonajiliʼ (xok Efesios 6:14, 15). Jeʼel u páajtal u kʼaʼaytajoʼob kéen jóokʼkoʼob maaneʼ bey xan teʼ tuʼux ku meyajoʼoboʼ. Wa táan u yáantajoʼob utiaʼal u beetaʼal junpʼéel  lugar tuʼux ku adorartaʼal Jéeobaeʼ jeʼel u páajtal u kʼaʼaytajoʼob tiʼ le vecinoʼoboʼ wa tiʼ uláakʼ máakoʼob ku binoʼob teʼeloʼ. Tsʼoʼoleʼ jeʼex apóstol Pabloeʼ teʼ súutukil jokʼaʼanoʼob kʼaʼaytajoʼ jeʼel u páajtal u kaʼanskoʼob le sukuʼunoʼob jeʼex le siervo ministerialoʼoboʼ.

8. Yaan kʼiineʼ, ¿baʼax kʼaʼabéet u beetik juntúul anciano?

⁸ Le ancianoʼoboʼ junpuliʼ maʼ unaj u chʼíikiloʼob u beetoʼob jejeláas meyajoʼob teʼ múuchʼulil wa teʼ circuito ka pʼáatak maʼ tu páajtal u jóokʼloʼob kʼaʼaytajoʼ. Yaan kʼiineʼ maʼ xaaneʼ tumen taak u táakpajloʼob teʼ kʼaʼaytajoʼ yaan u kʼaʼabéettal u yaʼalikoʼob maʼ tu kʼamkoʼob junpʼéel meyaj. Maʼ xaaneʼ kéen tsʼoʼokok u oraroʼobeʼ yaan u tsʼáaikoʼob cuentaeʼ wa ku yóotik u beetoʼob junpʼéel meyaj teʼ múuchʼulil wa teʼ circuitooʼ jeʼel u descuidarkoʼob baʼaloʼob kʼaʼanaʼantak jeʼex le adoración ich familiaoʼ, le kʼaʼaytajoʼ yéetel u kaʼanskoʼob u paalaloʼob kʼaʼaytaj xan. U jaajileʼ yaan jujuntúul sukuʼunoʼobeʼ ku talamtal tiʼob u yaʼalikoʼob maʼ tu kʼamkoʼob wa baʼax meyajil, chéen baʼaleʼ maʼ unaj u tuʼubultiʼobeʼ Jéeobaeʼ ku naʼatik baʼaxten maʼ tu kʼamkoʼob.

9. Tumen yaʼab baʼax yaan u beet le ancianoʼoboʼ, ¿baʼax jeʼel u talamtal tiʼobeʼ?

⁹ Baʼaxten maʼ chéen chʼaʼabiliʼ. Tumen kuxaʼanoʼon tu tsʼook kʼiinoʼobeʼ le máaxoʼob meyajtik Jéeobaoʼ yaʼab baʼaloʼob ku aktáantkoʼob. Le oʼolal ku kʼaʼabéettal u líiʼsaʼal u yóoloʼob wa u yáantaʼaloʼob. Yaan tak jujuntúuleʼ ku kʼaʼabéettal u yáantaʼaloʼob utiaʼal maʼ u jóokʼloʼob tiʼ le maʼalob bejoʼ (1 Tes. 5:14). Le ancianoʼoboʼ maʼ tu páajtal u xuʼulskoʼob tuláakal le baʼaxoʼob ku muʼyajtik le máaxoʼob meyajtik Jéeobaoʼ. Chéen baʼaleʼ letiʼeʼ ku páaʼtik ka u beetoʼob tuláakal le ku páajtal utiaʼal u kanáantkoʼob le tamanoʼoboʼ. Tumen yaʼab baʼax yaan u beet le ancianoʼoboʼ, ¿bix jeʼel u páajtal u jóoʼskoʼob tiempo utiaʼal u yáantkoʼob le sukuʼunoʼoboʼ?

10. Jeʼex u yaʼalik 1 Tesalonicenses 2:7, ¿bix tu tratartil Pablo le sukuʼunoʼoboʼ?

¹⁰ U ejemplo Pablo. Letiʼeʼ mantatsʼ tu kaxtaj bix jeʼel u líiʼsik u yóol le sukuʼunoʼoboʼ. Le ancianoʼob teʼ kʼiinoʼobaʼ maʼalob xan ka u yil u yeʼeskoʼob yaabilaj tiʼ le sukuʼunoʼob jeʼex tu beetil Pablooʼ (xok 1 Tesalonicenses 2:7). Pabloeʼ tu yaʼalaj tiʼ le sukuʼunoʼoboʼ u yaabiltmoʼob yéetel yaabiltaʼanoʼob xan tumen Jéeoba (2 Cor. 2:4; Efe. 2:4, 5). Tu tratartaj le sukuʼunoʼob bey u amigoʼoboʼ yéetel tu máansaj tiempo tu yéeteloʼob. Tu yeʼesaj xan ku confiar tiʼ letiʼob tumen tu tsikbaltajtiʼob baʼaxoʼob sajakkúuntik yéetel baʼax ku talamtal u beetik (2 Cor. 7:5; 1 Tim. 1:15). Chéen baʼaleʼ kex yaʼab baʼaxoʼob ku aktáantik kaʼacheʼ maʼ chʼíik tuukul tiʼ le baʼaxoʼob ku yúuchultiʼoʼ baʼaxeʼ tu yilaj bix jeʼel u yáantik le sukuʼunoʼoboʼ.

11. ¿Baʼaxten tu tsʼáaj consejo Pablo tiʼ le sukuʼunoʼoboʼ?

¹¹ Pabloeʼ yaan kʼiineʼ tu tsʼáaj consejo tiʼ le sukuʼunoʼoboʼ. Chéen baʼaleʼ maʼ tu beetaj tumen pʼujaʼan tu yéeteloʼobiʼ, baʼaxeʼ tumen u kʼáat ka xiʼik utsil tiʼob yéetel maʼ u kʼáat ka muʼyajnakoʼobiʼ.  Tu yilaj u tsʼáaik consejoʼob séebaʼan u naʼataʼal yéetel uts tu tʼaan u yojéeltik bix u yilik le sukuʼunoʼob le baʼax ku yaʼaliktiʼoboʼ. Jeʼex juntéenjeakileʼ ka tsʼíibnaj tiʼ le sukuʼunoʼob yanoʼob Corintooʼ tu tsʼáaj consejo tiʼob. Chéen baʼaleʼ ka máan kʼiineʼ tu túuxtaj Tito tu yiknaloʼob tumen taak u yojéeltik bix tu yililoʼob le baʼax tu yaʼalajtiʼob teʼ cartaoʼ. ¡Seguro jach kiʼimakchaj u yóol ka tu yojéeltaj tu kʼamoʼob le baʼax tu yaʼalajtiʼoboʼ! (2 Cor. 7:6, 7).

12. ¿Baʼax jeʼel u páajtal u beetik le ancianoʼob utiaʼal u líiʼskoʼob u yóol le sukuʼunoʼoboʼ?

¹² Baʼax ku kaʼansiktoʼon. Le ancianoʼoboʼ ku seguerkoʼob u ejemplo Pablo kéen u jóoʼsoʼob tiempo utiaʼal u yantaloʼob yéetel le sukuʼunoʼoboʼ. Utiaʼal lelaʼ ku kʼuchloʼob temprano teʼ muchʼtáambaloʼob utiaʼal u tsikbaloʼob tu yéeteloʼoboʼ. Tak chéen wa jaypʼéel minuto ka tsikbalnakoʼob yéetel juntúul sukuʼuneʼ jeʼel u líiʼskoʼob u yóoleʼ wa jeʼel u beetkoʼob u yuʼubik yaabiltaʼaneʼ (Rom. 1:12; Efe. 5:16). Le ancianoʼob ku seguerkoʼob u ejemplo Pablooʼ ku meyajtiʼob le Biblia utiaʼal u líiʼskoʼob u yóol le sukuʼunoʼoboʼ yéetel utiaʼal u yeʼeskoʼobtiʼob yaabiltaʼanoʼob tumen Jéeoba. Utiaʼal u yeʼeskoʼob xan u yaabiltmoʼob le sukuʼunoʼoboʼ mantatsʼ ku kaxtikoʼob u súutukil u tsikbaloʼob tu yéeteloʼob bey xan utiaʼal u felicitarkoʼob. Wa juntúul anciano kʼaʼabéet u tsʼáaik consejo tiʼ wa máaxeʼ unaj u chʼaʼik teʼ Biblia le baʼax ken u yaʼaltiʼoʼ. Kex kʼaʼabéet u yaʼaliktiʼ tiʼ baʼax unaj u mejorareʼ ku yilik u beetik yéetel yaabilaj tumen u kʼáat ka kʼaʼamak le baʼax ken u yaʼaloʼ (Gál. 6:1).

13. ¿Bix jeʼel u yilik juntúul anciano le baʼaxoʼob maʼ maʼalobtak ku beetkoʼ?

¹³ Baʼaxten maʼ chéen chʼaʼabiliʼ. Le ancianoʼoboʼ j-kʼebanoʼob xan, le oʼolal yaan kʼiineʼ ku beetkoʼob baʼax maʼ maʼalobiʼ (Rom. 3:23). Maʼ xaaneʼ yaan jujuntúuleʼ ku lúubul u yóol tumen jach ku chʼíikil u tukult le baʼaxoʼob maʼ maʼalobtak ku beetkoʼ. Chéen baʼaleʼ yanoʼobeʼ maʼ xaaneʼ mix tu beetkoʼob u cuentail le baʼax ku beetkoʼoboʼ wa ku tuklikoʼob maʼ kʼaʼabéet u mejoraroʼob tiʼ mix baʼaliʼ.

14. Jeʼex u yaʼalik Filipenses 4:13, ¿bix áantaʼabik Pablo tumen le kabal óolal utiaʼal ka u aktáant le baʼaxoʼob ku yúuchultiʼoʼ?

¹⁴ U ejemplo Pablo. Letiʼeʼ tu yeʼesaj kabal u yóol tumen tu yaʼaleʼ chéen yéetel u yáantaj Dios béeychaj u aktáantik le baʼaxoʼob ku yúuchultiʼoʼ. Antes u beetkuba cristianoileʼ jach tu beetaj u kʼasaʼanil tiʼ u discípuloʼob Jesús. Chéen baʼaleʼ le ka máan tiempoeʼ tu tsʼáaj cuenta maʼ maʼalob le baʼax ku beetkoʼ ka tu kʼexaj bix u tuukul bey xan u modos (1 Tim. 1:12-16). Yéetel u yáantaj Jéeobaeʼ kʼuch u beetuba juntúul anciano ku yeʼesik yaabilaj, ku chʼaʼik óotsilil yéetel kabal u yóol. Letiʼeʼ ku yaatal kaʼach u yóol u  yilik le baʼaxoʼob ku yúuchultiʼ tumen j-kʼeban máakoʼ, chéen baʼaleʼ confiarnaj yaan u perdonartaʼal tumen Jéeoba yéetel tu chʼaʼtuklaj u xuʼulul u tuukul tiʼ le baʼaxoʼob maʼ maʼalobtak ku beetkoʼ (Rom. 7:21-25). U yojel kex jeʼel baʼaxak ka u beeteʼ j-kʼeban máak, chéen baʼaleʼ tu tsʼáaj u yóol u maas jatsʼutskíint u modos yéetel confiarnaj tiʼ Jéeoba utiaʼal u béeytal u tsʼoʼokbesik le meyaj kʼubéentaʼantiʼoʼ (1 Cor. 9:27; xok Filipenses 4:13).

15. ¿Bix unaj u yilik juntúul anciano le baʼaxoʼob ku yúuchultiʼ tumen j-kʼeban máakoʼ?

¹⁵ Baʼax ku kaʼansiktoʼon. Le sukuʼunoʼoboʼ maʼatech u tsʼaʼabal u beet u ancianoiloʼob tumen perfectoʼob. Chéen baʼaleʼ Jéeobaeʼ ku páaʼtikeʼ wa yaan kʼiin ku beetkoʼob baʼax maʼ maʼalobeʼ ka u reconocertoʼob yéetel cada kʼiin ku máaneʼ unaj u yilik u maas jatsʼutskíintik u modosoʼob (Efe. 4:23, 24). Unaj u meyajtiʼob le Biblia utiaʼal u yilkoʼob wa yaan baʼax maʼ táan u beetkoʼoboʼ bey xan wa yaan baʼax unaj u yutskíintikoʼob. Wa ku beetkoʼob beyoʼ yaan u yáantaʼaloʼob tumen Jéeoba utiaʼal u tsʼoʼokbeskoʼob yéetel kiʼimak óolal le meyaj kʼubéentaʼantiʼoboʼ (Sant. 1:25).

16. ¿Baʼax jeʼel u yúuchul wa le ancianoʼoboʼ chéen ku yilkoʼob le baʼaloʼob maʼ maʼalobtak ku beetik le sukuʼunoʼoboʼ?

¹⁶ Baʼaxten maʼ chéen chʼaʼabiliʼ. Le kéen múul meyajnak le ancianoʼob yéetel le sukuʼunoʼoboʼ maʼ xaaneʼ ku tsʼáaikoʼob cuenta le baʼaloʼob maʼ maʼalobtak ku beetkoʼoboʼ, pero wa chéen letiʼe baʼax ku yilkoʼoboʼ jeʼel u lúubul u yóoloʼobeʼ, jeʼel u joʼopʼol u criticarkoʼob le sukuʼunoʼoboʼ wa jeʼel u joʼopʼol u maltratarkoʼobeʼ. Úuchjeakileʼ Pabloeʼ tu yaʼalaj tiʼ le sukuʼunoʼoboʼ jach letiʼe baʼax u kʼáat Satanás ka u beet máakoʼ (2 Cor. 2:10, 11).

17. ¿Baʼax ku tuklik kaʼach Pablo yoʼolal le sukuʼunoʼoboʼ?

¹⁷ U ejemplo Pablo. Letiʼeʼ mantatsʼ tuukulnaj maʼalob tiʼ le sukuʼunoʼoboʼ. U jaajileʼ letiʼeʼ tu tsʼáaj cuenta le baʼax maʼ maʼalob ku beetkoʼoboʼ tumen yaan kʼiineʼ ku afectartaʼal tak letiʼ. Chéen baʼaleʼ u yojleʼ juntúul máax ku beetik baʼax maʼ maʼalobeʼ maʼ u kʼáat u yaʼal wa kʼasaʼan máakiʼ. Letiʼeʼ jach u yaabiltmaj kaʼach le sukuʼunoʼoboʼ yéetel maases ku yilik le jatsʼuts modos ku yeʼeskoʼoboʼ. Wa juntúul sukuʼun ku beetik junpʼéel baʼax maʼ maʼalobeʼ maʼatech u jáan tuukul kʼaas tiʼ letiʼ, baʼaxeʼ ku tuklikeʼ chéen kʼaʼabéet u yáantaʼal.

18. ¿Baʼax ku kaʼansiktoʼon le bix u tuukul kaʼach Pablo yoʼolal Evodia yéetel Síntiqueoʼ? (Filipenses 4:1-3).

¹⁸ Koʼoneʼex ilik bix úuchik u yáantik Pablo kaʼatúul kiikoʼob tu múuchʼulil Filipos (xok Filipenses 4:1-3). Le Bibliaoʼ ku yaʼalikeʼ Evodia yéetel Síntiqueeʼ maʼatech u biskubaʼob kaʼachi. Chéen baʼaleʼ Pabloeʼ maʼ tu criticartaj le kiikoʼobaʼ mix tu beetaj u kʼasaʼanil tiʼobiʼ. Baʼaxeʼ maases tu yilaj le jatsʼuts modos ku yeʼeskoʼoboʼ bey xan bix u tsʼaamil u yóol u meyajtoʼob Jéeoba. Pabloeʼ u yojel yaabiltaʼanoʼob tumen  Jéeoba. Tumen maʼ tuukulnaj kʼaas tiʼ le kaʼatúul kiikoʼobaʼ tu yáantoʼob utiaʼal u kaʼa biskubaʼob. Le bix u tuukuloʼ le áant utiaʼal maʼ u xuʼulul u yantaltiʼ kiʼimak óolal yéetel utiaʼal u seguer u biskuba yéetel le sukuʼunoʼob yanoʼob teʼ múuchʼuliloʼ.

19. 1) ¿Baʼax jeʼel u páajtal u beetik le ancianoʼob utiaʼal u tuukuloʼob maʼalob tiʼ le sukuʼunoʼoboʼ? 2) ¿Baʼax ku kaʼansiktech le foto tuʼux yaan le anciano táan u beetik limpieza teʼ tuʼux ku adorarkoʼob Jéeobaoʼ?

¹⁹ Baʼax ku kaʼansiktoʼon. Ancianoʼex, jach ilawileʼex le jatsʼuts modos ku yeʼesik le sukuʼunoʼoboʼ. Kex j-kʼebanoʼobeʼ ku beetkoʼob xan baʼaloʼob maʼalobtak (Fili. 2:3). U jaajileʼ yaan kʼiineʼ yaan u kʼaʼabéettal a tsolnuʼuktikeʼex wa máax, chéen baʼaleʼ jeʼex Pabloeʼ maʼ chʼíikileʼex tuukul chéen tiʼ le tʼaanoʼob wa le baʼaloʼob maʼ maʼalobtak ku beetkoʼ. Baʼaxeʼ ilawileʼex bix u yaabiltmil Jéeoba, bix u tsʼáaik u yóol u meyajte yéetel bix jeʼel u páajtal a wáantkeʼexeʼ. Le kéen tuukulnakeʼex maʼalob tiʼ le sukuʼunoʼoboʼ jach ka wáantajeʼex utiaʼal u yeʼesaʼal yaabilaj teʼ múuchʼuliloʼ.

20. ¿Baʼax jeʼel u páajtal u beetik le ancianoʼob utiaʼal u seguer u kaanbaloʼob tiʼ Pablooʼ?

²⁰ Le ancianoʼoboʼ maʼalob ka seguernak u xakʼalxoktikoʼob u ejemplo Pablo. Teʼ Índice de las publicaciones Watch Toweroʼ jeʼel u páajtal u kaxtikoʼob «Pablo», ku tsʼoʼokoleʼ ku binoʼob teʼ jaats «ejemplo para los ancianos». Le kéen u xakʼalxoktoʼobeʼ maʼalob ka u tukloʼob: «¿Bix u yáantken u ejemplo Pablo utiaʼal u seguer in beetik in ancianoil yéetel kiʼimak óolal?».

21. ¿Baʼax maʼ unaj u tuʼubul tiʼ le ancianoʼoboʼ?

²¹ Ancianoʼex, kʼaʼajakteʼexeʼ Jéeobaeʼ maʼ táan u páaʼtik ka pʼáatkeʼex perfectoiliʼ, chéen baʼax ku páaʼtikeʼ ka chúukpajak a wóol a meyajteʼex (1 Cor. 4:2). Úuchjeakileʼ Jéeobaeʼ jach tu apreciartaj tuláakal baʼax tu beetaj Pablo bey xan bix chúukpajik u yóol. Bejlaʼa xaneʼ maʼ u tuʼubulteʼexeʼ letiʼeʼ jach ku apreciartik tuláakal baʼax ka beetkeʼex. Tiʼ Hebreos 6:10, ku yaʼalik: «Dioseʼ maʼ kʼasaʼan utiaʼal ka u tuʼubs le meyaj ta beeteʼexoʼ mix le yaabilaj ta weʼeseʼex tu yoʼolal u kʼaabaʼoʼ, tumen teʼexeʼ ta wáanteʼex le máaxoʼob santoʼoboʼ yéetel láayliʼ táan a wáantkeʼexoʼobeʼ».