Juntúul máak chéen ku jáan xokik le baʼax ku yaʼalik le tekstooʼ maʼ xaaneʼ jeʼel u beetik le kʼáatchiʼ tsʼoʼok k-aʼalikoʼ. Chéen baʼaleʼ u jaajileʼ yaan kaʼatúul máakoʼob ku kʼaabaʼtikoʼob Mefibóset. Wa k-xakʼaltik tubeel le baʼax ku yaʼalik le Bibliaoʼ yaan jujunpʼéel baʼaloʼob jeʼel k-kanikeʼ.

Rey Saúleʼ yanchaj siete u hijoʼob yéetel kaʼatúul u hijaʼob. Le yáax hijooʼ tu kʼaabaʼtaj Jonatán. Le ka tsʼoʼokeʼ yanchaj juntúul u hijo yéetel Rizpá tu kʼaabaʼtaj Mefibóset, chéen baʼaleʼ Jonatáneʼ yanchaj xan juntúul u hijo tu kʼaabaʼtaj Mefibóset. Jeʼex túun k-ilkoʼ Saúleʼ yanchaj juntúul u hijo bey xan juntúul u yáabil tu kʼaabaʼtaj Mefibóset.

Junpʼéel kʼiineʼ rey Saúleʼ káaj u pʼektik le gabaonitaʼob kajaʼanoʼob ichil le israelitaʼoboʼ ka tu kíimsaj wa jaytúul tiʼ letiʼobiʼ. Leloʼ jach maʼ maʼalobiʼ tumen tu kʼiiniloʼob Josuéeʼ u nuuktakil le israelitaʼoboʼ tu chʼaʼajoʼob junpʼéel acuerdo yéetel le gabaonitaʼob utiaʼal maʼ u xuʼulskoʼobtiʼoboʼ (Jos. 9:3-27).

Le acuerdo chʼaʼabaʼanoʼ unaj u tsʼoʼokbesaʼal kaʼach tak tu kʼiiniloʼob Saúl. Chéen baʼaleʼ letiʼeʼ maʼ tu respetartaj le acuerdo chʼaʼabaʼanoʼ ka tu yóotaj u xuʼuls tiʼ le gabaonitaʼoboʼ, le oʼolal tu táan Dioseʼ «Saúl yéetel u familiaeʼ culpableʼob» úuchik u kíimskoʼob le gabaonitaʼoboʼ (2 Sam. 21:1). Le ka káaj u beetik u reyil Davideʼ le gabaonitaʼoboʼ tu tsikbaltoʼobtiʼ le baʼax beetaʼabtiʼoboʼ. Tu yoʼolal le baʼax jach kʼaas tu beetaj Saúl yéetel utiaʼal u páajtal u kaʼa bendecirtaʼaloʼob tumen Jéeobaeʼ, Davideʼ tu kʼáataj tiʼ le gabaonitaʼob baʼax jeʼel u páajtal u beetik tu yoʼolaloʼoboʼ. Letiʼobeʼ maʼ tu kʼáatoʼob taakʼiniʼ baʼaxeʼ tu kʼáatoʼob ka tsʼaʼabaktiʼob siete u túulal u hijoʼob le máax taak kaʼach u xuʼulsiktiʼoboʼ (Núm. 35:30, 31). David túuneʼ tu beetaj le baʼax tu kʼáatoʼoboʼ (2 Sam. 21:2-6).

Teʼ kʼiinoʼob jeʼeloʼ Saúl yéetel Jonatáneʼ tsʼoʼok kaʼach u kíimloʼob, chéen baʼaleʼ Mefibóset, u hijo Jonatáneʼ kuxaʼan kaʼachi. Letiʼeʼ móochchaj desde tu chichnil yéetel maʼ táakpaj tiʼ le baʼax tu beetaj u abuelo tiʼ le gabaonitaʼoboʼ. Tsʼoʼoleʼ Davideʼ u beetmaj kaʼach junpʼéel acuerdo yéetel Jonatán utiaʼal u biskubaʼob, ichil le acuerdoaʼ táakaʼan kaʼach tak u paalaloʼob (1 Sam. 18:1; 20:42). Yoʼolal leloʼ Davideʼ «tu chʼaʼaj óotsilil tiʼ Mefibóset u hijo Jonatán, u yáabil Saúl. Lelaʼ tu beetaj yoʼolal le baʼax tu jurartaj tiʼ Jonatán [...] tu táan Jéeobaoʼ» (2 Sam. 21:7).

Davideʼ utiaʼal u beetik le baʼax tu kʼáataj le gabaonitaʼoboʼ tu chʼaʼaj kaʼatúul u hijoʼob Saúl yéetel cinco u yáabiloʼobeʼ ka tu kʼubajtiʼob, juntúul tiʼ u hijoʼob Saúloʼ ku kʼaabaʼtik Mefibóset (2 Sam. 21:8, 9). Bey úuchik u xuʼulsik David le maldición yaan kaʼach yóokʼol le luʼum úuchik u weʼekel u kʼiʼikʼel le gabaonitaʼoboʼ.

Le tsikbalilaʼ ku kaʼansiktoʼoneʼ wa le kaʼatúul u hijoʼob Saúl yéetel le cinco u yáabiloʼob mix baʼal kʼaas kaʼach u beetmoʼoboʼ Jéeobaeʼ bejlaʼa maʼ tu chaʼik u kíimsaʼaloʼobeʼ, tumen le Leyoʼ ku yaʼalik kaʼacheʼ le hijotsiloʼoboʼ maʼ unaj u kíimsaʼaloʼob tu yoʼolal u kʼeban u taataʼobiʼ. Le leyoʼ ku yaʼalik: «Juntúul máakeʼ unaj u kíimsaʼal yoʼolal le kʼeban tu beetoʼ» (Deu. 24:16). Leloʼ ku yeʼesiktoʼoneʼ le kaʼatúul u hijoʼob Saúl yéetel le cinco u yáabiloʼoboʼ yaan bix úuchik u táakpajloʼob utiaʼal u xuʼulsaʼal tiʼ le gabaonitaʼoboʼ. Bey túunoʼ tu siete u túulaloʼobeʼ kíimsaʼaboʼob tu yoʼolal le baʼax kʼaas u beetmoʼoboʼ.

¿Baʼax túun ku kaʼansiktoʼon le tsikbalilaʼ? Ku kaʼansiktoʼoneʼ juntúul máax ku beetik junpʼéel baʼax kʼaaseʼ culpable tiʼ baʼax ku beetik, maʼ tu páajtal u yaʼalik chéen táan kaʼach u yuʼubik tʼaan. Le oʼolal le Bibliaoʼ ku yaʼalik: «Tumen cada juntúuleʼ yaan u bisik u kuuch» (Gál. 6:5; Efe. 5:15).