1, 2. 1) ¿Baʼax tu yaʼalaj junpʼéel libro? 2) ¿Baʼax ken k-xakʼalt teʼ xookaʼ?

BEJLAʼEʼ u millonesil máakoʼob ku yaʼalikoʼob ku creerkoʼob Jesús, chéen baʼaleʼ maʼatech u kʼamkoʼob le baʼaxoʼob tu kaʼansoʼ (2 Tim. 4:3, 4). Junpʼéel libroeʼ ku yaʼalik: «Wa ka yanak juntúul Jesús teʼ kʼiinoʼobaʼ yéetel wa ka tʼaanak jeʼex úuchik u tʼaan Jesús [...] walajki dos mil añosaʼ, ¿jeʼel wa k-kʼamkeʼ? [...] U jaajileʼ maʼ».

² Úuchjeakileʼ yaʼab máakoʼob tu yuʼuboʼob le baʼaxoʼob tu kaʼansaj Jesúsoʼ yéetel tu yiloʼob le milagroʼob tu beetoʼ, kex beyoʼ maʼ tu creertoʼob wa letiʼ le Mesíasoʼ. ¿Baʼaxten? Teʼ xook máanikoʼ t-ilaj kanpʼéel baʼax oʼolal, yéetel teʼ xookaʼ yaan k-ilik uláakʼ kanpʼéeliʼ. Yaan k-ilik xan baʼaxten yaan máakoʼobeʼ maʼ tu kʼamkoʼob le baʼaxoʼob ku kaʼansik u discípuloʼob Jesús teʼ kʼiinoʼobaʼ yéetel yaan k-ilik baʼax jeʼel u yáantkoʼon utiaʼal maʼ k-tʼóochpajleʼ.

3. ¿Baʼax tu beetaj Jesús jelaʼan ilaʼabik tumen jujuntúul máakoʼob?

³ Jesús kaʼacheʼ ku biskuba yéetel tuláakal máak. Ku janal kaʼach yéetel ayikʼaloʼob, chéen baʼaleʼ ku máansik yaʼab tiempo xan yéetel le óotsiloʼoboʼ. Tsʼoʼoleʼ ku chʼaʼik óotsilil tiʼ le máaxoʼob kʼaj óolaʼanoʼob bey j-kʼeban máakoʼoboʼ. Yaan máaxoʼob jach ku creerkubaʼobeʼ jelaʼan tu yililoʼob le baʼax tu beetaj Jesúsoʼ, le oʼolal tu kʼáatoʼob tiʼ u discípuloʼob: «¿Baʼaxten ka múul janaleʼex yéetel ka wukʼikeʼex vino yéetel le máaxoʼob cobrartik impuestoʼob bey xan yéetel le j-kʼeban máakoʼoboʼ?». Jesús túuneʼ tu núukajtiʼob: «Máaxoʼob toj u yóoloʼobeʼ  maʼ kʼaʼabéettiʼob juntúul doctoriʼ, chéen baʼaleʼ le máaxoʼob kʼojaʼanoʼoboʼ kʼaʼabéettiʼob. Teneʼ maʼ taalen in tʼan máakoʼob mix baʼal kʼaas u beetmoʼobiʼ, baʼaxeʼ taalen in tʼan j-kʼeban máakoʼob utiaʼal ka u kʼex u tuukuloʼob» (Luc. 5:29-32).

4. Jeʼex u yaʼalmil profeta Isaíasoʼ, ¿baʼax unaj kaʼach u yojel le judíoʼoboʼ?

⁴ ¿Baʼax ku yaʼalik le Bibliaoʼ? Profeta Isaíaseʼ u yaʼalmiliʼ maʼ tun kʼambil le Mesíasoʼ, letiʼeʼ tu tsʼíibtaj: «Letiʼeʼ taasaʼab mix baʼalil yéetel mix máak náatsʼ tu yiknal [...]. Bey pixaʼan u yich utiaʼal maʼ k-ilkeʼ, taasaʼab mix baʼalil yéetel pʼáat bey mix baʼal k-ilkeʼ» (Isa. 53:3). Jeʼex k-ilkoʼ Isaíaseʼ u yaʼalmiliʼ maʼ tun taaktal u náatsʼal le máakoʼob tu yiknal le Mesíasoʼ, le oʼolal le judíoʼoboʼ unaj u yojloʼob maʼ tuláakal máak kun kʼamik Jesúsiʼ.

5. ¿Baʼax ku tuklik yaʼab máakoʼob yoʼolal le máaxoʼob meyajtik Jéeobaoʼ?

⁵ ¿Bey wa xan u yúuchul bejlaʼeʼ? Beyoʼ. Bejlaʼeʼ u nuuktakil le religiónoʼoboʼ uts tu tʼaan u kʼamkoʼob le ayikʼaloʼoboʼ, le máakoʼob yaan u naʼatoʼoboʼ bey xan le máakoʼob jach kʼaj óolaʼanoʼob teʼ tuʼux kajaʼanoʼoboʼ, kex le máakoʼobaʼ maʼatech u kuxtaloʼob jeʼex u yaʼalik le Bibliaoʼ. Chéen baʼaleʼ u nuuktakil le religiónoʼoboʼ maʼatech u kʼamkoʼob u testigoʼob Jéeoba kex u tsʼaamaj u yóol u meyajtoʼob Dios yéetel kex ku kuxtaloʼob jeʼex u yaʼalik le Bibliaoʼ. ¿Baʼaxten? Tumen letiʼobeʼ ku taasaʼaloʼob mix baʼalil tumen le máakoʼoboʼ. Chéen baʼaleʼ Pabloeʼ tu yaʼaleʼ Dioseʼ tu yéeyaj le máaxoʼob ku taasaʼaloʼob mix baʼaliloʼ (1 Cor. 1:26-29). Jeʼex k-ilkoʼ Jéeobaeʼ koʼoj u yilik u kuxtal cada juntúul tiʼ le máaxoʼob meyajtikoʼ.

6. ¿Baʼax tu yaʼalaj Jesús tiʼ Mateo 11:25, 26, yéetel bix jeʼel k-beetik jeʼex letiʼeʼ?

⁶ ¿Baʼax jeʼel u yáantkoʼon utiaʼal maʼ k-tʼóochpajleʼ? (Xok Mateo 11:25, 26). Maʼ a jáan creertik le baʼaxoʼob ku yaʼalaʼal tu contra le máaxoʼob meyajtik Diosoʼ. Jéeobaeʼ chéen ku yéeyik le máaxoʼob kabal u yóoloʼoboʼ (Sal. 138:6). Máans ta tuukul tuláakal le baʼaxoʼob tsʼoʼok u páajtal u beetik le máaxoʼob ku taasaʼaloʼob mix baʼalil yéetel ku tuklaʼal minaʼan u naʼatoʼoboʼ.

7. ¿Baʼaxten tu yaʼalaj Jesús kaʼapʼéel ich le fariseoʼoboʼ yéetel bix tu yuʼubilubaʼob?

⁷ Jesúseʼ tu yaʼalaj le baʼaloʼob maʼ maʼalobtak ku beetik u nuuktakil le religiónoʼob úuchjeakiloʼ. Juntéenjeakeʼ tu yaʼalaj kaʼapʼéel ich le fariseoʼoboʼ tumen maas ku preocuparkubaʼob yoʼolal baʼaloʼob jeʼex u pʼoʼik u kʼaboʼoboʼ, chéen baʼaleʼ maʼatech u kanáantik u taataʼob (Mat. 15:1-11). Teʼ kʼiin jeʼeloʼ tak le discípuloʼob jaʼakʼ u yóoloʼoboʼ ka tu yaʼaloʼob tiʼ Jesús: «¿Ta wilaj wa kʼuuxilnaj le fariseoʼob yoʼolal le baʼax ta waʼaloʼ?». Jesús túuneʼ tu núukajtiʼob: «Tuláakal paakʼal maʼ in Taata yaan teʼ kaʼan pakʼmiloʼ yaan u joʼokol. Maʼ a beetkeʼex u cuentailoʼob. Letiʼobeʼ beyoʼob jeʼex le máakoʼob chʼóopoʼob ku nuʼuktikoʼob uláakʼ máakoʼoboʼ. Le oʼolaleʼ wa juntúul chʼóop ku nuʼuktik u yéet chʼóopileʼ tu kaʼatúulal kun lúubloʼob tiʼ junpʼéel jool» (Mat. 15:12-14). Kex pʼuʼuj u nuuktakil le religiónoʼob tu contra Jesúsoʼ, letiʼeʼ maʼ xuʼul u yaʼalik u jaajiliʼ.

8. ¿Bix tu yeʼesil Jesús maʼatech u kʼaʼamal tumen Dios tuláakal le baʼaloʼob ku kaʼansaʼaloʼ?

⁸ Jesúseʼ tu yaʼalaj xaneʼ Dioseʼ maʼatech u kʼamik tuláakal le baʼaloʼob ku kaʼansaʼal úuchjeakiloʼ. Juntéenjeakeʼ tu yaʼaleʼ yaʼab máaxoʼob kun binoʼob teʼ kóokoch bej ku bisik máak tiʼ xuʼulsajoʼ, chéen baʼaleʼ chéen junpʼíit máakoʼob kun binoʼob teʼ nuʼunuʼutʼ bej ku bisik máak teʼ kuxtaloʼ (Mat. 7:13, 14). Tu yeʼesaj xaneʼ kex yaan máakoʼob ku yaʼalik ku meyajtikoʼob  Dioseʼ u jaajileʼ maʼ beyiʼ, le oʼolal tu yaʼalaj: «Kanáantabaʼex tiʼ le maʼ jaajil profetaʼob ku taaloʼob ta wiknaleʼex bey tamanoʼoboʼ, tumen u jaajileʼ loboʼob maʼatech u yuʼubik u naʼajtaloʼob. Tu yoʼolal le ich ku tsʼáaikoʼoboʼ tiʼ ken a kʼaj óolteʼex máaxoʼobiʼ» (Mat. 7:15-20).

9. Aʼal jujunpʼéel baʼaloʼob maʼ jaajtak ku creertaʼal úuchjeakiliʼ.

⁹ ¿Baʼax ku yaʼalik le Bibliaoʼ? Junpʼéel profecíaeʼ ku yaʼalikeʼ le yaabilaj ku yuʼubik le Mesías tu yoʼolal u yotoch Jéeobaoʼ bey junpʼéel kʼáakʼ ku tóochʼbaleʼ (Sal. 69:9; Juan 2:14-17). Le oʼolal Jesúseʼ maʼ sajakchaj u yaʼal le baʼaloʼob maʼ jaajtak ku kaʼansaʼal yéetel ku beetaʼal tumen le máakoʼob úuchjeakiloʼ. Le fariseoʼoboʼ ku yaʼalikoʼob kaʼacheʼ yaan baʼax ku pʼáatal kuxaʼanil tiʼ máak kéen kíimik, chéen baʼaleʼ Jesúseʼ tu kaʼanseʼ le kimenoʼoboʼ mix baʼal ku pʼáatal kuxaʼanil tiʼob tumen bey táan u weenloʼobeʼ (Juan 11:11). Le saduceoʼoboʼ maʼatech u creerkoʼob kaʼach wa yaan u kaʼa kuxkíintaʼal máak, chéen baʼaleʼ Jesúseʼ tu kaʼa kuxkíintaj Lázaro (Juan 11:43, 44; Hech. 23:8). Le fariseoʼoboʼ ku yaʼalikoʼob kaʼacheʼ Dioseʼ u destinarmaj tuláakal máak, chéen baʼaleʼ Jesúseʼ tu kaʼanseʼ tuláakal máak jeʼel u páajtal u chʼaʼtuklik wa yaan u meyajtik Dioseʼ wa maʼ (Mat. 11:28).

10. ¿Baʼaxten yaʼab máakoʼob ku tsʼíikiloʼob ken u yuʼuboʼob baʼaxoʼob k-kaʼansik?

¹⁰ ¿Bey wa xan u yúuchul bejlaʼeʼ? Beyoʼ. Yaʼab máakoʼobeʼ ku tsʼíikiloʼob tumen k-eʼesiktiʼob maʼ jaaj le baʼax ku creerkoʼoboʼ. U nuuktakil le religiónoʼoboʼ utiaʼal u jaʼasikoʼob u yóol le máakoʼoboʼ ku kaʼanskoʼobeʼ Dioseʼ ku castigartik máak tiʼ junpʼéel infierno. Chéen baʼaleʼ toʼoneʼ k-ojel u yaabiltmaj máak le oʼolal k-eʼesik maʼ jaaj le baʼax ku kaʼanskoʼoboʼ. Le religiónoʼob xanoʼ ku kaʼanskoʼobeʼ yaan baʼax ku pʼáatal kuxaʼanil tiʼ máak kéen kíimik, bey túunoʼ ku tsʼáaikoʼob naʼatbil maʼ kʼaʼabéet u kaʼa kuxkíintaʼal máakiʼ. Chéen baʼaleʼ toʼoneʼ k-eʼesik yéetel le Biblia maʼ jaaj le baʼax ku kaʼanskoʼoboʼ. Le religiónoʼoboʼ ku kaʼanskoʼobeʼ Dioseʼ u destinarmaj tuláakal máak, chéen baʼaleʼ toʼoneʼ k-kaʼansikeʼ tuláakal máak jeʼel u páajtal u chʼaʼtuklik baʼax ken u beeteʼ. Le oʼolal ku pʼuʼujul u nuuktakil le religiónoʼoboʼ.

11. Jeʼex u yaʼalik Juan 8:45-47, ¿baʼax u kʼáat Dios ka k-beete?

 ¹¹ ¿Baʼax jeʼel u yáantkoʼon utiaʼal maʼ k-tʼóochpajleʼ? Wa k-yaabiltmaj u jaajileʼ yaan k-kʼamik baʼax ku yaʼalik Dios (xok Juan 8:45-47). Unaj u chúukpajal k-óol k-meyajt Jéeoba yéetel maʼ unaj k-pʼatik u jaajil jeʼex úuchik u beetik Satanáseʼ (Juan 8:44). Jéeobaeʼ u kʼáat ka k-seguert u ejemplo Jesús, le oʼolal ku yaʼaliktoʼon: «Sen pʼekteʼex le kʼaasoʼ, chʼíikik a beeteʼex baʼax uts» (Rom. 12:9; Heb. 1:9).

12. ¿Baʼax beet maʼ u kʼaʼamal Jesús tumen yaʼab judíoʼob?

¹² ¿Baʼax uláakʼ beet maʼ u kʼaʼamal Jesús tumen le judíoʼoboʼ? Pabloeʼ tu yaʼalaj: «Toʼoneʼ táan k-tsikbaltikeʼ Cristoeʼ baʼaj tiʼ cheʼ, lelaʼ ku beetik u tʼóochpajal le judíoʼoboʼ» (1 Cor. 1:23). Le judíoʼoboʼ ku tuklikoʼob kaʼacheʼ wa Jesús letiʼe Mesíasoʼ maʼ unaj u kíimil tiʼ junpʼéel cheʼ jeʼex juntúul kʼasaʼan maakeʼ (Deu. 21:22, 23).

13. ¿Baʼax maʼ tu creertaj le judíoʼob tu tsʼáajubaʼob tu contra Jesúsoʼ?

¹³ Le judíoʼoboʼ maʼ tu creertoʼob wa mix baʼal kʼaas u beetmaj Jesúsiʼ mix tu creertoʼob wa chéen táan u yaʼalaʼal baʼaloʼob maʼ jaajtak tu contraiʼ. Tsʼoʼoleʼ jach séeb úuchik u juzgartaʼal yéetel maʼ beetaʼab jeʼex u yaʼalik le Leyoʼ (Luc. 22:54; Juan 18:24). Le máaxoʼob juzgartoʼ hasta tu kaxtoʼob «baʼaloʼob maʼ jaajtak u yaʼaloʼob tu contra Jesús utiaʼal ka páajchajak u kíimskoʼob[iʼ]», chéen baʼaleʼ maʼ jóokʼoʼob yéetel baʼax ku tuklikoʼobiʼ. Le oʼolal u maas nojchil le sacerdoteʼoboʼ u kʼáat kaʼach ka tʼaanak Jesús utiaʼal u yantal wa baʼax oʼolal u kíimskoʼob (Mat. 26:59; Mar. 14:55-64). Ka tsʼoʼok u kaʼa kuxkíintaʼal xaneʼ le juezoʼoboʼ «tu tsʼáajoʼob yaʼab u taakʼinil plata tiʼ le soldadoʼoboʼ» utiaʼal ka u yaʼaloʼob maʼ jaaj wa kaʼa kuxkíintaʼab Jesúsiʼ (Mat. 28:11-15).

14. ¿Baʼax u yaʼalmaj profeta Isaías?

¹⁴ ¿Baʼax ku yaʼalik le Bibliaoʼ? Kex yaʼab judíoʼob maʼ táan kaʼach u páaʼtkoʼob u kíimsaʼal le Mesíasoʼ, le profeta Isaíasoʼ u yaʼalmaj: «Tu kʼubaj u kuxtal utiaʼal kíimil yéetel xoʼok ichil le kʼasaʼan máakoʼoboʼ. Letiʼeʼ tu bisaj u kʼeban yaʼabkach máakoʼob yéetel tu yáantaj le kʼasaʼan máakoʼoboʼ» (Isa. 53:12). Le oʼolaleʼ le  úuchik u kíimsaʼal Jesús jeʼex juntúul kʼasaʼan máakoʼ maʼ unaj kaʼach u beetik u tʼóochpajal le judíoʼoboʼ.

15. ¿Baʼaxoʼob maʼ jaajtak tsʼoʼok u yaʼalaʼal tu contra u testigoʼob Jéeobaiʼ?

¹⁵ ¿Bey wa xan u yúuchul bejlaʼeʼ? Beyoʼ. Jeʼex Jesúseʼ u testigoʼob Jéeobaeʼ ku taʼakal u pooloʼob yéetel ku castigartaʼaloʼob kex maʼ unajiʼ. Tu luʼumil Estados Unidoseʼ desde tu añoil 1930 tak 1950, yanchaj k-bin tu táan le tribunaloʼob utiaʼal k-defendertik le derecho yaantoʼon utiaʼal k-adorartik Diosoʼ. Yaan jujuntúul juezoʼobeʼ tu yeʼesoʼob deporsi maʼ tu lúubul utsil tiʼob u testigoʼob Jéeoba. Tu kaajil Quebec, yaan tu luʼumil Canadáeʼ, tu muchʼuba le Iglesia yéetel le gobierno utiaʼal u tsʼáaikubaʼob tu contra le meyaj k-beetkoʼ. Yaʼab sukuʼunoʼob kʼaʼaloʼob cárcel chéen tumen ku tʼaanoʼob tiʼ u Reino Dios. Tu luʼumil Alemania xaneʼ yaʼab táankelmoʼob kíimsaʼaboʼob tumen le naziʼoboʼ. Yéetel maʼ sen úucheʼ tu luʼumil Rusiaeʼ yaʼab sukuʼunoʼob kʼaʼaloʼob chéen tumen ku tʼaanoʼob tiʼ le Bibliaoʼ. Le autoridadoʼoboʼ ku yaʼalikoʼobeʼ jach maʼ maʼalob bin le baʼax ku beetkoʼoboʼ. Tsʼoʼok tak u prohibirkoʼob le Biblia U Tʼaan Dios utiaʼal u Kajnáaliloʼob le Túumben Luʼum beetaʼan ich rusooʼ, tumen ku taasik u kʼaabaʼ Jéeoba.

16. Jeʼex u yaʼalik 1 Juan 4:1, ¿baʼaxten maʼ unaj k-creertik le baʼaloʼob ku yaʼalaʼal tu contra u testigoʼob Jéeobaoʼ?

¹⁶ ¿Baʼax jeʼel u yáantkoʼon utiaʼal maʼ k-tʼóochpajleʼ? Unaj k-ilik wa jach jaaj le baʼaxoʼob ku yaʼalaʼal tu contra u testigoʼob Jéeobaoʼ. Jesúseʼ tu yaʼaleʼ yaan u yaʼalaʼal baʼaloʼob maʼ jaajtak tu contra u discípuloʼobiʼ (Mat. 5:11). Chéen baʼaleʼ le tuusoʼobaʼ tiʼ Satanás u taal, letiʼ péeksik le máaxoʼob pʼekmiloʼon utiaʼal u yaʼalikoʼob baʼaloʼob maʼ jaajtak t-contraiʼ (Apo. 12:9, 10). Toʼoneʼ maʼ unaj k-creertik le tuusoʼobaʼ, maʼ unaj k-sajaktaliʼ yéetel maʼ unaj k-náachtal tiʼ Diosiʼ (xok 1 Juan 4:1).

17. ¿Baʼax wal tu tuklaj jujuntúul máakoʼob il baʼax beetaʼab tiʼ Jesúseʼ?

¹⁷ Jesúseʼ traicionartaʼab tumen juntúul tiʼ u 12 apóstoloʼob. Uláakʼ juntúuleʼ óoxtéen tu yaʼalaj maʼ u kʼaj óoliʼ, tsʼoʼoleʼ le u maasiloʼoboʼ tu xúumpʼattoʼob le áakʼab táanil tiʼ u kíimsaʼaloʼ (Mat. 26:14-16, 47, 56, 75). Chéen baʼaleʼ Jesúseʼ maʼ jelaʼan tu yilil lelaʼ tumen u yaʼalmiliʼ bey kun úuchloʼ (Juan 6:64; 13:21, 26, 38; 16:32). Maʼ xaaneʼ yaan tiʼ le máaxoʼob il le baʼax úuchaʼ, tu tukloʼob waleʼ: «Le apóstoloʼoboʼ tu traicionartoʼob Jesús, le oʼolaleʼ teneʼ maʼ in kʼáat in wil mix baʼal tu yéeteloʼobiʼ».

18. ¿Baʼax profecíailoʼob béeychajoʼob antes tiʼ u kíimil Jesús?

¹⁸ ¿Baʼax ku yaʼalik le Bibliaoʼ? Antes tiʼ u taal Jesús way Luʼumeʼ Jéeobaeʼ u yaʼalmiliʼ yaan u traicionartaʼal le Mesías tu yoʼolal 30 u pʼéelal baʼaloʼob de plataoʼ (Zac. 11:12, 13). U yaʼalmiliʼ xaneʼ juntúul tiʼ u amigoʼob kun traicionartik (Sal. 41:9). Zacarías xaneʼ u tsʼíibtmaj: «Beet loob tiʼ le j-kanan tamanoʼ yéetel chaʼa u kʼiʼitpajal le tamanoʼoboʼ» (Zac. 13:7). Le máaxoʼob uts u puksiʼikʼaloʼob kaʼachoʼ yaan u muʼukʼaʼantal u fejoʼob le kéen u yiloʼob bix u béeychajal le profecíaʼob aʼalaʼan tu yoʼolal le Mesíasoʼ yéetel maʼ tun tʼóochpajloʼob.

19. ¿Baʼax u yojel le máaxoʼob uts u puksiʼikʼaloʼoboʼ?

¹⁹ ¿Bey wa xan u yúuchul bejlaʼeʼ? Beyoʼ. Jujuntúul u testigoʼob Jéeobaeʼ náachchajoʼob tiʼ letiʼeʼ ka suunajoʼob apóstatail. Letiʼobeʼ ku yilik u tuskoʼob uláakʼ Testigoʼob utiaʼal ka u beetoʼob xan beyoʼ. Tiʼ letiʼobeʼ ku meyaj Internet yéetel uláakʼ baʼaloʼob utiaʼal u yaʼalikoʼob baʼaloʼob maʼ jaajtakiʼ. Chéen baʼaleʼ le máaxoʼob uts u puksiʼikʼaloʼoboʼ maʼ tu chaʼik u tuʼusloʼob, tumen u yojloʼob le Bibliaoʼ u yaʼalmiliʼ yaan u  yantal máaxoʼob beetik baʼaloʼob beyaʼ (Mat. 24:24; 2 Ped. 2:18-22).

20. ¿Baʼax ken u yáantoʼon utiaʼal maʼ k-tuʼusul tumen le apóstataʼoboʼ? (2 Timoteo 4:4, 5).

²⁰ ¿Baʼax jeʼel u yáantkoʼon utiaʼal maʼ k-tʼóochpajleʼ? Kʼaʼabéet k-muʼukʼaʼankúuntik k-fe. Utiaʼal leloʼ unaj u suuktal k-xakʼalxook, k-orar yéetel k-tsʼáaik k-óol k-beet le meyaj u kʼubéentmajtoʼon Jéeobaoʼ (xok 2 Timoteo 4:4, 5). Wa muʼukʼaʼan k-fejeʼ maʼ ten k-creert le baʼaxoʼob maʼ jaajtak ku yaʼalik le máaxoʼob tsʼoʼok u náachtaloʼob tiʼ Jéeobaoʼ (Isa. 28:16). Le yaabilaj k-uʼuyik tu yoʼolal Jéeoba, tu yoʼolal le Biblia yéetel tu yoʼolal le sukuʼunoʼoboʼ le kun áantkoʼon utiaʼal maʼ k-tuʼusul tumen le apóstataʼoboʼ.

21. ¿Baʼax tsʼoʼok u chʼaʼtuklik u beetik yaʼab máakoʼob teʼ kʼiinoʼobaʼ?

²¹ Úuchjeakileʼ yaʼab máaxoʼob maʼ tu kʼamoʼob Jesús bey le Mesíasoʼ. Chéen baʼaleʼ yanchaj xan máakoʼob tu kʼamoʼob Jesús. Ichiloʼobeʼ yanchaj kex juntúul tiʼ le máaxoʼob táakaʼanoʼob teʼ Sanedrínoʼ bey xan «yaʼabkach sacerdoteʼob» (Hech. 6:7; Mat. 27:57-60; Mar. 15:43). Bejlaʼaʼ xaneʼ u millonesil máakoʼob tsʼoʼok u chʼaʼtuklikoʼob u creerkoʼob le baʼaxoʼob tu kaʼansaj Jesúsoʼ. ¿Baʼaxten? Tumen u yaabiltmoʼob le baʼaxoʼob ku yaʼalik le Bibliaoʼ. U Tʼaan Dioseʼ ku yaʼalik: «Jach yaan jeetsʼelil tiʼ le máaxoʼob u yaabiltmoʼob a leyoʼ, mix baʼal jeʼel u beetik u tʼóochpajloʼobeʼ» (Sal. 119:165).